Tuesday, December 27, 2016

三日兩夜 Palm Springs 遊 -- day 3

第三日食完早餐執好嘢就 check out 酒店,向 outlet 進發啦!
沿途經過有個公園有兩隻大恐龍。由於落緊雨,人仔又對恐龍冇乜興趣,所以晌車度影兩張相就算。

之後就去 Outlet 啦!今日大家都買倒嘢,好開心!二號差唔多成日晌 Stroller 入面,瞓多咗覺。

人仔就有得坐車,仲識咗個講廣東話㗎小朋友!佢哋晌一間舖玩咗好耐,估唔到之後晌另外兩間舖又見面!一見面就好開心咁跑嚟跑去!見佢有伴玩得開心,媽媽都 shop 得冇咁 guilty!
行到五點幾就離開,晌附近食完午餐就返屋企。成程車都落雨,感恩平安返到屋企。

三日兩夜 Palm Springs 遊 -- day 2

第二日朝早襯啲仔未起身就浸吓浴嘆吓。放假唔洗做家務又乘機嘆吓!
朝早攪掂就去坐纜車上山啦!見到個山又高又斜,其實我好啲驚,但人仔就好興奮!


上到山著好衫就出去玩雪啦!其實嗰日唔係好凍,好舒服。晌纜車站要行一條大斜路落山至有雪玩,好在地唔 icy,好安全。不過婆婆都係同二號留晌室內。

雪唔多,不過都玩倒。我哋都係掟吓雪球,砌吓雪人咁。

玩到十二點幾就行返上纜車站食午餐。食完又玩多轉。今次見有個叔叔同個仔玩掟雪球,人仔又加入玩埋一份!佢係好鍾意同其他人一齊玩,去咩地方都好識倒朋友仔一齊玩!

玩到三點就返去車站啦!我去餵二號,人仔就同婆婆飲熱朱古力。之後就坐返纜車落山。我又驚過。。。
坐落山,上車後兩個好快瞓咗。我就同婆婆遊車河,睇吓 Palm Springs 呢個小鎮。
佢哋醒就去食晚飯,之後返酒店。我見有人 gym, 又走去玩吓,好好享用吓酒店㗎設施!

之後同人仔沖涼瞓覺,咁又一日啦!

三日兩夜 Palm Springs 遊 -- day 1

每次婆婆嚟,都會揀個地方去旅行。今次揀咗 Palm Springs,因為想帶人仔上山玩雪,又有 outlet 比婆婆同我 shopping, 大家開心!
第一日攪到中午至開車出發。遲出發都好,兩位小朋友可以晌車午睡。
去到 outlet 附近食午餐。本來計劃第三日回程時至行街,費事帶住啲戰利品周圍去,但見 outlet 好大好吸引,於是決定行個圈。

行咗兩個鐘,平時難買倒嘢㗎我竟然買倒兩對鞋!終於可以掉咗啲爛鞋了!
四點幾天黑前離開繼續去酒店。沿途經過會見好多風力發電風車。之前同人仔晌圖書館借咗本講風力發電㗎書,所以佢一見到啲風車就大聲話“風力發電呀!”

去到酒店安頓好就去食嘢。拖住兩個費事走咁遠,只係晌酒店入面間餐廳食。酒店冇乜人,結果我哋包場!

Friday, December 16, 2016

二號十個月大!

二號九個月嗰時晌香港唔記得寫,咁快就十個月啦!


