我要跑走個肚!

上年十一月老公送咗架跑步 BB 車比我,初初我跑得幾密㗎,差不多隔日就跑。仲雄心壯志咁想揾個 5k 玩吓。不過天氣開始凍,我就以唔想凍親人仔為理由(藉口?!),少咗跑。之後又病咗幾次,所以冇乜點跑。依家天氣暖,又好返,要的起心肝跑返至得!

生完仔之後身體差咗,成日病。呢排又成日覺得攰,冇精神,而且心情鬱鬱悶悶咁。除咗因為瞓得唔好之外,缺乏運動係原因之一。唔可以再咁懶,要做吓運動。其實依家只得一個仔,佢又仲肯坐 stroller 培我跑,真係要跑多 D 至得!



老實講,要跑步仲有另一大原因,就係想消滅個肚腩。咁其實我唔著貼身衫係唔覺有肚腩嘅,特別係冬天著埋褸更唔覺。奈何有人耐不耐就話我有個肚腩,又話以前冇㗎,又叫我要做多 D sit up。有時自己見倒,都好想消滅咗佢。要消脂,最好就係做帶氧運動,咁就跑多 D 啦！打篇 blog 出嚟激勵吓自己,希望夏天有 D 成績啦！