二號 22 個月

咁快又一個月了!隨意記錄吓佢㗎成長。

講嘢有進步,越來越多單字。
切, 要, 借借, 蛋, 馬, 貓 (咩動物都話貓!), 鼻鼻, 掟, dum, 花花 (花草樹木都係花!), 係, go,

去圖書館終於唔亂跑,無掟晒啲書出嚟,會一本一本攞出嚟睇。平時晌屋企都鍾意睇書,會揀書比我同佢睇。

好似上個月佢去教會 nursery 同 bible class 會同我講 bye bye 自己入去唔再喊。唱遊開始會跟動作

多多主見成日唔合作,有時數123會做,不過呢招呢兩日又開始冇用。最煩係出門接哥時佢唔肯上 strollet, 攪一大輪終於上咗去, 坐坐吓又要出嚟要我抱。。。沖完涼又唔肯著衫,明明手腳凍冰冰都唔肯著。

好鍾意哥啲嘢。哥返咗學佢就要玩哥啲 Lego, 蓋哥張被, 攬佢啲公仔,坐佢個 car seat。

食嘢好咗少少, 試多咗嘢, 某日竟然同哥爭食西蘭花!但有時仲係有一樣嘢鍾意就成餐飯只係食嗰樣嘢。

呢排有時好早 nap, 送完哥返學跑完步10點就要"妮妮"瞓覺, 瞓到哥放學。之後如果下午冇 nap, 就會好痴身,但可以7點幾就瞓覺。如果下午 nap 咗又會夜瞓(9-10pm)。有時又會接完哥, 佢已經好攰冇食嘢就 nap, 瞓到3點至食嘢。最好都係11 點幾 nap, 瞓完食嘢。夜晚7點幾8點好快就瞓著。

跑出加州-Vegas 之旅 day 4

第四日朝早執嘢走啦！我朋友仲想買少少嘢,於是老公睇仔,放我出去同朋1買嘢！嘩!難得㗎自由時間啊！

我哋先去 Starbucks 買杯咖啡,跟著見有 begal 佢又去買返香港。之後就去超市買零食。買完返去執嘢,十一點走人。

佢要去一去 Apple store,本來好快,但人仔見有個 playground 想去玩,見二號瞓咗,我哋就比佢玩一陣。個 playground 幾得意,又有個小迷宮好好玩!二玩玩吓二號醒咗,本來諗住比佢放吓電,點知佢扭計唔肯玩。

之後去咗食午餐。朋友食過一次 in n out 竟然覺得唔好食。原因係佢食時係夜麻麻路途中晌車食,又唔知可以點 manu 以外㗎嘢。

我哋一齊食,包加 grilled onion, animal style fries,再自己整 lemon pepper 汁,幾個人一齊食有傾有講,即刻好食晒!

食飽就送佢去機場,我哋揸車返屋企。

回程經過 Seven Magic Mountains, 停下影吓相。啲人仔玩搬石掟石,跑嚟跑去玩得好開心!去 Vegas 呢啲五光十色㗎地方都冇咩點玩,反而嚟到曠野就係咁玩。不過其實我鍾意佢哋晌大自然環境玩,好簡單㗎天然嘢其實都好好玩。

跑出加州～ Vegas 之旅 day 3

第三日朋友要求朝早瞓多啲，我哋冇乜所謂，咪晌 apartment hea 吓囉！佢起身之後同我老公出去買零食手信。佢為咗練馬拉松，所以食得好健康，依家跑完，話要放肆吓!佢哋買咗啲香港冇㗎雪糕薯片汽水返嚟就開零食 Party! 最開心當然係人仔啦！一朝早就有得食雪糕。試咗少少之後執吓嘢，整吓嘢，佢當晚仲有場半馬，所以要預備吓。之後出去又食過!

我哋去咗佢好想食㗎 Shake Shack。都幾好味，不過以咁㗎價錢同環境，個包又以似冇咩特別。

之後去咗行 Trader Joe's 同 Sprouts 買手信同晚餐。到四點就要去返 strips 跑半馬。點知平時都幾塞車㗎 strips 因為路跑賽封路所以大塞車。賽事四點半開始但四點半我哋仲塞緊車!結果朋友五點至去到起點!!佢跑咁多次都只會早到，未試過會遲咁多!証明呢次係 Hea 跑!好在賽事人多出好耐，所以佢可以順利出發!

