Wednesday, February 25, 2015

迷你芝士蛋糕 (附食譜)

情人節嗰晚我哋一家同教會朋友一大班人一齊打邊爐。嗰晚有廿幾個大人,六個小朋友,好熱鬧!
嗰晚除了幫手買吓嘢之外,仲整咗個甜品。今次整迷你芝士蛋糕,貪佢易整又容易運送。


材料:
Cream cheese 1包 (8oz)
糖 1/4 c
蛋 1 隻
餅底材料:
餅碎 1/2 c
牛油 2 Ts
糖 2 Ts
做法:
1,cream cheese 回室溫,mini muffin tin 放好蛋糕紙。
2,餅底材料拌勻,放入 mini muffin tin, 壓實。
3,cream cheese、糖、蛋拌勻,放入 muffin tin.
4, 放入已預熱 350 F 的焗爐,焗 15 分鐘。

Tuesday, February 24, 2015

人仔話

人仔耐唔中都會作啲詞出嚟,有時要諗一諗至知佢講咩,但係又 make sense 㗎喎,例如:
倒車:即係泥頭車,會倒泥沙㗎車。其實我覺得呢款車叫倒車比泥頭車更貼切。英文都叫 dump truck 啦!

轆轆車:即係混凝土車。叫轆轆車只係因為架車後面有個轉得㗎大轆轆。

蛋糕餅:某日我開咗個零食櫃,佢一邊指住盒餅,一邊話“蛋糕餅”。我諗咗一諗至明點解佢叫盒餅做蛋糕餅。之前我整芝士蛋糕就係用呢盒餅壓碎做餅底,於是佢就叫呢盒餅做“蛋糕餅”。

彈琴叔叔歌
人仔鐘意聽歌,最近老公揾倒個組合係網琴加大提琴,人仔叫呢個組合㗎歌做“彈琴叔叔歌”。

Monday, February 23, 2015

有朋自遠方來 2~ 愚太一家

幾個月前睇愚太 blog, 佢哋打算一家嚟美加玩,想睇吓有冇 blog 友住嚟邊。就係咁,我同佢聯絡上。
嚟 LA 當然要去迪士尼玩!首先去咗新開㗎 Frozen Fun.


有得玩真雪

當然唔少得同 Elsa, Anna 公主見面!不過人仔唔識欣賞,佢對後面塊窗更有興趣!

小朋友瞓咗㗎時候,我哋去 Carsland 行咗個圈。我想人仔大啲,明白套卡通,認識啲人物同個城鎮至入 Carsland, 到時佢一定好興奮!所以今次趁佢瞓咗就入 Carsland。

佢瞓緊㗎時候, "pin" (人仔將 McQueen講成 “pin”) 經過。

第一次坐定定睇巡遊,原來好精彩㗎!
我覺得單槓上面嗰兩位 cast members 好勁,係咁大回環!一開頭我仲諗會唔會係假人嚟㗎呢!


有人仔至愛車車。

睇完巡遊已差唔多天黑了,再玩多一陣我哋就走啦。

嗰日人仔好 cool, 又呆呆地,原來佢開始病了。。。之後嗰日我又病,就係年三十嗰日,所以原本計劃同愚太一家去 outlet, 我哋都去唔倒,好可惜呢!希望可以快啲再見佢哋啦!


Thursday, February 19, 2015

平淡的新年

上 FB 見好多朋友,特別係晌香港嘅,新年好多節目,好熱鬧好開心。而我呢,年三十同初一,都係晌屋企過。呢兩日本來都有啲節目嘅,可惜我同人仔都病咗。。 。年三十清晨,我無端端肚痛,跟住又屙又嘔。。。 我諗我食錯嘢,但唔知係咩。人仔呢就咳同流鼻水,年三十晚仲有少少燒。好在第二日已經冇燒,但都比平日攰,佢朝早瞓到差唔多九點,中午食咗少少粥,玩咗陣,就話玩完,要瞓,跟住又好快瞓著喎。平時邊會咁易瞓倒。希望佢快啲好返!

點都好啦,希望新一年大家都健健康康啦!

Friday, February 13, 2015

有朋自遠方來 1

呢排唔知點解,有幾個朋友不約而同地嚟 LA 玩!首先係一個晌 Bay Area 㗎朋友佢幾日前突然話 book 咗酒店,一家三口嚟玩三日。佢哋主要係去 Disney 玩,我只係同佢哋食咗餐飯。雖然只係一餐飯,但人仔同佢個女已經 friend 咗,之後仲手拖手行超市!

