六十里單車

星期六,老公參加咗一年一度㗎一百里單車籌款。個 event 係兩日,不過佢唔得閑,所以只踩一日,六十里。仲記得舊年我雖然大住肚,但係就好輕鬆咁去唔同㗎休息站等佢,好好玩!今年有隻人仔,所以我只係去 day 1 終點等佢。



本來諗住餵完人仔個 lunch 至出去,點知老公好似比預期快,所以人仔瞓完個早覺我地就出發。點知行咗半個鐘,老公打嚟問我有冇攞埋個單車架,我至知原來朝早個同事 pick up 佢時放低咗個單車架比我攞落去,所以我拿拿聲掉頭返屋企攞。

全程車個幾鐘,人仔瞓足全程,証明佢係唔夠瞓。而我就可以靜靜咁享受揸車。想當年,我成日自己一個揸幾個鐘頭車,好懷念呢！

去到已經係兩點幾,所以即刻搵個地方餵人仔 mum mum. 點知餵餵吓老公已經踩完,我地冇得睇佢衝線添!希望下年可以啦。之後我地晌度 hea 到六點就走。我希望呢個會係我地屋企㗎週年活動,到人仔十二歲時佢就可以一齊踩啦！