Monday, November 12, 2018

Legoland 兩日一夜遊

之前有人送咗幾張 Legoland 飛比我哋,見酒店有一晚平啲,於是就 book 埋酒店住一晚。某日人仔放學,我哋成家一齊接佢,跟住就直接去啦!之前冇同啲仔講,佢哋晌車度知道係去 Legoland 開心到不得了!
去到就入酒店,今次係住 Castle Hotel, 人仔好開心呢!晌酒店都好多嘢玩,有 treasure hunt, 有 playground, 有泳池, 有表演睇又有戲睇。啲人一開始唔去玩水,攪到食完嘢七點幾至話要玩水,雖然有暖水,不過都係凍。二號玩咗一陣我就同佢返房。

第二朝起身就去食早餐。酒店啲早晨又唔錯喎!食完就去玩啦!
嗰日唔多人,好多嘢排一陣隊就玩倒,仲可以玩幾次。有幾個地方有得砌 Lego, 佢哋玩得好開心!
我自己都鍾意 Legoland。唔多人又唔太大,可以玩倒好多嘢。就算兩歲㗎二號都有好多嘢玩。都唔明點解啲人成日話 Legoland 細唔好玩,又話三歲以下冇嘢玩。二號至少玩咗10樣嘢啊!唔迫人,玩都玩得舒服啲!
我哋應該好快又會再去㗎啦!

Friday, October 26, 2018

突如奇來的 5k

跑步 group 有朋友介紹呢個 5k, 近近哋,唔洗錢,嗰日又得閑,咪報名囉。
呢排跑少咗, 5k 前兩星期某日跑咗2 mile 幾,之後嗰日腳有啲酸痛。嘩,大濟,弱咗咁多,呢個5k 點算?唯有盡力練吓啦!30分內完成算啦。
當日天氣好好,用少少快但舒服㗎速度開始。
好快見到大牌寫住"1"。"咦,咁快1 mile 嘅。。。"繼續前進。
好快又見到"2",咁快又到2?仲有1 mile 咋,加速啦!
見倒 "3"啦,到啦!衝呀!
睇真啲,原來係3 km! 唔怪得咁快就到啦!
開快咗,仲有2km 喎,點捱呀。。。
啱啱有人晌前面阻住,回一回氣放慢少少先再繼續。
到4km 啦,仲有1k咋,捱埋佢呀!
咦,見到終點喎,開始衝呀!
咪住,原來要轉彎再跑又 u turn 返轉頭晌另一邊跑去終點。。。
跑跑吓聽倒有個阿叔同個妹妹講 "24:xx"
咦,24分幾,我遲出咁我可能可以25/26分完賽喎!
轉多個彎終於都見終點啦,衝呀!
衝線見大會個鐘 "24:xx"
睇吓自己個 app "7:52"。心諗個 app 又傻咗,只記錄咗7分鐘,等大會出時間啦。。。
再睇真啲,7:52 係 pace 啊!時間係 23:05。不過距離係 2.93 mile, 唔夠 3.1 mile。咁算唔算 PB 呢?

Saturday, October 20, 2018

關於我同跑步的20件事

寫"關於自己的30件事"㗎時候當然有諗到跑步,但跑步都有好多件事,所以寫多篇"關於我同跑步的20件事"。

1, 中學時代有跑田徑,多數跑400米,因為100/200 米唔夠人快,見400米冇人跑就跑。覺得好長好辛苦,當年阿 sir 話 400 米係短跑時有啲驚訝。

2, 冇受過咩訓練,但有機會代表學校出去比賽,當然冇贏啦。

3, 大學初時耐唔中會跑吓。之後冇跑一輪,跟著有一次諗住跑吓做吓運動,點知跑完腳酸痛,之後就停咗。

4, 讀 PT school 時覺得真係要做吓運動,開始去 gym, 之後天氣暖就出去跑步,覺得好舒服,咁就開始玩長跑。

5, 第一個5k 係04年。

6, 第一次跑超過1個鐘係因為迷路,之後發覺原來自己可以跑咁長,開始想試全馬。

7, 第一隻全馬係朋友幫我報的。

8, 鍾意 Asics 跑鞋。

9, 以前落雨都會跑,仲覺得自己好型。

10, 試過最凍華氏0度以下出去跑,係因為返工激氣所以想去跑個圈。但因為地結晒冰唔係好跑倒,個身暖唔倒,所以跑咗幾步就返屋企。

11, 以前長課鍾意食住軟糖跑。

12, 跑長途補給做得麻麻。跑完隻馬餓到顛!但係跑得慢,見好多蕉皮但冇得食因為比人食晒。

13, 有機會想去日本跑,同埋 Twin Cities Marathon, 因嗰度有一啲跑步回憶。

14, 想同朋友跑場馬拉松接力賽。

15, 依家鍾意跑5k, 唔需要花太多時間練,壓力又冇咩,而且鍾意有啲速度。

16, 生完仔好少跑,直至有朋友揾人一齊跑10 k 我至跑返。

17, 以前要 sign up 比賽迫自己跑,跟住訓練計劃練。依家有冇比賽都會跑吓,練咩隨意,但有比賽當然會 motivated 啲啦!

