不再 Hea 煮~ 粟米魚柳爛飯

人仔一向食嘢又快又多,比咩食咩,次次清碗。但係最近,佢病咗加出牙以致胃口麻麻,所以出現唔肯食,食唔晒㗎情況。雖然佢依家好返,但係食嘢唔再好似以前咁快咁多。以往我只係將蔬菜肉類切粒煮熟,然後配飯仔或 pasta. 睇嚟我唔可以再咁 hea,要花 D 心思煮 D 好味又健康㗎 mum mum 比佢至得。

我參巧咗一 D blogger 媽媽㗎食譜,多謝你地無私㗎分享!首先我試整咗粟米魚柳爛飯。

粟米難消化,次次人仔食完之後都晌便便度見返成粒粟米。攪爛佢,易消化 D, 加 D 奶,仲可以煮成汁,撈飯撈意粉都得!



材料:
粟米粒 (我用一條起粒), 牛奶/配方奶, 龍利柳半條, 雜菜 (今次我用咗洋蔥同翠肉瓜), 飯

造法:
1, 煮好爛飯。
2, 粟米蒸熟起粒,用攪拌機打成溶,加入奶造成汁。
3, 落少計油將雜菜及龍利柳炒熟。
4, 加入粟米汁煮滾。