四月雜記

成日都好懶冇寫嘢，睇吓相其實呢個月都去咗幾個地方玩，寫篇 blog 記錄吓都好。

第一個星期六去咗一個復活節活動。嗰朝我跑5k, 之後衝返屋企一拖二咁出去，趕到咩嘢食包括 BB 飯都冇帶!點知去到都係趕唔切執蛋，好在有得坐火車跳彈床，人仔玩得好開心，二號就扭咗一輪就瞓咗。

某日去咗科學館，第一次去，都幾多嘢睇，不過我覺得大部份展品都適合大個啲㗎小朋友。

某日去鄰居屋企執蛋，上次錯過咗，今次執個夠!

表弟生日，一齊去咗個室內 playground 玩。

有人介紹 Adventure Playground, 睇相好吸引，於是就去玩吓。呢個公園同一般唔同，有好多大舊 Lego, 遊樂設施，小小㗎圖書角，而人仔最鍾意㗎工程車周地都係，仲有挖土機可以挖泥水!玩到污糟邋遢又有水喉比人沖洗，設備唔錯。而且個 playground 有圍牆圍住，唔驚啲細路走失。

某日去公園玩，哥哥推弟弟。如果你哋時時刻刻都咁相親相愛就好了!

二號十四個月大

好快就十四個月大了！

體重唔知有冇廿磅，繼續係細頭細身細碼 B。食嘢都唔差嘅，係病㗎時候會好 picky, 好多嘢都唔食，又食好少。不過我唔迫佢食，唔想佢驚對食嘢反感。唔為食，見人食嘢唔會想食，比啲新嘢佢就多數唔食。

呢兩日開始有興趣自己攞匙羹食，當然係食到四圍都係啦，不過係好㗎開始。

一日兩次小睡。不過如果朝早十一點幾至瞓，有時會瞓到兩點，咁就到夜晚至瞓。半夜清晨仲會醒，盡量唔餵奶，不過有時朝早四、五點真係好攰，咁就比佢食住一齊瞓。

十三個月開始行，到依家十四個月行得穩咗，好少爬啦！成日見個細粒人行嚟行去好過癮!爬上爬落好快，一轉頭就爬上枱!去公園會自己爬上樓梯跟住轉身扒住 "sir" 滑梯。

識做少少手勢。食完嘢會做 "all done"，想出嚟會摸吓個 high chair/ car seat 扣。有時跟倒簡單指令，例如放低手上㗎嘢。開始多要求，有脾氣，不過尚算易話為，只係坐唔定、抱唔定呢樣比較煩。依家盡量比佢多活動，自由啲，比佢玩個夠，希望大啲會定啲啦！

馬場5k

星期六跟啲朋友一齊跑咗個5k。今次認真啲，因為想試吓破自己記錄。個記錄係十多年前仲讀緊書㗎時候創嘅，嗰時跑多好多，但冇認真練速度。依家冇時間跑咁多，反而多咗練速度，因為要快快跑完返屋企湊仔嘛！

呢個5k 晌馬場同側邊個公園跑，開跑會經過個閘，好似跑馬啲馬出閘咁，好攪笑!

經過個公園幾靚，有朋友仲見到孔雀開屏!尾段入馬場跑沙地，我已經有啲冇氣想放慢，但係都堅持盡力衝埋佢。結果 25：38, 比記錄慢十幾秒，不過已經快過平時練習了！

嗰度仲有一啲 Kid races 同小朋友活動，可惜太早人仔起唔到身去。所以我都係急急腳返屋企同啲仔出去玩!

依家要備戰六月㗎半馬了!