之前我都有諗過跑半馬，或者跑個10k, 不過太貴啦！好在冇咋，交通混亂人多車多，接送都好煩，又會攪到好夜。

佢跑時我哋就返 Apartment。整嘢比啲仔食，玩一陣跟住就攪佢哋瞓。老公去接返朋友返嚟。

啲人仔瞓晒本來好清靜，可以慢慢嘆晚餐,點知洗衣機漏水!即刻聯絡屋主。我朋友啲衫洗緊一半,成機泡,攪到佢要漏夜手洗衫。。。

21個月有多

又一個月，真快!呢個月講多咗嘢，雖然有時講唔正。講得最多係“bam bam" (餅餅)，某日食包時攞住塊包同我講 “抿”,一開頭我聽唔明，聽聽吓至知原來佢想我幫佢抿塊包。㩒制時會講 "do",聽到車響銨會講 “bib"。 琴日講麵麵，今日試講袜同褲不過唔正，就咁講應該冇人聽得明!

某日聽到佢 hum 哥音樂音啲歌，原來歲幾就識唱歌!

同哥哥多咗互動，去公園兩個追嚟追去，又一齊玩滑梯，佢哋 friend 㗎時候好開心，不過每日二號都會攪哥哥啲嘢攪到哥哥紮紮跳！

食嘢仲係麻麻地。新嘢唔鍾意試。一餐如果有一樣嘢佢好鍾意就只會食嗰樣嘢，其他嘢完全唔食。一般飯加剪碎㗎餸佢會食，但有時食食吓又會吐返出嚟。麵同麵包就一時時。依家水果都唔係咁鍾意食，最鍾意係餅同飯。湯都鍾意飲所以我都盡量煲。

一日瞓一覺，有時半個鐘有時個幾鐘。仲食要食奶或者晌車度至瞓得著。有得玩就會一直玩玩玩!夜晚八點瞓到朝早六點幾，有時清晨會醒一醒。

依家脾氣大咗，又開始有自己主見。出街唔鍾意坐 stroller 要自己行。跟住有時又要抱。今個星期仲要哥哥放假，帶晒佢哋去買嘢實在幾煩，成日多多要求又四圍走，買個餸都攪到耐，我諗成間超市啲人都聽倒我喝仔!!哈哈！

有時好想二號快啲大個，歲幾兩歲真係幾煩，但有時對住佢又覺得佢好得意，唔捨得佢大得太快，好矛盾啊！

跑出加州～ Vegas 之旅 Day 2

第二日一早去咗 Walmart 買啲嘢。之後去接機，接機後本來諗住去食午餐，但講講吓變咗去 expo。雖然我只係參加5k，但同一賽事仲有10k 半馬全馬，而且呢個係大型賽事，所以有大型 expo!

好耐冇去過呢啲 expo, 一開頭仲諗住攞一攞選手包再行個圈應該好快攪掂，點知行咗差唔多兩個鐘!我哋仲放咗個 Stroller 晌 apartment, 二號成日要我抱，唯有當負重訓練啦！

一開始攞選手包，跟住有好多贊助商㗎運動產品同大會紀念品賣。同埋有好多公司㗎 booth，有遊戲玩，禮物送，試飲試食試用等。我唔諗住買嘢，但朋友想買，所以我哋周圍行等埋佢。條比錢人龍長到呢。。。好在有好多嘢睇!最後大會嗰檔有張嘢比人簽名畫嘢，啲仔就係咁畫。

場内仲賣一件衫有晒所以參加者個名。我揾倒自己個名啊！不過丁屎咁細，哈哈！

行完 Expo 都兩點，二號已經不停講 “餅餅”,所以我哋都快快揾嘢食。

朋友話嚟到美國冇餐好，原來佢食咗好多麥記、Wendy's 呢啲 junk food, 咁當然唔好食啦！我哋要快，結果去咗 Blaze Pizza。佢話好好味呀，終於有啲好嘢食!

