Thursday, October 31, 2013

無油燕麥餅乾 (附食譜)

呢個又係參巧 Carol 㗎食譜。我有 D 材料唔同,例如快熟麥片我冇,就改用屋企有嘅唔快熟隻。呢隻餅係硬嘅,因為冇落油。我見有 comment 話可以加 20 g 油令個餅鬆軟 D。唔想咁健康的話可以試試。


Wednesday, October 30, 2013

越大越激氣?

今朝上 FB 見到有個 friend 個 status 話比個十幾個月大㗎仔激 c. 跟住有 d comments 話大 d 仲激氣。有人仲話比個仔激到日日嘔血。。。

雖然依幾日我比人仔攪到冇覺好瞓(病咗冇計。。。)但其實佢都好乖。扭計時多數都係眼瞓(雖然攪佢瞓唔容易。。。),又肯晌 play pan 度玩,等我可以一路住佢一路做家務。

Tuesday, October 29, 2013

氣管炎。。。

呢幾日,又回復冇覺瞓㗎日子,因為人仔病咗。。。我就做"培瞓"專員,同佢晌書房瞓,等老公可以瞓得好少少。

星期六晚開始,人仔半夜咳醒幾次,聽得出佢好多啖,但係又咳唔出。有時又好似有點呼吸困難咁,攪到我驚驚地。日間又冇咩喎,只係間中咳兩聲,不過依然係好多啖,所以,我琴日帶咗佢去睇醫生, check 吓。平時 regular check up 都唔多洗等,琴日唔知做咩護士榜完重之後等咗好耐。。。

Monday, October 28, 2013

自製乳酸飲品

呢個又係睇 Carol 個 blog 學,唔睇唔知原來乳酸飲品係可以自己整。呢度 D 乳酸飲品唔平,至少三,四蚊一枝,又少減價,所以我冇買過(基本上依家除咗奶之外,都唔會買飲品)。

Carol 個食譜係用有糖㗎原味乳酪。我屋企得冇糖㗎原味乳酪,所以要加多 D 糖。Carol係用 cc做單位。我冇嘢度倒 cc, 所以convert 咗做 cup。我個食譜變成一杯乳酪加一杯糖煮溶,放涼後再加三湯匙檸檬汁。放入已消毒㗎玻璃樽,飲時稀釋四至五倍。可存放兩個月。

Sunday, October 27, 2013

十一個月啦!

嘩!話咁快就十一個月大啦,仲有一個月就一歲啦!

瞓覺:
日間依然兩次 nap. 大約九點同三點。一係坐車或stroller 瞓,一係啜住瞓,間中會晌 swing 度瞓。至少要瞓一個鐘,唔係就扭扭扭!
夜晚通常七點幾就同佢沖涼,跟住食奶瞓覺,多數會喊幾聲,八點前瞓着。第二朝四五點醒,我會埋餵吓,未到六點就會放返佢上床,咁佢會瞓到七點幾,有時六點幾見佢都好醒咁就同佢起身。
半夜好少醒啦,最多都係醒一次!好嘢!

Saturday, October 26, 2013

南瓜蘋果小蛋糕 (附食譜)

秋天係南瓜同蘋果當造㗎季節,所謂不時不食,整返個南瓜蘋果 muffin 先!整咗十八個,攞嚟派街坊!



Friday, October 25, 2013

滋味雞

有一次我請朋友嚟屋企食飯,整咗個快靚正㗎焗雞腿,有個朋友好鐘意食,仲幫個餸改名做"滋味雞"。呢個滋味雞真係好易整。只係是但落 D 調味,好似蒜鹽, seasoning salt, onion powder, onion powder, mixed herb 等等。由於次次都係是但落調味料,所以次次整出嚟個味都有少少唔同!不過都好味。


Thursday, October 24, 2013

士多啤梨蛋糕 (附食譜)

天氣都開始涼啦,竟然仲有士多啤梨減價!即刻買咗三盒。可以整個士多啤梨蛋糕啦!以前都整過,好容易整。唔知點解,冇用咩特別材料,但整完放咗幾日都仲好鬆軟啊!今次老公識做啦,主動帶返工做早餐,仲讚好食!嘻嘻!

