二十一個月啦

今個月最開心就係人你講嘢有明顯進步!

雖然呢排講少咗上個月識講㗎"拍""拆""車",但係就多咗跟我口水尾講。有日我講"抹抹",佢突然跟我講,把聲好得意㗎！另外講過"花","爬","波",祙","飛"。今朝又無端端學我講 "mall", 玩㗎時候又講 "peek-a-poo".

佢有 D 發音唔正,但肯開口已經好好啦！奇怪㗎係之前佢講"鴨"係講得好正嘅,但呢排佢學我講㗎時間又講唔正喎,唔知點解?

除咗講多咗嘢,佢亦識點頭或縮膊以表示"好"。我唔明點解佢會用縮膊以示"好",唔知佢晌邊學返嚟呢？

另外一個進步就係成功晌廁所 pee pee. 通常係沖涼前,瞓覺前比佢試一試,多數都會有。但其他時候叫佢去又搖頭唔去,我諗呢 D 嘢都係唔急得㗎啦。。。

Poo poo 今個月就冇成功過,叫佢換片仲調頭走!你估你包住 D 真係金嚟㗎咩。。。

今個月大致上都好合作,叫佢做咩都會做。最鐘意就係幫手,見我做咩都要幫。買完餸要幫手攞,我掠衫時佢會遞衫遞夾,不過遞兩遞又走開咗！哈哈!見我抹嘢又幫手抹(有次攞住公仔當布抹。。。)平時我又唔係趕時間,所以盡量比佢參與吓,當親子活,順便訓練吓佢做家務都好呀！

扭吓計總有,多數都係唔夠瞓時,算好好啦！

書中自有黃金屋

最近成日同人仔去圖書館,冇咩地方去就去圖書館。比佢走吓,同佢睇吓書,玩吓玩具,同其他小朋友 interact 吓,仲可以涼埋冷氣,一舉多得!

以前對嬰幼兒讀物認識唔多,以為只係教吓 123, 唔同顏色形狀咁。依家接觸多咗,至發現有 D 書雖然每頁得幾個字,但都有故事性之餘,仲可以帶出好正面㗎訊息,唔簡單啊！

今日見倒呢本 "A Good Day".內容係講幾隻小動物有唔開心㗎遭遇,雖然失去一 D 嘢,但最終得到更多。而雀仔失去咗㗎羽毛比小妹妹執倒,佢好鐘意,好開心。

簡單㗎內容,就帶出"人生總有出路""積極面對""將快樂帶比人"等等㗎道理!利害呀！(定係我想像力豐富?)人仔見本書冇車車,冇乜興趣睇,反而我好欣賞!哈哈!

之前睇過一本書係講火車頭努力嘗試拉裝滿玩具㗎車廂上山,以帶出"勇於嘗試"努力向目標進發"等積極訊息又係令我好欣賞㗎一本書。

有時望住圖書館架上一排排㗎書,覺得好似一個無窮無盡㗎寶藏,希望人仔會一直愛去圖書館,慢慢發掘寶物啦！

放電新選擇~有蓋 playground

晌加州太陽實在太猛烈,基本上朝早八,九點開始興到下午五,六點。為免晒到生 cancer,我同人仔放電只可以去室內地方。免費㗎室內放電地方,只有圖書館同 mall 入面個小 playground.

最近有朋友介紹一個有蓋 playground, 晌屋企附近。雖然唔係室內冇冷氣,但有個蓋擋太陽都以經好好多!朝早玩到十一點幾都接受倒。我見唔少人仲帶埋食物野餐添!

呢個 playground 都幾好玩,其中有個半低褲 swing. 人仔坐上去,叫佢扶住,佢都玩倒,唔會坐唔穩。

有條吊橋仔,拖住佢行兩次之後就可以自己行。

依家行上行落自己嚟,我唔洗同佢爬埋一份啦！

揾次我又試吓同佢野餐先!