食完嘢就返 Apartment 換衫準備跑 5k 啦！

五點幾去到比賽場地，天黑晒，好多人啊！第一次跑咁多人㗎5k! 本來仲諗住半個鐘就跑完，點知排隊出都出咗半個鐘!早知排前啲啦！

我同朋友輕鬆地跑，中途影吓相咁，大約33分鐘跑完。

之後攞咗啲嘢就走。嗰晚仲有音樂會，我哋冇留低，一來要快快同老公細路會合食晚餐，二來人多地方我都係想快啲跑完走人!

晚餐去咗一個越南華僑介紹㗎越南餐廳。我好想叫碗熱粉食，但要就二號，佢食飯唔食粉麵，所以叫咗碟豬扒飯。從來唔鍾意食飯㗎我依家出街成日都要叫飯。。。啲食物真係唔錯，可惜我都唔可以慢慢品嘗。二號成餐飯晌度攪攪震，我都唔知自己食咗咩!哈哈！

食完就返 Apartment 沖涼瞓覺啦！

跑出加州～Vegas之旅 Day 1

Vegas 一向唔係我家杯茶，無端端會去係因為我有朋友從香港嚟參加紐約馬拉松。佢山長水遠嚟到當然玩多幾日啦，咁我就話如果佢去西岸，咁我哋可以一齊跑返場喎!佢就揀咗去 Vegas, 順便去吓 Grand Canyon。我哋冇咁多時間，所以只係去Vegas 同佢會合，同佢跑返場 5k.

星期五一早執完嘢就上路。

經過 Mad Greek Cafe 食午餐，下午三點到達。二號算合作，上車玩咗一陣跟住瞓咗兩個鐘，係食完午餐嗰程喊咗一輪。

我哋租 AIRBNB, 間 apartment 入面幾好，但外面感覺好雜，有諗過即刻揾另一個地方，但好在冇事發生。

晌屋度攪一輪，之後出去超市買啲嘢返 apartment 食，過簡單㗎一晚。

20 個月

又一個月了
依家好多時日間只瞓一次，每次一至兩個鐘。好多時喊醒唔夠瞓，但又瞓唔返。

食嘢時好時壞，有時食好多，有時咩都唔食。會揀食，依然鍾意飯同包，唔鍾意粉麵。對新食物冇乜興趣。

今個月講多咗幾個字。識講 bear bear, boo (可以係 book 或者抱)，指住自己條臭片講 boo boo，bye bye. 朝早爸爸返工會講 ba ba bye bye. BB 手語識做蘋果，瞓覺。見到人會揮手，不過佢矮，唔係人人見到!

會跑會跳，依家仲會由樓梯級跳落嚟，跳完仲拍手哈哈笑!好大膽!去公園爬架差啲跌親但係問佢好唔好玩佢會點頭，要唔要再玩又點頭。成日要爬滑梯，又試過調轉頭落，有時仲企晌滑梯中間，好大膽，唔知危險!跌親多數唔喊，笑笑口起身繼續跑。

仲係係字腳，所以有時 "kick" 倒。但上次見醫生話唔嚴重，應該慢慢會好，希望係啦！

上咗幾個星期游水堂。唔係見佢鍾意水都唔諗住帶佢上呀，因當年人仔上實在學唔到咩嘢。佢唔驚水係好好多!佢坐池邊拉佢落水，頭入水都唔驚仲好鍾意。上星期老師仲將佢放入水推比我!佢係鍾意水，不過好易凍，所以每次上大半堂佢就想上水!另一日人仔上堂我同佢坐池邊，佢會指住泳池同 mung 自己件衫想我同佢換衫落水!

