失落爸爸

人仔前兩日病病扭計。爸爸走去攬攬佢㗎時候,佢推開爸爸要媽媽,仲要唔係一次半次,係次次都係咁,攪攪到爸爸有 D 失落。冇法啦,爸爸又返工又返學,對住人仔㗎時間好少,咁佢當然痴我多 D 啦！(嘻嘻…我㗎努力冇白費 :p)

其實人仔都好鐘意爸爸㗎。同爸爸玩親都好開心,因為爸爸成日都有 D 新奇嘢同佢玩。次次問佢爸爸呢,佢就會走去個窗度望吓係咪爸爸返嚟。

自己晌屋企湊雖然係悶,有時人仔扭計時又好煩。不過如果佢係比長輩或者工人姐姐凑,佢唔舒服要佢地抱而唔要我的話,我諗我會幾心痛!