講道理實戰篇~ 唔好倒水

啱啱講過失敗例子,記錄返個成功例子,勉勵自己,勉勵他人。

幾個月前人仔開始識用普通杯飲水,但係就好鐘意倒水,所以我多數比返鴨咀杯,就算佢倒都冇倒得咁快。

每次見佢想倒,都會盡量制止,加不停講道理:
"呢 D 水係飲,唔可以倒,倒咗飲唔倒,好浪費,呢個世界好多人要好辛苦至飲倒少少水。。。"
"倒濕地下要抹,好煩,太濕地板會漲起。。。"
"我知你鐘意玩水,但呢 D 水係飲嘅,唔可以玩,想玩水一陣沖涼可以玩"
。。。。

有一次,我一邊講佢就一邊倒,制止咗佢跟著又繼續倒。。。 要係咁諗道理同佢講,某程度上令我無暇發火。我發火的話,人仔分分鐘大喊,越攪越煩。。。

過咗一排,佢冇再倒水。我諗係佢好奇心過咗,唔再倒。唔知佢明唔明我講㗎道理,不過唔倒水就 ok 啦,哈哈!

依家用普通杯飲嘢,佢仲會好小心咁攞,以防倒瀉。

攪掂倒水,仲有好多行為要改善。近期問題行為有:
打/拍人
唔瞓覺
揀餸食
唔肯換片
學用廁所。。。

講道理永遠講唔完,努力。。。

有樣學樣 ~發脾氣

我一向都好 buy 汪培珽老師㗎教法~講道理。但近來少咗耐性,少咗心平氣和咁慢慢講,多咗大聲話。。。

有次我開雪櫃,人仔又走嚟睇,攪呢樣攪樣,講極佢都唔肯走,終於倒瀉咗樽菊花茶,倒到雪櫃同地下都係,期屋企仲要有蟻,煩 c。。。 我嬲得濟大聲鬧佢,佢又冇喊喎,只係行開咗。。。

之後我同返佢講,唔可以攪雪櫃。。。 倒瀉嘢好煩,又浪費。。。 佢又似明唔明咁冇咩嘢。

幾個鐘後佢無端端好大聲/惡咁講 BB 話。佢從來未試過咁講嘢!我心諗"c 啦,一定係我頭先大聲鬧佢,佢學緊我。"

唉,要控制吓自己 D 情緒啦,因為小朋友㗎表現某情度上係反映大人㗎表現。如果有一日人仔成日亂發脾氣大聲鬧人,我諗我要檢討一吓自己係咪都係成日發脾氣鬧人。。。

芝士瓜瓜咸蛋糕

近來人仔㗎濕疹同食物敏感好咗,所以我開始比奶類食品同有蛋,奶㗎食物佢。其中一樣佢鐘意食嘅係蛋糕!有佢支持,我就有動力焗 muffin, 唔洗好似以前咁一個人食晒成盆咁濟。。。

成日整嚟整去都係兩款,今次試吓整咸蛋糕,始終食得多甜嘢對大人細路都唔好啦。整咸嘅好似健康 D, 嘻嘻…

上網睇咗幾個食譜,最後都係用整開個再變化一吓,又做實驗!

材料:
麵粉 1 1/2 杯
泡打粉 1 茶匙
發粉 1 茶匙
油 1/4 杯
蛋 1 隻
奶 1 杯
碎芝士 1/2 杯
意大利瓜 (切絲) 1 杯
蒜頭 (切碎) 2 瓣

做法:
1, 將乾材料拌勻。
2, 加入油,蛋,奶。
3, 再拌入芝士,瓜,蒜泥。
4, 倒入焗盆,放入已預熱 350F. 的焗爐。
5, 迷你 muffin 焗 15 min, regular muffin 焗 20-25 min.

