睇睇日曆，原來人仔已經兩歲半了！係時候記錄吓佢㗎成長進度。
食同瞓依舊，冇咩特別。呢排開始肯食綠色蔬菜，雖然唔係種種都肯食，不過已經好好了！
Potty training 依然冇進展。。。 佢識晌廁所 pee 好耐了，不過問親都話唔洗去。見人訓練㗎方法多數都係比佢著 training pants, 隔一陣就提佢去，濕幾次就識。。。 問題係，人仔唔肯著 training pants 喎，攞條車車低褲出嚟，愛車㗎佢令願著片都唔著低褲，問親佢有冇或者叫佢去廁所都唔肯，晌片度去咗又唔出聲。。。依家冇再話佢，仲成日鼓勵佢要同我講，又成日同佢洗腦話著低褲好舒服，某某(佢啲偶像)都係著低褲㗎。。。又繼續講道理解釋點解要晌廁所去，但佢依然係一 poo poo 就叫我行開。其實比之前好咗少少，耐唔中都會話比我聽佢去咗，同埋去咗片度佢都覺得唔舒服。之前好想就咁比佢唔著片，但係佢唔肯，我又唔想迫佢喎。。。 唔知幾時至攪得掂。
今個月小肌肉有明顯進步。用學習筷子用得唔錯，又多咗用匙羹同义，我諗之前佢咁鐘意用手食係完全掌握用餐具㗎技巧。大大細細㗎樽蓋唔太實嘅都擰倒，比盒盒裝飲品佢可以自己攪掂。除衫褲鞋袜可以自己攪掂，著鞋著褲就耐唔中至肯自己著，同埋要幫吓。另外開始踩倒幾吓三輪車。
無意發現問佢車、火車、馬騮、蘋果㗎英文係咩佢識答，不過調返轉講個英文問佢中文係咩又唔識答喎!哈哈！
做錯嘢開始肯講“對唔住”，多咗講“唔該”“謝謝”，但好多時都要提。
