煎薯角

老公同我都係薯仔怪,點煮㗎薯仔都鐘意食!煎薯角係其中一個我地常煮嘅。簡單又好食!

先將薯仔切角,亦可以切條或片。然後烚熟。

跟住煎至表面金黃。再隨意加入調味料如蒜鹽,香料等。

外脆內軟,好好食㗎！

我想請病假。。。

湊仔工其中一個辛苦之處,就係冇得請病假!呢兩日有些感冒,一路流鼻水一路換片,眼瞓頭痛都要攪隻扭計人仔瞓覺,自己唔想食都要整嘢比人仔食。幸好老公星期五只返半日工,星期六又冇咩地方去,可以幫幫手,咁多都可以抖一抖。湊仔嘅人,病都要揀日子病。。。

希望聽日完全康復啦！

homemade pancake mix

某日上網睇倒個 pancake mix 㗎食譜:
5 杯麵粉
1 1/4 杯奶粉
1/4 杯糖
1/4 杯發粉
1 TS 鹽

可以整定,要食 pancake時用兩杯 mix,加一杯水,一隻蛋同兩TS油,就成麵糊,幾方便喎!

十個月啦！

話咁快又十個月大啦！今個月佢又大咗叻咗, BB 㗎成長真係好快呢！佢好似比同齡㗎 BB 大份,係咪食得多呢?

瞓:
日間兩次 nap, 大約係十點同三點。比佢啜住瞓可以瞓倒差不多兩個鐘,晌車上瞓半個至一個鐘。嘗試訓練佢自己 nap,不過唔得。夜晚就可以喊兩喊之後自己瞓。希望佢唔會再喊啦！半夜都有醒,不過好快自己瞓返。比以前好好多呢!

食:
半夜冇食奶之後,我朝早會比早餐佢食。通常係奶,少少麥皮同水果,亦試過比少少曼頭。我發現佢鐘意食嘢多過飲奶(除咗想瞓時),所以我依家比咗奶先,始終一歲前,奶係最有營養。午餐同晚餐係有菜有肉㗎粥仔加一次水果。另外仲有兩至三餐奶。試過嘅新食物包括:菠菜, 芥蘭, 蕃茄, lima bean,三文魚, 啤梨,西梅,曼頭。今個月多咗新嘢！
開始比佢試 sippy cup,試咗幾日,開始飲倒啦！

活動能力:
依家爬得好好啦,唔再係軍人式!平衡亦唔錯,唔會再爬爬吓 "look" 落地。扶住嘢企起身,坐底都控制得好好,仲可以唔扶住企倒幾秒!依舊非常活躍,冇時停。沖涼換片真係要同佢搏鬥!

社交能力:
開始有 separation anxiety. 幾星期前我去開㗎聖經班開課,佢地有 nursery,之前都有帶人仔去,不過佢唔記得,今次佢去到喊爆。去咗幾次之後好 D 只係一開始喊。6299走咗,我地又可以返教會,人仔一被多人圍住就喊。單對單會好 D 有時仲會伸手摸人!佢都係比較少見人,依家我成日同佢出吓去,等佢見多 D 人。

溝通:
暫時仲未識 baby sign, 不過就會做類似揮手㗎動作,同拍手。呢排少咗 baba mama 聲,但有時會好似唱歌咁,好得意!

終極睡眠訓練~第一週總結

我地終於都同人仔進行睡眠特訓,方法係由佢喊!其實佢四,五個月大㗎時候我地已經想試,不過有人話佢可能仲細,需要安全感,所以我地冇試。之後佢瞓得好咗少少。到6299嚟咗之後,佢慢慢又瞓得差咗,既唔識自己瞓,又一晚醒幾次,仲培養咗要啜住奶至瞓倒㗎壞習慣。6299晌度時當然唔可以由佢喊,所以拖到依家至可以訓練佢。

其實用 cry it out 呢個方法我都心大心細。唔想試㗎原因係:
1. 人仔又長氣,又大聲,我驚佢會喊足一晚都瞓唔倒。
2. 有人話到佢大佢自然識瞓,可以攬住佢瞓㗎日子其實好短,唔需要急於訓練佢自己瞓。

