好友探訪

呢幾日有位朋友由香港過嚟做嘢加玩,順便嚟探我。諗一諗,原來大家係十幾年前識,突然覺得自己好老呀！雖然近來少聯絡,但係一見返又好好傾,因大家㗎喜好都幾似。

佢地星期三下午到,我就煮定飯等佢地,因唔知交通情況點,以為佢地會夜晚至到。人仔瞓醒個午覺就見倒佢地,佢有 d 怕羞,之後仲扭計,好在好快就冇嘢。食完飯,玩吓傾吓計,我就攪人仔瞓。之後老公返嚟又傾咗一大輪,因為大家都鐘意行山(佢地之前上咗 Half Dome!),而兩位老公又鐘意單車,仲攪到我老公想返香港買部二手車!(我叫佢買隻鑊就極不願意咁,搬部單車就講到好興奮。。。-_-)

星期四朝早同佢地去咗間單車舖行吓。之後去咗 Laguna Beach 行。人仔食完午餐就瞓咗。。。半個鐘咁大把。。。之後同佢去沙灘邊個 playground 玩咗一陣,三點幾就走啦,因遲走會好塞車。之後去屋企附近㗎韓國超市買餸打邊爐,我老公至愛呀！原來大家除咗鐘意行山跑步之外,都鐘意行超市!哈哈!夜晚又傾到十二點幾。

今朝十點倒佢地就走啦,真係想佢地留耐 D!不過我相信我地會再見,希望將來可以一齊去行山 camping 呢！其實佢地嚟都冇乜計劃要去邊,因佢地冇乜所謂。不過大家志趣相投,傾吓計都好開心!

歲半啦！

呢幾日有 D 忙,攪到人仔歲半過咗都未記錄返佢㗎成長進度。

瞓:
一日一 nap,約兩個鐘。
夜晚瞓約十個鐘。
有幾日連續朝早五點幾醒,攪到我好攰。。。

食:
正式食大人飯,出街帶餐具同少少佢食得㗎嘢,因為佢容易敏感。不過都比以前方便好多呢！
可以用普通水杯飲水,飲管冇乜點教但都識。
開始識用义。

活動:
正式識跑。
可以單腳企倒少少同踢倒嘢。
好鐘意爬上凳,上枱就要佢落返嚟。

講通:
終於識一個手語,不過呢幾日又冇做。
仍然係全 BB 話, 呢兩日要咩就媽媽媽。。。 初頭仲以為佢識叫我。。。
鐘意講"喔噢"。
比嘢佢唔要會係咁搖頭。
聽得明好多嘢,有時仲跟倒 2-steps command.

自理能力:
教咗好耐㗎除鞋,仍要提吓至除倒 。
" 休"褲會"休"一半。
沖完涼會放自己㗎污漕衫入籃。
執玩具提佢都肯執。

其他:
識得扮食嘢,餵公仔食嘢,幫公仔刷牙。

突然學識吹泡泡

有 D 嘢,我教極人仔都唔識,例如講嘢。但有 D 嘢,唔教又識。

某日,人仔食餅咗時候對住塊餅晌度"呼呼"咁吹,好似我平時同佢吹涼 D 食物咁。之後佢食飯,"不"起一羹,又無端端晌度"呼呼"咁吹喎！前兩日吹泡泡比佢玩,伊見我"呼",佢又"呼",於是我就擺枝泡泡棒比佢試吓吹,又比佢吹倒泡泡出嚟,當然唔係次次得啦。後來仲係咁要攞枝泡泡棒試吹,仲差 D 擺入口食。。。

依家就會"呼"一聲,我"呼"返佢,佢就哈哈笑,好得意!

Big Bear day trip 後記

其實同我地同行㗎另一對 couple 有兩個仔,佢地驚會玩得夜,所以留下仔仔比家人湊。老公同我都都有 D 羨慕,因為我地冇得放低人仔去玩,對上一次二人世界食餐飯係年幾前我媽媽過嚟時。。。

雖然同埋人仔出街係煩 D , 辛苦 D, 不過見佢玩得開心就乜都低晒!佢依家識行識走係應該同佢出去玩多 D, 而且一家人㗎快樂回憶點可以冇佢份!諗返轉頭,如果我放低佢,自己去玩,我可能會有 D 內疚呢！

久違了的家庭樂 ~ Big Bear day trip

老公忙到顛,好耐冇一家人出去玩啦！星期六我地一家同另外兩對 couple 去 Big Bear玩咗成日。好 happy 呀！

朝早九點幾朋友嚟接我地,人仔上車時扭咗一輪,因為佢以為叔叔收起佢㗎 stroller!好在好快佢就被街上㗎車車吸引住,冇再扭。接埋個朋友我地就上 Big Bear. 途中人仔冇得周圍走又有少少眼瞓,所以有少少扭計。不過同佢玩吓睇吓書食吓生果十二點幾就去到。

去到行咗一陣就食嘢。人仔除咗等食時有 D 唔耐煩之外,其他時間都乖乖坐定食。食飽就扭眼瞓,於是我放佢上 stroller. 佢又好乖喎,眼光光一陣就瞓咗。我地就去個 Starlight Festival.

