識行啦！

其實自十二月頭,人仔已經可以戰戰兢兢咁行倒兩步,不過佢一路都好細膽唔敢行。十二月中去 Bay Area 個親戚屋企時佢行多咗,可能係因為親戚屋企用地毯, traction 大 D, 跌又冇咁痛。不過返到屋企都係好少自己行,最多都係推部車仔。前幾日天氣暖,晌屋企我冇幫佢著襪,腳仔冇咁滑,就係咁佢行多咗,可以行倒半條走廊！

呢幾日佢行咗好多!星期六去個朋友屋企,佢周圍行,琴日出街都有落地行。我望住老公拖住佢行,覺得佢真係大個仔啦！

學用匙羹

大約兩星期前開始積極教人仔用匙羹食嘢,不過人仔既為食,又心急,要教佢慢慢用匙羹食,真係唔容易。好多時食兩食就用手食,一唔比佢用手,就即刻兩行眼淚發脾氣!佢又唔鐘意我足住佢隻手。咁我又唔想迫到佢咁可憐,所以有時我都比佢自由發揮,由得佢用手食,用手玩,比佢探索吓。

又出手,當枝匙羹冇到!

匙羹初期,應比 D 容易"不"㗎食物比佢試。乳酪係唔錯㗎選擇。人仔都幾肯用匙羹食乳酪,會不停將匙羹放入杯乳酪入面,然後放入口。當然,佢食得非常 messy! 張枱同圍巾仲食得多過佢！哈哈!有次我由佢自由發揮,食食吓佢用咗手食,我見佢食得好滋味,所以我比佢用手食晒!

其他唔錯㗎"練習食物"包括杰粥,薯溶,香溶加奶,米糊等等。人仔依家開始有用匙羹㗎意識,可以用匙羹食晒一碗食物,當然我有幫佢(係每一啖都要幫 :p )而且食完要清潔一輪,不過我相信呢個係必經階段,除非我想餵到佢三,四歲啦！

白汁雞皇飯

唔知點解今日好想食白汁焗飯,於是整咗個白汁雞皇飯。個白汁自己煮,一湯匙牛油煮溶,加一湯匙麵粉煮匀,然後加一杯奶,慢慢煮到杰杰地,跟住加調未芝士等。自己整白汁都好簡單,好過用罐頭湯,太多 sodium。

十三個月啦！

有人話一歲之後學嘢好快,變得好快,我又唔覺得人仔變咗好多,可能因為我日日對住佢啦!哈哈!

瞓:
日間依舊兩次小睡,十點同三點,半個鐘至個半鐘。夜晚就七點幾同佢沖涼飲奶瞓覺。想轉個 bedtime routine,飲咗奶至沖涼講故仔瞓覺,不過扭得太勁,又喊得好慘。亦試過埋身餵,但又唔想餵到佢瞓著,結果又係喊爆咁瞓。所以依家都係用樽餵。佢有時飲 4,5 安就唔飲,轆兩轆瞓著。

食:
一早一晚媽奶。諗過同佢誡,不過有指引話可以餵到兩歲,所以依家依然朝早比佢埋身食吓奶,夜晚就泵一次。三餐加一至兩次小食。可以食碎㗎大人嘢,不過晌屋企就多數都分開煮比佢。今個月出多咗街又有去旅行,所以試多咗好多嘢。之前驚敏感㗎芝士同青豆都証實冇事。新食物包括:
甜椒, 粟米, 津白, 磨菇, 士多啤梨, 烏冬麵, 牛奶, 藍莓, 乳酪, 豆腐, 黑莓, 合拿瓜,西芹, 龍利柳, 紅腰豆, 橙

終於識食 finger food,依家食 cheerios 食得好快!教緊佢用匙羹,不過佢玩支羹多,跟住佢又做返"印度人"用手食,唔鐘意食㗎嘢仲會掉落地!

活動:
企得好好,但仲係唔係好夠膽行。呢兩日暖,所以晌屋企冇比佢著,就可以行多幾步。拖住就可以行晒成條走廊。好鐘意推佢㗎車。可以由企慢慢坐下。近來亦好鐘意攬住我對腳,好得意!

溝通:
好鐘意指住 D 嘢 ee ar ar 叫。會指住 D 嘢示意我比佢。成日比嘢人。同佢睇書,一見倒車就好興奮係咁指係咁叫。佢一指住 D 嘢我就會講樣係咩,有時會做埋手語,不過佢都係未識。開始冇咁怕生人,肯比人抱。

贏在起跑線

最近睇咗星期二檔案其中一集:贏在起跑線。內容係關於幾個家庭點幫仔女部署報考幼稚園。有人幫仔仔報咗三十間幼稚園,一日去三場面試;有人為咗幫仔仔預備報考而 quit 咗份工;有人報面試班,自己又去上報考攻略班。

睇完個節目之後,我有一個疑問,點解依家讀個幼稚園都攪到咁大壓力?家長辛苦,小朋友又辛苦。其實我相信 D 家長都唔想咁辛苦,更唔想比壓力個小朋友。就好似節目入面有個家長帶個仔去面試就同佢講話係去同老師"玩"。但當個小朋友見到媽媽好緊張咁截的士,又成日叫佢加油努力,我諗個小朋友會sense 倒唔係玩吓咁簡單。而且見幼稚園都已經咁緊張,要贏要谷,遲 D 入小學,中學,咪不得了?

節目中我覺得最誇張㗎係幫個兩歲㗎小朋友做 resume。可以有咩寫?唔通個個都要爭住去爬行比賽,推尿片比賽?依家唔單止幾歲架人仔上幾個興趣班,補習班,連幾個月㗎 BB 都有 playgroup,遲 D 唔知會唔會有 D 專門"培訓" BB 參加爬行比賽㗎興趣班呢？就算真係贏好多比賽,咁又代表 D 咩？可能只係代表家長好勝㗎心態。

有一位家長話依家考幼稚園,攪到要 D 兩歲㗎小朋友識 D 四歲㗎嘢。點解要苖助長?小朋友唔係應該日日食玩瞓㗎咩？咁快識咁多嘢,但失去童真快樂,值得嗎？

有家長為咗預備個仔入幼稚園而 quit 咗份工。如果 quit, 係因為想倍多 D 個仔,等佢開心成長, 咁係件好事。但如果個動機係想倍佢多 D 等佢叻 D 考倒間好 D 㗎幼稚園,咁就有 D 問題。

個節目講咗三個家長吹谷,之後小朋友有 offer 㗎例子,令人睇完之後覺得好似真係要谷吓至得。其實,我有興趣想睇吓唔谷又入倒學校㗎例子。好想睇吓一 D 正面 D 㗎個案!

