Sunday, June 29, 2014

19 個月

婆婆嚟咗,成日去街,攪到呢篇19個月㗎記錄都遲咗完成。其實今個月最大進步係聽得明好多嘢,但佢依然未識講,所以感覺上佢好似唔係咁醒,好多時 以為佢唔識聽但佢又做倒出嚟,哈哈!

瞓:
每大約瞓十個鐘,日間瞓一至三個鐘。有一排半夜醒幾次要拖住我手瞓,呢幾日又好咗。

食:
一日三餐加兩次小食,多數跟大人食,但唔食得蛋,奶類,乾果同芝麻。
可以自己用匙羹食,但鐘意用手食多 D...

活動能力:
試過唔扶嘢上落樓梯
跑得好咗
未完全跳倒
可以單腳企一企同踢波

溝通:
成日"媽媽"聲,咩都叫"媽",應該有時係叫我。
問佢咩都搖頭。
聽得明好多指令,但仲係唔識講囉。。。

其他:
扭計多數係晌唔夠瞓㗎時候,其他時間都算聽話。
夠膽自己 "sir" 滑梯,之前要拖住我手至敢 "sir"㗎!

Saturday, June 28, 2014

無蛋奶香蕉餅乾(附食譜)

蛋糕餅乾多數有蛋同奶,人仔唔食得,所以我嘗試揾 D 無蛋奶㗎食譜整 D 小食比隻為食豬食。晌 "Carol 自在生活" 個 blog 度見倒呢個食譜,見佢無落蛋奶,所以想整比人仔食。

由於個餅無蛋無奶,所以口感比較硬。整碎少少人仔都食倒嘅,不過唔係咁好食,老公一定唔食,睇嚟呢批餅都係要我清晒㗎啦!下次整要整到好薄至好食。

材料:
香蕉半條 (約 50g)
低筋麵粉 100g
糖 25g
菜油 20g

做法:
1, 香蕉壓溶備用。
2, 其他材料拌勻,再加入香蕉拌勻成麵團。
3, 將麵團分成十五份,搓圓壓平。
4, 放入已預熱 320F 的焗爐焗 30 分鐘。


Thursday, June 26, 2014

敏感人仔

人仔㗎濕疹雖然好咗好多,但係仲未完全好晒,所以歲半 check up 時醫生又再提議我帶人仔睇專科。其實之前醫生都提議過㗎啦,但我覺得人仔都好緊,而且專科醫生可能都係開 D 勁 D 㗎 steroid 同叫我做好保濕等,所以我遲遲未預約。今次直情有信嚟提我要約專科,睇吓專科攞多 D 意見都好嘅,咁我就約咗上星期睇。

醫生見倒人仔㗎皮膚,就話其實好多都係 scar, 要一排至好, D 地方唔需要揸藥。而佢仲有 D 地方會痕同紅, D 地方就要揸,咁就唔會變成 scar 啦。另一方面,佢又問吓平時㗎生活環境,睇吓有咁令佢過敏,亦提議用熱水洗佢㗎衣物床單,防止 dust mites. 由於人仔對一 D 食物可能敏感,所以再次抽血, comfirm 一吓。

上次抽血哥哥手勢唔錯,㩒得實人仔隻手又抽得快。今次抽血姐姐要我攬晒人仔㗎四肢同身體。人仔係咁扭,佢好大力,姐姐又抽得慢,幾驚佢一個反身連針都飛出嚟!好在最後都順利抽完。

驗血報告話人仔對蛋,奶同花生敏感。好在依家無再對黃豆,咁可以飲豆奶,食豆腐。另外留意倒佢對芝麻敏感,所以依家煮餸都唔落麻油,希望佢大 D 會慢慢好啦!

Sunday, June 22, 2014

沙灘樂

老公 term break, 所以週末就約吓人,隨口講話去沙灘,點知一叫就叫咗六家人,十二大,八細,一齊去。其實去之前兩日都未定地點。我晌加州住得最短時間,只係去過兩次沙灘,隨口提出去New Port Beach, 因為記得度有得泊車。點知大家就話"好呀"!