食落覺得幾得意,可能係慣咗蛋糕㗎 texture 係配甜味。今次咸咗少少,同個蒜味幾濃。下次改一吓先。唔知加多隻蛋,少 D 奶又會點呢？

啫哩生日蛋糕

上星期老公生日,問佢想點慶祝,佢話請人嚟屋企打邊爐!呢個邊爐控大熱天時都想打邊爐,難得又有人同佢顛,十幾個朋友親戚齊齊嚟!哈哈!

預備呢次生日邊爐,除咗買嘢食,煲涼茶之外,當然要整個蛋糕啦！今年懶得整 mousse cake, 反正老公鐘意食啫哩,整個啫哩蛋糕算!不過之後我又有 D 手痕,結果做咗 D mini cup cake,仲玩埋揤 cream... hehe...

之前上網見有人整 broken glass jelly, 又易又靚,於是決定用個 bundt cake 模整 broken glass jello.

揾倒個食譜:
1. 四盒不同顏色啫哩粉,每盒加一杯水攪溶
2. 放入盒中雪凍後切開一粒粒,放入模內
3. 兩杯水煮溶兩包冇味啫哩粉,再加一罐煉奶,拌勻倒入模內,雪凍

我驚太甜,所以每隻色加多一包冇味啫哩粉同多一杯水。煉奶部份同樣溝淡,出嚟甜度剛好!

後記:
第二日,老公話打邊爐真係太熱,夏天都係唔好打邊爐。。。。
你終於醒覺啦！哈哈!

蘋果芒果小蛋糕 (附食譜)

某日心血來潮想整 muffin, 見有蘋果就整蘋果 muffin, 點知冇奶。望望雪櫃見有盒芒果汁,就過期,咁就做吓實驗,用佢嚟代替奶,睇吓得唔得先。

用返上次蘋果 muffin 個食譜,冇落肉桂粉,奶轉做芒果汁。出嚟效果都 ok, 都係 muffin 咁㗎樣,但食落唔係好覺有芒果味。。。我諗要用埋芒果肉會好 D.

材料:
1 1/2 杯麪粉
3/4 杯糖
1/2 茶匙鹽
2 茶匙發粉
1/3 杯菜油
1 隻蛋
1/3 杯芒果汁
1 杯蘋果（切粒）

1, 預熱焗爐至350F。
2, 將麵粉、糖、鹽、發粉拌勻。
3, 將菜油、蛋、芒果汁拌勻加入麵粉混合物拌勻。
4, 加入蘋果。
5, 放入焗杯，焗25-30分鐘。

人生第一個 field trip

人仔上緊個 Art and Music 堂,雖然老師帶得麻麻地,但佢每個學期都會帶大家去 Knott Berry Farm個 Liberty Hall.

個 Liberty Hall 係復製 Pennsylvania 個,入面㗎嘢都係一樣嘅。我一直都唔知呢邊有個 Liberty Hall, 連上網都 search 唔倒,唔怪得我問人都冇人知啦。

我地一早晌 parking lot 附近集合,跟住一齊行過去。去到要等一陣至開門,於是我地就影吓相。

一入去就見倒個 Liberty Bell. 之後入去聽個 presentation. 小朋友當然坐唔定,所以聽咗一陣就出去。晌個 gift shop 度影吓相,行一陣就離開。

行出去時見倒有幾隻雞,小朋友就追住 D 雞周圍走。對小朋友嚟講小動物比美國歷史吸引得多!哈哈!等佢地大 D,學美國歷史時嚟就啱啦!

之後我地自己晌 Knott Berry Farm 㗎 Market Place 行咗一陣就返屋企啦!其實小朋友咁細,都唔知 Liberty Hall 係乜,不過一朝早同 D 同學仔行吓跑吓,係唔錯嘅！

圖書館 storytime 特別活動 ~ petting zoo

原來每到夏天,圖書館㗎 Storytime 都會有 D 特別活動。其中一個係 petting zoo. 有動物睇喎,我當然唔會錯過!