依家成日測試我哋低線，所以我成日都提自己要堅持!有啲嘢之前唔夠堅持，例如冇晌 high chair 食飯，所以食飯會走開。依家堅持要佢坐好。識自己“不”嘢食，不過仲未做得好好。

鍾意 vroom (車), “共共” (火車), “拍拍” (直升機”， bear bear. 晌書度見到動物會錫佢同矣塊面落去。返 parenting class 鍾意玩 BB 公仔同廚房，依家開始會玩車。未識做動作，跳舞時要我抱，唔太鍾意做勞作，同哥一樣唔鍾意 hand print，(佢其實好少少)做唔到啲有紀念價值㗎勞作添。。。

寫住咁多先。。。

19 個月

又遲咗啦!成日都懶，但又想記錄吓二號㗎成長，因為頭兩年變得太快了！

日間一至兩 naps, 如果朝早遲咗瞓，下午就唔瞓，夜晚八點前瞓著。朝早六七點起身，半夜仲有醒，食吓奶又瞓返。成日覺得佢唔夠瞓，又唔易瞓著，好在佢又唔會太扭眼瞓。

大肌肉發展唔錯，識跑識跳了。仲係入字腳，不過醫生話唔太嚴重，希望大啲好啲。

哥哥報咗游泳班，本來唔諗住同佢報，因我覺得啲 mommy and me 游泳班冇乜用，當年哥哥上咗兩期大部分時間都係驚，攬住我。。。但見二號好鍾意玩水，於是同佢上一期睇吓會唔會唔同。暫時佢都玩得好開心，冇樹熊上身。

識講爸爸媽媽Mum mum 奶奶之外，今個月識講哥!依家會大叫哥想同佢玩!哥都鍾意同佢講嘢，因為佢有反應會點頭。好多時有人同佢講嘢佢會點頭。其實我覺得佢唔係時時明白，特別係啲人講英文。有時哥會整蠱佢，問佢係咪鍾意 poo poo , 咁佢又會點頭喎!

依然鍾意食飯，開始肯食少少粉麵。好多時晚餐己經跟大人食了，因連食兩餐一樣佢好多時都唔食，所以我只係中午煮 bb 餐。呢排早餐除咗 cereal 之外其他嘢好少食。有時又趕送哥返學，所以比啲 cereal 佢路上食。

二號算係易話為又唔硬頸(哥啲硬頸性格真攞命!)。有啲時間會扭計啲，但呢輪又好似好返啲。當然仲係成日攪攪震倒亂，有時激到哥扎扎跳!有時又好奸，明知你唔想佢做佢又會做。但佢都算係明道理㗎小孩。有時想攞哥手上㗎玩具，同佢講哥玩完至到佢，佢又會等唔會搶唔扭計，呢樣好難得，希望佢繼續佢咁啦！

哥哥正式返學了!

四歲半㗎人仔終於自己返學了!其實開咗學差唔多一個月，不過實在太懶，一直冇寫底!

人仔暫時好鍾意返學，除咗頭一星期有少少唔捨得之外，之後都係好開心咁走入去!好快就適應咗日日一早返學㗎新生活。佢又有鄰居朋友仔一齊，更加容易適應!

晌美國唔少細路都係四、五歲至正式返學。成日聽人講小朋友早啲返學早啲適應好，有人仲話兩歲開始返會喊，三歲開始都係喊，咁不如早啲開始等佢適應啦！但我覺得兩歲實在太早了!我諗大部分小朋友兩歲時都未係好 Ready 返學。眼見有小朋友兩歲開始返，到四歲時都仲係冇乜安全感。四、五歲獨立啲，適應力又強啲，社交能力好啲，返學會容易適應好多，可以真正享受校園生活。當然，呢邊啲學校亦 hea 啲，咁小朋友都返得開心啲!好興幸可以陪到人仔四歲至送佢返學!

人仔只係返上午幾個鐘，其實好快過，一開始我仲諗住可以做多啲嘢，但帶住個二號，有時咩都做唔到!哈哈！第一個星期仲慘，我病咗，又屙又發燒，好辛苦，咩都做唔到，只係可以做到接送，跟住就坐晌屋企望住佢哋倒亂!

佢返咗學，我就乘機跑多啲步!he he! 差唔多日日都推住二號去跑個圈順便 tum 佢瞓!下個星期開始會帶二號去上 Mommy and me class 同聖經班，到時又忙啲啦！

歲半了！

實在太懶，成三個月冇記錄過二號㗎成長!