我地齊齊嚟 Big Bear 係因為朋友公司晌呢個 Festival 度擺檔,所以佢就叫埋我地一齊上嚟。個 Festival 㗎目的係推廣天文科學,有好多望遠鏡,又有 D 機械人呀機械車咁,都幾得意。

人仔瞓咗唔夠一個鐘,當我朋友話佢瞓得幾好時,佢就醒咗。。。佢醒咗我就同佢行個圈。望遠鏡唔敢比佢掂,分分鐘貴過一間屋!佢好鐘意隻會郁會講嘢㗎機械人,望咗好耐。機械車就只係比佢遠遠咁睇一睇,以免佢扭計要攞。之後仲有隻 Wall-E 走咗出嚟！

行完 festival, 我地就去咗湖邊行。其實湖邊冇咩玩,人仔只係不停咁執石仔,掟落湖,都已經開心到"ka ka"笑!呢位小朋友真係易滿足!

之後見倒有個 Discovery Center, 雖然關咗,但旁邊有個 Discovery Trail Walk,我地走咗入去。有唔同 stations 玩, 例如大大舊木頭積木,平衡木,木造丁丁琴。。。 好有趣!

玩完我地就走啦！本來仲想晌朋友屋企打邊爐,不過太夜啦,結果買外賣算。食完 hea 一陣,就同人仔清潔吓,換睡衣。佢上車之後扭咗少少,就瞓咗！仲以為佢會一如以往咁大喊一輪至瞓添!不得不讚佢全日表現唔錯,要多 D 同佢出嚟玩呀！

BB 手語~ 多 D

人仔未出世時,我認識到 BB 手語。好多朋友都大力推介,話佢地㗎 BB 學識之後,就算未識講嘢,都可以表達倒自己想要㗎嘢,因此冇咁易扭計。

通常六個月大就可以開始教,到九至十個月倒就可以做倒例如奶,食嘢, 多 D, all done 呢 D 簡單㗎字。我就由人仔出世時已經教佢做手語,點知佢都差不多歲半,一般小朋友都識講嘢啦,佢就連手語都未識。。。。 佢㗎表達能力真係有 D 弱。

最近,佢做倒"多 D" 呢個手語!通常佢飲完杯水/奶,會咦咦呀呀咁遞隻杯比我,咁我就會做"多 D " 個手語,同時問佢係咪要多 D. 佢又唔做手語喎,但係當我 refill 咗個杯,遞比佢㗎時候,佢會笑笑口咁做 "多 D" 個手語。咁其實佢明唔明手語㗎意思呢？今日嘗試影佢,佢就嚟個錯誤示範。。。

今日我洗緊士多啤梨㗎時候,佢又想食,於是我比咗幾粒佢。其實有 D 酸,我諗住佢唔會食,點知食完走埋嚟,比返個空兜我,跟住做咗"多 D"呢個手語!我當然再比幾粒佢。食完佢又走嚟要多 D, 今次我快快攞部電話嚟影低呢個歷史性㗎一刻!影得唔好,不過佢又唔肯再做。。。

期待佢再做其他手語或者開金口㗎一刻!

青木瓜湯

見倒有青木瓜,揀個細㗎嚟煲湯,都分咗兩次煲,煲咗兩個啱女仕㗎湯,所以特別請咗個女仔 friend 嚟飲!老公就飲吓綠豆水,菊花茶呢 D 清熱嘢啦！

青木瓜黃豆排骨湯
有補益氣血、消除疲勞、美容護膚，增加皮膚彈性㗎作用。呢度咁乾,要飲多 D 啦！

花生眉豆青木瓜雞腳湯
熱門坐月湯,除咗有助上奶外,亦含豐富膠質,健脾益胃,滋養皮膚,平時都啱飲。

你今日仲係 baby

我同人仔出街,有時途人見倒佢,會話:" baby! So cute!" (特別係佢扭住 pat pat 行㗎時候!)有時去公園或者圖書館,途人會叫人仔做 baby。特別係 D 小妹妹,好鐘意同 baby 玩。所以,我同人仔返到屋企之後,會同佢講你今日仲係 baby!

今日仍有人叫人仔做 baby。其實佢依家都唔細,識行識走,每次聽倒人叫佢 baby 我都會諗會唔會係最後一次?我諗好快就冇人叫佢 baby,好唔捨得呢！不過唔捨得都冇法,小朋友大得好快,唯有珍惜同佢一齊㗎時間!

