平淡是福

前兩個星期真係覺得好鬼悶,上個星期就突然間好充實,攪到我 blog 都睇/打少咗！

首先,人仔病好,我又可以同佢去"上堂"。而老公又唔洗返學唔洗 OT,竟然可以成個星期都返屋企食飯。好耐冇試過啦！人仔夜晚可以同爸爸玩,我又可以同老公傾吓計,咁至似一家人今麻。除止以外,我又約倒人食個 lunch, 星期六又返工,星期日就請咗朋友嚟食晚飯,生活突然充實咗！

雖然係開心,不過,星期五晚㗎地震真係幾驚!晚我洗緊碗,突然震咗一震,係3 點幾級。震完之後我即放多兩條片入個 diaper bag! 哈哈!以備不時之需!個咗阿媽之後,最擔心㗎都係仔女㗎需要!之後我同人仔沖涼瞓覺,就晌我同佢講緊故事㗎時候又震!次成 5.1 級!我既刻抱住人仔,老公就衝咗入嚟,佢話見倒成塊玻璃晌度搖!好驚會成塊打爛!我地住得幾近震央,我未經歷過咁㗎地震!之後成晚都耐唔中就震一次,我成晚都瞓得唔好,個腦要一路唱詩歌至瞓倒。5.1 級已經搖得咁緊要,震勁 D 咪咩都 "lum"? 最驚㗎係冇人知幾時會再震!其實已經過咗兩日,但仍然耐唔中又震一震,依家一路打都有 D 驚!

依家發覺,過住平平淡淡,沉沉悶悶㗎日子,係福氣嚟㗎！希望唔好再震啦！

十六個月啦！

今個月㗎大轉變係戒人奶同戒臨瞓奶奶,同轉瞓一次午睡。用匙羹食飯同聽指令大有進步。但去厠所 poo poo 同講嘢就零進展。。。

食:
三餐加小食, 轉返飲 rice milk. 懷疑對幾樣食物敏感,所以繼續分開煮比佢,雖然佢好鐘意食大人嘢!
用匙羹漸入佳境,等我另開一個 post 講。
用杯仲努力緊。有時唔肯飲,病又要多飲水,所以間中仲有比奶樽。。。呢兩日冇啦,希望可以繼續!

瞓:
轉一次午睡,多數係食完午餐後。
晚上九點幾瞓著後到七八點醒!冇啜奶之後瞓長咗！中間醒幾次不過好快瞓返。

溝通:
只講 BB 話,今個月連"鴨"同"牙"都冇埋。。。
聽得明多咗。叫佢比 xx 爸爸,佢會做,將 xx 擺返好佢有時做。可以叫佢做跑腿啦！
叫佢錫錫 xx 佢會去錫!

Potty training:
零進展!定時同佢去,佢轉第二個時間去。谷緊足佢去,佢去咗一半都停,包返片再去。。。 激 c。
同佢講換片片佢會掉頭走,明明已經一大包尿尿屎屎都走。。。
我諗佢有排至介倒片。。。

活動:
識落樓梯,拖一拖佢或者佢自己扶 rail 都得。
某日我示範跳,佢就跟我 "un"。
爬高爬低越來越叻,幸好仲係小心型,但已開始大膽!

其他:
睇書時叫佢指某物件佢好多時都指得出,不過有時都係亂指!哈哈!
睇書見動物會錫埋去!
鐘意叠嘢同砌類似 lego㗎積木。
飲/食完嘢會比隻杯/碗比我。

媽奶工廠光榮結業

本來諗住餵人奶餵到一歲,但係一直唔捨得,結果餵到十五個幾月!其實一直餵仲有幾個原因:
1, 清晨或半夜三更佢醒咗攪佢唔掂,就可以抱佢埋身邊瞓邊餵!
2, 原本打算九月返香港,咁晌飛機佢喊到拆天就可以用啜奶呢個武器嚟 "卜"暈佢！

依家唔打算返香港啦,所以唔需要 keep 住個武器。決定唔返香港之後,都仲餵咗一輪,因為真係唔捨得啊!但我明白到如果依家唔戒遲 D 戒就會辛苦 D, 而且我會更唔捨得!咁我就停咗冇埋身餵,但 keep 住一日泵一次 (其實只得一兩安!)。佢第一,二朝指住張床(嘆奶地點)喊咗幾喊,到第三朝我忍不住餵佢點知佢咬咗我一啖！呢次應該係最後一次!

