Basic muffin

坐月坐咗三個幾星期喇，精神好好多。早上見倒個好簡單架muffin 食譜，下午見人仔瞓得咁乖，就整muffin 喇！
材料好簡單，只係麵粉、糖、油、baking powder、奶、蛋、salt. 全部屋企都有。我用咗個 loaf pan 焗，費事浪費D muffin 杯紙。
今朝試咗一片，麻麻地，有D乾又冇咩味。唔怪得review 入面有D人會查牛油、果醬食。
下次改改D材料份量再試過！

Growth spurt?

昨日人仔唔知做咩，成日都冇乜點瞓。食完奶，換完片，掃完風，一放底就喊，瞓一瞓就醒，攪到大家都冇得休息，咩都做唔倒，仲有D frustrated。之前睇過D articles, 話BB三星期大，六星期大，三個月同六個月都有growth spurt. 佢會食多D同fussy D。唔知係咪因為咁，所以佢琴日咁難攪呢？
佢真係長大咗，出院時D newborn 衫有D大，依家啱啱好，過幾日可能唔啱著lu. 好在所有衫都係人地比(有好多，著唔晒)，我一件都冇買過，唔洗浪費！

兩星期後

人仔兩個幾星期大喇！

我一向作息定時，大肚後期更管住＂有得瞓就好瞓＂架精神，一早醒咗又再瞓，有時下午又小睡片刻，諗住生咗之後最辛苦就會係冇覺好瞓。點知第一個星期，我覺最辛苦係痛。傷口痛覺到行又痛，坐又痛，瞓底時轉身又痛，加上我嘗試埋身餵人奶，人仔食得唔好攪到我好痛。而且個人容易累。以前見倒碗就去即刻洗，地污漕就去抹，但係嗰時真係有心冇力

初時我地盡量比人奶佢食，但佢食唔好，唔夠飽，仲覺到dehydration，我地加formula又唔知加幾多，每次餵好耐但佢好快又扭要食。依家好好多。佢每餐大約食四、五安士。我每隔幾個鐘pump一次奶之後用bottle餵，唔夠至再加formula。佢食完，同佢掃完風，換完片之後多數都會乖乖瞓，雖然都至少攪個幾兩個鐘，但比之前好。不過每曰都至少有二、三次佢唔肯瞓，攪到差不多夠鐘食第二餐，真係激死⋯有時我諗係掃風掃得唔好，佢唔舒服。希望咁架情況會好轉喇！

改變人生的一天

十幾日前，bb出世，比預產期早咗九日。當日早上我地去接我媽機,佢話我個肚有D低，之後仲提醒我瞓覺時要好張床，同用成日紙尿片，以防穿水時攪到張床濕唒。於是嗰晚瞓覺，就用咗衞生巾同用張waterproof 架野住張床。

由於媽剛落機，所以佢下午休息，當晚我就同老公去食in and out,諗住遲D BB 出世之後就有排都冇得食。估唔到，當晚瞓到三點，我聽倒卜一聲，然後有少少水流出嚟，於是我去廁所，見係有D血水，但又唔係好多，唔似人地講咁好多水湧出嚟。但係我都打個電話去醫院，個護士叫我去醫院evaluate，於是我地就執野出去。

去到醫院換好衫，瞓底之後至有多D水流出嚟！真感恩！張床同架車，連我條褲都冇濕！護士証實我係穿水，BB 24小時內會出嚟喇！我地都知道有排等，所以老公車番媽返屋企休息。由於穿咗水，護士唔比我週圍行，所以我只係在床上休息。到九點幾，陣痛越來越強烈。十點幾打epidural.嘩！epidural原來係神仙藥！一打完有個陣痛都唔覺，而且打嗰時都唔係好痛，之前打IV仲痛，早知一早打喇!打完之後就繼續休息。

到兩點幾，陣痛又越來越強，如果冇epidural，都唔知點頂！三點幾開始push,到四點幾BB出世喇！push嗰陣真係好辛苦。好想停一停但D陣痛又好強烈。後來知道原來護士中途停咗藥，攪到後尾聯針時好辛苦。好多人一生完，聽倒BB喊聲會覺得低返晒。不過老實講，我一生完，第一個念頭係好辛苦，以後唔生喇！哈哈！