第二個母親節

上年母親節,人仔五個幾月大,我都唔記得做咗咩。今年我地都冇計劃做咩,朝早返教會。我地近來去咗間新教會,我仲適應緊,不過人仔就好適應,一去度 nursary 就自己走入去玩。D 職員好有心機,母親節仲整咗禮物!之前幫人仔影咗張相,放入個相架入面。哈哈!人仔㗎招牌認真樣!

去完教會之後,就去朋友屋企食飯,之前冇 plan 㗎,咁啱大家㗎父母都係晌香港,冇咩活動,所以就一齊 hang out 吓。其實去到佢地屋企,已經係人仔㗎 nap time. 我地食嘢,又傾咗一陣至走,人仔都冇扭計,只係晌車度扭咗一陣至瞓!好難得!算係我嘅母親節禮物啦！

夜晚如常晌屋企煮飯洗碗同人仔玩吓然後沖涼瞓覺。其實唔洗同人迫,唔洗驚人仔扭計,老公又可以有多 D 時間做吓嘢,幾好呀！

食得是福

我好興幸,人仔係鐘意食咗㗎小朋友,除咗扭眼瞓,出牙,唔舒服之外,好多時會自己坐定定食。呢排佢開始唔鐘意食菜,不過大致上佢晌食方面都係易攪嘅！

佢特別鐘意食大人嘢,就算大人同佢食㗎嘢一樣,佢都要你手上 D。

某日,我切咗 D 蘋果比佢食,我自己又食一個。佢唔食自己 D 切好嘅,係都要我手上整個蘋果。咁我就比我個佢試吓食。佢又真係食倒喎！

又某日,我地食雞肶。佢又要食,於是我切少少肉比佢,但佢不停咁想食我隻。咁我就將 D 肉切開少少然後成隻肶比佢攞住食。佢食得不知幾滋味!

近期靚湯

芥菜魚湯
上次 D 芥菜未用晒,再用嚟煲多次魚湯。今次又試吓用第二種魚。呢條好似叫白立, sheep head, 我覺得上次條好似好味 D。

花生眉豆雞腳湯
雞腳減價,買咗一包返嚟煲湯。今次就煲花生眉豆雞腳,順便清吓 D 花生。

覇王花粟米芡實瘦肉湯
覺得自己有 D 熱氣,除咗煲綠豆水之外,仲煲咗個清熱㗎湯。粟米減價,買咗幾條,就放一條落去煲。好清甜呀！

臉紅眼腫敏感驚魂

琴晚我煮緊飯時,人仔扭肚餓,於是我比 D 腸粉佢自己食住先,我繼續煮飯。廿四孝爸爸見佢 D 腸粉好齋,就整少少調味比佢。人仔食時佢仲扮人仔講"超好味!"。佢食咗一陣,我就去睇吓佢。見佢咀仔四周好紅,即刻問老公比咗咩佢。原來個"超好味"調味有花生醬晌入面!!!

噢！花生醬呢 D 咁容易致敏㗎嘢點會比佢㗎！

我即刻攞走晒 D 腸粉,比其他嘢佢食,但面仔紅㗎地方越嚟越大,去到額頭,眼周圍又紅又有少少腫,又開始 "R" 手 "R" 腳。

佢食其他嘢食咗一陣就唔多想食,我地就放佢落地玩。幸好佢㗎敏感反應冇影響呼吸道,否則我地實要衝去 ER!

人仔玩咗一輪,面仔開始冇咁紅,個幾鐘之後面面就冇事,我地都鬆一口氣!

平時我好多嘢都唔比人仔,有時爸爸會話"少少啫,唔怕啦"。經此一役,我諗佢明白點解平時我咁小心人仔㗎飲食。

初遊動物園

人仔除咗鐘意車之外,仲鐘意動物。每次睇書見倒動物都會錫埋去,出街見倒狗會好開心,所以我好想帶佢去動物園。

揾倒有個小動物園,半小時車程倒,係晌個 regional park 入面嘅。入 park $3, 入動物園再比 $2. 有朋友話幾好玩,於是見星期一冇咩做,朝早就帶佢去行一轉。

動物園好細,"住客"都係 D 比較細同北美至有㗎動物。最大隻㗎係熊。園入面有個 petting zoo,有幾隻羊比小朋友摸,人仔都有掂一掂佢地㗎！

本來想影多 D 靚相,點知個相機唔 work... 我單拖湊住佢,冇時間慢慢研究,結果冇得影低人仔第一次去動物園呢 D 咁歷史性㗎時刻。。。唉。。算啦,下次去至影啦！

行完動物園,我地出咗去公園野餐,跟住行咗去個 playground 玩咗陣。見時間尚早,我就再同佢入動物園行多個圈。玩完返屋企都只係三,四點,我仲有時間買少少餸煮飯,因有朋友嚟屋企食飯。又有姐姐嚟同人仔玩,日節目好豐富呀！

呢幾日好熱,等天氣涼返少少時我又可以同佢再去!下次一定要影好多相!