之後我同佢戒牛奶轉飲 rice milk, 濕疹好咗,咁我就連泵出嚟㗎人奶都唔比佢飲,因為佢對幾樣嘢敏感,我唔想戒口只係為咗比一安奶佢。其實我仲想泵吓,總係覺得 keep 住有奶會好 D 咁,但既然佢唔飲得,我泵嚟都冇用。。。咁就停咗泵啦！

諗返餵人奶㗎日子,真係有血有淚!初初唔識餵,人仔又唔識食,攪到 dehydration. 佢食奶又食到我好痛,好在有奶泵,如果唔係我頭個星期就收檔啦！初初泵半小時都係得一安,到後來一次出五,六安可以全人奶,好滿足!中間經歷過泵出血,塞奶等奶媽必經路。到後其餵奶變成我同人仔㗎親密時刻。。。 依家人仔再唔係小 baby 啦！媽媽唔可以再唔捨得,要放手,同你一齊成長啦！

濕疹元兇?

人仔自三個月起就有濕疹,時好時壞。初時係晌面仔,後來靚仔返,但一歲後腳仔就又痕又紅,成日 "R" 損。用過好多唔同㗎潤膚膏都冇用。試過沖芫荽水同金銀花水,夜晚沖完第二朝好咗,但之後又紅過。同佢揸過椰子油,頭一,兩日好少少,之後就仲乾。

佢幾個月大食人奶㗎時候我試過戒牛奶,但又冇咩大好轉,可能係因為佢都有食奶粉,而奶粉係 milk base. 當時我提出話想同佢試 Hypoallergenic 隻,但有人話唔好咁就佢,等佢身體自己適應喎。。。 咩 theory。。。

到佢食得 soild 時,一開頭我都唔比佢食奶類食品。有一次有人比咗少少 pizza 佢食,夜晚佢腳仔有少少紅,我懷疑佢對芝士敏感。後來冇比,但佢隻腳依然有紅,我以為唔關奶類食物事,於是慢慢比佢試奶類食物。依家諗返其實可能佢又有食到黃豆類或蛋類食物所以隻腳一直紅。有一輪我比佢試 rice milk 都冇咩好轉,可能又係因為冇戒其他致敏食物。於是我就比返牛奶佢,因為 rice milk 唔夠脂肪,又好似比較多糖分。。。

佢隻腳痕痕剛剛係天氣開始乾燥時。濕度高 D 好似冇咁差。於是我努力同佢保濕,又用放濕機,但唔能完全改善問題。

雖然同佢戒過奶都冇大好轉,但我總係覺得佢可能對奶敏感,於是我再次同佢戒牛奶,轉飲 rice milk. 今次仲戒埋人奶 (其實好唔捨得!),咁我唔洗戒咁多嘢 :p

第一日已經好轉,我相信佢真係對牛奶敏感!依家戒晒蛋,黃豆同牛奶,連有蛋有奶㗎包都唔比佢食。情況真係好好多!唉,如果我一直小心 D, 佢就唔洗痕得咁辛苦啦！希望戒晒奶,黃豆同蛋,佢會好返啦！

自學樂趣

我發覺我教人仔嘢,佢通常都唔理我,但係佢自己玩玩吓就會學倒,佢仲會沾沾自喜,好滿足咁。

我知道歲幾應該識叠積木,於是我幾個月前就示範比人仔睇,嘗試教佢。但係每次佢都會推倒 D 積木,仲推得好興奮!咁我就冇刻意去教佢。最近,我見佢好鐘意將 D 嘢叠高,車車,鴨鴨,船船。。。平嘅唔平嘅,咩都叠一餐。有時成功咁將兩樣嘢叠起,佢就會開心笑笑,同吖吖叫,示意比我睇。

原來自己摸索中學嘢係好好玩,好滿足!

五色菜湯

呢個湯係晌芳姐湯水個 blog 見倒嘅,其實用咩蔬菜都得,總之有五隻色就得啦。晌中醫㗎角度,唔同顏色㗎蔬菜對某臟腑有影響。青色入肝,紅色入心,黃色入脾,白色入肺,黑色入腎。所以咩顏色㗎蔬菜都應該食吓。

今次呢個湯用紅蘿蔔, 白蘿蔔, 青瓜, 木耳同粟米。芳姐話呢個湯有養顏消脂功效,屬家常保健湯水,可加瘦肉或豆類煲。我只係用蔬菜煲,都已經好好味啦！

我要跑走個肚!

上年十一月老公送咗架跑步 BB 車比我,初初我跑得幾密㗎,差不多隔日就跑。仲雄心壯志咁想揾個 5k 玩吓。不過天氣開始凍,我就以唔想凍親人仔為理由(藉口?!),少咗跑。之後又病咗幾次,所以冇乜點跑。依家天氣暖,又好返,要的起心肝跑返至得!

生完仔之後身體差咗,成日病。呢排又成日覺得攰,冇精神,而且心情鬱鬱悶悶咁。除咗因為瞓得唔好之外,缺乏運動係原因之一。唔可以再咁懶,要做吓運動。其實依家只得一個仔,佢又仲肯坐 stroller 培我跑,真係要跑多 D 至得!

