焗薯仔脆片 (附食譜)

某人話屋企冇咩零食,所以呢兩日去買餸都買咗少少薯片餅乾。今日仲整咗個杏仁豆腐同焗薯仔脆片。

個薯仔脆片又係晌 Carol 個 blog 度見倒。一見就好想試整。今次係第二次整。上次 D 薯溶比較濕,又焗得唔夠耐,所以 D 薯片唔脆,第二日仲 "un" 晒添,所以我都唔比老公食,自己食晒。

今次個薯溶整得冇咁濕,又焗耐 D,確保佢地乾脆,真係好食好多!下次再整試吓再整薄 D 應該會仲好食!



材料:
薯溶 200g
木薯粉(即生粉,太白粉) 60g
菜油 30g
調味料如鹽,胡椒,蒜粉,香料等

造法:
1, 薯仔去皮,切粒,煮熟再壓成薯溶。
2, 將薯溶,木薯粉,菜油,調味料混合。
3, 將混合物放在保鮮紙中,用木棍壓平。
4, 將混合物分割成小塊。有時間,有心機的話可以用曲奇印模印出形狀。每片大小厚薄一樣的話,就唔會有 D 焗燶有 D 焗唔熟。
5, 放入焗爐 (350F), 焗15-18 分鐘,然後調低温度至 300F 再焗 5 分鐘。在焗爐中放至涼。