18, 希望5k 可以接近20分鐘頭。

19, 感恩好少傷 (可能跑得少)。但之前 plantar fasciitis 都攪咗一年有多,改咗跑姿好咗啲,最後發覺行同企㗎姿勢都好有影響,改咗之後好返晒。

20, 希望可以跑到老。

Friday, October 19, 2018

關於自己的30件小事

見愚太寫咗關於自己㗎小事,令我又想試吓寫,唔知會寫咗啲咩呢?

1, Morning person. 讀書時期令願早瞓,第二朝早啲起身讀書做功課都唔想捱夜。未生仔前生活好律,日日都係10點半瞓6點半起身。

2, 揸車好咋,考車考咗5次至考倒,感恩冇發生過大意外。只試過比人撞,同晌雪地失控。

3, 好鍾意自己揸車四圍去,可以自己連揸10多小時。揸車去過美國21個州。

4, 上一代港孩,大學至識買餸煮飯做家務。

5, 曾經好鍾意整甜品,但整得唔好, 失敗咗又要自己食返晒,慢慢就冇咁鍾意整。

6, 去美國頭兩年同朋友/家人住,之後自己住。

7, 晌美國住過6個州,8個城市。

8, 鍾意去牙醫度洗牙,洗完感覺好乾淨。

9, 綠茶控,鍾意綠茶飲/食品,仲有港式奶茶

10, 中學時係學校田徑同游泳校隊,雖然有出去比賽,不過冇受咩訓練。

11, 文科生誤打誤撞做咗物理治療師。其實中學時最好成績係人類生物同體育,做物理治療係好合理。當時真係唔知,仲要讀文科。

12, 中學體育科雖然高分,但完全唔識打波!依家會比仔笑我接唔倒波。

13, 毫無美術天份,只係識畫火柴人。

14, 自細有學芭蕾舞,之後學過 hip hop 同 Jazz, 其實好鍾意跳舞,但依家冇咩機會跳。

15, 鍾意唱歌跳舞,想試吓演歌舞劇。當然係當玩咁啦!

16, 唔鍾意買嘢,唔想擁有太多嘢,曾經希望自己少嘢到得兩隻喼,可以時拍埋走佬。

17, 唔鍾意細路,但唔知點解未結婚前已經會睇育兒節目。結婚後好快有咗,仲要做埋 stay home mom, 不過都好 enjoy 咁㗎生活。

18, 唔識打麻雀,唔識鋤大 D。

19, 冇咩扮靚心得,好少化妝。

20, 去秘魯旅行認識老公,一齊跟團行山 camping, 初見面就見到大家4日冇沖涼㗎樣。

21, 鍾意日本,覺得去好多次都唔夠,又會睇日劇同電視節目,自己學緊日文。

22, 想去睇星河,北極光,同天空之鏡。

23, 細個好男仔頭,鍾意玩男仔嘢。

24, 細個最鍾意咗動畫係 Cyber Formula。又會睇星矢,龍珠。最鍾意㗎漫畫係高橋陽一㗎作品,都係同運動有關。另外都鍾意將太的 sushi。

25, 細個會同哥哥打機,是但話一日係國際打機日跟著成日晌度打機。

26, 成日想種吓嘢,但種咩都 c。

27, 小時志願係做科學家。

28, 好眼淺,有時同仔睇故事書都會睇到眼濕濕。

29, 鍾意睇劇情片,特別係勵志,温暖人心嗰啲。曾經鍾意睇戰爭片,但睇完好心 up,依家好少睇。最唔鍾意恐怖片。

30, 睇書鍾意睇人物傳記,有興趣知唔同時期唔同地方㗎人㗎生活。


Thursday, October 18, 2018

Balance bike

前兩日睇返幾篇自己寫㗎 blog, 發覺有啲小朋友成長點滴唔記得咗,好彩有寫底。我要努力寫吓 blog,記錄多啲將來可以回憶吓!
上星期終於買咗 balance bike! 想買好耐,但之前仲諗緊回流,加上我個人唔鍾意買嘢,所以一直冇買。啱啱見屋企附近有人放二手,又平又近於是就買咗啦!
二號好鍾意,人仔都勉強可以玩兩玩。依家佢哋日日都要出 yard 玩,多咗好多 outdoor 活動時間!買架 bike 實在非常值得。希望遲啲可以揾倒㗎大啲㗎單車比人仔。我希望佢哋學識踩單車,仲有游水,咁就多好多嘢玩啦!