1 1/2 杯麪粉
3/4 杯糖
1/2 茶匙鹽
2 茶匙發粉
1/3 杯菜油
1 隻蛋
1/3 杯鮮奶
1 杯士多啤梨(切粒)

1, 預熱焗爐至350F。
2, 將麵粉、糖、鹽、發粉拌勻。
3, 將菜油、蛋、奶拌勻加入麵粉混合物拌勻。
4, 加入士多啤梨。
5, 放入焗盆,焗45-55分鐘。



Wednesday, October 23, 2013

六十里單車

星期六,老公參加咗一年一度㗎一百里單車籌款。個 event 係兩日,不過佢唔得閑,所以只踩一日,六十里。仲記得舊年我雖然大住肚,但係就好輕鬆咁去唔同㗎休息站等佢,好好玩!今年有隻人仔,所以我只係去 day 1 終點等佢。

Tuesday, October 22, 2013

初試爛飯

其實我依家餵生果已經試過一粒粒咁餵,所以我一路都想比人仔試食爛飯,但好多時煲煲吓加水,又加蔬菜,煲飯結果成為粥仔。今日終於整倒爛飯比佢啦!仲將蔬菜分開,等佢食真 D 菜味。 D 冬瓜只係切粒,冇整到溶。

Monday, October 21, 2013

蒸釀豆卜

唔記得幾時見倒個蒸釀豆卜㗎食譜,今日去買餸時見倒豆卜就諗起,即刻買返包豆卜返屋企整吓先!

又係一個幾易整㗎餸。將醃好㗎肉碎釀上揸咗少少生粉㗎豆卜上面蒸熟佢,然後淋個汁上去就得啦。個汁其實只係蠔油汁,如果仲有自己煲㗎清雞湯就好啦!






Sunday, October 20, 2013

終於quit 了

終於 quit 咗其中一份工。

其實我一路都覺得唔需要做兩份咁類似㗎 per diem 工。只不過之前兩間都請,我覺得多個機會,又安排倒,返多 D仲有 bonus,咁咪做囉。

呢間醫院剛比人買咗,新高層決定星期日唔需要 PT, 話我可以改星期六返。咁我一向星期六都係返另一間,與其返兩間,不如我返一間返多個星期六算啦。而且論工作環境,論學嘢,論人工,論返工距離,都係星期六間好。咁就藉此機會quit 咗星期日呢間啦!

Saturday, October 19, 2013

愛車男

愛車唔知係咪每個男士㗎天性呢。通常我地放人仔晌 high chair度,都會比 D 嘢佢玩。佢同一般BB 一樣,都鐘意扔嘢落地,係佢地探索㗎其中一個方法。但係,有一樣嘢佢好少扔落地,仲可以玩得好投入,就係車仔啦!當我比㗎車仔佢,佢係咁玩,冇扔落地,我就以為佢過咗個"扔嘢階段"。但當我比其他嘢佢玩㗎時候,佢又好快會扔咗佢!比幾樣玩具佢玩,佢就會將其他嘢扔掉,剩係玩車車!

Friday, October 18, 2013

焗香草咸豬肉

最近揾倒個blog (caroleasylife.blogspot) 有好多食譜,中西主餐小吃蛋糕麵包醬汁應有盡有。而且圖文並茂非常清楚,晌入面揾倒唔少好煮意!呢個餸係其中一個。

Thursday, October 17, 2013

備份。搬家

自從開咗個 blogspot, 慢慢適應咗之後,個 yahoo blog 就比我慢慢淡忘(真貪新忘舊!)。直至最近見倒有 blogger 話可以輕鬆搬家去 we share , 我至醒起"咦,我未備份喎!"

Wednesday, October 16, 2013

失落的腸粉

今朝一早見倒有人 post 咗個腸粉食譜,我老公好鐘意食腸粉,見屋企有材料,咁就開工整,等佢醒咗有新鮮腸粉食。

老公見倒之後,冇咩表情,問佢帶唔帶返工食,佢話唔洗。跟住我話,咁依家食吖,佢話循例都要食吓嘅。即係其實唔想食囉。最後,佢攪東攪西,攪到夠鐘就返工。兩條腸粉就依然坐咗晌隻碟度。。。


Tuesday, October 15, 2013

又"返學"啦~圖書館 Storytime

好開心呀,我揾倒屋企附近有兩個圖書館都有 baby storytime.今日去咗其中一個。個圖書館好大好靚。個 Storytime 係比一歲以下㗎 baby, 內容都係唱吓歌仔,玩吓手巾,聽吓故仔咁。人仔都係不停咁返嚟返去,唔專心"上堂"。今日仲僚隔離個 BB 女玩添!聽完故仔有玩玩具時間,上次度冇㗎!有好多玩具,仲有人仔最鐘意㗎車車。BB玩時,我就可以同D 媽媽傾吓計。全程一個鐘,呢個 Storytime 真不俗!




Monday, October 14, 2013

擦牙仔

人仔出咗兩隻門牙之後,好快就出多四隻牙,唔知係咪個為食仔想快D食好嘢所以一次出咁多牙呢?咁多隻,要同佢刷牙啦!