出咗四隻牙仔㗎佢食固體食得好好,一日三餐咩都食!再加三、四餐奶。食得多但只得十七磅。我一向都唔太緊張佢幾重,只要有增長就得。但呢兩個月增長少咗又跌到5%以下,可能郁得多。又有可能係吸收唔好,見佢有時食㗎嘢晌 poo poo 度見返,所以依家餵多啲奶,睇吓會唔會好啲。


又係瞓得麻麻地。日間瞓兩次,好多時都係半個鐘就喊醒。夜晚仲係會醒。。。 上星期有兩日好啲,叫幾聲就瞓返,我以為曙光初露,點知之後病,又成日喊醒要食吓人肉奶咀至瞓返。。。希望病好會好啲啦。

活動
絶對係一隻馬騮仔!換衫換片轉唔停,又瞓又爬又企。依家爬得好快,所以放佢㗎地方一定要安全。隻手又好快就會攞咗啲嘢,睇少眼都唔得!可以扶住啲嘢行。

溝通
好多嘢講,有時成日講 ma ma ma ba ba ba. 教緊手語,唔知幾時會做倒?好鍾意哥哥。我同哥哥做同一個動作,我做佢唔會笑,哥哥做就笑到哈哈聲!好鍾意玩 Peekaboo, 仲有掉嘢落地等人執!一般情況都肯比人抱,又鍾意玩,放佢去主日學佢唔會喊。

Wednesday, December 14, 2016

敏感兄弟

二號驗血報告出咗,驗出佢對 wheat、蛋白、花生、黃豆敏感。黃豆敏感非常輕微,另外三樣都屬輕微,希望佢大啲好啲啦!如果唔係,煮嘢比兩兄弟都幾煩!人仔對全蛋、奶、花生敏感。即係比塊 cheese pizza 佢哋,一個只可以食啲料,一個只可以食下面塊包!人仔最锺意食包、粉麵呢類食物,但二號唔食得,只可以食飯、米粉要兩個都食得安全開心,有啲難度!

Monday, December 12, 2016

又嚟!過敏反應!

人仔有濕疹同食物敏感,二號都有少少濕疹,不過輕微好多,以為佢會冇咩事,點知。。。

某日佢食完午餐,瞓咗一覺,跟住喊醒。同佢換片之後就放低佢自己玩。玩玩吓佢叫,就睇吓佢。嘩!成面又紅又腫,睇吓啲手腳好似出風癱咁一撻撻,又好痕,仲有兩聲咳,即刻帶佢去 urgent care.

醫生話佢有過敏反應,仲話口喉嚨有少少腫,跟住抽血,驗吓對咩過敏。到當日夜晚仲係眼腫腫,好陰功。

我懷疑係對 wheat 過敏。返香港前試過比少少包佢食,諗住食得包,去旅行方便好多,但食完之後佢就手肘成日有濕疹嗰個位痕,懷疑佢對麪粉敏感,所以唔比包佢食。過一排又試,覺得佢冇咩,跟住又試通粉,食咗幾粒,面有兩點紅,又冇咩嘢。事發當日就係食咗碗通粉,即時冇咩嘢,瞓完個覺至出事。

依家冇比任何 wheat product 佢食,我仲餵緊奶所以都戒口。即係唔食得我最鍾意㗎包包餅餅。。。佢㗎濕疹又真係好咗喎!希望驗血報告快啲出咁就至係對咩敏感。

Thursday, December 8, 2016

香港之旅--感想篇

讀萬卷書不如行萬里路
返完香港,明白到讀萬卷書不如行萬里路呢個道理,決定唔送人仔上 preschool 住,慳咗㗎學費用嚟去多幾次旅行!返學真係唔需要咁早,有得晌淡季去旅行就玩多幾次先!

遲返學,唔輸蝕
人仔未正返學,我又教得 hea, 學術嘢學得慢,數數字數到十之後就亂嚟,英文細階仲未識晒,又冇上咩興趣班。不過佢係一個算有禮貌會守規矩㗎小朋友。有時又會為人著想,食嘢預埋其他人嗰份。返香港眼見一啲小朋友冇禮貌,唔尊敬長輩。同其他小朋友玩又唔肯分享。四、五歲講嘢已經好 mean, 又咩都要贏,要其他人輸,可能係受競爭風氣影響。當然都有見過啲乖小朋友。始終覺得良好品德、正確價值觀要從小建立,呢啲嘢唔一定要返學學,家教身教更重要。