仔仔睡眠訓練2

人仔五個月大喇，佢㗎睡眠算有少少進步喇!之前佢成日醒，我諗其中一個原因係佢想反身但又未反倒。依家佢反得好快，仲好鐘意扒晌度瞓!

Day time nap: 日間㗎Nap 仲係唔定時。有時成日瞓得半個鐘，有時一瞓又可以瞓兩個鐘。之前試過跟住個nap schedule, 但係人仔成日唔肯瞓，攪到我成日就係攪佢瞓覺，所以我已經半放棄個nap schedule. 有時佢晌swing 度瞓咗都比佢繼續瞓，最多停咗個swing,難得佢瞓得著。

Bedtime routine: 每晚八點會同佢沖涼，之後食奶。有時佢食下食下會瞓咗，不過佢都可以食曬。之後同佢掃風然後放佢落床仔。通常佢都會好快瞓番。如果佢食完冇瞓又唔扭計的話，就同佢講故仔，之後放佢落床，捉住佢手仔等佢唔好拙眼R面，又會掃下佢額頭，同唱下瞓覺歌，佢大約會二十分鐘內瞓著。如果佢大喊，咁我就會開吸塵機，佢就會好快瞓。

Sleep through the night: 佢八、九點瞓。 通常我地十二點一點倒餵一次，跟住四、五點再餵。有一排佢成日醒，十點十一點醒、兩點三點醒、四點五點醒⋯⋯ 佢醒咗又瞓唔返，有時冇法就就餵佢令佢瞓。不過都盡量跟番一點同五點食。我地好想再將佢呢兩餐隔開D，什至cut 一餐。唔想佢慣咗半夜二點至四點𠴱段時間食嘢。呢幾晚開始有D成功!試過一點醒咗跟住瞓返，亦試過四點醒咗，我抱下佢同佢換片，之後放番佢落床，佢就瞓至六點幾!

綠茶小蛋糕（附食譜）

 

我一向都鐘意飲綠茶同食綠茶味㗎嘢，不論係蛋糕、麵包、雪糕、餅乾⋯⋯總之有綠茶就鐘意!

呢排想焗綠茶味㗎嘢，不過屋企D綠茶粉用晒。呢度唔多地方有得買，有都唔平。上網搵過又係貴，一細罐要廿幾蚊美金，唔捨得買。於是我趁阿哥過嚟，請媽媽買然後叫阿哥帶過嚟。

琴晚老公遲咗少少返，我就在等開飯時快快手整咗個綠茶小蛋糕。



易就易整，味道都唔差，不過我覺得綠茶味唔夠濃。
Ingredients:

• 1 cup flour
• 1/2 teaspoon baking soda
• 1/2 teaspoon sale
• 2 teaspoon green tea powder
• 1/2 cup white sugar
• 1/2 cup vegetable oil
• 1.5 egg
• 1/2 cup plain yogurt
• 3/4 teaspoon vanilla extract

Directions:

1. Preheat oven to 350 degrees F (175 degrees C). Sift together the all-purpose flour, baking soda, salt, and green tea powder; set aside.
2. In a large bowl, beat together sugar, oil, and eggs until smooth. Stir in vanilla. Beat in the flour mixture alternately with the yogurt, mixing just until incorporated. Pour batter into prepared muffin cup.
3. Bake in the preheated oven for 25 minutes, or until a toothpick inserted into the center of the cake comes out clean.

訪客

呢幾日好特別，因為阿哥阿嫂同一位朋友嚟探我地。雖然有D忙同攰，但係好開心。阿嫂同佢個同學去西雅圖conference，之後過嚟LA兩日，而我阿哥就請假過嚟。

阿哥星期四晩到。

星期五：我地中午去食In and Out, 跟住去咗BabyRus睇奶pump同買尿片（$14一大盒!好抵!）之後去Costco買ribs 同牛扒，同去Walmart 買乾果麪包。夜晚我地晌屋企焗ribs, 好正!

