二號半歲!

過咗差唔多兩個星期至記得寫!哈哈！

半歲㗎佢重16磅，長25.5串，頭圍好似係16.5,繼續做細碼細頭 BB。

佢用哥哥一樣有濕疹，好在冇哥哥咁嚴重。醫生開咗藥，不過唔會揸，因為發覺啲藥係越揸越唔掂!

開始食糊仔啦！一心比佢試 baby led weaning. 所以等到半歲，坐得好啲，對食有興趣至試。第一樣係試蕃薯條，佢冇乜意欲攞，比佢攞住又唔會放入口，明明平時咩都放入口。。。又gag 咗兩次。都幾驚!之後又嘗試整難啲用匙羹比佢，佢又唔食。試咗幾日都係唔鐘意，見到一條條㗎食物冇意欲攞，但係見匙羹就會開口。終於我試吓整米糊，佢又好鐘意喎，我諗都係用返 traditional weaning。

活動能力唔錯，反身好快，又成日軍人式四圍爬，開始做到正式爬㗎姿勢，但未爬到。

多咗唔同㗎發音。之前成日講”L Ger",依家會講“um 咩”“ma",特別係有需要時就會"咩咩ma ma"。

一日兩至三次 nap,有時都會扭眼瞓。夜晚六點幾食完奶就瞓。半夜仲會起身，食一陣就瞓返。想訓練佢瞓過夜，試過兩次唔餵佢抱吓佢跟住放低佢，佢會瞓返，但唔係次次得。有時都係餵一餵佢容易啲。。。唉，我已經唔記得一覺瞓天光㗎感覺係點啦！

Overall 都係一個開心 BB，可能當年哥哥太難攪!佢一見到我就開心笑嗰個樣真係好可愛!雖然仲要餵夜奶，有時又扭眼瞓，但我都好珍惜佢細細粒手抱㗎時候，真係唔想佢大得咁快啊！

終於報咗10k!

琴晚一連報咗兩個 10K，一個晌10月，同呢邊啲媽媽一齊玩，另一個係11月晌香港跑!

媽媽會朋友幾星期前問有冇人有興趣，重燃我跑步㗎興致。呢兩個星期跑咗幾次之後決定報名玩吓。

香港有朋友練緊全馬，同佢傾傾吓講到不如11月我返香港時揾個 event 一齊跑吓。我哋揾倒個啱時間又未 full 㗎 10k, 於是報名一齊玩!

一連報兩個10k ,唔練唔得啦！

琴晚餵夜奶時發覺一邊塞咗，今朝又餵又泵都未通仲谷住，攪咗一輪準備出去跑個圈，點知人仔起身喊住要媽媽。安撫佢整埋早餐比佢，佢又話唔想媽媽出去跑步，好彩最後都肯。自己乖乖食早餐等老公可以瞓多陣。一波三折終於可以出去跑個圈。

今日跑多咗:
3.5 miles
36 min
10:18 min/mile

開始加長距離!其實跑跑吓都有啲攰，不過難得有得跑，就跑長少少，跑好少少!希望 10k 可以 sub 1hr!

努力跑!

好耐冇跑過啦! 依家跑步，最難係揾時間練。啲仔仲細好困身，又要餵夜奶攪到冇覺好瞓。最近有朋友揾人一齊跑 10 k, 攪到我都想跑吓。

今日返工，老公就帶咗啲仔去朋友屋企因為佢下午都要返。我放工返到屋企係冇人㗎!!呢啲千年難得一見㗎景象，我當然要好好把握!

2.15 mile
25 min
11:37 min/mile

竟然仲可以跑完全程，我諗平時晌屋企做㗎 interval 係有用喎!

雖然係慢，但係係好㗎開始!希望可以繼續努力!咁十月就可以跑個 10k 啦！

平機票!返香港!

最近聽見有五百幾蚊來回機票返香港，好平呀！攪到我拖住兩件都心郁郁想返香港。諗咗個幾星期，老公請倒假，安排好我返工㗎日子，終於 book 咗機票啦！

我有五年冇返過香港啦！我所有親戚都晌香港，雖然好想返，但一直覺得細路細，返去好煩。人仔以前成日唔瞓覺，喊又喊得大聲，所以唔敢同佢坐飛機。依家佢大咗，希望會好啲啦！

其實係要返吓去㗎啦，太耐冇見啲親戚同朋友。而人仔下年可能正式返學，咁就唔可以 low season 返。二號仲細，依家返去都煩，但我覺得一係就一歲前返，一係就等到三歲。一、兩歲嗰啲時候識行識走但又未係好懂事，塔嗰轉飛機會好辛苦。

今次遇著平機票，係時候返吓去啦！希望旅途順利啦！