十五個月啦！

今個月最辛苦係唔肯食嘢同瞓得唔好。最大驚喜係佢聽得明多咗嘢！

瞓:
半夜依然會醒,因為係咁出牙。日間多數兩次 nap, 有時下午冇瞓夜晚都唔會扭計。試過佢八點至起身(我超開心!雖然半夜都有醒),就下午比佢瞓一次都 ok.

食:
今個月又病又出牙,攪到平時好好胃口㗎人仔唔肯食嘢,好在兩星期後好返。厭食時由得佢用手食,或餵佢,總之佢肯食就得啦,但學用匙羹方面,竟然都有少少進展。佢肯食返嘢時突然識"不"嘢。之前只係勉強"不"倒 yogurt, 但依家佢"不"倒飯/粉。但唔係次次肯用羹,基本上仲係多數用手食。。。
依舊早晚有媽奶嘆,一日三餐加兩次小食。不過媽奶越來越少,清晨比佢食其實只係我唔想咁早起身。
用鴨咀杯飲得好好,成日想學大人咁飲嘢,不過仲係倒瀉晒。。。

Potty training:
兩個月前開始去厠所便便。不過佢便便唔定時,一日有兩,三次,有時食食吓去,有時食完好耐都冇,所以成功率唔高。

活動能力:
終於識原地自己企起身,之前要扶 D 嘢至得,但睇得出佢有能力,只係唔知自己做倒,今個月終於得啦！
可以自己扶欄杆上樓梯,落就教咗佢要 bend 一隻腳落,依家開始識,但仲要我扶一扶。
行得好好,草地沙地,上斜落斜都行倒。

溝通:
仲係"牙""鴨"同一大堆 BB 話。亦唔識做手勢。。。
但聽得明好多嘢!
講"抹手"佢會申手出嚟;"攞本書過嚟我地睇書書"佢會行去攞;"過嚟啦","唔好攪"佢會聽話(希望繼續係咁！)出街佢一鬆手唔比我拖,我同佢講"拖實",佢多數都肯比我拖返。但係有時就唔肯,又要四圍走。。。

其他:
開始對動物有興趣,睇書唔再只係指住車車或轆轆
攞住隻公仔會攬攬錫錫,好鐘意咁,但好多時攬兩攬就掉佢落地
認得邊本書打邊本書
認得羊咩咩,狗狗,直升機, bulldozer, bus
"上堂"坐得定 D,不過都係要我捉住佢

第十二,十三隻牙

頭先同人仔玩,留意到佢又有兩隻牙出緊!上排左邊大牙同下排右邊大牙!今個月真係出唔停!

chocolate chip muffin (附食譜)

某日,我一朝早就煲湯煮 mum mum 又煲綠豆水芫荽水。中午整咗簡單午餐比自己。跟著又預備晚餐因為有人嚟食飯。煮開有癮,我仲整咗 D 蛋糕仔。見有包 chocolate chip 開咗,所以就整 chocolate chip muffin.

材料:
2 杯麵粉
1/2 杯 糖
3 茶匙 發粉
1/2 茶匙鹽
1 隻蛋
1 杯奶
1/3 杯油
3/4 杯 chocolate chip

造法:
1, 預熱焗爐 400 F.
2, 乾材料(材料1-4)拌勻備用。
3, 蛋,奶,油拌勻,慢慢加入乾材料。
4, 再拌入 chocolate chip.
5, 將麵糊倒進 muffin tin 內。
6, 放入焗爐焗 22-25 分鐘。

幼兒食譜~魚湯烏冬

又一個無飯餐!哈哈!今次係烏冬。我將烏冬剪短少少,易食 D. 不過我見過有人教小朋友啜烏冬,小朋友好快學識,仲食得好開心添!

我用咗剛煲好㗎魚湯嚟煮烏冬,好味好多呢！餸有三文魚, 津白同合掌瓜。我仲加咗紫菜,人仔都好鐘意食呢！

四歲自制力預測一生成敗?

以前聽過一個研究係比塊曲奇餅一 d 四歲㗎小朋友,但係就叫佢唔好食,睇吓佢地可以忍幾耐。最近聽收音機提到呢個研究,話 D 研究人員一直 follow D 小朋友,發現當年忍得耐 D 㗎小朋友學業成績同 standardized test 㗎成績比較好。於是研究人員就繼續 follow  D 人直至佢地 40 歲。個研究發現當年忍得口㗎小朋友㗎學歷,事業,什至健康都比忍唔倒既好!証明自制力對一個人㗎成敗有好大㗎影響!