不過我真係開始頂唔順啦,晚晚佢都上咗大人床,佢一醒就要比佢啜奶,仲啜到我起卜,痛到不得了,而且佢瞓上大人床,唔單止冇人瞓得倒,而且仲好危險,成日驚佢會跌落床。加上醫生話如果一歲前佢唔識自己瞓,咁就可能要去到三,四歲至會改倒佢㗎壞習慣。。。所以,我地決定要試一試。

第一日由下午個 nap 開始,佢喊咗差不多一個鐘,跟住我地抱返佢出嚟。夜晚就喊咗九個字,跟住靜咗半個鐘,之後瞓咗。半夜醒兩次,喊廿分鐘至一個鐘至瞓返。之後幾晚都係喊大約廿分鐘,有一晚佢冇喊,食完奶碌兩碌就瞓咗!半夜依然會醒,喊幾喊之後瞓返。每次佢醒,我都會攬吓佢,睇吓佢有冇事,冇野就同佢講乖乖瞓覺啦。琴晚,佢終於可以由八點幾瞓到五點幾!至於 nap, 都係幫吓佢,比佢啜或者比佢坐車瞓,因為佢都係瞓唔倒係咁喊,而佢瞓咗倒就會成日都扭計。。。所以 nap 都係下一步至訓練。

其實聽倒佢喊,都覺得佢慘㗎,不過唔識自己瞓對佢都唔好,又令到佢長期唔夠瞓,希望佢快D識啦！

檸檬薏米水

屋企有好多薏米,99 帶咗D過嚟,而我自己之前又買咗D,加加埋埋就好多。又有幾隻就嚟爛㗎檸檬,咁就煲個檸檬薏米水啦！據聞係美白同去水腫㗎,啱晒女仕!

只需將薏米浸一個鐘,然後加冰糖煲一個鐘倒,再加檸檬汁,太酸可以再加糖,咁就得啦！

BB 西梅溶

人仔有 D 便秘,整 D prune 比佢先。剛上網睇,原來用 dried prune 都可以整 baby food. 只要將佢浸水至軟,然後加少少水再打溶佢,咁就得啦！

香葱肉鬆煎餅

睇小菲菲個 blog, 見佢成日整煎餅,又形容到好易整,咁我就試吓啦！

佢話六,七匙麵粉,一小匙酵母,一匙糖同少少油。加適量暖水搓成麵團,放入雪櫃發酵一晚。我跟住做,入面加咗葱同肉鬆。

一晚過後,我舊麵團都好似冇發酵。。。

不過我唔理,照煎。都食得吓嘅！:p

自在生活

6299返咗香港,有人話"咁你咪做到踢晒腳?"老實講,我不單只唔覺得"踢晒腳",仲多了一份輕鬆自在!我實在太唔習慣同人住,仲要係同D思想習慣唔同㗎人住!而且多兩個人真係多好多嘢做,淨係個厠所都要洗得密D!佢地又餐餐都要晌屋企煮,早餐都要煲個麥皮(有時仲要滾瀉。。。),真係多好多嘢做。

始終,湊住個仔同打理都有唔少嘢做,不過依家可以冇壓力,輕鬆自在咁做,舒服好多呢！

預備 mum mum

今朝襯人仔唔扭計,剁定 D 瘦肉。整好一份份,咁煲粥仔時就唔洗次次剁。

之後跟手整咗 D 瓜溶,分開一份份冰起佢。睇過 D 研究,話冰咗嘅食物比唔冰嘅更 keep 倒營養!

自己整 baby food, 節省
唔少錢呢！

失敗了的蜂蜜綠茶蛋糕

前幾日揾倒以前抄落㗎食譜,其中有呢個蜂蜜綠茶蛋糕。琴晚手痕試試,點知失敗咗。。。可能係D蛋白唔夠暖,所以打唔起。。。我唔理,照焗。焗出嚟個 texture 同樣唔靚,不過味道係 ok 嘅,自己食,冇所謂啦！不過我一個定會再試!

