Wednesday, April 30, 2014

近期靚湯

雜菜湯
因為要清吓雪櫃,所以煲咗個雜菜湯。落咗西芹薯仔蕃茄洋蔥。好清甜,仲可以用嚟做人仔 mum mum 㗎湯底,方便又好味。

粉葛湯
成日都想煲粉葛湯,但係唔見有粉葛賣。上星期見倒,即刻買返個。以為屋企有赤小豆,點知原來係紅豆。呢度又唔見鯪魚。所以用咗瘦肉,再加少少薏米。

芥菜魚湯
見芥菜減價,就諗起煲芥菜魚湯。今次唔用唯一㗎游水魚 tilapia, 試咗條 bass (鱸魚?),都好鮮甜喎!下次又試吓其他魚先!

Tuesday, April 29, 2014

清潔瓷磚間隙

屋企個飯廳同廁所都係瓷磚地,瓷磚同瓷磚之間條邊其實好污漕,平時抹地抹唔倒,我又懶。。。。

最近睇倒有文章話用水,梳打粉,醋同少少檸檬汁加埋,噴上去,等一陣,然後抹一抹就會乾淨。啱啱買咗一大樽醋(因有朋友講咗好多醋㗎用途)於是我的起心肝試吓清潔瓷磚 D 邊。剛剛屋企冇晒檸檬汁,我就只係用醋,梳打粉同水。噴上地,等一陣,再抹,真係好易就抹乾淨喎!

嘩!之前真係污漕到不得了。。。



Monday, April 28, 2014

無蛋奶香蕉小蛋糕 (附食譜)

又整無蛋奶㗎蛋糕,今次係香蕉小蛋糕。

原來食譜用一杯糖,我減到1/4 杯,淡淡地都有少少甜味,想像唔倒落成杯會有幾甜。

原來食譜只有1/4 杯油,冇其他液體。我覺得好乾,於是落咗1/4 杯 rice milk. 成品仲係比較乾,食譜要再改良。

材料:
2 杯麵粉
1/4 杯糖
1 茶匙鹽
1 茶匙梳打粉
1/4 杯油
1/4 杯 rice milk
3 隻香蕉(壓溶)

做法:
1, 將乾材料拌勻。
2, 濕材料拌勻後加入乾材料中拌勻。
3, 倒入焗盆,放進已預熱 350 F 的焗爐中焗 25 分鐘。


Saturday, April 26, 2014

十七個月

十七個月啦,仲係唔識講人話。。。 但聽得明多咗嘢!

瞓:
一次午睡,多數係食完午餐玩一陣後放佢上床,佢會自己玩吓講吓嘢跟住瞓著。希望可以 keep 住係咁!平均瞓個幾至兩個鐘。每日無論幾點瞓,瞓幾耐都只係瞓一次。試過有日十點半晌車度瞓咗半小時,跟住下午眼瞓都冇再瞓。
夜晚九點幾瞓著,至七,八點。有試過瞓到九點!我終於可以自在地刷牙洗面食早餐!不過佢有時佢會六點幾起身。半夜間中會因出牙而喊醒,但會自己瞓返!
好幸福呀!可以有覺好瞓啦!

食:
可以自己用匙羹食嘢,當然仲係食得幾污漕。
開始唔鐘意食菜。。。有時會吐返出嚟。。。
戒晒奶樽,用 zippy cup, 試過一次用飲管。用大人杯就仍努力中。

沖涼:
沖涼盆還返比姑媽比表弟用,我又唔想買過,因唔用得幾耐,索性就咁淋浴,我同佢一齊沖。頭兩日驚驚地,依家照頭淋都 ok。

potty training:
想放棄之際又突然成功晌廁所 poo poo 喎。唔係次次得,都係見佢谷就同佢去。

溝通:
仲係冇人話講。。。好多 BB 話。。。
越來越聽得明多嘢。"出去""擺返好""休褲""比 xxx""攞xxx去xxx"。。。

活動:
行前行後自轉原地踏都冇問題。可以行得好快但未識跑。細級可以自己上落。想跳但只會 un. 有時聽到音樂會搖左搖右。爬嘢越來越嘢,開始爬倒playground 㗎梯。

其他:
放佢去 church nursary 終於唔喊!
出街肯拖住行。(好似上個月都會。。。)
多咗模仿我㗎動作,亦試過跟我講"啊",但仲係唔會做揮手之類㗎簡單動作。。。
識指鼻鼻肚肚,但最近又唔鐘意指。。。
出緊下排兩隻犬齒。




