雙瓜黃豆湯

最近睇 blog 見唔少人跟 Gigi 姐煮餸, 原來香港有個煮食節目叫"吾淑吾食"。於是我就上網揾吓有冇得睇。暫時睇咗兩集,又真係幾好睇喎。教煮食之餘又教揀材料,食療功效。Gigi 姐煮完又會同嘉賓一齊品嘗傾吓計咁。有時間我會煲埋其他幾集!

聽講佢教完呢個雙瓜黃豆排骨湯之後,好多煮婦跟住整,攪到街市㗎絲瓜即刻貴咗!平時我唔會整苦瓜因為老公唔食。聽人講呢個湯煲完唔會苦,攪到我好想試。


我用咗豬骨,因為我覺得用排骨煲好似有 D 浪費咗 D 排骨咁,其實得唔得㗎呢？另外當然有絲瓜,苦瓜同黃豆。煲之前再睇睇食譜,原來仲有枝竹。屋企冇,算啦唔落。

做法:
1, 豬骨氽水。
2, 黃豆豬骨先煲一小時。
3, 再放切好㗎絲瓜苦瓜煲一小時。

煲咗一輪我試味,苦苦地,再煲耐 D, 一到夜晚飲時,又真係唔苦喎！