其實都 make sense 嘅,自制力好 D 對成功應有 D 幫助。當你忍得唔去玩而去讀書,成績自然好 D; 當你忍倒唔食零食而走去做運動時,身體自然好 D。咁當然我相信凡事都有例外嘅。而且自制過頭又唔係一件好事,玩都唔玩一味死讀書;咩都唔食又狂做運動,咁咪仲衰。

研究人員又發現,忍得倒㗎小朋友有好多都用方法去引過自己對曲奇餅㗎注意力。例如佢地會踢吓腳,另轉身,什至同自己講塊唔係餅。。。咁如果個小朋友冇乜自制力,教佢地用方法去引開注意力,咁佢去又會唔會忍得耐 D?咁如果教咗佢地,而佢地又真係忍得耐 D, 咁對佢地將來㗎成敗會唔會有影響?呢 D 係研究人員依家研究㗎問題。

我覺得每個小朋友天生都有佢㗎個性。有 D 自制力好 D, 有 D 冇咁好。但係後天㗎培育都好重要。人仔天生屬於心急㗎人,我諗到佢大 D, 攞塊餅試佢,佢會係好快忍唔倒口要食批人。。。睇嚟我要研究吓點樣培養佢㗎自制力啦！

香蕉小蛋糕 (附食譜)

有一排冇焗過嘢啦,因為冇乜動力焗嘢。幾日前有幾條香蕉熟晒,我同人仔又有 D 咳唔食得蕉,於是攞嚟整蛋糕清咗佢。今次用呢個食譜,我仲懶靚咁學人放片香蕉上面做裝飾。點知片香蕉第二日黑咗,好樣衰。仲諗住請人食。。。算,自己清咗佢啦。。。

材料:
1 1/2 杯麵粉
1 茶匙泡打粉
1 茶匙梳打粉
1/2 杯糖
1 隻蛋
1/3 杯食油或牛油溶液
3 條香蕉 (壓成溶)

1, 預熱焗爐 350F.
2, 所有乾材料拌勻備用。
3, 蛋,油,香蕉溶拌勻,加入乾材料中拌勻。
4, 將麵糊倒入 muffin tin, 焗18-22 分鐘。

FTM 成日對住個仔玩 D 乜？

同個歲幾㗎人仔玩,唔一定要玩玩具。某日,我同人仔睇廣告紙。我仲興起,將 D 紙撕碎,人仔睇到嘻嘻笑。其實我有 D 後悔,因為清理個係我。。。

跟住佢發現佢心愛㗎車車,於是我撕佢出嚟比佢慢慢研究。

之後佢見倒佢更愛㗎車轆。。。

我仲同佢"講故仔"

"呢個轆賣 $39.95,呢個就 $44.95....."

講完故仔,仲要晌度自問自答。

扮人仔"媽媽,點解呢個平 D, 呢個貴 D 嘅？"
"哦,因為貴 D 個可以行唔同㗎路面。。。"

有時,我覺得我好無聊!哈哈。。。

有返胃口啦！

呢兩日人仔肯食多 D 嘢啦！雖然冇以前咁快咁多咩都塞入口,但已經好好啦！佢唔肯食嘢㗎時候,我冇刻意教佢用匙羹,由佢用手食或者餵佢,總之佢肯食就算。但琴日,佢竟然肯用匙羹,仲突然識"不"嘢,之前唔識㗎！當然佢依然係食到四圍都係,不過我都好開心呀！希望佢會繼續乖乖用匙羹食啦！我諗佢真係出牙加病病地所以唔食嘢。。。希望佢唔好再厭食啦！

小朋友唔食嘢真係好煩!花心機攪盡腦汁煮一大餐跟著仲要晌飯枱大戰一輪佢都可能只係食兩啖,然後仲要抹一大餐。。。同佢講依家唔食一陣餓都冇得食,佢又未必明。。。 我開始明白到有 D 小朋友唔食嘢,父母要長期抗戰係幾咁辛苦!