其實我相信每位家長都想孩子開開心心冇壓力咁過,但又驚太 hea 小朋友會立足唔倒。老實講,如果我係晌香港,我諗我都會有咁㗎矛盾,可能都會成為"怪獸家長"㗎一份子!哈哈!希望呢個贏在起跑線㗎風氣唔好持續,否則大家都會輸在終點線。

擠花曲奇 (附食譜)

之前試整過,唔成功,今次用第二個食譜再試。

材料:
牛油 1 杯
糖 半杯
蛋 1 隻
雲利拿油 1 茶匙
麵粉 2杯

造法:
1, 牛油放室溫回暖。
2, 牛油同糖打至軟滑。
3, 慢慢加入蛋及雲利拿油。
4, 分次加入麵粉。
5, 將麵團放入擠袋,擠出花形曲奇。
6, 放入已預熱 350F 焗爐焗 15 分鐘。

椰絲波波

前幾日隔離屋送咗一大罐 pop corn 比我地做聖誕禮物,咁我地都應該要回禮嘅。所以我整咗個之前造過一次㗎椰絲波波。上次太甜,所以今次減糖,再加少少朱古力上去,整靚 D。

今次份量係一包椰絲 (7oz), 1/4 杯糖,兩隻蛋白。325F 焗25分鐘。簡單容易!

啤梨啤梨汁

週末去個親戚度住,佢朝朝早都用幾種水果蔬菜再加少少乳酪整幾大杯 smoothie。飲一杯就食倒唔同㗎水果蔬菜,幾健康呀！而且自己整,可以唔落糖,比起街買 D 更健康更啱口味。

屋企有 set magic bullet,之前成日用嚟整人仔㗎 mum mum.  細細部,好方便,可以用嚟整果汁呀。今朝未買餸,得啤梨同之前雪落㗎士多啤梨。整咗杯,又唔錯喎！

衝出 LA 預備篇

帶住個一歲㗎人仔一定多嘢攞,所以我地選擇揸車去唔太遠㗎 Bay Area.

人人都話 Bay Area 好凍,雖然我地唔會週街行,但係我都帶定 D 厚衫厚褸,有好過冇嘛！ (不過其實都唔係咁凍,因為我地去幾日暖返,而且點凍,都唔及我以前住㗎地方凍!)只係人仔㗎衫褲鞋襪尿片睡袋毛巾小玩具都用咗一個中喼。反而我同老公㗎衫就只係用個細喼。

瞓覺方面,我地就帶個 play pen 比佢瞓,等佢可以安全自己瞓。沖涼本來諗住帶個吹起沖涼盆,不過後來覺得可以比佢坐浴缸沖,所以就冇帶。另一樣大件嘢就係 stroller。我地問人借咗㗎 umbrella stroller, 咁就輕巧好多!

衝出 LA

四日三夜㗎 Bay Area 之旅大功告成!今次係第一次帶人仔去旅行,佢當然都有扭吓眼瞓,不過 overall 都算 ok. 我地今次去 Bay Area, 主要係探吓親戚朋友,行程都幾 hea。

星期五出發,星期一返。四日㗎行程,頭尾兩日大部分時間都係晌車入面。因為帶住人仔,加上塞車,原本由六個鐘㗎車程變咗八,九個鐘!

星期六早上晌親戚屋企食個早餐,跟住出去散步。度真係好舒服,好多人工湖同小徑,散步跑步踩單車都得。環境舒服得嚟,交通又好方便,五分鐘唔洗就出倒 freeway. 我都想住呢 D 地方!不過人要知足嘅,我依家住度都好好㗎啦！

午餐我地就同親戚 late lunch 飲茶。呢一餐我食得非常自在,因為我堂哥全程抱住人仔,仲餵埋佢食!估唔到人仔一 D 都冇扭計!食完返屋企途中,人仔瞓咗,於是我地晌附近遊吓車河,之後就去下一個食飯地方,又食!晚餐係同我㗎中學同學食。大家畢業之後都冇乜點見,好開心可以又眾一眾!大家都做咗媽媽/準媽媽,好開心呢！可惜人仔有少少扭計,唔係就仲開心!今餐係人仔第一次食大人嘢！都 ok 喎!以後同佢出街就方便 D 啦！

星期日朝早老公去個朋友屋企攞 D 細路嘢。老公出咗去,人仔冇得晌車度 nap, 連 stroller 都冇,結果佢瞓唔倒,扭計到爆,要到我地出去食午餐時佢至晌車度瞓倒。點知我地去到佢仲一路瞓。結果只係老公同佢朋友食飯,我就晌車度陪瞓,直至佢地食完佢至醒。我就唯有晌車度食外賣仲要一邊餵人仔。。。因為我地要去揾個視光師朋友幫我地驗眼。去到疹所,我地攪咗好耐,人仔又扭計又瞓唔倒。我地五點幾走時人仔至晌車度瞓。之後我地同親戚食飯。人仔又一直瞓。今次到老公陪瞓,我去食飯。。。好在老公之後約咗朋友,所以佢之後至同朋友出去食。人仔瞓到我地返到屋企,我唯有整醒佢餵佢食飯,費事佢半夜醒,我就唔知餵佢好唔餵佢好。佢食完同佢玩吓,之後同佢沖涼瞓覺,佢又瞓倒喎,瞓到第二朝五點幾。

星期一,我地食完早餐,傾吓計,跟住就執嘢走啦。差不多十一點至出車,中途食咗個午餐。旁晚人仔又扭計,我地就停咗一陣去行吓至再上路。七點幾返到屋企。

好開心可以同人仔去旅行!雖然要帶多好多嘢,佢又有 d 扭計,不過都算好順利!有咗今次經驗,下次可以去遠 D 啦！

去完我至發覺我地有乜影相。。。

終於。。。識食 finger food!

人仔一直都唔識自己用手攞嘢食,先排仲識餵人但係就唔識餵自己。今個週未經過"特訓"之後,佢終於都識用手食嘢啦!依家早餐同小食都會比佢自己食,正餐會教佢用匙羹,或者比佢用手食。我冇時間或出街就餵返。

佢識自己食之後,開始睇倒佢鐘意食咩。最鐘意係食 cheerios ,食得好快。麵包,提子都鐘意。芝士就麻麻地,會攞晒出個碗,或者餵我食!不過餵佢佢都會照食!切咗粒㗎蔬菜都會自己攞手食。

識得用手食之後,就成日放嘢入口。同佢去超市佢攞起成個橙想放入口。最攪笑嘅係,佢有次雙手攞住成條香蕉,好似飲奶咁想成條放入口!

用匙羹方面,都係要我幫佢"畢"起食物,然後佢可以攞住枝羹放入口,不過通常都食唔倒,要我再幫幫!

終於成功~奶白色魚湯!

成日聽人講煲魚湯想煲到白色好易。煎香條魚,倒滾水落去,滾一輪, D 湯就會奶白色。

原來真係咁簡單,但我都失敗咗幾次至得。。。有一次因為水唔夠滾,另一次水夠滾但我好快就落咗其他料令水温急降。。。

失敗乃成功之母。衰咗揾原因,下次改正,今次終於得咗,特別開心!