大 vs 細

近排教緊人仔大同細㗎 concept.當然係我有我教,佢有佢玩!

某日我揾倒一隻大鴨同幾隻細鴨。於是,我不停教佢邊隻大 D, 邊隻細 D。

又某日我煮飯時,就地取材,比咗幾隻大細不同㗎量杯佢玩。見佢摸吓望吓叠吓研究吓又掟吓,呢幾隻杯又幾有娛樂性㗎喎！

呢個時期㗎小朋友都幾易滿足,咩都可以玩一餐!

敏感兒童

之前懷疑人仔對蛋白黃豆敏感,但又心大心細,唔知好唔好同佢驗 allergy. 上兩星期 check up 時終於抽咗血驗。抽血過程有人喊爆爭扎 (其實成個睇醫生過程都係),好在我身手都唔差,㩒得住佢右手雙腳加控制唔比佢反身起身拱橋。而抽血哥哥手勢好好,一拮就抽倒,快速完成。

驗血結果證實人仔對蛋白敏感,蛋黃都有少少。環境方面㗎嘢就冇。咁都好 D, 如果佢係對樹,草,花粉 D 嘢敏感,咁我都唔知點避!

轉 bedtime routine

某日聽我朋友話佢個女三歲,但臨瞓一定要飲十安奶,少一安都唔得,攪到十二點要同佢換條片,唔換就會賴尿賴到成牀濕晒。其實九個月過後就唔需要臨瞓飲奶,如果養成習慣,到歲幾兩歲時就好難改,所以我決定試吓同人仔介臨瞓餐奶。

要轉人仔㗎 bedtime routine 絶對係艱巨任務,因為佢屬於難入睡同醒瞓㗎人,不過我又唔想佢養成臨瞓飲奶㗎習慣,所以我就鼓起勇氣試試!

人仔本來㗎 bedtime routine 係沖涼,上大人床飲奶,轆一陣瞓。有時好攰,會飲飲吓瞓。跟住我會抱返佢去 BB 床。 試過比佢埋身食,不過唔想佢啜到瞓著,未瞓著唔比佢食又喊爆,所以都係用樽餵。

覇王花湯

呢排睇芳姐 blog 至知原來覇王花有清肺止咳化啖功效。其實我未煲過覇王花,飲都係飲過一次。見大家輪住咳,屋企又有覇王花,咁我就試吓煲啦。

呢幾日煲咗兩次,第一次材料有覇王花,海底椰, 紅蘿蔔, 南北杏, 蜜棗, 瘦肉。煲出嚟味道唔錯,唔洗落鹽都夠味呀！

第二次唔用海底椰,轉用無花果。一樣係清熱潤肺化啖止咳咁囉。其他材料都係覇王花,瘦肉,紅蘿蔔同南北杏。

買咗包海底椰之後上網睇倒好多人都話好容易買咗假嘢。真嘢係有深啡色㗎狗牙邊,中間會睇倒有果肉紋。我買 D 雖然都好似有果肉紋,但係條邊冇狗牙狀喎。。。 我諗都係假嘢。。。算,以後唔買,反正有好多其他食材都係清熱潤肺㗎啦。。。

鮮果果凍 (附食譜)

前兩日晌 Carol 自在生活 (http://www.caroleasylife.blogspot.com) 度見倒呢個食譜,一見倒就好想整,因為好靚,而且我老公好鐘意食啫哩。

我冇見過咁大個人都咁鐘意食啫哩。以前我好有心機試整唔同㗎甜品,可惜佢未必食,但係整啫哩佢就一定食,所以我都費事整咩特別甜品。連情人節都只係整個橙啫哩!

今次呢個果凍好靚好吸引,屋企又有材料,於是就即刻開工!

材料:
適量士多啤梨,罐頭菠蘿(原食譜用罐頭水蜜桃)
罐頭菠蘿汁2 罐 (約 350 g)
砂糖 30g
檸檬汁 2 大匙
魚膠粉 10 g
冷開水 25 g

做法:
1.罐頭菠蘿切粒,草莓洗淨去蒂切成2半。
2. 冷開水倒入魚膠粉中混合均勻靜置5-6分鐘,等待魚膠粉完全吸水膨脹。
3.使用隔水加熱的方式融化將魚膠粉完全溶解成液體。
4. 菠蘿汁倒入檸檬汁及細砂糖混合均勻,加熱至細砂糖完全融化關火。
5. 溶解的魚膠液體就倒入混合均勻放涼。
6. 菠蘿及草莓交錯放入圈型模中。
7. 倒入放涼的水蜜桃湯汁。
8. 放入冰箱冷藏一夜至完全凝固。

雙瓜黃豆湯

最近睇 blog 見唔少人跟 Gigi 姐煮餸, 原來香港有個煮食節目叫"吾淑吾食"。於是我就上網揾吓有冇得睇。暫時睇咗兩集,又真係幾好睇喎。教煮食之餘又教揀材料,食療功效。Gigi 姐煮完又會同嘉賓一齊品嘗傾吓計咁。有時間我會煲埋其他幾集!