瞓覺都係差唔多，夜晚八點幾瞓到四點幾，食吓奶又瞓到六點幾，但半夜仲會醒，救命!日間兩 naps, 晌車至會瞓，唔係就一直玩玩玩!冇以前咁醒瞓，晌車瞓咗搬佢上 stroller 多數都仲會繼續瞓。

開始跟大人食，口味成日轉，有時一餐飯有一樣嘢鍾意食就只係食嗰樣嘢，其他嘢唔食。呢期好鍾意西瓜，一見西瓜就要食，其他嘢乜都唔食!實在冇以前咁好心機煮咁多 BB 飯比佢，希望哥哥返學之後會好啲!

識做雀仔，魚，hello/ bye, 書，手勢。見動物會話“畫畫”，想啜奶食話“妮妮”，問佢好唔好、要唔要、係唔係會點頭。唔鍾意就搖頭。

奸豬一名，有時有人彈緊電子琴，佢會整熄個琴跟住望住人笑。我訓話緊哥時佢靜靜唔會攪攪震。成日一邊望住我一邊嘗試掂啲唔掂得㗎嘢睇我反應。

行得好快就嚟跑倒，行石仔路沙路草地上落斜都冇問題。可以唔扶嘢上落細級樓梯，大級有時都得!成日um 吓 um 吓 試跳。

好鍾意水，一星期去 splash pad 起碼三、四次，次次都好開心。落過一次泳池一啲都唔驚，不過頭冇浸入水。鍾意攞筆亂畫仲畫埋自己啲手腳，好在係 washable!

兩兄弟有時水溝油，多數都係弟弟攪哥哥啲嘢，激到哥哥紮紮跳，跟住哥哥大叫唔要弟。有時又好 sweet, 哥會問弟係咪想 xxx 係咪鍾意 xxx, 弟會點頭回應。但哥又好鍾意整蠱個弟!弟瞓咗就攪佢啲手腳什至整開佢對眼!希望佢哋大個會相親相愛啦！

隨心。隨意。三日兩夜 road trip

上兩星期一家人去咗個短旅行。呢排好熱，一直都唔知去邊度好，晌出發前一日至抽籤決定向北行，朝早 book 好住宿地方就出發!

第一晚揀咗間 RV 住。有得晌車屋瞓覺，人仔好開心!

嗰度係郊區，屋主有餵狗仔同七隻雞，佢哋仲放咗幾隻新鮮雞蛋比我哋，所以我哋早餐有新鮮 free range cage free 㗎雞蛋食!

隔離屋有馬，另一邊有羊，小朋友有動物睇好開心。

好鍾意呢間車屋，可惜佢第二晚 not available.

第二日我哋出發去沿海㗎公路。見有海灘就停吓玩吓。今次係二號第一次去海灘呢！

之後去咗一個碼頭旁邊食午餐,順便參觀吓個個 Discovery Center。跟住繼續上路，見有個地方有海獅睇又停低睇吓，估唔到有好多海獅呢！

睇完就繼續去一個聽聞好靚㗎境點。去到二號瞓咗，嗰度啱啱有婚禮，都唔係好睇倒境，行咗一陣就出發去住宿㗎地方。

呢晚係住 KOA 㗎 cabin。我哋只租倒最細冇廁所㗎 cabin。啲細路細，冇廁所實在唔方便，而且呢個 KOA 㗎廁所冇咁乾淨，冇下次了。

個 Campsite 有個大彈床同一啲小室外遊戲。

嗰晚好熱，間房又有啲污糟，所以我只想快啲走。其實以前我都鍾意 camping 又唔怕污糟，不過可能人大咗，又要照顧細路，所以冇咁鍾意 camping。

第二朝我哋去咗隔離個湖行個圈，環境好舒服!之後就回程返了。中途經過一間裝修特別㗎酒店，借個洗手間，再晌附近食啲嘢，就返揸幾個鍾車返屋企了。

今次第一次冇咩計劃地去旅行，沿途發掘有咩好玩有趣㗎地方，估唔到又幾好玩喎!