不愛 shopping

我諗我係少數唔 enjoy shopping 㗎女士。呢幾日為咗要買幾份禮物比親戚,攪到我要成日 shopping. 我本身都唔係好鐘意行街㗎啦,仲要係買嘢比 D 唔太熟㗎親戚,加上要帶住個人仔。。。令我更加唔享受。好在人仔都好合作,冇咩點扭計。不過我一諗起唔知買咩就頭痛。。。唔知佢地鐘意咩,又唔知佢地需要咩,唔想買太貴,但又唔可以咁 cheap... 買 gift cards 會唔會好冇誠意呢？

甜脆乾果 (附食譜)

我諗住整 D 小食送比 D 親戚。晌呢 D 湊 B 的日子,最好當然係整 D 容易,快捷,好味又唔多會失敗㗎嘢啦！繼上次個椰絲波波之後,我揾倒呢個甜脆乾果食譜。今日整盆試試先!

奇蹟！自然入睡!

人仔自出世就瞓得唔好,唔識自己瞓,又醒瞓。經過訓練之後已經好好多,不過夜晚轉,都係要食奶食到差唔多瞓著至瞓倒,一係就要放佢落床等佢喊兩喊然後瞓。

今晚佢又如常食奶準備瞓。食完都未瞓著,咁我就同佢晌床度轆吓,又細細聲唱吓瞓覺歌,點知佢又瞓唔倒喎。於是我抱佢一抱,攬一攬,say goodnight,然後放佢落床,心諗佢實會喊,點知佢又冇喊喎。咁多就熄燈,留晌房度一陣,佢 er 咗兩 er, 冇幾耐就自己瞓咗！間直係奇蹟!希望佢以後都可以自己瞓！

甩底士多啤梨慕斯日蛋糕 (附食譜)

上星期三,四都有朋友嚟食飯兼慶祝人仔生日。我見有士多啤梨賣,所以買定 D 嚟做 mousse cake. 星期三一直忙到下午五點幾至得閑,心大心細唔知整唔整個蛋糕,最後都決定整!

其實時間都夠嘅,不過自己心急,加上唔知人仔會唔會"合作"乖乖自己玩,所以個餅底整得唔好,又冇整餅面妝飾。好在 D mousse 整得唔錯。今次用部 magic bullet 嚟整果溶,快靚正!

孩子的成功來自媽媽1%的改變閱後感~2

繼續閱書報告。上回講到要培養孩子㗎基本功。。。

6. 交流力:唔好只係要求孩子乖乖聽話,要鼓勵佢地發表自己意見。有時,佢問你問題,你可以反問"你覺得呢？"當然,孩子發言時,父母要留心聽啦。

7. 英語力(外語力):學習外語,不外乎係要多聽,多睇,多講,將語言融入生活。小朋友學習語言能力高,所以要把握時機。

8. 經濟力:要孩子懂得節省,也要懂得有效率地運用金錢。當佢地大 D 㗎時候,可讓佢地參與計劃屋企洗費。亦可以比零用錢佢地,要佢地自己計劃自己㗎洗費。

9. 自制力:願意做不太喜歡但又需要完成㗎事。培養佢地唔會三分鐘熱度。孩子細㗎時候可以要求佢地晌一定時間自己做一件鐘意㗎嘢,例如晌書枱上畫畫五分鐘,令佢地學習專心做一件事。可以慢慢加長時間,繼而請佢地做一 D 佢地冇咁鐘意做㗎嘢。做完可以獎佢做鐘意㗎嘢,令佢地學習忍耐同専注。

要培養孩子呢 D 基功真係唔容易,我相信要花好多時間同心機。而且媽媽自己都要有呢 D 基本功。好似自制力咁,如果要求孩子要做完功課至玩電腦,但係自己又成日掛住上網唔做家務,咁孩子又點會聽你講!睇嚟我要訓練吓自己㗎基本功至得!因為其中有幾點,我真係好缺乏,例如交流力,我覺得自己成日都冇意見,冇感想,又唔識表達。希望寫吓卜會有幫助啦！

牛油曲奇/ 擠花曲奇(附食譜)

我真係冇記性!自己買咗一牛油唔記得咗,前幾日買餸時見減價又買多咗盒返嚟,攪到屋企依家有兩盒未開㗎牛油,仲有一盒開咗嘅！咁多牛油,就攞嚟整吓餅啦！

本來想整個擠花曲奇,點知個麵團太杰,擠唔倒,唯有卷起佢,雪一陣,然後切開一片片焗。。。有機會的話,我要再試,希望整倒擠花曲奇。

呢隻牛油曲奇牛油味唔係太濃,冇咁好味,不過感覺健康 D!

材料:
無鹽牛油 70g
糖粉 50g
蛋液30g
低筋麵粉 90g
粟粉30g
鹽 少許

造法:
1. 將牛油放在室溫回暖,粉類過篩。
2. 將牛油打至乳霜狀。
3. 加入糖再打發。
4. 分次加入蛋液打匀。
5. 分次加入粉類拌勻。
6. 將麵團搓成條狀,雪至硬身,然後切片。
7. 放入已預熱 350F 的焗爐焗 18-20 分鐘。

牛奶棒 (附食譜)

每次睇 Carol 個 blog,就會見倒有好多嘢想試造。呢個牛奶棒係其中一個。今日有少少時間,試吓造先!

原食譜係用煉乳造,亦附加咗一個用奶粉㗎造法。屋企有 D 奶粉要用埋佢,啱晒!

材料:
低筋麵粉 100g
糖 30g
鹽 少許
油 25g
牛奶 30g
奶粉 20g

造法:
1. 將麵粉,糖,鹽,奶粉拌勻。
2. 加入油,牛奶,拌勻。
3. 搌平,放入雪櫃30分鐘。
4. 將麵皮分割成一條條。
5. 放入已預熱200F 的焗爐焗18-20 分鐘。

一歲啦！

人仔話咁快就一歲啦!我諗每一個媽媽見到自己仔女一歲時,㗎感覺都會係:"話,咁就一年啦！"
真係難以想像,依家識玩識笑識企識坐㗎人仔,一年前仲晌我個肚裡面,準備出嚟！

又係時候記錄吓佢㗎進展:
瞓:
叻咗!依家冇咁醒瞓,醒咗會自己瞓返,不過有時依然會喊爆!每日 nap 兩次,十點同三點,每次九個字至個令鐘。試過擺佢上 swing 度,佢喊一陣,跟住瞓咗。不過多數都係比佢晌車或 stroller 度瞓。夜晚七點幾同佢沖涼飲奶瞓覺,通常佢轆兩轆,八點前就瞓著。

食:
一日三餐加兩餐奶。可以食爛飯同粒狀食物。今個月試過㗎新食物有:
蜜棗,白菜,青豆(懷疑敏感),蛋黃,洋蔥,矮瓜,西蘭花,番薯
有人比咗 D 芝士佢食,當時我唔知,只係夜晚見人仔皮膚有紅色一撻撻,唔知佢係咪敏感?
雖然我日日都比 D cheerios 佢等佢學自己食,但佢都係唔識。。。反而識得餵人食。。。 奇怪。。。