風琴薯仔

某日晌 FB 見倒呢個焗薯幾得意,於是我又試整吓。

將薯仔切薄片不過唔好切斷。然後夾入自己鐘意㗎餡料。我用咗火腿,其實用煙肉會幾正,不過屋企冇。仲加咗牛油同芝士(好肥呀！)用錫紙包好焗熟佢就得啦！

川貝雪梨羅漢果水

先排人仔同我都咳,於是我煲咗個川貝雪梨羅漢果水齊齊飲。佢初時唔係咁肯飲,於是我就同佢講,我飲你唔飲,我會好返先過你,哈哈!(我成日同佢講埋 D 無聊嘢!哈哈!)第二日佢就肯飲啦！

幼兒食譜~ 南瓜汁意粉

好耐冇整過南瓜比人仔食,今次整個南瓜汁意粉比佢試吓先!

首先將南瓜蒸熟壓成溶,再加奶煮成汁。

意粉煮淋,蔬菜肉類炒熟。

撈上南瓜汁即成。

花時間心機煮一輪,點知人仔唔多鐘意,晌度玩食物之餘,仲掟落地!我抹完又掟抹完又掟。唔食就算,唔好掟晒落地。激 c 我!希望佢只係出牙冇胃口啦！

幼兒食譜~其貌不揚小餃子

繼續整"無飯"餐比人仔,今次係自家餃子。

其實同平時包餃子冇乜分別,只不過係醃肉時無落調味。

今次仲自己整埋皮,因為我費事買一大包皮又冇時間包。

幼兒食譜~ 西蘭花薯仔忌廉湯

人仔鐘意食包包,某日,我就諗到可以整個湯比佢點包包食。於是整咗個西蘭花薯仔忌廉湯比佢。所謂忌廉,其實只不過係晌薯溶入面加牛奶。我仲落咗雞肉,有菜有肉有澱粉有奶類,係均衡㗎一餐。

佢雖然食晒包包,但 D 菜就仲有剩。以前佢好鐘意食"樹樹"(西蘭花)㗎。:(

我教人仔點包包落 D 湯度,攪到佢依家鐘意咩都放入去杯水入面。。。-_-

學嘢慢。。。定係有性格?

身邊唔少十四,五個月大㗎 BB 已經識講一 D 單字,但係人仔仲未講爸爸媽媽。最近連佢識講㗎牙同鴨都唔講,都唔知點解。佢又唔係唔識㗎喎。睇相問佢爸爸呢？佢識指。叫佢攞車車,佢識攞。又聽過佢發倒 D 音㗎喎,仲成日自己講 BB 話,但係就唔識晌適當時間講。

我覺得佢學嘢比較慢,特別係表達能力。佢出世冇耐就開始教佢 baby sign,但係到依家都仲未識。唔好話 baby sign, 連揮手佢都唔做。有時都唔知佢係唔識,定係有性格唔跟人做!哈哈!

教佢要掉轉頭爬落樓梯就由爬教到識行,學咗幾個月至識。入彩虹圈,我教教吓都冇教,但有一日做比佢睇,之後佢又跟住做。所以有時係急唔嚟,佢到時候就會自然識。

幼兒食譜~三文魚米餅

最近人仔唔係好肯食飯,又唔鐘意用匙羹,吓吓都落手食。剛見倒有個幼兒米餅食譜,試吓整嚟比人仔食先!

將飯煮好。蛋黃,魚肉碎加入飯中拌勻。

用羹"不"起放入煎 pan 煎至魚熟及米餅成塊。

第十一隻牙!

一係唔出,一係就連續係咁出。前幾日已經見想谷牙咁㗎樣,琴日終於見倒白色㗎牙仔出緊嚟！晌下排左邊,臼齒嚟㗎！

幼兒食譜~BB 蒸蛋黃

見幾位 blogger 媽媽整蒸蛋黃比 BB,我一路都想試整。最近人仔胃口唔好,我至"的"起心肝整比佢食。

其實都幾簡單易整:
一歲以下㗎 BB 唔適宜食蛋白,所以只用蛋黃,加配方奶,隔水蒸熟即可。

一歲以後如無敏感可以食埋蛋白。試過牛奶又 ok的話可將配方奶轉牛奶。

至於份量,我記得有個食譜㗎份量係一隻蛋黃加 30 mL 奶。我只係隨意落!