乳腺炎--餘波未了

乳腺炎好返晒，仲可以一家人去個三日兩夜短旅行，就晌最尾嗰朝，手臂有啲痕粒粒。我哋嗰幾日係去郊區住 cabin，我以為比嘢咬。點知啲粒粒越來越多，整整吓成身都係。好在其他人冇事!以為瞓一晚會好，點知第二日冇好到仲要發燒!於是又去 Urgent Care.

去到 Check-in 個護士都認得我!佢話我應該唔係比嘢咬，似係對 antibiotics 敏感。我食咗成個幾星期至發出嚟？

入去見醫生，佢好肯定咁講我係對 antibiotics 敏感。原來食咗咁多日至敏感都唔係罕見，我後來睇啲文章話有啲人食完幾個星期後至有過敏反應!咁都好，起碼乳腺炎好返先攪啲咁㗎嘢。

知道係 Antibiotics 敏感我都安樂啲，起碼唔係咩傳染病，最驚傳咗比啲細路!

睇完醫生攞咗藥就返屋企。其中一隻藥係口服類固醇!我就唔敢掂啦！人仔就係揸咗類固醇攪到啲皮膚越來越差!

老公帶咗啲仔去教會，我就晌屋企休息。發咗成日燒，差唔多冇離開過張床!到夜晚至好少少!

第二日冇發燒，不過仲係成身紅紅腫腫咁，不過感覺好好多，希望啲紅腫快啲退啦！

乳腺炎

估唔到，餵人奶餵到十六個月都仲會有乳腺炎!
星期一開始有少少痛，之後兩日再痛啲，仲發現有啲紅。星期四半夜痛到瞓唔倒，咁啱呢幾日二號瞓得唔好，攪到我半夜三點幾之後冇乜點瞓!朝早發現紅㗎地方擴大，又好痛。個人好攰，一開頭仲以為唔夠瞓。之後發燒又越來越攰，叫老公請假睇仔，我頂唔順!
早上瞓咗一小覺都仲係好攰發燒發冷，於是去睇醫生。
晌疹所即刻食止痛藥同打枝 Antibiotics. 跟住攞藥。成個過程都好辛苦好攰。
返屋企瞓足全日，好在老公都算攪得掂兩隻細路。
第二日好好多，但都聽醫生講返疹所 follow-up。紅㗎地方又擴散咗，於是醫生開多一隻抗生素比我。我唔鍾意食藥但冇法，唔食藥等陣啲菌繼續散出去就慘!
好彩有去 follow-up, 因為下午又發燒!可能第一隻抗生素殺唔倒啲菌。
之得慢慢好，退燒，冇咁痛，不過餵奶都仲係好痛。我盡量 pump 出嚟但 pump 好耐至有半安，其實我都唔知依家有幾多奶，但感覺好似唔係好出。
過咗五日都仲有少少痛，好似之前塞奶咁。想同二號戒奶㗎啦，但佢呢排瞓得唔好，一醒就要啜唔係就大喊，希望等我好返晒就慢慢戒啦！

Mammoth Lake 四日三夜半馬之旅

又去旅行啦！今次呢個係幾個月前計劃嘅。見好多跑友都跑馬遊世界，攪到我都好想試吓。全馬暫時冇可能練到，咁就玩半馬!想揾隻晌大自然環境中跑嘅半馬，揾咗一輪都冇邊隻啱。某日無意中晌 FB 見到呢隻半馬㗎宣傳片，一睇就好想去!日期 Ok，婆婆啱啱晌度，老公唔得閒我哋都可以去。車程五個幾鍾都 ok, 咁就報名。報完之後睇真啲至知隻半馬係晌 9000ft 落到 7000/ 8000 ft! 好甘呀!!都係志在參與睇吓風景，目標係順利轆落山!

星期五我同婆婆帶住兩隻馬騮出發。人仔啱啱有 skin infection,已經食緊抗生素，但未好，於是睇多次醫生，攞多啲藥，好在可以預期出發。帶住兩隻坐長途車預咗要停好多次，同埋有人不停問幾時到。最後六點幾到。到達後去超市買水同晚餐，之後入酒店。

星期六主要係要攞選手包。嗰度啲巴士係免費嘅，所以就一齊搭吓巴士。等吓車四圍行吓，咁就大半日。之前仲以為會涼，點知熱到不得了！夜晚食完晚餐就早早瞓覺!