星期六：中午食越南嘢，之後老公去讀書，我地再去搵奶pump, 買咗之後同阿哥去Ross 買褲，我就幫老公買鞋。好少河係我等佢試褲!然後去咗Daiso 同Yogurtland. 又係其中一樣佢想食嘅嘢。返屋企之後阿哥去跑咗個歩，我都想去⋯⋯夜晚去咗食韓國嘢。我發覺好耐冇單獨同阿哥相處喇!以前由細玩到大，又一齊晌Madison讀書，依家各有家庭又一個住香港一個住美國，真係好難得可以同佢傾下計!

星期日：阿嫂同朋友中午到，老公同阿哥去接佢地。佢地又去咗食In and Out!之後老公買咗條越南包比我。我食完，攪掂埋人仔，就去咗Trader Joe, 因為個朋友係Trader Joe 架fans, 所以同咗佢去入貨!買完嘢，就一齊去食阿哥阿嫂好期待架wings! 

星期一：我地去咗Laguna Beach 同 Dana Point. 行下街去下海灘睇下風景咁。中午去咗間Diner食嘢，佢地仲叫咗milk shake! 飽到夜晚八點至去食韓國嘢。而我就因為要攪人仔瞓，自己又攰，所以冇去到。佢地食完飯仲去咗Ross 添!

星期二：去咗Pasadena. 無意中去咗我影結婚相㗎City Hall! 跟住又行下街，食下嘢，然後返屋企。我預備晚飯（煎扒），佢地就再去Ross諗住換D嘢，點知冇換到，仲買咗好多嘢!食完飯，佢地就出機場喇。

佢地嚟得真係好短。佢地晌度時間屋好熱鬧，又令我覺得好似以前讀college 𠴱陣同D friends 晌屋企hang out. 人仔都好開心因為成日有人同佢玩，又有得出街。依家佢地走咗，間屋好靜，好miss 佢地添!

失眠

唉，點解唔夠瞓都仲可以失眠? 

日間難得人仔瞓咗，我又冇咩嘢急住做，係大好瞓覺時間，但係有時「典」到人仔起身我都未瞓著⋯⋯

半夜比人仔整醒，攪一輪之後佢終於瞓番。我瞓落床，又要「典」一輪先瞓倒⋯⋯

一大清早佢醒咗，幫佢換下片，洗下臉，有時老公唔洗返工會抱佢出房，但係我又瞓唔番⋯⋯

點解?

我只想好好瞓一大覺!

就嚟五個月喇!

人仔就嚟五個月大喇!記下佢㗎進展先：

Gross motor development
前幾日開始可以自己坐。開頭只可以坐一、兩秒，今日已經可以坐倒十秒八秒!佢好鐘意企，腳仔好有力，可以bear weight。其實佢一個月倒已經得，當然我要扶住佢喇!頸都好有力，有時pull to sit 都冇head leg. 反身方面，兩面都試過反倒，不過佢好少反。由supine 到prone 只係反倒一次，仲要係扭緊計𠴱時反。

Fine motor development
手仔可以捉倒D細玩具，又可以攞住奶樽食奶，當然我仲要扶下喇!佢好努力咁練手眼協調，有時睇得出佢架depth perception 唔係好準。

食
一日六至七餐，每餐五至六安士，想餐餐六安不過佢有時會吐番D出嚟。清晨依然會埋身餵，盡量餵完放番佢上床仔，不過好多時都好攰，因為有時清晨𠴱餐變咗半夜⋯⋯

瞓
最令人頭痛㗎一項。nap time 仲係定唔倒。每晩九點放佢上床，唔再抱，只係捉住手仔，掃下額頭咁，平均要二十分鐘至瞓著，如果佢大喊，會出動吸塵機，佢一聽倒多數都會瞓。

講通
有時都幾多嘢講。有時同佢玩佢會笑出聲，不過我覺得佢唔係成日笑，係成日喊（多數係扭眼睏）⋯⋯ 而且望佢佢會令轉面，佢一路都係咁，唔知點解。

再戰慕斯（附檸檬慕斯食譜）

前日整個檸檬芝士蛋糕𠴱陣都知整得唔好，不過諗住只係自己食，所以冇再整過。點知老公好有心思咁整個surprise 比我。當我準備瞓覺時，有幾個朋友突然出現同我慶祝!老公仲預先攞咗個蛋糕出嚟，於是大家一齊食我個失敗蛋糕⋯

