學嘢慢。。。定係有性格?

身邊唔少十四,五個月大㗎 BB 已經識講一 D 單字,但係人仔仲未講爸爸媽媽。最近連佢識講㗎牙同鴨都唔講,都唔知點解。佢又唔係唔識㗎喎。睇相問佢爸爸呢？佢識指。叫佢攞車車,佢識攞。又聽過佢發倒 D 音㗎喎,仲成日自己講 BB 話,但係就唔識晌適當時間講。

我覺得佢學嘢比較慢,特別係表達能力。佢出世冇耐就開始教佢 baby sign,但係到依家都仲未識。唔好話 baby sign, 連揮手佢都唔做。有時都唔知佢係唔識,定係有性格唔跟人做!哈哈!

教佢要掉轉頭爬落樓梯就由爬教到識行,學咗幾個月至識。入彩虹圈,我教教吓都冇教,但有一日做比佢睇,之後佢又跟住做。所以有時係急唔嚟,佢到時候就會自然識。



我明白每個小朋友學習進度唔同,所以我暫時都唔太擔心佢未識講嘢。反而係 D 三姑六婆成日晌度問佢講嘢未,又話我要教佢,又話某某未夠一歲就講嘢(又唔見佢話邊個兩歲至講嘢!),跟住又話要戒片,又話要教佢乜乜物物,好煩!攪到我有 D 壓力。

都係我媽媽明理,佢會話男仔係慢少少,又會鼓勵我。依家佢要湊我哥哥兩個,我地成日講湊仔經,有時又閑話家常,關係比以前更好!始終都係媽媽好!

學嘢慢,就要補多 D 習啦！哈哈哈哈!