Friday, August 17, 2018

2018 暑假

話咁快就放完暑假啦!

上半場同佢哋晌屋企附近四圍去吓。去過科學館,農場,沙灘,圖書館,朋友屋企,公園,玩水,參觀消防局。。。

下半場就精彩囉!返咗香港,中間仲去咗日本!

今次返香港兩程機都係我自己一拖二,又唔辛苦喎,我仲睇咗好多電視添!

晌香港因為好熱,好多時都係晌屋企 hea,表姐妹就住隔離,而且有得睇電視有玩具玩,佢哋都唔係好想出街!最多就係落樓下玩水!

都有帶佢哋去玩吓嘅,佢哋最鍾意係 Lego Store 同波波池!

去日本幾日扶老幼,唔係去好多地方,二號仲要病咗,有一日我要同佢晌酒店過。好在酒店樓下就係大型商場又有便利店,我都有得去行個圈。咁都去咗我想去㗎鐵路博物館同温泉物語嘅。我鍾意日本,總之去咗都開心!哈哈!

返嚟時差都未攪掂就開學啦!

Friday, June 8, 2018

暑假第一天

放暑假第一日就約咗同學仔去廸士尼!第一日就玩到咁盡,之後仲可以玩咩呢?哈哈!
實在好多人,好在未算好熱。兩大四細朝九晚五,盡興而歸!返到屋企人仔仲叫朋友留低繼續玩!佢哋實在精力無窮!

Friday, June 1, 2018

Last day of school

話咁快就到 last day of school 啦!人仔咁就返咗一年學!

Wednesday, May 30, 2018

行山樂

Memorial Day 有以前教會朋友約行山,我哋反正冇節目,老公又要返工,我就帶兩隻馬騮行吓山啦!
假期好多人,我哋泊唔到入 park, 泊出面,要行一段路至入到 park。其中一個朋友個女十個月大,佢用個可以背 bb 㗎背囊背住個女, 睇見都辛苦。點知二號行咗幾步就話要抱,嗰刻我發覺我仲大濟。。。
我哋要行一段車路入去。由於我要抱住二號,其他人就好心幫我睇住人仔又僚佢玩吓。但可能人仔同佢哋唔熟,耐冇行山,又冇其他小朋友,所以有啲扭計。好在行咗一陣有朋友請佢食餅,咁佢就同人 friend 咗肯跟人行。
行入去微微上斜,有啲位要踩石過河,不過唔太難行,加上成程都好多樹蔭,所以幾好行,只係要抱住包廿幾磅㗎"米"。。。我耐唔中 tum 吓二號行,佢都有行少少嘅。

行吓行吓就到瀑布,佢哋有得玩水好開心。其實都係攞枝樹枝"了"吓的水,掟啲沙石落水,咁就覺得好好玩!


坐低食吓嘢影吓相,跟住人仔突然話急大大。。。要即刻走。其他朋友未準備好,我就唯有自己帶兩個先出發。
回程行得快啲,二號肯行多啲,見哥跑佢又跑但係又唔睇路攪到跌咗幾次又要扭抱。
行到出去即去廁所。去完見朋友們啱啱到,於是我哋一齊行返條車路出去。
行完一齊食 pizza, 兩個小朋友當然好開心!
今次人仔都好叻呀,自己行晒!雖然一開始有少少扭計,不過好快就同啲叔叔姨姨熟咗肯跟人行。好鍾意小朋友晌大自然玩,簡單得嚟又可以發掘好多新奇有趣㗎嘢!又可以一齊做吓運動!我抱住包"米"行運動量都唔少呀!要多啲帶佢哋行山至得!

Tuesday, May 29, 2018

Airport Day 2018

仲記得上年要推住 bb 車,今年唔洗啦!二號好鍾意飛機,所以佢好開心。人仔就鍾意車多啲,一去到唔肯上飛機,只肯上車。

今年有 show 睇,有警車直升機捉人, 消防直升機示範救火人,同小型飛機表演。

行行吓見到朋友仔,玩得好開心。
睇咗好多飛機,又有得坐上去,兩兄弟都玩得好開心呀!