佢哋好快就走了,都冇機會見多次,不過大家咁近,我相信好快可以再見嘅!

Tuesday, February 10, 2015

手搓包~煉奶包

晌 FB 見有人整呢個煉奶包,好靚好好食咁,於是我又試吓整。今次用咗呢個食譜:

材料:
高筋麵粉200g
糖20g
鹽3g
即溶酵母粉3g
煉奶25g
牛奶130g
無鹽牛油20g
塗料 : 煉奶20g 無鹽牛油20g


未食時我以為會好甜,但原來都唔係太甜,有啲似甜餐包,唔揸嘢,就咁食都好好食。而且好鬆軟,唔怪得有人用同一個食譜整吐司都話好鬆軟好好食啦!

Monday, February 9, 2015

ABC

教英文字母都教咗一輪,其實只係 hea 住教,有靈感時就整啲小遊戲比佢晌玩之中學。




平時同佢睇書時有時又教吓,出街見倒啲牌有字母又指吓比佢睇咁。唔知幾會學識 26 個字母呢?

Thursday, February 5, 2015

收割

十月尾種咗幾棵西蘭花苗,雖然佢啲葉比蟲蛀咗好多,雖然我除咗淋吓水之外都冇乜點理佢,但都有一棵好靚仔,前兩日收割啦,仲即晚煮嚟食!
一開始種咗好耐都唔見有西蘭花,種咗成兩個幾月至有少少出嚟,終於種成三個幾月至有得食。開始覺得超市賣嘅,就算冇減價,都好抵!哈哈!
不過自己種係好有滿足感,又係一個好好㗎親子活動,睇吓嚟緊又種啲咩先。


Tuesday, February 3, 2015

26 個月

完全唔記得人仔已經 26 個月大啦!其實一歲之後,已經開始難數佢幾多個月大,過咗兩歲,直頭唔記得,次次都要數一數至知!
日日對住佢,覺得佢好似冇咩改變,但其實佢每日都學緊嘢㗎呢!
飲食:
比少咗 snack 之後,正餐食得好咗,肯食菜食飯。
睡眠:
繼續每日下午一 nap, 夜晚瞓十個鐘度。一唔夠瞓就好 cranky.
溝通:
有傾有講,多好多句子。依家佢想要一樣嘢,會要佢用句子講,仲有講唔該,成日要提佢講。佢有幾個好鐘意㗎故事,佢可以晌我提之下好簡單咁講個出嚟。
Separation anxiety:
人仔日日夜夜都同我一齊,以前我返工或者放佢去 church nursery 佢會喊。依家明白媽媽會返嚟,所以會講拜拜或者媽媽接,然後走去玩。
Potty training:
仲係間唔中可以晌廁所 pee pee. 自己唔會講。不過呢排開始講 “pee pee 緊”, 有時 poo poo 咗會唔舒服,肯即刻換片。
興趣
除了依舊大愛車車之外,都好鐘意音樂。成日要聽歌,依家開始唱倒一兩句歌詞。唱歌做倒好多動作。有首唔知咩歌,佢唱到好似講粗口咁!好鐘意攞住支 quad cane 當 mic stand 扭腰唱歌。又鐘意攞筷子打鼓。
生活技能:
自己除鞋襪,衫褲有時要幫,除出嚟嘅會自己放好,但有時提佢至放好。自己刷牙,不過我會補。提佢會幫手收碗碟,成日講邊啲會打爛邊啲 “冇打爛”(唔會打爛)。有時會幫手開飯。晚晚提佢執玩具,多數都會執。幫手攞餸,執嘢,抺地(成日抺兩抺又走咗去!)間中幫吓手煮嘢 (攪攪陣!)
學術
我 hea 住教,反正唔急住要學。顔色仲係亂晒,咩都話藍色!哈哈!數倒 123,但數量 concept 未識,只知好多、好少、或者冇晒。英文字母最叻係認個 A 字,一見倒會好開心咁指住講“A”,其他要提。

手搓包~吐司,粟米包,腸仔包,餐包

呢排繼續 keep 住整包,已經好耐冇出去買包了!

試整吐司,可能都係搓揉技術未夠好,發酵唔夠加模太大,所以整出嚟個樣一啲都唔似吐司。。。有機會要再試吓!


粟米包加腸仔包
今次整形整得開始似樣了!好開心呢!


餐包
用牛奶代替水,好香好軟呢!試咗幾個造型,仲嘗試整車形等人仔開心吓。可惜一啲都唔似,問人仔個包似咩,佢完全答唔出!哈哈!有咩方法整倒車形包呢?