活動:可以自己企倒一陣,仲行倒幾步,不過一扶佢行,佢就好快坐低,跟住就爬。屋企有兩級樓梯,我日日都教佢爬,爬上就好快,但係佢未識爬落。。。最鐘意係玩車同用轆㗎嘢,比幾個筒佢就可以自己玩一輪。識得揭書,未識入圖形(開始有興趣),未識入圈圈。有用 pincer grasp, 右手靈活過左手。

溝通:成日 ee oo, 好多嘢講,有時仲識得跟我講"mum mum",又試過一朝發個音好似講"早晨"!依然唔識 baby sign... 我覺得可能到佢識講都未學識。。。
依家講"no"佢會明,有時仲會試你!好攪笑!希望遲 D 唔好比佢激 c

好多人都話一歲之後好多嘢會突然開竅,唔知人仔又會唔會係咁呢？

chocolate covered chips

某薯片製造商晌 holiday season 推出 chocolate covered potato chips. 老公見到個廣告極之興奮。薯片推出之後我即刻去買,點知要成三個幾美金至得一細包,非常唔低,所以冇買。

某日,我突然諗到"點解唔自己整呢？"於是,我今日走去買朱古力同薯片試吓整。

我好衰唔衰,買咗筒碎薯片。。。 算啦,都係自己人食啫。。。

我之前整過 chocolate covered pretzels, 但係失敗咗, D 朱古力第二日"生粒粒"。。。 之後至知原來用邊隻朱古力同溶朱古力係一大學問。自從次之後,我都冇整過要溶朱古力至整倒㗎食物。今次本來想買專係比人用嚟整 chocolate covered 㗎朱古力,但係貴好多,所以最後都係買 chocolate chips, 因為好多食譜都只係用 chocolate chips. 今次溶朱古力溶得好小心,希望聽日佢地唔會"生粒粒"!

椰絲波波 (附食譜)

遲 D 我會去探一 D 親身朋友,我想送少少嘢比佢地。同佢地唔算好熟,所以都唔知送咩好。買嘢又驚唔啱心水,送 gift card 又好似冇咩誠意。於是就諗起不如整少少嘢送比佢地啦。

上網睇吓有咩 idea, 見倒呢個椰絲波波好似幾簡單,又幾有冬天㗎感覺,等我試吓整先。

工作後感

今日又有得"放假"啦,即係返工!返工對我嚟講好重要,可以令我生活平衡 D ,唔洗成日都係做屋企嘢。如果可以返多少少就好啦！

兩個星期冇返,一返到去個感覺就係要轉 gear, 將平時個 hea mode 轉做作戰 mode! 今日返工都幾攰,因為好多病人要睇。今日㗎怪現象係我個 caseload 入面,深切治療部㗎病人行得多過普通病房㗎病人!好多時,晌心切治療部㗎病人最多都只可以坐晌床邊,但今日我幾個病人都行倒,仲要行得幾遠!反而有幾個手術後普通病房㗎病人坐都坐唔倒起身。所以每朝見倒自己個 caseload㗎時候,係唔可以完全估計倒當日㗎工作會係點。我覺得呢個係醫療工作有趣亦係有挑戰之處!

放工返到屋企,人仔有 D 扭,老公又趕住走,所以我要拿拿淋沖個涼,跟住就要"處理"人仔。餵食,陪玩,沖涼,瞓覺。佢瞓咗之後我仲有一大堆嘢要執要洗。依家總算可以鬆一口氣。不過其實屋企要執要洗嘅仲有大把,但我決定隻眼開隻眼閉,上網鬆一鬆,今晚早 D 瞓,聽日至再做過!

豬肉乾

好耐之前見倒有豬肉乾食譜,好似好容易,成日都想試,不過一直冇試。今日終於的起心肝,煮飯時挆多少少豬肉,用嚟整豬肉乾。原來真係幾簡單,當然要整得好就要試多幾次攞吓經驗啦。

今次我用生抽,魚露,糖,再加少少紹酒嚟醃。份量冇正式度,只係比平時醃肉重手 D。醃咗兩個鐘,跟住放上牛油紙,上面蓋上保鮮紙然後轆平佢。用 350F 焗爐焗 15 分鐘,反轉再焗 15 分鐘。攞出嚟放涼之後就可以剪細佢。其實應該要再焗耐少少,同可以加蜜糖再焗。下次試吓先!

餵媽媽

好多 BB 7,8 個月大已經識自己食 finger food, 但係唔知點解,人仔唔識。人仔開始食 solid 時我冇刻意比佢試,到佢九個幾月大,我就開始比 D cheerios 佢。我餵佢,佢會張開口。但當我放粒 cheerios 落佢張枱時,佢唔估嘗試放粒 cheerios 入口,佢只會用手指玩粒嘢。當我攞起同一粒 cheerios 時,佢又會張開口要食喎！

日日都試吓要佢自己食,又示範,又捉住佢手仔,佢都係唔識。不過我相信佢大大吓自然識。今日,我又比 D cheerios 佢食,又如常咁放 D 晌佢張枱。佢攞住一粒,申隻手向住我,咁我咪開口扮想食囉。點知佢真係將粒 cheerio 放入我個口度!成功咗仲好開心,之後又餵咗我幾粒!估唔到佢未識自己食就識餵人食!哈哈!

當時得我一個同佢,但我都好想影低佢,所以我就試吓自己拍。拍倒段佢用左手餵,唔成功。停機之後佢用右手餵,即成功!

燕麥果仁脆餅(附食譜)

又試咗一個用燕麥整㗎餅。今次呢係硬硬脆脆嘅,唔係人人鐘意,但我就好鐘意,而且容易整所以焗咗一盆之後再 encore 多一盆!

材料:
燕麥100g
麵粉60g
糖45g
鹽1/8茶匙
牛奶3湯匙
油3湯匙

造法:
1. 將所有乾材料拌勻。
2. 加入牛奶及油,拌勻。
3. 取出適量麵團在手中緊捏成球狀。(個麵團有 D 痴,所以我加多咗少少麵粉)
4. 放在焗盆上壓扁。
5. 放入已預熱300F 的焗爐焗25分鐘。
6. 再以 300F 焗 5 分鐘至表面金黃。

香茅焗雞脾

突然想食香茅整㗎餸,所以前幾日買咗幾枝返嚟。今日攞嚟焗雞脾。焗嘢真係好方便,預早醃定,跟住幾時放入焗爐都得,焗熟之後熄火,要食時再焗返熱就得。

今次用咗香茅碎,魚露,蒜頭醃,焗到最後加少少蜜糖。又香又好味,仲好易整!