Friday, April 25, 2014

尋找靚煲的故事

晌我揾鑊同時,我亦揾緊煲,因為有兩個細易潔煲唔用得,所以要買過新嘅。老公以前屋企有用過玻璃煲,佢好鐘意,於是我上網睇吓幾多錢。

買玻璃煲首選 Corningware. 佢㗎 Vision 系列就佢老公以前用過嘅。一隻細㗎都要 US$50+, 仲有個蓋係要另外買嘅,所以我一直心大心細唔知買唔買好。

某日老公上 Craigelist 睇,原來有唔少人賣緊呢隻煲,最後,佢用 US$45 就買咗一套三隻煲加隻玻璃 pan!仲要全部都有蓋!雖然係二手嘅,但 condition 都唔錯。我諗我只會要兩隻煲,其他嘅可以試吓賣返出去。


佢晌 Craigelist 仲揾倒一套 Corningware,有成六個煲/ pans, 都只係 US$25!我會揀有用㗎出嚟,然後又試吓賣咗冇用 D.

不得不讚,老公上 Craigelist 真係有一手,好快就揾倒平靚正㗎嘢!

依家順手清吓屋企冇用㗎廚具,賣埋出去,又揾緊 recycling center 接收我 D 唔要㗎易潔鑊,實行嚟個廚房大執位!

Wednesday, April 23, 2014

尋找靚鑊的故事

我發覺自己雖然煮咗好多年飯,但對煲煲鑊鑊冇乜認識。晌美國,最常見㗎係易潔鑊/pan. 我一直都係用易潔 pan。呢 D 易潔嘢初初係好用,但係就好易花。就算我好小心咁用,始終都會花。花咗就驚佢㗎 coating 會脱落,食咗有害身體,所以就要買過隻新嘅,既唔健康,又唔環保。。。

我唔想再用呢 D 易潔嘢,所以開始研究吓有咩其他選擇:

LC: 好多人都一用上癮,我成日心郁郁想買返隻試吓。不過都幾貴,而且好重。老公話呢 D 五顏六色,都係有 coating, 佢唔多鐘意。

Cast iron: 傳統美國家庭常見,一隻 pan 只係十幾蚊美金,但同 LC 一樣都係重,因大家都係 cast iron. 煮嘢食時都應該 ok, 但洗㗎時間我驚會撞爆個 sink... 咁就大鑊啦。。。

不銹鋼: 用嚟煲湯都可以,但煎嘢炒嘢要用好多油至唔痴。。。

仲有咩 aluminum 加唔知咩 coating, titanium 呀, ceramic 呀。。。。。

終於都係睇返中國人用開㗎鑊。原來鑊有 cast iron 或者carbon steel. 當我仲研究緊邊隻好㗎時間,我有個朋友就話晌香港買㗎黑金鋼又平又好用!咁可能要老公九月返去㗎時候"咩"隻返嚟啦!反正佢成日都話香港冇嘢好買!哈哈

與此同時,我有另一個朋友用緊韓國超市賣㗎石鑊。唔洗廿蚊隻,係aluminum 加 marble coating. 佢話好用,咁我又試試。我相信呢個都唔會 last forever,用用吓都會花㗎啦,但可以晌買鑊之前用住先。

依家仲心大心細,好唔好上 Amazon 買住隻鑊先呢?

Monday, April 21, 2014

baking soda 去茶漬

飲茶係有益,但時常飲茶,好易令到隻杯有茶漬。而呢 D 茶漬含對人有害嘅物質,飲多有害。

我有隻杯有茶漬,成日想洗走佢但又洗唔走。今日無意中發現,原來用 baking soda 可以輕易去茶漬!倒少少 baking soda 落隻杯,然後用塊濕濕地㗎海棉捽吓就洗得乾淨啦!

我隻杯變到新㗎一樣!好嘢!(洗之前冇影相,冇得比較添。。。)




Saturday, April 19, 2014

有朋自遠方來

上星期請咗幾個朋友嚟屋企食飯,其中一個係晌香港過嚟玩嘅。上次見佢我都仲未結婚,今次見我就已經有個歲幾大㗎仔啦!