呢日我地遲咗少少,去到圖書館㗎草地已經坐滿人,一個叔叔彈結他,一個唱歌。個叔叔一邊抱住隻動物,一邊又唱又跳,其實我覺得幾攪笑,哈哈!佢地帶咗唔少動物嚟,有雞,鴨,兔仔,龍貓,仲有兩隻羊!

睇咗一陣,人仔要落地玩。等佢再大 D 聽得明,應該會好鐘意!

叔叔介紹完 D 動特之後,就比小朋友入去摸摸小動物。大家都好有規矩,跟住圖書館職員㗎指示分批入去。

人仔入到去見倒隻黑羊有 D 驚,於是我同佢去睇兔兔,佢就肯摸摸。然後又鼓勵佢摸吓隻白羊,佢都肯摸。但當佢見倒白羊個黑色頭,佢又驚一驚,原來佢怕黑色㗎動物!

睇完動物我地就出去,再晌圖書館玩咗一陣就返屋企啦！好多謝呢間圖書館安排呢 D 活動比小朋友參加呀！

蟻隊遊 San Diego~ day 3

第三日,我地朝早食完早餐,執完嘢,十點幾 check out 酒店去 Carlsbad 啦！

呢日我地兵分兩路:哥哥一家去 Legoland.婆婆,人仔同我就去 Legoland 隔離個 outlet! 其實 Legoland 應該幾好玩,而且人仔唔洗錢,不過成人票唔平,所以都係留返 D 錢 shopping!等人仔大少少,識玩 D 至再去啦！

我放低哥哥佢地,就去 outlet.揸車技術麻麻嘅我突破咗自己,第一次揸 mini van 呀！! (之前係哥哥揸嘅)原來幾好揸㗎喎！

個 outlet 唔係好大,但人人都有收獲!婆婆話冇咩買,結果都買倒幾樣嘢!

我地行到五點幾就返去接哥哥一家。跟住就繼續北上,去到 OC 食晚飯然後返屋企。

呢三日過得好快呀！今次旅行大家都係志在一齊開心吓,去邊都冇咩所謂,所以行程好 flexible. 而且 San Diego 我比較熟,大概都識路,所以雖然帶住小朋友,但都玩得好輕鬆!人仔都有扭吓計,但大致上都好乖,可以去多 D 旅行啦！哈哈!

蟻隊遊 San Diego~ day 2 (part 2)

食完午餐,我地就去 The New Children's Museum, 都係晌度附近。呢個 children museum 係 art focus 嘅,佢有一 D art project 教小朋友做手工,可惜我地冇時間參加。收費係一歲以上就 $10,即人仔都要比錢。

個館有三層,仲有一 D 室外㗎地方。

我地一去就去咗三樓。上面有個 bounce house,不過我冇比人仔入去玩。一來我見排隊㗎小朋友都幾高大,怕危險,二嚟我唔想人仔玩到唔捨得走扭計要足佢出嚟,所以都係唔好入去!

有一間 rain house, 幾靚不過冇咩玩。

仲有一 D 地方比小朋友畫吓嘢。

最好玩嘅係呢個類似一般室內遊戲室㗎地方。睇真 D 原來係個 sink 同食物,幾得意。兩個小朋友晌度玩得最耐。

之後我地去二樓玩揸車仔同切木條。

二樓仲有 D 爬設施。人仔太細玩唔倒。。。

一樓係圖書館,我地冇時間去睇。

玩到四點 museum 關門我地就走。佢出面仲有個小 playgound. 我地玩咗一陣就走。

離開 children museum, 我地去咗一間 christian book store. 我見一位朋友,同佢傾吓計。其他人就買嘢,五點幾就返酒店。

見有 D 時間,我地就拿拿聲換衫落酒店游泳池玩水。人仔第一次去泳池呀!佢開頭有 D 驚,不過玩玩吓就玩到唔捨得走。我地玩㗎時候,婆婆就預備晚餐。就係整熱前一晚㗎 left over 同攞酒店㗎 free dinner. 呢晚有 sloppy joe 包薯條同沙律。咁我地就慳返一餐啦。