難 gag 兒歌

前兩日同個朋友傾計,佢話香港依家有幼稚園教小朋友唱 D "難 gag" 兒歌。例如有首歌其中兩句歌詞係"我有兩個哥哥,一個係鼻哥,一個係膝頭哥。我有兩個公公,一個係手指公一個係腳趾公。"另外又有首歌其中有句歌詞係"排個靚隊先。。。"

唱 D 咁㗎歌又點學好中文呢？

藉口 (附炸魚柳食譜)

某日,老公提到 fish and chips, 問我識唔識整。我未整過,但佢咁提起,攪到我心郁郁想整。於是我買咗包魚柳,又上網揾食譜。揾倒個冇用 beer 㗎食譜。琴日試整,用半煎炸㗎方法,因為想慳少少油。點知有人扭計,令我唔可以專心/煎炸魚,攪到 D 魚肉肉酸酸咁。。。不過味道係可以嘅。。。

跑步紀錄

買咗部跑步車之後,暫時跑咗五次。

第一次:出門時至發現㗎 stroller 都幾大架,摺埋仲要拆轆至放倒入車尾箱。揸揸吓車至醒起冇幫人仔換片,所以攪到要去公園換。公園冇換片地方,好在人仔冇便便,唔係實換到一身便。。。跑跑吓佢扭眼瞓。於是我餵幾安奶比佢,希望佢瞓倒,點知唔得,結果要走人,等佢晌車度瞓。。。第一次都係試吓車,同睇環境,行多過跑。

第二次:都係去公園。今次跑/行咗一圈,人仔就開始扭。。。 於是停底同佢玩吓滑梯。點知都係扭。。。所以好快走咗。我覺得佢坐得唔舒服,因為公園彎路多,而架 stroller 前轆係冇得轉嘅,咁轉彎就要㩒低車尾令前轆升起。成日咁上上落落,人仔點會舒服吖。。。

"孩子的成功來自媽媽1%的改變"閱後感~1

前幾日同人仔去圖書館,順便睇吓 D 大人書。(估唔到我都有時間睇吓書!)呢度個圖書館有幾個書架有中文書,選擇唔多但都有唔少書想睇。今次借咗呢本"孩子的成功來自媽媽1%的改變"。

一路睇,我都覺得有 D 嘢幾有用,但係諗返轉頭又諗唔起。。。我諗我應該寫返少少 summary 同感想出嚟幫助我消化吓 D 內容,同幫助我記憶。原來以前返學做 D 閱讀報告係有用㗎。。。

本書首先提到要成功,唔一定要成績好(求學不是求分數!?)。要自細訓練佢一些基本功,咁對佢㗎未來至有幫助。

基本功:
1. 忍耐力:要訓練孩子有耐性,同肯做一 D 自己唔鐘意做但又需要完成㗎嘢。而且一開始,就要做到完成就唔可以半途而廢。

2. 思考力:要培養孩子㗎思考力。例如佢地提出一個問題,特別係 D 又深又冇一定答案 D, 好似神係咩,唔需要立刻答佢。可以同佢講話不如大家一齊揾吓答案,一星期後一齊討論。

3. 失敗力:要教導孩子失敗咗唔緊要,最重要係盡咗力,同埋要後失敗中學習。

綠茶慕斯 (附食譜)

琴晚洗咗 D 士多啤梨。老公見倒就問 D 士多啤梨係咪攞嚟整 mousse 㗎。我本來冇咁㗎打算,不過佢想食我當然會整啦,難得佢開口落 order! 點知後來佢一路讀書,一路食士多啤梨,食到冇晒。但係佢又想食 mousse 喎,咁我就提議整綠茶 mousse 。其實係我自己想整又想食!!哈哈!

上網揾食譜,想揾個冇用蛋同簡單 D 嘅,不過揾唔倒啱心水,結果嘗試用之前檸檬慕斯個食譜,改一吓,變成綠茶慕斯。

青豆敏感?

前幾日人仔面面又有 D紅,夜晚瞓覺又扭多咗計。我懷疑佢又出牙仔。因為之前出牙佢又係咁。但係我又見唔倒有牙冒出嚟喎。之後諗諗吓就醒起我前幾日比佢試㗎新食物係青豆,唔通佢對青豆敏感?但係佢食其他豆又冇嘢喎。

之後上網睇睇,原來青豆敏感都唔係罕見㗎,而且對青豆敏感唔等於對其他豆都敏感。有 D 細路對青豆敏感之外仲對花生敏感。唉,希望佢唔好對咁多嘢敏感啦。不過依家好多小朋友都有敏感。有一次我晌教會睇小朋友主日學玩遊戲,老師叫佢地自我介紹時講吓自己對咩敏感。差不多個個都對某 D 嘢敏感。敏感真係好普遍呀！

琴日冇比青豆佢食,面仔再冇紅啦,不過夜晚都有扭,究竟點解呢？

雪梨雪耳糖水

某日揾倒屋企有 D 雪耳,剛好買咗 D 雪梨,咁就煲個雪梨雪耳糖水潤吓啦!兩個雪梨半個雪耳少少冰糖,話咁快煲好!秋天真係要潤一潤!

香草餅乾(附食譜)

琴日無意見倒個香草餅乾食譜,好似幾簡單喎,屋企又有晒材料,所以今日就開工先!

材料:
麵粉 100g
依士 3g
温水 30g (搓時覺得唔夠水,所以邊搓邊加水)
鹽 1茶匙
菜油/牛油(溶液) 15g
香草

造法:
1. 所有材料拌勻,搓成麵團。
2. 包上保鮮紙,靜置半小時。

焗雞扮炸雞

今朝打算整雞脾做晚餐,於是我問老公想食咩雞脾。佢答我:"炸雞脾。"

炸雞脾又熱氣又要用好多油,晌屋企唔想整 D 咁㗎嘢喎。。。

其實我諗佢只係講吓笑,不過我又好認真咁上網睇吓可以用咩方法用焗爐整"炸雞脾"。

原來都有好多造法㗎！其中一個係將 D 雞放晌個架上面焗,咁成隻脾/翼就會脆啦！不過我屋企冇呢 D 架,同埋我唔係好想洗個架囉。。。

失敗了的韭菜煎餅

包水餃用剩咗 D 韭菜,於是搵咗個韭菜煎餅㗎食譜試吓整。其實應該唔難整,但係唔知點解我煎極都唔金黃。一開頭太大火,所以燶咗少少。之後又太細火所以煎極都未得。之後較返大少少火,都煎好耐。煎煎吓我仲走咗去餵仔食 mum mum。佢食完塊餅都未金黃。而且有 D 地方太厚。。。。

粟米雞肉餃子

今日繼續包餃子,因為想用晒 D 餃子皮。今次整粟米雞肉餃子,因為我鐘意食粟米!哈哈!

韭菜豬肉餃子

今日買餸時突然想包餃子,所以買咗包餃子皮同韭菜。返到屋企時人仔肯乖乖自己玩,咁我就開工啦！我發現今次係我第一次自己包餃子,整個普普通通㗎韭菜豬肉餃子,我仲加咗少少蝦同雲耳,希望好食㗎！

整完放入冰格,隨時可以攞嚟食啦！仲有餃子皮剩,下次包咩好呢？

焗薯仔脆片 (附食譜)

某人話屋企冇咩零食,所以呢兩日去買餸都買咗少少薯片餅乾。今日仲整咗個杏仁豆腐同焗薯仔脆片。

個薯仔脆片又係晌 Carol 個 blog 度見倒。一見就好想試整。今次係第二次整。上次 D 薯溶比較濕,又焗得唔夠耐,所以 D 薯片唔脆,第二日仲 "un" 晒添,所以我都唔比老公食,自己食晒。

今次個薯溶整得冇咁濕,又焗耐 D,確保佢地乾脆,真係好食好多!下次再整試吓再整薄 D 應該會仲好食!