人仔如一般小朋友一樣,第一次去驚沙,一踏入去就舉起一隻腳唔肯行。於是抱佢去張度坐,我就撥 D 沙去佢腳度,但佢就即刻撥走。老公嘗試抱佢去海邊玩,但係一直唔肯落地,於是抱返佢返嚟。有人開始食嘢,佢當然又要食。食食吓,我覺得冇理由山長水遠嚟到食嘢咁嘛,所以抱返佢出去玩沙。一開始佢都肯坐晌我腳上玩,而佢雙腳係凌空嘅!慢慢慢就肯放隻腳落沙,之後我再推佢自己坐。玩咗一陣就抱起佢想佢企,但係對腳依然係坐㗎姿勢!之後就帶佢出海邊玩,比浪沖吓腳,佢終於唔驚肯企肯行啦!

我地由兩點玩到五點幾,夜晚買外賣去個朋友屋企食,食完同人仔沖個涼至返屋企,佢一上車就瞓咗啦!

其實我幾怕去沙灘,覺得攪到成身沙, D 嘢又污漕,好煩。帶小朋友就仲多嘢煩。事實上我當晚洗一輪(因我地有帶嘢食),第二日又洗一輪執一輪至攪掂。不過見人仔玩得開心,就覺得好值得!期待一齊 camping 呀!

Friday, June 20, 2014

爸爸替我著衫時。。。( 二)

之前 post 咗篇<爸爸替我著衫時。。。>,令我諗起更早前爸爸幫人仔著衫㗎趣事。

話說有一朝,爸爸見人仔醒咗,就自告奮勇地同人仔換片換衫食早餐,等我可以瞓多少少(呢 D 美德值得表揚吓!)。

人仔唔多合作,換咗片著咗褲又唔肯除件夾拿睡衣,善良㗎爸爸唔想同佢"搏鬥",於是就同佢著件褸,然後"休"條睡褲腳入條褲度!

我醒咗之後,見人仔玩緊,但有隻褲腳走咗出嚟!人仔又一可愛造型!


Wednesday, June 18, 2014

好書 ~ <餵故事書長大的孩子>

成本書只係講一件事:陪子女睇書,講故事比佢地聽。估唔到咁簡單㗎親子活動係有好多好處。呢本書比我好多啓發,值得推介!

一向我都有同人仔睇書,但有時一日只係臨瞓時睇。依家一日睇幾次,一有時間唔知做乜就睇吓。

一向都去圖書館借書,通常都係揀 D 新淨嘅。依家揀書多咗要求,如果要買,更要慢慢揀。開始覺得 BB 書都有好同冇咁好。當然,睇冇咁好嘅都好過完全唔睇。

一向出街會帶 D 車車比佢玩,依家會帶多兩本書。去到一 D 地方要等㗎地方,例如睇醫生,就揾書同人仔睇,好過唔知比佢玩乜,追住佢周圍走。

一向覺得同人仔睇書係要陪養佢閱讀習慣同教佢嘢。依家覺得睇書除咗有以上目的之外,其實都係一個好好㗎親子時間。可以攬住佢睇書㗎日子唔多,要好好享受呀!

(鳴謝各 blogger 媽媽推介,否則,我唔會認識汪培珽,更唔會睇倒呢本書!)




Tuesday, June 17, 2014

送飯行動

有朋友啱啱生咗,佢另外仲有個大仔四歲,二女未夠歲半(細過人仔!),又冇咩屋企人晌附近,兩公婆睇三個咁細嘅,可想而知有幾忙!所以佢間 church 幫佢整咗個送餐list,等人 sign up 送飯過去,幫輕吓佢地。

佢地係美國人,所以唔洗諗咩坐月食物,我整咗韓醬炒雞同炒飯,西人都啱食,再加士多啤梨 muffin.希望幫倒佢地啦!


Friday, June 13, 2014

爸爸替我著衫時。。。

某日放工,見人仔可愛到暈,公主袖 T-shirt 配三歲 size 泳褲!件公主袖係表姐舊衫,我暫放晌櫃底, just in case 冇晒衫著都有件頂檔。條褲係人送嘅,等人仔大 D 游水著。唔知點解爸爸會揾倒出嚟。。。仲配搭得咁可愛!哈哈!


Thursday, June 12, 2014

第一次玩 bounce house

上星期日,係教會一個 campaign 㗎完結同八週年,有 celebration. 除咗有 food trucks 之外, 仲有兩間 bounce houses, face painting, balloon artists, 同 photo booth. 以一間細教會嚟講,我覺得攪得幾大!