食完飯一陣,小朋友就沖涼瞓覺,大人就 hea 吓,咁又玩咗一日啦！

蟻隊遊 San Diego~ day 2 (part 1)

朝早哥哥發現架租車有 flat tire. 其實前兩日已漏氣,攞返去租車公司佢地發現有粒釘,於是幫我地整好,仲拍晒心口咁話冇事㗎啦!點知過兩日就成條 flat 咗。都唔知係我地唔好彩又踩釘定係佢整得差。。。

於是我地叫 roadside assistance. 佢地好快就到,幫我地換咗條駄。雖然換咗駄係行得,但都要換㗎車,因為 spare tire 唔可以行咁多。於是我地無端端多咗個行程,就係去機場邊換車,因間分店有最多選擇。結果我地換咗架 mini van, 好過本身架!

原本想去 children muesum, 但見 D 小朋友有 D 眼瞓,於是就去 Sea Port Village 同 USS Midway 戰艦附近行吓先。

我地泊架車晌 Sea Port Village.放人仔上 stroller, 點知佢又唔瞓。。。 行過去 USS Midway 時見倒有個 batman 行嚟行去,我地呢班遊客就揾佢影相,點知影完佢叫我地比 $5 佢,話係比 charity, 但問佢又講唔出咩 charity.... 算,見佢咁熱都全副裝備行出嚟,就比佢賺啦。。。

去到戰艦附近大家都好開心咁影相,當然唔少得晌呢個經典石像下影啦。好多情侶夫婦朋友都扮石像個姿勢影,我地就嚟個婆孫版!

可惜當時人仔開始扭眼瞓,我都冇心情影。。。

之後哥哥同阿嫂想上戰艦,我就同媽媽推小朋友瞓覺。推咗一輪終於攪掂隻人仔。而表姐瞓覺就好乖,攰會自己上車,合埋眼瞓。

無幾耐哥哥佢地返過嚟,話上船太貴,所以唔上,於是大家就晌 Seaport Village 行吓 D 特別㗎舖頭。小朋友瞓晒,大家都行得好輕鬆!

行到咁上吓就揾嘢食。佢地見 Cheesecake factory 想去食,就行過去。一去到人仔就醒啦,可以知道有嘢食!而表姐就瞓到我地差不多食完,佢至起身食。

(待續)

蟻隊遊 San Diego ~ day 1

同哥哥一家去完迪迪尼,第二日我地就去 San Diego 玩三日兩夜。蟻隊一朝早攪一大輪,差不多十一點至出門!

第一站係 La Jolla. 車程個幾鐘,表姐好快就瞓咗,而人仔呢,就差不多到至瞓。。。 好在我地揾地方停同揾車位用咗一段時間,佢勉強都瞓倒差不多一個鐘。。。算佢啦。

去到就揾嘢食,食咗邊好多㗎墨西哥嘢,之後就行去海邊。未到海邊之前有一大片草地,比小朋友放電啱晒!

之後再行出海邊,睇吓有冇海獅。上次嚟我見好多㗎,今次得幾隻。人就好多!都唔知係咪太多趕走咗 D 海獅。。。人有 D 人仲晌佢地隔離 游水,大家都唔驚大家嘅！?

睇完海獅,就上車去酒店啦。去到酒店 lobby, 見倒好熱鬧喎！有個小攤檔比小朋友玩釣魚。表姐即刻去玩,仲得到小禮物添!

人仔就對個鯨魚石像好有興趣!

除咗有嘢玩之外,仲有免費 fish and chips dinner,同 open bar! 不過佢地嚟到美國,想据扒,所以我地出咗去食扒。

食完飯返酒店,同人仔沖涼瞓覺。佢都攰啦,所以好快瞓著。雖然係瞓酒店提供㗎 playpen 但瞓得好好,之前驚佢會大喊嘈醒人都冇發生,乖仔!