星期日二號如常五點幾醒咗，我整返佢瞓再預備出發跑步。攪攪吓佢又醒咗，好在婆婆醒咗，我六點幾就出去等大會㗎巴士上山去起點。

上到山凍到震!兩旁仲有積雪，但知道會越跑越熱，所以除低件外套寄存，之後就震住咁等開跑。

mile 1: 開跑時已唔覺凍。慢慢跑，空氣稀薄都唔覺。
mile 2: 開始落斜，積雪好快冇晒，風景好靚!

mile 6: 落完斜，原來真正挑戰依家至開始!
mile 7-9: 又晒又熱。。。應該有7000ft, 實在唔易!

mile 10: 踩咗落水 tum, 成腳濕晒。。。
mile 11: 靠望住遠遠㗎雪山捱過
mile 12: 好長好長㗎一 mile
mile 13.1: 終於完成！

跑呢隻半馬仲辛苦過以前跑全馬!一嚟練習不足，二嚟晌高原又多落斜，三嚟天氣熱，最後一 mile 跌到12分一 mile! 不過完成倒都好開心!最正都係啲景，好靚好舒服!

跑完影吓相就返酒店休息。酒店就晌終點，非常方便!我咁啱嗰日開始“唔方便”，跑完瞓咗一陣，之後婆婆又瞓。hea 吓 hea 吓三點幾至上山揾雪玩。好在好快就揾倒一度好多雪玩又唔太凍。依家滑雪場仲開緊，仲有人滑緊雪。人仔好開心，二號人仔細細就第一次玩雪啦！

玩咗一輪就落山食晚飯，之後返酒店瞓覺。

第四日一早執好晒嘢 Check out, 然後晌附近食早餐，之後就上路啦！回程時快少少因為冇兜路停低睇醫生。最後都攪到五點幾至返到屋企。

今次旅程好特別又好開心，嗰度風景好靚，希望有機會再去！

驚喜的 Legoland 兩日一夜之旅

已經係兩星期前㗎事啦！婆婆過咗嚟探我哋，次次婆婆嚟都會揾個地方去吓住吓酒店，通常都係去 Outlet!今次一早計劃咗去另一個地方，但見人仔呢排好乖，又成日話想去 Legoland, 於是就襯佢未開學，比個驚喜佢!
之前一晚執定行李，只係同佢話會去 Outlet，有得住酒店佢已經好開心。佢知 Legoland 晌附近，不停話想去，本來諗住唔同佢講，第二朝去到比個驚喜佢，不過夜晚已經講吓講吓話咗比佢知。佢當然非常開心!
今年大個咗，多好多嘢玩，一入去就話要揸車，跟住又坐直升機，又坐船，又玩 Lego...

我同佢晌一個繩網㗎地區玩咗好耐，爬上爬落“sir"咗好多次長滑梯！

依家大個咗，有啲機動遊戲自己排隊自己玩！
二號就真係冇咩啱玩，瞓吓食吓行行企依掟吓 Lego 咁!不過有咁多嘢比佢睇都開心嘅!
啲人成日話 Legoland 好細好快玩完。我就覺得好好玩，玩多兩日都得!

Truck Adventure

已經係兩個星期前㗎活動啦！之前都聽過 truck adventure 呢個籌款活動，但唔近屋企又唔平所以冇去到。先一排發現屋企附近會有一次，見人仔呢排幾乖，而且佢實會好開心，所以就帶佢去睇啦！

去到當然見到有好多唔同㗎車啦，消防車、警車、巴士、泥頭車、挖泥車、旅行車、垃圾車。。。。

全部都可以比小朋友坐上去仲可以㩒吓啲制，所以啲嚮咹聲、bi bu 聲此起彼落，小朋友當然好開心!

有一樣嘢幾攪笑㗎係，美國啲小朋友有得上巴士係會好興奮，因為平時比較少機會坐!