佢地食之前我已經＂備定案＂同佢地講話個蛋糕有D失敗。跟住一個朋友叉開件蛋糕𠴱陣見倒有一絲絲白白地色架野就話：「咦，有椰絲架喎!」我無奈咁答：「係D魚膠溶液冇完全混入，所以自己凝固咗⋯⋯」唉，真係樣衰⋯⋯

整咗慕斯/慕斯蛋糕幾次，失敗多過成功。一係就唔凝固，好似水咁，一係就食落似橡皮。只有一兩次好D。明明睇video見人整得好易咁，點解我整唔倒?我唔死心，決定再試！

今日整咗個檸檬慕斯，終於成功喇!希望下次整第二D味都成功!

好多慕斯食譜都用蛋，我唔想食生蛋，所以搵咗一陣至搵倒呢個食譜，快D記低先：

檸檬汁1/3杯
魚膠粉一包（2 1/4 茶匙）
水1/4杯
糖半杯
Heavy cream 1杯 （今次我用咗whipping cream, 仲用人手打!）

我將檸檬汁加糖，加魚膠粉同1/4杯水加熱至魚膠粉溶。cream打起，然後快加入魚膠粉溶液/檸檬汁混合物至完全拌勻。放入雪櫃大約兩小時就完成。

祝我生日快樂〜檸檬芝士蛋糕

唔知有冇人好似我咁儍，自己生日整個蛋糕比自己?我成日都想整蛋糕，想練習多D，但係無端白事整個蛋糕又驚冇人食。咁有人生日就係一大籍口比我整蛋糕。由於技術未到家，所以唔敢自薦整比朋友，唯有自己生日整下喇!哈哈!

今次整檸檬芝士蛋糕，係參考moon moon 個食譜。我諗我用得太少水溶魚膠粉，而且拌魚膠粉溶液入去時唔夠快手，所以個蛋糕唔夠滑⋯⋯ 好想再整過添⋯ 

紅莓燕麥曲奇（附食譜）

曲奇餅高糖份又高脂肪，絶對唔係健康食品。想食又唔想咁guilty, 唯有加D健康食材入去，而且自己整，可以落少D油同糖，咁食𠴱陣時，個心都安樂D，哈哈!自欺欺人!


紅莓(cranberry)有豐富維他命C、E、K。有硏究指食紅莓有助防止尿道炎、胃癌、牙周病等疾病，亦可能有助降低膽固醇。

燕麥含水溶性纖維有助降膽固醇。又有多種維他命同礦物質，非常有益。而且有D人仲話食燕麥可以增加媽媽奶，所以我依家差唔多朝朝都食!

尼兩種食物最健康㗎食法當然係煮咗D麥皮然後加D紅莓乾入去。我都鐘意咁食，不過更鐘意食曲奇餅！

百歲人

依家返工等於放假，因為老公幫手湊夜（雖然佢有幾次半夜攪唔掂，結果我都係要起身⋯⋯ ）有工返下生活會平𧗾D，唔洗24/7都係攪屋企嘢，仲可以有D額外收入!

琴日返工又遇倒100歲㗎病人!我見佢時都冇留意到，之後打note時至睇倒，如果之前睇倒，就可以請教下佢㗎養生之道!佢比好多人健康，PMH 得三、四樣。有好多比佢年輕㗎病人閑閑地都有十樣八樣!佢講同聽都冇咩問題，判斷力亦正常；可以自己落床，我只係扶一扶佢企起身，然後佢就用walker行；平衡力亦唔差，真係唔似100歲!

1912年出世，經歷過兩次世界大戰，人生經驗一定好豐富，如果可以同佢傾下計就好喇!