Saturday, April 21, 2018

3日2夜 Legoland 之旅 -- day 3

第二朝起身我執嘢時啲仔就睇電視。細路嗰邊同大房分間,所以嘈唔到婆婆。跟住我帶兩個仔先去食早餐。人仔見到大堂㗎 Lego 又要砌,跟住排隊食早餐時突然又話去廁所。去完廁所再去排隊時二號開始扭計!我諗佢係好肚餓,因為由晌房時已經話要"食餐"。。。平時扭兩扭就冇嘢,今次就扭得勁囉!仲要瞓埋地!我叫人仔快啲是但攞啲嘢食,好在有個 kids section! 人仔有少不知所措,不過都出咗去攞。仲攞咗好多我平時唔會比佢哋食㗎七彩 cereal!一拖二遇著有人勁扭計真係頭痛!好在開始食嘢就冇嘢,只係出去攞嘢食煩啲啫。
食到七七八八婆婆就嚟。我返房執埋啲嘢,婆婆晌房睇住二號,人仔就幫我搬嘢上車,(呢個時候有啲掛住 c6, 因為見親搬行李嘅都係男人!)咁就去玩啦!
我哋先去水族館。二號對魚好似有啲興趣喎!人仔就只係對 Lego 有興趣!哈哈!
行咗個圈就入 Legoland. 今日人仔終於都玩揸車啦!仲一連玩咗九次!之後砌吓 Lego, 玩吓消防車,再過 castle 嗰邊玩吓,玩到關門至走!
人人都話 Legoland 好細一日玩完,我哋玩咗兩日都覺得唔夠啊!仲有 water park 未玩呢!
之後去 outlet 嗰邊食個簡單晚餐就揸車返屋企啦!晌車度個個瞓晒,我就晌寧靜㗎環境諗吓嘢,回味吓以前成日揸呢段公路㗎日子!

3日2夜 Legoland 之旅-- day 1&2

上個周末晌婆婆返香港之前我哋去咗 Legoland 玩!
星期五放學食完午餐就開車。個幾鐘就去到 outlet. 行一陣就食晚飯,之後就入附近間酒店。
第二日起身食完早餐就去 Lagoland 啦!啲人仔當然好開心啦!二號由出發開始就成日講"去 gagoland"!
入去坐吓火車直升機船仔,玩到三點幾人仔就話要去舖頭。可能係因為婆婆應承過買一盒比佢,所以就好想入去揀!四點幾去舖頭,買完嘢就 check-in 酒店。
今次好豪咁住 Legoland 酒店。唔好話小朋友,我都好期待呀!
酒店都好多嘢玩!有好多 Lego,有 treasure hunt, 有泳池入會有 disco music, 又有砌 Lego 比賽。。。連間房入面都有好多 Lego 飾同一盒 Lego 玩!
晚餐晌酒店食。個 buffet 都唔錯㗎,幾多嘢食。最賞佢有個 kids section, 張食物枱矮啲,小朋友都可以自己攞嘢食。
食完飯玩一陣就返房沖涼瞓覺。

Tuesday, April 17, 2018

二號兩歲兩個月

實在好懶寫 blog!上一篇二號兩歲,依家佢已經廿六個月啦!
食同瞓冇咩大分別,只係呢排冇咁飯桶,鍾意食包食 noodle 又肯食餃子,多完化咗少少。
講嘢溝通日日都有進步。可以講簡單句子不過文法未必啱。 e.g. 未哥哥出嚟,我抱爸爸, no 爸爸抱哥, no 坐拍拍(飛機)。。。
同佢講過馬路要拖住唔係會點呀?佢食答"偏 lo lo"!
問佢係咪曳?佢會答掟哥哥 gago (lego)
有啲音未發倒, e.g. Costco 講咗 cogco, Lego 講咗 gago.
有嘢唔對路 e.g. 著得唔好, 會話 "咁"。
同哥哥個性好唔同,佢古靈精怪有時答人專登講啲怪音,叫佢唔好做就越要做,比人話仲笑笑口。不過同佢去 mommy and me 又好定喎,但會扭抱唔跳舞唔做動作。呢樣同哥哥一樣。
Poo 咗會同我講㗎次數多咗,但仲係有時唔講問佢會話冇。啲片有兩款,波波同鯨魚,佢成日話 no 著波波片。不過講兩講佢又肯著。
有啲嘢要自己做, e.g. 上車, 扣安全帶, 我幫佢做就 no 媽媽。。。咁喊,有時又唔比人做佢做緊㗎嘢或者食緊㗎嘢,多多主見。心情好夠瞓唔肚餓時都會聽教唔會咁霸道,但有時會扭計大喊。
有時都好煩㗎,但乖嗰時又得意到不得了!呢個年紀係真係幾得意嘅!