聽講佢教完呢個雙瓜黃豆排骨湯之後,好多煮婦跟住整,攪到街市㗎絲瓜即刻貴咗!平時我唔會整苦瓜因為老公唔食。聽人講呢個湯煲完唔會苦,攪到我好想試。

芳姐止咳良方

小朋友咳真係好煩,咳極唔完又瞓得唔好,大人細路都辛苦!

最近識咗個朋友,佢有對孖女同人仔差不多大。講開小朋友咳,大家都覺得睇西醫冇乜用。佢同我講上網見倒有個芳姐blog,有好多湯水介紹,又有好多人問關於小朋友病㗎嘢,於是我朋友又問小朋友咳有咩好方法止咳。芳姐好快就覆咗,佢話用:

蘇子, 白芥子, 萊菔子各三錢,搗碎後放入茶包裝然後加米煲成粥比小朋友食。

海底椰蘋果蜜棗水

前兩日用晒 D 羅漢果,唔去買唔得。前兩日難得去開中國人區,就順便買埋。平時我真係唔想為咗兩粒羅漢果而專程去度買呀!咁去開,就順便買包海底椰。其實我未煲過,飲都好似未飲過,不過我知係止咳潤肺。呢幾日我同人仔都有幾聲咳,又試吓煲海底椰啦!

上網揾食譜,原來都有好多煲法,啱啱屋企有蘋果蜜棗,南北杏就用呢幾樣啦。其實食譜仲有瘦肉,過我有落。話時話,南杏北杏點分?好似一樣係毒 D係咪呢？

釀節瓜

上星期買餸買咗兩條節瓜,一條攞咗嚟煲湯,仲有一條晌我唔知煮咩好㗎時候,見倒佢,就諗到可以整釀節瓜。人地多數用瑤柱釀,我就整個平民版,用肉碎釀。。。

睇食譜話要將釀好㗎節瓜煎一煎,我照跟。出街食呢個餸,我成日 wonder 究廚師會將刮咗出嚟㗎心點處置。自己食,我擺埋落去煮埋佢算。

幼兒食譜~鮮茄肉碎菜飯

平時煮蕃茄多數配 pasta, 今次試吓配飯,都唔錯呀！煮法亦簡單:

蕃茄煮熟(我加咗少少糖),加肉碎煮熟;
菜炒/烚熟,切碎,拌入已煮好的飯中。

咁就攪掂！

再嚟 BB 餃子

又整餃子比人仔食。今次試吓加韭菜,佢又肯食喎！聽人講話小朋友自細食多 D 唔同㗎味,大個就冇咁揀飲擇食。希望人仔大個都係咩都肯食啦！

今次買咗包餃子皮,一次包多 D 冰起佢,咁冇時間煮 mum mum 或者我要返工時佢就可以食呢 D 啦！一向我都係去中國超市買餃子皮,食過韓國餃子覺得佢 D 皮薄 D 喎,所以去韓國超市時就買佢韓國餃子皮試吓。點知 D 皮厚 D 又硬 D... 下次都係買返中國超市 D 算。

小花仔初登場

上星期六,人仔獻出佢㗎第一次~做花仔!幾個月前朋友請人仔晌三月時做花仔,當時我心諗:"佢咁細,得唔得㗎。。。"而且佢仲未識行。。。 好在十二月尾正式識行,經兩個幾月㗎練習,佢已經行得好好。

朋友揀㗎花仔衫幾特別,白衫黑褲(自己預備),吊帶加頂帽,好得意呀!晌屋企試衫時出盡辨法想佢戴帽,可惜佢都係唔肯戴。。。

好家常㗎金針雲耳蒸雞

呢幾日有 D 傷風,(唉…又病,又冇得"請假")買餸時見到有切咗㗎全雞,於是買隻返嚟整金針雲耳蒸雞。醃咗佢,加金針雲耳然後蒸熟就得。快靚正!病病地㗎時候,是但整個餸加個菜就算。

我覺得呢個蒸雞好家常,但係我好少整,因為老公麻麻地 like. 諗返細個時屋企都好少整。咁點解我會覺得呢個餸咁家常呢？

蒸茄子 (附造法)

上星期見茄子減價,又幾靚,買㗎條返嚟。我參考雀后㗎食譜,整咗碟蒸茄子。改咗少少造法,方便自己。

造法:
1, 茄子洗淨,全條蒸熟(我條太長,所以切開一半蒸。
2, 用义將茄子斯成細條。
3, 落油爆香蒜頭,加入豉油,糖,水等調味。
4, 煮滾後倒在茄子上即成。