有個人仔,夜晚食飯最方便都係晌屋企食。今次煮咗蜆意粉,焗雞翼,焗三文魚頭,蝦沙津撻,薯角同炒什菜。下午見有時間仲整咗個啫哩。


其實有朋友嚟食飯,又有得煮飯仔,我好開心。可惜日煮得麻麻地,攪到依家諗起仲有 D 唔開心,希望朋友們唔好介意。。。 我仍需努力呀!

雖然煮得麻麻地,但至少人仔好捧場!仲第一次自己攞住隻雞脾仔咬添!


Friday, April 18, 2014

近期靚湯

上星期突然熱咗幾日,所以煲咗個消暑冬瓜薏米湯。

之後煲咗個節瓜湯。材料有節瓜,薏米,合桃,陳皮,瑤柱,瘦肉,係跟芳姐㗎食譜,佢話個湯有有潤膚養顏作用,咁要煲多 D 啦!


琴日煲咗個羅漢果菜乾湯。之前晌超市見過有羅漢果菜乾湯㗎湯包,我見 D 材料屋企都有,於是就試吓自己煲。材料有羅漢果,菜乾,紅蘿蔔,蜜棗。我覺得幾好飲,不過老公就唔多好,因為佢唔鐘意羅漢果。




Tuesday, April 15, 2014

尋校記

原本打算我會一直湊仔,湊到人仔五歲返幼稚園。但依家我有可能會提早"出山",返 part-time,咁就要揾間 pre-school 比人仔。所以呢排開始認識吓屋企附近㗎 pre-school.

老公有幾個同事都送佢地㗎小朋友去我地附近㗎一間 pre-school。佢地話好好,於是我就約個時間去 tour。一入去人仔就要掉頭走,我為有抱住佢入去。佢就一直喊,喊到 tour 完。。。一話走,就肯比我拖住自己行出去。好在呢度唔似香港咁要 interview, 否則佢實冇學返!


入面好好玩㗎,做乜掉頭走呀?


Saturday, April 12, 2014

終於。。。 跑倒 5k 多啲啲!

今朝洗完衫,預備完午餐之後,推住人仔出去跑咗個步。跑咗平時跑開個圈之後仲想跑多少少,於是跑多大半個圈。總共跑咗 3.24 miles,多過 5 k 少少!自從大肚之後都冇跑過咁多啦!雖然唔係長,但係竟然有以前跑 long run 個感覺,可以一路跑好耐好耐個感覺。。。

有好多跑步人仕話跑步會令佢地有 runner's high. 可能我呢種"可以一路跑好耐好耐"㗎感覺,就係我嘅 runner's high。通常跑完之後日感覺都會好舒服,好清新,好似排咗毒咁。


陪跑㗎人仔一路上睇吓車車,睇吓狗狗。我差不多跑完之際,佢就係咁攞住隻 snack cup 悶到瞓咗!


Thursday, April 10, 2014

無蛋無奶蘋果蛋糕

一直都好想自己焗 D 蛋糕呀餅呀之類比人仔食,可惜佢對蛋,奶都敏感,即係一般㗎蛋糕曲奇餅什至某些麵包都唔食得。於是我就上網揾無蛋無奶㗎食譜。

一開頭揾倒 D 係用 egg replacer 嘅,我唔知係乜。我唔係咁想用 D 化學嘢,所以我繼續揾。最近揾倒 D, 於是我琴日試整其中一個。我冇跟足原來食譜,因為有 D 材料我冇,例如 wheat flour 改用普通麵粉;而有 D 就唔適合人仔食,例如果仁,我就冇落。

我發覺好多食譜都用白醋,原來白醋係用嚟取代蛋。聽落有 D 怪,係咩化學作用呢?我冇深究,照落。我落少 D 糖,都甜,下次可以再少 D。

材料:
1 杯麵粉
3/4 茶匙泡打粉
3/4 茶匙玉桂粉
1/2 茶匙梳打粉
1/4 茶匙鹽
1/4 杯糖
1 杯蘋果絲
1/3 杯油
1/2 杯 rice milk
1/2 茶匙白醋
3/4 茶匙雲利拿油

造法:
1, 將乾材料拌勻。
2, 加入濕材料拌勻。
3, 倒入焗盆。
4, 放入已預熱 350 F 焗爐焗 30-35 分鐘。






Wednesday, April 9, 2014

上週靚湯

牛蒡雪耳紅蘿蔔果皮無花果瘦肉湯
屋企有包牛蒡乾,又有其他材料,所以煲咗呢個潤肺利㗎湯。



蘋果紅棗白背木耳果皮腰果湯
呢個湯有活血強心降血脂㗎功效。睇雀后人個 blog 月見倒,話係 Gigi 姐介紹過嘅,啱啱有齊材料,所以我照跟!唔落瘦肉落腰果,幾方便。


另外我煲咗個白菜菜乾豬骨湯。第二日仲用 D 湯煲咗個粥!正呀!