不再 Hea 煮~ 粟米魚柳爛飯

人仔一向食嘢又快又多,比咩食咩,次次清碗。但係最近,佢病咗加出牙以致胃口麻麻,所以出現唔肯食,食唔晒㗎情況。雖然佢依家好返,但係食嘢唔再好似以前咁快咁多。以往我只係將蔬菜肉類切粒煮熟,然後配飯仔或 pasta. 睇嚟我唔可以再咁 hea,要花 D 心思煮 D 好味又健康㗎 mum mum 比佢至得。

我參巧咗一 D blogger 媽媽㗎食譜,多謝你地無私㗎分享!首先我試整咗粟米魚柳爛飯。

粟米難消化,次次人仔食完之後都晌便便度見返成粒粟米。攪爛佢,易消化 D, 加 D 奶,仲可以煮成汁,撈飯撈意粉都得!

遊學回憶

早前香港某幼稚園辦遊學團去美國,收費萬萬聲,引來社會回響。我以為遊學團只係間幼稚園至有,原來我哥哥個女間都有。N 班學期尾會有新加坡遊學團。依家 D 小朋友認真把閉,三歲人仔就出國遊學。

我以前都去過一次遊學。當時我中五,學校史無前例地舉辦遊學團。兩位老師帶十六位學生去北京十四日。聽聞係僅只一次,後無來者,因為要老師帶十多位學生太吃力,所以之後㗎遊學團都同遊學機構合辦。咁又真係好吃力嘅,呢個病完到個病,十幾個女仔又鬧不和,落雨出去水浸攪到車死火。。。兩位老師身兼教導,領隊,醫護,調停,安排起居飲食等職責,既吃力壓力又大。

得意小玩具

人仔好多人錫,有好多叔叔姨姨哥哥姐姐耐不耐就送件玩具比佢。最近,收倒一件幾得意嘅玩具
叫做 rainball. 佢係一個波形㗎物體,中間空心,一邊有一個孔另一邊有幾個。

失落爸爸

人仔前兩日病病扭計。爸爸走去攬攬佢㗎時候,佢推開爸爸要媽媽,仲要唔係一次半次,係次次都係咁,攪攪到爸爸有 D 失落。冇法啦,爸爸又返工又返學,對住人仔㗎時間好少,咁佢當然痴我多 D 啦！(嘻嘻…我㗎努力冇白費 :p)

其實人仔都好鐘意爸爸㗎。同爸爸玩親都好開心,因為爸爸成日都有 D 新奇嘢同佢玩。次次問佢爸爸呢,佢就會走去個窗度望吓係咪爸爸返嚟。

第十隻牙!

剛見倒第九隻牙出緊,今日就見倒第十隻牙都出緊嚟啦！又係上排,晌左邊。

有人病咗。。。冇得去威。。。

上星期日知道有 Super Bowl party 之後開心咗成個星期,仲整埋小食。點知。。。人仔星期六病咗,冇胃口加發燒。

我星期六返工,老公就帶人仔去 D 親戚度。下午人仔已冇胃口,仲有 D 興。之後好似好少少。到夜晚返嚟,佢仲有 D 燒。晚餐都唔係好想食。呢個仔一向食嘢又快又多,比咩食咩。佢冇胃口的話一定係好唔舒服,陰公豬!好在夜晚佢都瞓倒。

簡易朱古力夾心 pretzel (附食譜)

一年一度㗎 Super Bowl 又嚟啦！今年晌朋友屋企有 Super Bowl party, 我極興奮!我以前成日睇 football, 依家冇咩機會睇。老公唔睇,我又要揍仔,都冇閑情睇囉。不過 Super Bowl 喎,點都要睇吓嘅！而且一班人睇真係好開心!

睇 Super Bowl, 當然要預備 D 零食啦。本來打算隨便買 D 薯片就算,不過我又點會放過呢個整嘢食㗎大好藉口!整完年糕,就整呢個非常容易㗎朱古力夾心 pretzel.

第九隻牙終於出啦！

人仔晌九個月大時一出出咗四隻牙。一歲未夠就有八隻,出得好快。但係之後一真都冇。直至依家十四個月大,終於見倒第九隻牙出嚟啦！晌上排右邊。先幾日佢半夜成日醒,可能係吽緊牙!