簡易晚餐~白汁煙肉意粉

老公唔知返唔返屋企食飯,整定個意粉,就算佢唔食,我聽日都可以食。

自己整白汁其實好易,點知屋企冇晒奶,用罐頭忌廉湯算啦,仲簡單!不過冇咁健康,因為罐頭湯太多 sodium,就算用 reduced sodium  D 都唔少 sodium㗎。今次仲要用煙肉添,(99 買落,要用埋佢) sodium 超標啦!一次半次,唔係成日食,我地又冇高血壓,唔緊要啦！ :p

夏枯草水

99臨走吩咐落要時時煲 D 乜水物比老公飲,仲買定D 夏枯草,菊花,雞骨草,雞蛋花....

今日煲個夏枯草水啦,據聞係清肝火,適合夜瞓人仕。我仲加咗 D 雞骨草入去,同少少冰糖。

入好一樽樽放入雪櫃,可以時攞嚟飲!

繼續香蕉蛋糕

呢幾日冇餵人仔食香蕉,因為佢剛感冒,又好似有點咪,結果又有香蕉太熟,要攞嚟造蛋糕清咗佢啦！

今次用返上次個食譜,快快手手整個大嘅。焗咗55分鐘。

疑似乳腺炎。。。定係起水泡?

人仔發咗一日燒,夜晚就退咗燒啦!點知輪到我,不過唔係發燒,係懷疑乳腺炎。。。 琴晚半夜一邊餵奶好痛,我以為係人仔咬損咗,諗住唔餵邊,朝早起身至泵出嚟。谷咗成晚,到泵時又泵唔出,又谷又痛。。。 :( 但我同老公都照原定計劃返教會,因為6299嚟咗三個幾月我地都冇得返,我地都好掛住教會 D朋友呢！

我睇過D 資料話如果係乳腺炎,都唔好停止餵奶,要keep 住清咗 D 奶,於是下午餵奶時我嘗試比人仔啜。嘩!真係痛到c呢！有幾吓仲特別痛,跟住就好似通咗D 。依家每次餵奶都好c痛,希望快D 好返啦！

。。。。。。。。。。

一天後,仲係痛。睇睇吓,我諗可能係起水泡。。。 唉,點都好,總之就痛。。。

發燒人仔

九個月大㗎人仔一直冇病過,琴日見佢有少少鼻水,夜晚瞓覺本來都醒幾次,琴晚醒得仲多。。。今朝清晨佢就成身興,第一次發燒!今晚6299返香港,本來我今日仲返工,不過見咁情況,都係唔返啦。

依家下午佢仲有少少興,希望佢快 D好番!

煎焗鱈魚頭/柳

99晌度,真係差不多餐餐都食魚,因為佢覺得魚好有益。我一向都冇食咁多魚。以前自己住,煮一餐帶埋飯第二日返工食。帶返工嘅唔可以有海鮮因為好多美國人怕魚味,所以我好少煮魚。結咗婚之後好快就大肚,大肚就唔食咁多魚因為怕水銀,所以都係一星期食一次倒。

呢排真係食多咗好多魚(希望人仔唔會水銀過高!)。之前都係99 煮,佢又唔係好鐘意人幫手,所以我都有咩點入厨。最近佢身體唔係咁好,我就要幫手煮飯,機學吓練吓整魚!

鱈魚頭/柳洗淨抹乾,用鹽略醃,撲少許麵粉上面。

加羌,兩面煎一煎,然後加少許豉油,水,糖,蓋上蓋慢火焗熟。

三文魚頭炆豆卜

以前整過幾次三文魚頭,都係加少少鹽同胡椒焗。方便快捷。今次試吓炆,原來都好快好容易!

首先將三文魚洗淨整乾,用少少鹽同麵粉撈一撈佢,跟住煎煎佢。

然後加入豆卜,少少豉油,糖,蠔油,水,拌勻,炆焗至三文魚熟就得喇!

低鐵人仔

前幾日帶人仔去九個月 check up。人仔重21榜3安士, 長28串。上幾次佢都係瞓晌個榜度榜,今次佢太長啦,要坐上去!日日見住佢都唔覺佢長咗咁多!