Tuesday, April 8, 2014

止咳洋蔥水

呢排上網成日見人介紹蒸洋蔥水,話對止咳好有效。前兩日人仔又咳返,唉…又病!我即刻試吓整 D 比佢飲。

做法好簡單:
1, 洋蔥一個去皮切條。
2, 蒸約三十分鐘。

會有少量洋蔥汁,唔好加水就咁飲咗佢。甜甜地,人仔好快就飲晒!連飲兩晚,依家雖然仲有鼻涕,但冇咳啦!佢上兩次傷風都咳好耐,睇嚟洋蔥水真係有 D 料到!





Monday, April 7, 2014

鼻鼻呢?

教咗幾個月,終於識指自己個鼻鼻!不過好多時指咗去人中度! 心情好時仲會指埋口口,肚肚同頭頭!佢第一次指㗎時間,我開心到癲咗!如果佢一早識,我諗我唔會咁興奮!

呢排,佢突然好似識多咗好多嘢!有 D 指令,我以前講,佢冇反應,但呢排佢會識跟著做。例如放底牙牙(牙刷),落樓梯。。。某日爸爸叫佢執玩具,爸爸講邊樣佢就攞,擺去邊佢就擺,希望佢一路都咁聽話啦!(我知冇可能,好快就會咩都唔要,唔際! >.<)




Sunday, April 6, 2014

意料之外的 2.7 mile

前兩日攰攰地唔想跑步,不過反正都同人仔去公園,推㗎跑步車出去跑兩步都好。

出到去跑兩跑竟然又越跑越順,最後跑咗 2.7 mile,  剛好見倒老公㗎車返緊屋企,我就返去。

2.7 mile 雖然好短, 5k 都唔夠,不過應該係我大肚之後跑得最多㗎一次,因為平時多數都跑吓行吓!雖然我唔係跑得多,但係體能好咗少少,身形又好咗少少!要繼續努力!

Thursday, April 3, 2014

請客

上星期日老公請兩個同事嚟食飯,其中一個結咗婚,有個仔同對孖女。其實因為地震,我星期六又要返工,所以有諗過改時間,不過最後如期進行。我又可以大玩煮飯仔啦!

當日有五大四小,我整咗個焗排骨,煎三文魚皮,甜辣醬蝦,粟米, spinach quiche, 同鮮果啫哩。老公就幫手焗咗個芝士麵包。我估唔到,日下午,我仲可以 take 個 nap!





Wednesday, April 2, 2014

上週湯水

自從揾倒芳姐湯水個 blog 之後,我煲多咗湯水。希望飲多 D, 健康 D, 皮膚好 D, 人靚 D 啦!

上星期煲過覇王花芡實無花果蜜棗瘦肉湯,又一清熱潤肺之選。

跟住煲咗個淮山杞子蓮子百合圓肉螺肉湯,唔記得睇邊度學返嚟。冇買咩煲湯㗎時間可以煲呢個,順便清吓 D 湯料!

另外我仲煲過夏枯草同綠豆薏米海帶水。

Tuesday, April 1, 2014

用羹食 mum mum

人仔一歲之後,我開始教佢用匙羹食 mum mum. 初時只係比枝羹佢揸吓,我就用另一隻羹餵佢。慢慢就試吓"不"咗比佢,然後扶住住隻手教佢自己攞羹食。但係佢唔鐘意人掂佢隻手,有時自己試,但係 D 食物就周圍咁跌。。。繼而用手食,隻手一路食一路周圍摸,跟住又玩吓 D食物又掟落地。。。 每次都同佢大戰一輪然後就要執手尾。。。

慢慢,佢學識咗攞起我"不"好㗎羹然後放入口!之後就努力教佢"不"嘢。第一樣學識"不"㗎係 yogurt, 因為基本上佢唔需要"不",放枝羹落個杯度 yogurt 就"痴"咗上枝羹度。學得好地地點知佢又突然厭食!排唔理佢用手定要餵,總之佢肯食就得啦!