玩咗一輪到中午時間。當日好晒好熱，我拖住兩個仔都熱到冇咩胃口。本來諗住晌 food truck 買薯仔漢堡包，但排好耐隊，於是走去雪糕車買雪糕食。人仔當然開心又驚喜啦，阿媽竟然比佢以雪糕代正餐，仲要一齊食!

行到兩點人哋都收工我哋至走!

Airport day

Railroad Day 之後嗰個星期六係 Airport Day， 又係又近又免費㗎好活動！

Airport Day 當然有好多唔同種類㗎小型飛機睇。跑道不停有小型飛機同直升機飛過。

有 Bounce house 同小火車比小朋友玩，仲有得玩遙控飛機。

二號冇咩啱玩，不過放佢出嚟行吓已經好開心。

今日一拖二，玩咗個上午就走啦！

二號十五個月大

瞓覺差唔多，有時半夜會醒吓，清晨醒就餵佢食吓奶。夜晚多數食奶瞓，日間坐車瞓，唔係唔會瞓。啲壞習慣唔知幾時改倒？

食嘢都係時多時少，口味會轉，例如之前好鍾意香蕉，但呢兩日一啖都唔食。開始比飯佢食，再加個 BB 餸。依然唔鍾意食粉麵。鍾意食白飯，有時只食飯唔食餸，但食多兩啖又肯食餸。開始想食大人嘢,比得嘅都會比吓。會用羹食不過唔係時時肯用。

行得好好，草地石地都行倒，當然仲會跌吓。之前驚沙，前兩日去公園有沙，佢又唔驚喎，仲玩得好開心!

手勢做倒 all done、無、奶、多啲。成日整佢豬咀，依家會自己整自己豬咀，攪笑係有次同佢睇書，一頁係隻豬，我同佢講豬，佢就做個豬咀動作。講開睇書，佢會攞本書比我然後坐晌我腳上想我讀比佢聽。不過每頁我講一兩個字佢就 turn page。

跟倒簡單指令，有次叫佢飲完奶放個杯入廚房，佢又跟住做喎。當然唔係次次聽得明，跟住做。

鍾意掟嘢，不過比以前好咗少少。掟咗嘢叫佢執返有時都會做。

由兩個月大開始同哥哥一齊返學，依家可以一齊玩。circle time 坐倒一陣，之後就攪攪震。佢處於鍾意摸嘢探索階段，當然唔會坐定定聽故事啦！好在佢好少大吵大鬧，唔會嘈倒人。

依家㗎佢真係好得意，雖然有時喊到我好煩，又要人抱，不過大部分時間都 ok, 肯自己玩。同佢玩又笑得好開心，我日日攬住佢(雖然佢好少定一定比我攬)，唔想佢大得咁快!

Railroad Day 2017

上星期六係一年一度㗎 Railroad Day。難得唔洗返工，當然要帶人仔去啦！本來都係一拖二去，但係落毛毛雨，於是留二號晌屋企比老公睇，我只帶人仔去，輕鬆好多呢！難得嘅“拍拖”時間，我同人仔都好開心!

一去到就見到朋友仔，人仔同佢哋坐火車，跟住入去參觀。

有好多唔同款，大大細細㗎火車模型，城市模型，最特別一個用 Lego 砌㗎火車同城市，砌得好靚好仔細，大廈入面都有人有家私!

當然有真正火車比人參觀。我哋入咗一架1946年㗎火車，有唔同車卡。人仔見到有一卡有張床墊，跟住話呢卡有得換片㗎!哈哈！

呢個 Railroad Day 好多嘢睇，希望下年可以帶埋二號嚟啦！

小農場早上遊

星期五參觀咗個小農場。去之前人仔不停話要坐 tractor,我同定佢講未必有，希望佢唔好失望。

去度真係冇，好彩行行吓見倒有一駕停咗晌度比佢摸吓睇吓。

嗰度唔大，但樣樣有啲，好多嘢睇。

有牛、羊、豬、雞、兔。。。有好多動物 BB 好得意。又見到難得一見㗎孔雀開屏！

有示範搾牛奶㗎地方。

仲有有好多唔同蔬菜，果樹。

同場加影路跑賽事終點線。呢個 weekend 有場大賽，咁啱晌隔離，唔跑都去睇吓影兩張相!