九個月check up 唔洗打針,不過要驗血,睇吓夠唔夠鐵質。咁即係都要拮針!驗血結果即刻有,醫生話佢鐵質偏低。鐵質偏低可以食 supplement 補充,但醫生話食 supplement 會令牙仔有積,我識有個朋友個女就係咁,不過牙仔會換,而且健康比外觀重要,所以要食都唔係太大問題。但醫生講食 supplement 仲有可能會令人便秘。依家人仔便便時已經谷到面仔紅晒,成個關公咁,再便秘佢咪谷爆面都呵唔出? 其實我都唔太鐘意人仔食 supplement,令願在飲食上補充,盡量食天然嘢,被免食 supplement。紅肉,豆,西蘭花,綠葉蔬菜都係高鐵質。原來食高鐵質食物同時食高維他命C 㗎食物有助鐵質吸收,等我煮嘢比人仔時留意吓先!

又嚟香蕉小蛋糕 (附食譜)

今日有兩隻香蕉好熟,於是攞嚟整蛋糕仔。上幾次整開有用 plain yogurt, 不過屋企冇,所以揾咗個冇用 plain yogurt㗎食譜。

人地用三條蕉,我得兩條,所以其他材料都減少少。D食譜 review 話太甜!嘩!美國人都話甜即係超甜,所以我減咗一半糖!

食譜:
材料:
糖 半杯
油 半杯
蛋 一隻
香蕉 兩隻(壓成溶)
合桃碎 1/4 杯
麵粉 1 3/4 杯
梳打粉 1 ts
鹽 1/2 ts

造法:
1. 預熱焗爐 350F, 預備muffin tin.
2. 將糖,油,蛋拌勻。
3. 加入香蕉溶, 合桃碎。
4. 加入麵粉,梳打粉,鹽。
5. 焗25-30分鐘。

有人扭計,所以焗耐咗少少!

虎媽特訓！陪養閱讀習慣

我同老公都好希望人仔有閱讀㗎習慣。特別係呢個I mud I物㗎年代，唔想人仔歲幾就成為低頭族，令專注力下降,所以我由佢出世冇耐，就同佢一齊睇書講故仔，睇一本朋友送㗎中英對照小朋友聖經。

初初同佢講故仔時，佢傻下傻下，單天望地，唔知做緊咩。慢慢，佢開始留意倒D公仔，識得望住本書。依家佢識得打開本書玩。呢頭好似好認真咁睇，𠴱頭就撕爛一頁，一係就爬來爬去，當然我都唔會期望佢識得坐晌度安靜聽啦！

其實佢依家最適合睇baby touch and feel 㗎書，即係硬皮然後有D部份有唔同質地𠴱D書。佢都幾鐘意睇，仲開始識摸tim!

新 blog有感

開咗個新blog之後,尚未好多時間去研究點用個新blog, 但係就花咗唔少時間去揾以前睇開㗎 blog㗎新地址然後 add 去自己個 reading list。我發覺我原來睇好多 blog! Add 極都有!好開心見唔少 blog 友都開始寫新 post, 又整到個新 blog 好靚! 希望呢個新平台可以再次凝聚大家!

要搬blog 雖然好煩,又要揾新屋,又要研究點搬。入咗伙後又要從新適應,又要揾返D 睇開㗎 blog. 不過可能都係一件好事,因為 yahoo blog 成日問題多多,想關注人地D blog又唔得!依家發現blogspot 幾好,不單只可以關注人地D blog, 仲可以將手機或 i-pad D 相直接 load 上去個 post度! 非常方便!以前唔得㗎!

搬 blog 方法

呢個link 解釋了如何搬 blog, 希望大家搬blog 成功!
http://www.iphonenews.cc/2013/04/google-blogger.html?m=1

其實我冇諗過搬所有 post 過嚟,因為我有好多 post 係自己日記,既唔知呢度點 set private, 亦想藉今次搬 blog 嚟大執個 blog. 不過我想將自己D 日記搬去一個地方,作一個回憶。希望我睇得明個link, 搬得成啦！

出牙仔

今朝見倒人仔出緊四隻牙仔!

新開始!

Yahoo 關 blog, 見好多blog 友搬嚟 blogspot, 等我又試吓先!因為我唔想同大家失散呢!