本來冇打算比人仔玩 bounce house, 雖然有一間細嘅係比四歲以下㗎小朋友,但我覺得人仔仲細,驚危險。後來見冇乜細路晌入面,就比人仔入去玩。雖然佢仲未識跳,但係佢都玩到哈哈大笑!坐吓跌吓爬吓轆吓,成日想企起身不過又好易跌底,有時又行倒幾步。以佢咁細都平衡倒行倒,我覺得佢幾叻㗎啦!

見佢玩得咁開心,早知一早比佢入去玩啦!不過遲 D 總有機會,到佢大 D 仲好玩,而且會更安全呢!



Wednesday, June 11, 2014

再遊迪士尼

上星期去咗廸士尼,今次係人仔第三次去。我唔係廸士尼粉絲,亦唔係大富人家,會去迪士尼,只係因為識人有飛,唔係真係唔會去呀!成百幾蚊美金一張飛!

人仔頭兩次去都唔玩倒 D 咩,今次識行識走識自己坐 ride 所以好玩好多啦!

今次我仲整咗壽司同帶水果,唔洗食入面 D 貴嘢!


一開始我地去 California Adventure. 堂姐表姐走晒去玩 D 刺激嘢,我同人仔就去行吓 bear bear 繩網。之後見 Mermide 唔洗排隊,就坐一轉。人仔自己坐,又要睇又有 D 驚,成程挨住我,哈哈!

之後想去 Carsland, 但跟咗表姐去睇 Disney Junior show. 有人睇到瞓咗。。。出嚟放佢上 stroller 就醒咗大喊唔肯再瞓,早知唔睇 show 比佢晌 stroller 瞓啦。。。



跟著就過 Disneyland. 竟然見倒奇景: Small World 唔洗排隊!但我要同人會合。。。冇得玩。。。之後再返去已經排長龍啦。。。

晌 Disneyland "野餐"完,就去坐咗火車, tea cup。晌姐姐們玩第二 D 嘢時玩咗四次木馬,因為唔洗排隊!哈哈!跟著就走啦!下次一定要一早去玩 Small World!


Thursday, June 5, 2014

幼兒食譜~豆腐雜菜肉餅

人仔唔鐘意食菜,成日揀晒 D 肉出嚟食,於是整咗呢個有雜菜㗎豆腐肉餅。成功引倒人仔食多少少菜!

一半豆腐碎,一半醃好㗎肉碎,再加切碎㗎紅蘿蔔,津白葉同蔥拌勻,遂少慢火煎至熟。人仔唔食得蛋,如果唔係加隻蛋會仲香!









Wednesday, June 4, 2014

勞氣。唔勞氣。

我相信人仔開始踏入 trouble two! 越來越有主見,唔鐘意唔想做就搖頭或者途走,突然失控大扭。。。成日對住佢,好容易會勞氣發惡。一朝早就唔肯換片,換衫又郁來郁去繼而扭一輪,咪話唔激氣。

不過,咁易就勞氣,餘下日咪有排激。。。而且人仔都未算曳,遲吓脾氣大 D 㗎時候點算?其實好多時勞氣,大聲,惡並唔能夠解決問題。就算人仔乖乖聽話,都只可能係驚咗我,我唔想咁呀。

唔想勞氣,就用其他方法攪掂隻扭計豬啦。分散注意力呢招用咗好耐。換片企唔定,咪攞 D 車車書書引佢企定定;唔去得某處咪引佢去另一度,不過唔係時時得。

唔肯擦牙就扮同公仔擦,跟住佢又肯擦喎。唔肯食嘢收碗又扭計,就攞隻公仔出嚟餵公仔食,再加講道理,點解要食嘢,又同佢講好多小朋友冇得食。。。 講講吓佢又唔扭喎,又肯食返。

講道理/故事係我晌汪培珽本書度學嘅,呢期成日用。食嘢時揀晒 D 肉唔食菜,於是我就出動 Mickey 講故事,講點解要食菜,又餵 Micky 食然後扮 Mickey 咁話我最鐘意食菜,菜菜好好味。。。



掟玩具時就鄭重咁同佢講唔可以然後再解釋點解,又同佢講玩要斯文 D。。。佢大力拍我,就同佢講唔可以大力拍人,會痛痛,要講對唔住。。。其實我唔知人仔明唔明,但我好同意汪老師講到只係同小朋友講"唔可以"又唔解釋,即係冇教到佢地。

講道理呢招係要無比耐性,同一個道理講好多次人仔都照做,有時又擔心慈母多敗兒,但我又唔想吓吓靠惡。。。希望有一日會 payoff 啦!