終於。。。買咗㗎 jogging stroller!

最近,真係越來越想跑返步。一來,老公耐唔中,都會叫我要跑步, keep 返 fit。二來呢排見倒好多朋友跑5k 10k 全馬 半馬 㗎相,攪到我又想跑。依家跑步,冇以前咁方便,換件衫,著對跑鞋就出去跑。我要跑步的話,就要揾部跑步 stroller,仲要揾個安全 D 㗎地方跑。

呢排,我同老公都不時上 craigslist 睇吓有冇 D 平靚正㗎二手 jogging stroller. 上craigslist 買嘢絶對係我老公㗎強項。屋企有唔少家私都係佢晌 craigslist 度揾返嚟,全部都平靚正,有時佢買咗 D 嘢返嚟,發覺唔係咁啱用,仲會以高 D 㗎價錢賣返出去!

今次買 stroller, 我都有睇吓,不過當然唔夠佢快!今朝起身,就見倒㗎又型又新㗎 jogging stroller 晌 patio,真係好 surprise 呀！我可以去跑步啦！雖然我依家極 decondition, 不過我又唔係去比賽,做吓運動啫,唔洗理幾快,最緊要係安全同健康!

羅漢果雪梨水

人仔仲有幾聲咳,又有啖,所以我煲咗個羅漢果雪梨水,一家三口齊齊飲。其實佢只係飲好少,都係我地飲多!羅漢果化啖止咳,希望人仔飲完快 D 好啦！

粒粒蘋果小蛋糕 (附食譜)

某日見倒個蘋果 muffin 㗎食譜,發現係同我整開個士多啤梨食譜差不多,只係將士多啤梨轉做蘋果,同加玉桂粉。又幾好味喎！

材料:
1 1/2 杯麪粉
3/4 杯糖
1/2 茶匙鹽
2 茶匙發粉
1 茶匙玉桂粉
1/3 杯菜油
1 隻蛋
1/3 杯鮮奶
1 杯蘋果（切粒）

1, 預熱焗爐至350F。
2, 將麵粉、糖、鹽、發粉、玉桂粉拌勻。
3, 將菜油、蛋、奶拌勻加入麵粉混合物拌勻。
4, 加入蘋果。
5, 放入焗杯，焗25-30分鐘。

茄子不退色之秘

以前知道煮茄子唔想佢變啡色就要先用油炸佢咁煮出嚟㗎茄子就會好靚。出街食㗎茄子就係咁整,雖然好靚,但係好油淋淋,唔健康,所以好少晌街食。自己整當唔想用油炸,就惟有犧牲色相,茄子㗎色相,用健康 D 㗎整法,整到 D 茄子啡晒。。。

前幾日上網睇倒個方法唔洗油炸,都可以保存茄子㗎紫色,就係將茄子炒一炒之後蓋上蓋,焗幾分鐘,焗到佢熟,咁就得啦。為免焗得太耐而令茄子變色,切茄子時可以切得細 D,咁就快熟 D 啦。

無油燕麥餅乾 (附食譜)

呢個又係參巧 Carol 㗎食譜。我有 D 材料唔同,例如快熟麥片我冇,就改用屋企有嘅唔快熟隻。呢隻餅係硬嘅,因為冇落油。我見有 comment 話可以加 20 g 油令個餅鬆軟 D。唔想咁健康的話可以試試。

越大越激氣?

今朝上 FB 見到有個 friend 個 status 話比個十幾個月大㗎仔激 c. 跟住有 d comments 話大 d 仲激氣。有人仲話比個仔激到日日嘔血。。。

雖然依幾日我比人仔攪到冇覺好瞓(病咗冇計。。。)但其實佢都好乖。扭計時多數都係眼瞓(雖然攪佢瞓唔容易。。。),又肯晌 play pan 度玩,等我可以一路住佢一路做家務。

氣管炎。。。

呢幾日,又回復冇覺瞓㗎日子,因為人仔病咗。。。我就做"培瞓"專員,同佢晌書房瞓,等老公可以瞓得好少少。

星期六晚開始,人仔半夜咳醒幾次,聽得出佢好多啖,但係又咳唔出。有時又好似有點呼吸困難咁,攪到我驚驚地。日間又冇咩喎,只係間中咳兩聲,不過依然係好多啖,所以,我琴日帶咗佢去睇醫生, check 吓。平時 regular check up 都唔多洗等,琴日唔知做咩護士榜完重之後等咗好耐。。。

自製乳酸飲品

呢個又係睇 Carol 個 blog 學,唔睇唔知原來乳酸飲品係可以自己整。呢度 D 乳酸飲品唔平,至少三,四蚊一枝,又少減價,所以我冇買過(基本上依家除咗奶之外,都唔會買飲品)。

Carol 個食譜係用有糖㗎原味乳酪。我屋企得冇糖㗎原味乳酪,所以要加多 D 糖。Carol係用 cc做單位。我冇嘢度倒 cc, 所以convert 咗做 cup。我個食譜變成一杯乳酪加一杯糖煮溶,放涼後再加三湯匙檸檬汁。放入已消毒㗎玻璃樽,飲時稀釋四至五倍。可存放兩個月。

十一個月啦！

嘩!話咁快就十一個月大啦,仲有一個月就一歲啦!

瞓覺:
日間依然兩次 nap. 大約九點同三點。一係坐車或stroller 瞓,一係啜住瞓,間中會晌 swing 度瞓。至少要瞓一個鐘,唔係就扭扭扭!
夜晚通常七點幾就同佢沖涼,跟住食奶瞓覺,多數會喊幾聲,八點前瞓着。第二朝四五點醒,我會埋餵吓,未到六點就會放返佢上床,咁佢會瞓到七點幾,有時六點幾見佢都好醒咁就同佢起身。
半夜好少醒啦,最多都係醒一次!好嘢！

南瓜蘋果小蛋糕 (附食譜)

秋天係南瓜同蘋果當造㗎季節,所謂不時不食,整返個南瓜蘋果 muffin 先!整咗十八個,攞嚟派街坊！

滋味雞

有一次我請朋友嚟屋企食飯,整咗個快靚正㗎焗雞腿,有個朋友好鐘意食,仲幫個餸改名做"滋味雞"。呢個滋味雞真係好易整。只係是但落 D 調味,好似蒜鹽, seasoning salt, onion powder, onion powder, mixed herb 等等。由於次次都係是但落調味料,所以次次整出嚟個味都有少少唔同!不過都好味。

士多啤梨蛋糕 (附食譜)

天氣都開始涼啦,竟然仲有士多啤梨減價!即刻買咗三盒。可以整個士多啤梨蛋糕啦！以前都整過,好容易整。唔知點解,冇用咩特別材料,但整完放咗幾日都仲好鬆軟啊！今次老公識做啦,主動帶返工做早餐,仲讚好食!嘻嘻!