Sunday, October 13, 2013

粟米魚塊

幾星期前超市有雪魚柳減價,我買咗包嚟試。之前煎咗兩塊發現唔好食。所以今次加厚粉,半煎炸再落埋粟米溶,希望冇咁難食。難得唔多食魚㗎老公都話ok,炸嘢同醬汁真係可以掩飾食材㗎不足!

Saturday, October 12, 2013

煎蓮藕肉餅

雪櫃仲有一少節蓮藕,上次炒咗蓮藕片,今次試吓煎藕餅。

原來都唔難整。將豬肉挆碎,加調味。蓮藕磨成溶,加入肉碎,我仲加咗一隻蛋,少少芫荽碎同生粉。我襯人仔唔扭計時整定,所以將佢放入雪櫃,旁晚至攞出嚟煎。煎時只係用隻匙羹"畢"一舊仔出嚟,然後晌煎 pan上整平佢,唔似D食譜咁教,整好形至放入煎 pan. 湊住個人仔,真係唔可以咁講究,快快整好就算。:p

Friday, October 11, 2013

紅色奶奶

琴晚我都係一如以往,瞓覺前泵奶。每次泵頭幾吓都有少少痛,琴晚痛多少少,心諗可能係琴日埋身餵多咗,望望冇咩,又唔繼續痛,咁就如常咁一路上網一路泵。泵到咁上吓就停機,一望,嘩!點解有血嘅。攞開個泵見有條血絲,仲整污漕埋件衫,之後再望望個樽,嘩!鮮血色,好恐怖!原來泵咗血出嚟!我即刻倒晒佢,洗泵同洗衫。。。

之前都試過泵咗粉紅色水出嚟,不過今次仲嚴重,係鮮血色。。。 依家仲有少少痛。今日都係唔好泵,唔好埋身餵面。。。 最多用手泵清一清奶。。。

餵人奶,真係有血有汗!

Thursday, October 10, 2013

滋潤蘋果梨水

前幾日見 blogger cici 煲咗個蘋果雪梨雪耳湯,提醒咗我可煲吓雪梨水。橫掂我個夏枯草菊花茶綠豆水 cycle 都cycle 咗幾次,而且天氣開始涼,係時候煲 D 滋潤 D 㗎嘢。

剛買咗蘋果同韓國梨,加塊果皮同粒蜜棗,煲一輪(煲吓停吓出街返嚟又再煲,我都唔記得煲咗幾耐!)咁就得啦! D 蘋果同梨煲到林晒,我比咗 D 人仔食! :p





Wednesday, October 9, 2013

蓮藕炒肉片

呢度唔係成日都買倒蓮藕,一係貴,一係唔靚。上星期難得有靚蓮藕減價,所以買咗少少返嚟。

蓮藕,以前淨係識用嚟煲湯,後來至識得攞佢嚟炒,仲好好味添!前幾日就將蓮藕切片嚟炒肉片。簡單快捷,又好味,啱晒我呢D湊仔人士!




Tuesday, October 8, 2013

初試四季豆

今日買咗 D 四季豆比人仔試,我整完之後聞一聞,嘩,真係好豆味喎,人仔會唔會唔肯食呢?所以我將D 豆分開上。


人仔食第一啖時停咗一停,好似諗緊"新嘢喎,咩嚟㗎呢?"不過照食。之後就一邊玩車仔一邊食,十多分鐘就食晒D豆同碗粥,仲食埋大半條香蕉!



其實佢so far除咗第二次隻牌子㗎奶粉口一唔肯飲之外,咩都肯食,所以我都唔需要擔心佢唔肯食!希望佢大個都一樣肯食蔬果!

hea 媽學前教育的迷思

當我每日同人仔晌度hea 吓 hea 吓㗎同時,原來香港好多家長已經為佢地㗎龍仔龍女通頂排幼稚園。聽講好多人都擔心唔夠學位,所以連一D唔太有名㗎幼稚園都要排長龍,就算學校有提供網上下載入學申請表,D家長都照排。又聽講有唔少人報十多間,然後留位又留幾間。又有D小朋友幾個月大就去playgroup,歲幾又去面試班。如果我晌香港,唔知我會點呢?

我之前計劃人仔頭幾年都係自己教吓佢,去吓圖書館聽故仔,上吓主日學,參加吓社區中心D活動等等。到五歲至正式返學,咁就可以省下返pre-school 㗎錢。因為我覺得既然我都唔做全職留晌屋企照顧佢,點解仲要花錢送佢去返學呢?而且咁細個咪由佢玩吓囉。但係有時我又諗,我教唔教得佢掂呢?我係咪應該開始睇吓幾時教咩,用咩方法,用咩教材呢?定係同佢玩吓出吓街,順其自然咁見倒咩就教咩呢?