Wednesday, February 21, 2018

二號兩歲了!

呢篇好耐之前開始寫,但拖咗好耐啊!

成日都好懶冇寫 blog!二號兩歲啦!依家好得意,唔記錄吓佢㗎成長我驚遲啲會唔記得佢兩歲嗰時係點啊!

依家成日練習講嘢,每日都講啲新字,成日跟我講單字, 琴日學我講"魚皮"。大約個幾月前開始加埋啲字咁講,第一個識講㗎 phase 係"咬 。 pat pat"!哈哈!依家會講"媽媽。咬","比。哥哥", "ng ng 媽媽 um" (媽媽唔好食), "爸爸抱抱", "媽媽。跑", "攞。bear bear", "帶。vroom 麻" (帶車), 波波被。。。

有人攪佢啲嘢佢會話"no no"。有時講嘢唔正, "鵝齊" (我砌), "蛋都" (蛋糕), "獲獲" (肉肉)。

成日激到阿哥札札跳,掟佢啲 Lego 或者做完啲 naughy 嘢會 "蝦夏" (哈哈) 兩聲好奸!都唔知佢晌邊度學返嚟。

觀察力幾好,有次準備食飯見我攞餸出嚟,主動放塊比我擺餸。算明白事理,有啲嘢我唔比,佢喊兩喊就停。有啲嘢佢唔鍾意,例如抽氣扇,吸塵機啲聲,會表示唔想開,但同佢解釋一吓又肯比我開。同一般兩歲㗎細路一樣好有主見,要自己關門,要自己扣 car seat....

一日一 nap, 夜晚8點幾睇到朝早6-7點。仲係要食人奶瞓,我諗佢食到3歲㗎啦!不過啲奶好有用,最近開始同哥揸,因佢正在 tsw, 揸嘢唔揸嘢都唔好,暫時人奶似乎係最好!

食嘢時多時少。如果啲飯餸唔係撈埋一碗的話,有時仲係成餐飯只食一樣嘢。依家好啲,佢會食幾樣嘢,食完一輪肉,跟住食菜,跟住食飯。。。 依家唔洗吓吓剪碎啲食物啦,可以成條菜食!除咗零食之外,同哥啲口味唔同,一個鍾意飯唔食 pasta, 一個鍾意 pasta ; 一個食肉唔食蛋同豆腐;一個唔食肉但食蛋同豆腐;一個好鍾意餃子一個掂都唔掂。。。

二號係一個奸奸地又鍾意攪攪震㗎小朋友,叫佢唔做就偏要做,仲要奸笑,做錯事繼續對住你笑唔會驚。但就冇哥咁硬頸,有啲嘢我堅持唔比,佢都識做唔會扭。佢同哥真係好唔同啊!

Friday, January 5, 2018

人仔五歲生日會

過咗差唔多成兩個月至寫返!第一次開生日會應該記錄吓!
一直冇幫佢開生日會,一兩歲時未識咩係生日,三歲去咗個短旅行,四歲剛從香港玩完返嚟,加上佢生日近 Thanksgiving, 有時有聚會就買個蛋糕唱首歌就算,我真係好懶啊!哈哈! 到今年本來冇諗住攪,不過佢某日突然話自己個生日會想請某某朋友,哈!當正會有生日會!咁去咁多朋友㗎生日會,都想有自己嘅,再加上下年可能已經回流咗,咁就攪個生日會比佢同朋友仔開心吓啦!
有諗過去公園攪,不過又要揾位又要搬嘢好唔方便,租場地又貴又多限制,結果都係晌屋企攪。都係屋企最好,又平又方便。初初老公都唔肯㗎,不過最後都應承!
我攪得好簡單,主要都係安排食物,整啲室外玩具比人玩。本來想租 bounce house, 但老公係咁話冇位。。。佈置都係掛啲 balloons。其實最重要都係有一班小朋友嚟一齊玩!
嗰朝當我哋忙於準備時, kitchen sink 突然漏水!好在老公話佢應該整倒,即刻叫啲人遲啲至嚟。最後只係遲個幾鐘開始,好在老公好 handy!
遲咗個幾鐘開始,好在大家都係好朋友,唔介意!我哋都係玩吓,食吓嘢,唱生日歌切蛋糕咁。啲小朋友當然玩得開心!玩咗幾個鐘,啲朋友開始走啦,最後有兩家人留低夜晚打埋邊爐至走。啲人走晒之後,老公一邊清潔一邊問,唔係年年攪㗎呵。實情係,人仔第二日已經講緊就嚟六歲嗰時再開生日會!