仔仔睡眠訓練

之前發現swaddling 令人仔瞓得定D，仲以為我可以從此有覺好瞓。點知由兩星期前開始，人仔每晚半夜醒幾次！初初仲以為佢growth spurt 半夜肚仔餓，但係冇理由三點餓、四點餓、五點又餓咁嘛!日間可以四個鐘食一次，冇理由夜晚要食咁密!於是開始睇好多關於嬰兒睡眠㗎文章。嬰兒睡眠有兩個stages，active sleep 同deep sleep. Active sleep 通常大約20分鐘，deep sleep大約三十分鐘，成個cycle大約五十分鐘。通常完咗一個cycle，人會醒一醒，不過好快瞓返，所以唔知自己醒過。有D BB醒咗唔識自己瞓返，咁就會喊。唔知人仔係唔係咁所以醒？無論係點，我都決定要訓練佢自己瞓，同改佢㗎睡眠壞習慣。依家定咗一D睡眠規則：

1. 有固定nap time 同 bed time。以前都係隨佢幾時瞓就幾時瞓，有時瞓多D，有時瞓少D。依家盡量定時帶佢去瞓，不過暫時佢都要一段時間至瞓倒，又有時瞓多有時瞓少。好多時都中間醒。

2. 有固定瞓覺地點。以前好多時都比佢晌swing度nap, 有時又比佢晌car seat 或BB 車度瞓。依家除咗出街之外，所有瞓覺時間都晌床仔。希望佢associate 倒在床上=瞓覺。

3. 有固定bed time routine. 八點幾沖涼，之後食奶，食完講估仔（佢安定的話）跟住瞓覺。講就易，做就難。次次都暗一論至瞓倒，有時瞓十分鐘就醒⋯⋯

4. 唔比佢一路啜奶一路瞓。依家就算埋身餵，佢食完就放返佢上床，唔比佢晌我身邊瞓，咪佢醒一醒又啜兩啖瞓。如果唔係佢會將食嘢同瞓覺associate 咗。

5. 唔抱住佢瞓。呢個係我個目標。依家都係要抱一抱佢，抱到佢一入睡就放佢上床，有時佢眼仔會睜一睜開但會瞓返，有時佢會醒咗然後喊，咁我又再抱。其實應該晌佢有睡意時就放佢上床，等佢晌床上自己瞓，不過佢未瞓著又眼睏時一定喊，咁耐只係試過一次佢自己瞓倒。我知有好多人用cry it out 㗎方法，即係由佢喊。人仔仲細，而且佢又長氣，又喊得大聲，如果由佢喊，我諗佢會喊到隔離屋投訴!

訓練咗兩個星期，佢依然會扭眼睏同扭抱。不過呢幾晚醒少咗，日間㗎nap 多數都可以自己瞓半個鐘或以上。係咪進步咗呢?最近有朋友話佢個女兩歲，半夜仲會扭計要抱⋯⋯ 睇尼我有排捱!

Circuit training

生完仔冇乜點做運動都好快瘦返，係有少少肚，同feel 倒abs 弱咗。老公間中見倒我個小肚，都提我要做運動。不過依家自己一個全職湊仔，週末又要返工，想出去跑個步都難。但係我有辨法!以前晌San Diego lunch time 㗎時候成日同D同事玩circuit training. 七至八個動作，每個做五十秒然後用十秒轉項，一個cycle 重覆三次，做完唔洗半個鐘。circuit training 可以練倒心肺功能、肌肉力量同肌肉耐力。可以因應自己需要同能力嚟設計program,所以好個人化。而且好多運動都唔需要特別工具，佔用地方亦唔大，晌屋企都做倒!啱晒我依家湊仔㗎生活!

今日我就揀咗七個動作：
Sit up on exercise ball
burpee
hamstrings workout on exercise ball
jumping jack
reverse abs
wall sit 
plank

襯人仔瞓緊時做，做完佢仲瞓緊!yeah!

士多啤梨蛋糕 (附食譜）

今個星期到士多啤梨減價，所以整咗個士多啤梨蛋糕。

1 1/2 杯麪粉
3/4 杯糖
1/2 茶匙鹽 
2 茶匙發粉
1/3 杯菜油
1 隻蛋
1/3 杯鮮奶
1 杯士多啤梨（切粒）

1, 預熱焗爐至350F。
2, 將麵粉、糖、鹽、發粉拌勻。
3, 將菜油、蛋、奶拌勻加入麵粉混合物拌勻。
4, 加入士多啤梨。
5, 放入焗盆，焗35至40分鐘。