1 1/2 杯麪粉
3/4 杯糖
1/2 茶匙鹽
2 茶匙發粉
1/3 杯菜油
1 隻蛋
1/3 杯鮮奶
1 杯士多啤梨（切粒）

1, 預熱焗爐至350F。
2, 將麵粉、糖、鹽、發粉拌勻。
3, 將菜油、蛋、奶拌勻加入麵粉混合物拌勻。
4, 加入士多啤梨。
5, 放入焗盆，焗45-55分鐘。

六十里單車

星期六,老公參加咗一年一度㗎一百里單車籌款。個 event 係兩日,不過佢唔得閑,所以只踩一日,六十里。仲記得舊年我雖然大住肚,但係就好輕鬆咁去唔同㗎休息站等佢,好好玩!今年有隻人仔,所以我只係去 day 1 終點等佢。

初試爛飯

其實我依家餵生果已經試過一粒粒咁餵,所以我一路都想比人仔試食爛飯,但好多時煲煲吓加水,又加蔬菜,煲飯結果成為粥仔。今日終於整倒爛飯比佢啦！仲將蔬菜分開,等佢食真 D 菜味。 D 冬瓜只係切粒,冇整到溶。

蒸釀豆卜

唔記得幾時見倒個蒸釀豆卜㗎食譜,今日去買餸時見倒豆卜就諗起,即刻買返包豆卜返屋企整吓先!

又係一個幾易整㗎餸。將醃好㗎肉碎釀上揸咗少少生粉㗎豆卜上面蒸熟佢,然後淋個汁上去就得啦。個汁其實只係蠔油汁,如果仲有自己煲㗎清雞湯就好啦!

終於quit 了

終於 quit 咗其中一份工。

其實我一路都覺得唔需要做兩份咁類似㗎 per diem 工。只不過之前兩間都請,我覺得多個機會,又安排倒,返多 D仲有 bonus,咁咪做囉。

呢間醫院剛比人買咗,新高層決定星期日唔需要 PT, 話我可以改星期六返。咁我一向星期六都係返另一間,與其返兩間,不如我返一間返多個星期六算啦。而且論工作環境,論學嘢,論人工,論返工距離,都係星期六間好。咁就藉此機會quit 咗星期日呢間啦！

愛車男

愛車唔知係咪每個男士㗎天性呢。通常我地放人仔晌 high chair度,都會比 D 嘢佢玩。佢同一般BB 一樣,都鐘意扔嘢落地,係佢地探索㗎其中一個方法。但係,有一樣嘢佢好少扔落地,仲可以玩得好投入,就係車仔啦！當我比㗎車仔佢,佢係咁玩,冇扔落地,我就以為佢過咗個"扔嘢階段"。但當我比其他嘢佢玩㗎時候,佢又好快會扔咗佢！比幾樣玩具佢玩,佢就會將其他嘢扔掉,剩係玩車車!

焗香草咸豬肉

最近揾倒個blog (caroleasylife.blogspot) 有好多食譜,中西主餐小吃蛋糕麵包醬汁應有盡有。而且圖文並茂非常清楚,晌入面揾倒唔少好煮意!呢個餸係其中一個。

備份。搬家

自從開咗個 blogspot, 慢慢適應咗之後,個 yahoo blog 就比我慢慢淡忘(真貪新忘舊!)。直至最近見倒有 blogger 話可以輕鬆搬家去 we share , 我至醒起"咦,我未備份喎！"

失落的腸粉

今朝一早見倒有人 post 咗個腸粉食譜,我老公好鐘意食腸粉,見屋企有材料,咁就開工整,等佢醒咗有新鮮腸粉食。

老公見倒之後,冇咩表情,問佢帶唔帶返工食,佢話唔洗。跟住我話,咁依家食吖,佢話循例都要食吓嘅。即係其實唔想食囉。最後,佢攪東攪西,攪到夠鐘就返工。兩條腸粉就依然坐咗晌隻碟度。。。

又"返學"啦~圖書館 Storytime

好開心呀,我揾倒屋企附近有兩個圖書館都有 baby storytime.今日去咗其中一個。個圖書館好大好靚。個 Storytime 係比一歲以下㗎 baby, 內容都係唱吓歌仔,玩吓手巾,聽吓故仔咁。人仔都係不停咁返嚟返去,唔專心"上堂"。今日仲僚隔離個 BB 女玩添!聽完故仔有玩玩具時間,上次度冇㗎！有好多玩具,仲有人仔最鐘意㗎車車。BB玩時,我就可以同D 媽媽傾吓計。全程一個鐘,呢個 Storytime 真不俗!

擦牙仔

人仔出咗兩隻門牙之後,好快就出多四隻牙,唔知係咪個為食仔想快D食好嘢所以一次出咁多牙呢？咁多隻,要同佢刷牙啦！

粟米魚塊

幾星期前超市有雪魚柳減價,我買咗包嚟試。之前煎咗兩塊發現唔好食。所以今次加厚粉,半煎炸再落埋粟米溶,希望冇咁難食。難得唔多食魚㗎老公都話ok,炸嘢同醬汁真係可以掩飾食材㗎不足!

煎蓮藕肉餅

雪櫃仲有一少節蓮藕,上次炒咗蓮藕片,今次試吓煎藕餅。

原來都唔難整。將豬肉挆碎,加調味。蓮藕磨成溶,加入肉碎,我仲加咗一隻蛋,少少芫荽碎同生粉。我襯人仔唔扭計時整定,所以將佢放入雪櫃,旁晚至攞出嚟煎。煎時只係用隻匙羹"畢"一舊仔出嚟,然後晌煎 pan上整平佢,唔似D食譜咁教,整好形至放入煎 pan. 湊住個人仔,真係唔可以咁講究,快快整好就算。:p

紅色奶奶

琴晚我都係一如以往,瞓覺前泵奶。每次泵頭幾吓都有少少痛,琴晚痛多少少,心諗可能係琴日埋身餵多咗,望望冇咩,又唔繼續痛,咁就如常咁一路上網一路泵。泵到咁上吓就停機,一望,嘩!點解有血嘅。攞開個泵見有條血絲,仲整污漕埋件衫,之後再望望個樽,嘩!鮮血色,好恐怖!原來泵咗血出嚟！我即刻倒晒佢,洗泵同洗衫。。。

之前都試過泵咗粉紅色水出嚟,不過今次仲嚴重,係鮮血色。。。 依家仲有少少痛。今日都係唔好泵,唔好埋身餵面。。。 最多用手泵清一清奶。。。

餵人奶,真係有血有汗!