Monday, October 7, 2013

我返學啦~第一次去baby story time

上星期開始老公又開學啦。一星期起碼兩晚唔返屋企食飯,上星期仲多兩晚冇返,剩返我同人仔朝夕相對,真係要揾D地方去吓。除咗買餸同一星期一次㗎聖經班 nursery 之外,我仲揾倒有個圖書館有 baby story time. 唔洗錢有得玩又有嘢學,當然去睇睇啦!

Story time係比6個月至2歲㗎小朋友。一次半個鐘,多數時間其實係唱歌仔,做動作。人仔唔係好知發生緊咩事,人有人唱,佢有佢周身郁。不過等佢見識吓都好!再大少少就真係學倒嘢啦!

呢個圖書館唔算近,要開廿分鐘車,而頭又冇咩好去,仲有D 雜,所以都唔知好唔好個個星期去,定係等佢大少少至去吓。等我再揾吓附近D 圖書館有冇類似㗎活動先!

Sunday, October 6, 2013

hea 煮晚餐之煙三文魚蛋炒飯

呢幾日唔知做咩,提唔起幹勁,成日好似hea 吓 hea 吓咁。琴日星期六,我同老公都成日晌屋企。佢讀書,我睇仔。家務都冇點做。晚餐只係整咗個煙三文魚炒飯。



D 煙三文魚係個朋友送嘅。佢有親戚住晌 Alaska. 佢地好厲害,會出去打獵,捉魚。跟住會將食唔晒㗎肉整成腸仔,將D魚 smoke 咗佢。佢地耐唔中,就會帶 D "貨"落嚟加洲比我個朋友。我朋友就好好咁送咗份煙三文魚比我地。份煙三文唔係一片片,係一舊魚扒,自家製,好正㗎!真係好多謝我朋友!

Hea hea 地㗎日子,整個炒飯,加碟油菜,簡簡單單㗎晚餐,都唔錯呀!


Friday, October 4, 2013

ADHD!?

星期日同老公帶埋人仔去 church. 我地坐咗晌專比有 BB 㗎父母度,等 D BB唔會嘈倒人。我地發現人仔係全場最坐唔定個,又坐又企又轉身係咁返。。。 老公話佢會唔會有 D 咩 ADD 㗎?佢係指 ADHD,啫係過度活躍症。

我返屋企之後上網睇資料,發現有D人話有ADHAD細路晌嬰兒時期已經有D特徵,包括坐唔定,瞓唔好,易忟,易大喊,食嘢分心。。。 嘩,除咗食嘢樣唔仲之外,其他全中!仲有一個係佢地鐘意撞個頭。呢排人仔會將個額頭仔輕力撞向牆度,有時阻都阻唔切。唉,連咁奇怪㗎symptom 都中,真係驚佢有ADHD,係我就有排教囉!不過點都好啦,佢係神賜嘅,神會比智慧同能力我教好佢!

Thursday, October 3, 2013

西蘭花菇菇芝士蛋批

以前整過菠菜芝士蛋批,今次試吓用西蘭花同菇菇。

材料同上次差不多,只係將D蔬菜轉咗,同用碎㗎車打芝士。

造法一樣,先炒咗D洋蔥蒜頭同蔬菜,將佢地放入 pie pan,然後加入3隻打勻㗎蛋,1/4杯奶,同一杯碎芝士,再焗佢40分鐘(350F),咁就得啦!今次都懶冇整批皮,揾次試吓先!


加 D 薯仔就成為老公㗎午餐。


Wednesday, October 2, 2013

homemade granola bar (附食譜)

屋企有好多麥皮,唔係快熟隻,所以比較少食。係時候清吓啦!

我好鐘意食 granola bar. 出面買 D 偏甜,自己整就可以就番自己口味,可以用自己鐘意㗎材料,仲經濟好多呢!

今次用咗買咗耐又未食晒㗎杏脯嚟代替原來食譜㗎朱古力粒。又減去食譜入面㗎糖。整出嚟冇咁甜。

材料:
2 杯 麥皮
半杯 麵粉
半茶匙 泡打粉
半茶匙 雲呢拿油
1/3杯 牛油(放軟)
1杯 乾果
1/4杯 蜜糖

造法:
1) 預熱焗爐325F.
2) 將所有材料混合。
3) 焗18-22分鐘。
4) 出爐後十分鐘切件,放涼後才拿出。



Tuesday, October 1, 2013

愛心便當

某日下午,人仔非常乖,自己晌 play pan 度玩,咁我就好順利咁整咗個粆粿條同 sushi,比老公帶返工做早餐同午餐。:)