滋潤蘋果梨水

前幾日見 blogger cici 煲咗個蘋果雪梨雪耳湯,提醒咗我可煲吓雪梨水。橫掂我個夏枯草菊花茶綠豆水 cycle 都cycle 咗幾次,而且天氣開始涼,係時候煲 D 滋潤 D 㗎嘢。

剛買咗蘋果同韓國梨,加塊果皮同粒蜜棗,煲一輪(煲吓停吓出街返嚟又再煲,我都唔記得煲咗幾耐!)咁就得啦! D 蘋果同梨煲到林晒,我比咗 D 人仔食! :p

蓮藕炒肉片

呢度唔係成日都買倒蓮藕,一係貴,一係唔靚。上星期難得有靚蓮藕減價,所以買咗少少返嚟。

蓮藕,以前淨係識用嚟煲湯,後來至識得攞佢嚟炒,仲好好味添!前幾日就將蓮藕切片嚟炒肉片。簡單快捷,又好味,啱晒我呢D湊仔人士!

初試四季豆

今日買咗 D 四季豆比人仔試,我整完之後聞一聞,嘩,真係好豆味喎,人仔會唔會唔肯食呢?所以我將D 豆分開上。

人仔食第一啖時停咗一停,好似諗緊"新嘢喎,咩嚟㗎呢？"不過照食。之後就一邊玩車仔一邊食,十多分鐘就食晒D豆同碗粥,仲食埋大半條香蕉!

其實佢so far除咗第二次隻牌子㗎奶粉口一唔肯飲之外,咩都肯食,所以我都唔需要擔心佢唔肯食!希望佢大個都一樣肯食蔬果!

hea 媽學前教育的迷思

當我每日同人仔晌度hea 吓 hea 吓㗎同時,原來香港好多家長已經為佢地㗎龍仔龍女通頂排幼稚園。聽講好多人都擔心唔夠學位,所以連一D唔太有名㗎幼稚園都要排長龍,就算學校有提供網上下載入學申請表,D家長都照排。又聽講有唔少人報十多間,然後留位又留幾間。又有D小朋友幾個月大就去playgroup,歲幾又去面試班。如果我晌香港,唔知我會點呢？

我之前計劃人仔頭幾年都係自己教吓佢,去吓圖書館聽故仔,上吓主日學,參加吓社區中心D活動等等。到五歲至正式返學,咁就可以省下返pre-school 㗎錢。因為我覺得既然我都唔做全職留晌屋企照顧佢,點解仲要花錢送佢去返學呢？而且咁細個咪由佢玩吓囉。但係有時我又諗,我教唔教得佢掂呢？我係咪應該開始睇吓幾時教咩,用咩方法,用咩教材呢？定係同佢玩吓出吓街,順其自然咁見倒咩就教咩呢？

我返學啦~第一次去baby story time

上星期開始老公又開學啦。一星期起碼兩晚唔返屋企食飯,上星期仲多兩晚冇返,剩返我同人仔朝夕相對,真係要揾D地方去吓。除咗買餸同一星期一次㗎聖經班 nursery 之外,我仲揾倒有個圖書館有 baby story time. 唔洗錢有得玩又有嘢學,當然去睇睇啦！

Story time係比6個月至2歲㗎小朋友。一次半個鐘,多數時間其實係唱歌仔,做動作。人仔唔係好知發生緊咩事,人有人唱,佢有佢周身郁。不過等佢見識吓都好!再大少少就真係學倒嘢啦！

呢個圖書館唔算近,要開廿分鐘車,而頭又冇咩好去,仲有D 雜,所以都唔知好唔好個個星期去,定係等佢大少少至去吓。等我再揾吓附近D 圖書館有冇類似㗎活動先!

hea 煮晚餐之煙三文魚蛋炒飯

呢幾日唔知做咩,提唔起幹勁,成日好似hea 吓 hea 吓咁。琴日星期六,我同老公都成日晌屋企。佢讀書,我睇仔。家務都冇點做。晚餐只係整咗個煙三文魚炒飯。

D 煙三文魚係個朋友送嘅。佢有親戚住晌 Alaska. 佢地好厲害,會出去打獵,捉魚。跟住會將食唔晒㗎肉整成腸仔,將D魚 smoke 咗佢。佢地耐唔中,就會帶 D "貨"落嚟加洲比我個朋友。我朋友就好好咁送咗份煙三文魚比我地。份煙三文唔係一片片,係一舊魚扒,自家製,好正㗎！真係好多謝我朋友!

Hea hea 地㗎日子,整個炒飯,加碟油菜,簡簡單單㗎晚餐,都唔錯呀！

ADHD!?

星期日同老公帶埋人仔去 church. 我地坐咗晌專比有 BB 㗎父母度,等 D BB唔會嘈倒人。我地發現人仔係全場最坐唔定個,又坐又企又轉身係咁返。。。 老公話佢會唔會有 D 咩 ADD 㗎?佢係指 ADHD,啫係過度活躍症。

我返屋企之後上網睇資料,發現有D人話有ADHAD細路晌嬰兒時期已經有D特徵,包括坐唔定,瞓唔好,易忟,易大喊,食嘢分心。。。 嘩,除咗食嘢樣唔仲之外,其他全中!仲有一個係佢地鐘意撞個頭。呢排人仔會將個額頭仔輕力撞向牆度,有時阻都阻唔切。唉,連咁奇怪㗎symptom 都中,真係驚佢有ADHD,係我就有排教囉!不過點都好啦,佢係神賜嘅,神會比智慧同能力我教好佢！

西蘭花菇菇芝士蛋批

以前整過菠菜芝士蛋批,今次試吓用西蘭花同菇菇。

材料同上次差不多,只係將D蔬菜轉咗,同用碎㗎車打芝士。

造法一樣,先炒咗D洋蔥蒜頭同蔬菜,將佢地放入 pie pan,然後加入3隻打勻㗎蛋,1/4杯奶,同一杯碎芝士,再焗佢40分鐘(350F),咁就得啦！今次都懶冇整批皮,揾次試吓先!

加 D 薯仔就成為老公㗎午餐。

homemade granola bar (附食譜)

屋企有好多麥皮,唔係快熟隻,所以比較少食。係時候清吓啦！

我好鐘意食 granola bar. 出面買 D 偏甜,自己整就可以就番自己口味,可以用自己鐘意㗎材料,仲經濟好多呢！

今次用咗買咗耐又未食晒㗎杏脯嚟代替原來食譜㗎朱古力粒。又減去食譜入面㗎糖。整出嚟冇咁甜。

材料:
2 杯 麥皮
半杯 麵粉
半茶匙 泡打粉
半茶匙 雲呢拿油
1/3杯 牛油(放軟)
1杯 乾果
1/4杯 蜜糖

造法:
1) 預熱焗爐325F.
2) 將所有材料混合。
3) 焗18-22分鐘。
4) 出爐後十分鐘切件,放涼後才拿出。

愛心便當

某日下午,人仔非常乖,自己晌 play pan 度玩,咁我就好順利咁整咗個粆粿條同 sushi,比老公帶返工做早餐同午餐。:)

煎薯角

老公同我都係薯仔怪,點煮㗎薯仔都鐘意食!煎薯角係其中一個我地常煮嘅。簡單又好食!

先將薯仔切角,亦可以切條或片。然後烚熟。

跟住煎至表面金黃。再隨意加入調味料如蒜鹽,香料等。

外脆內軟,好好食㗎！