轉 bedtime routine

某日聽我朋友話佢個女三歲,但臨瞓一定要飲十安奶,少一安都唔得,攪到十二點要同佢換條片,唔換就會賴尿賴到成牀濕晒。其實九個月過後就唔需要臨瞓飲奶,如果養成習慣,到歲幾兩歲時就好難改,所以我決定試吓同人仔介臨瞓餐奶。

要轉人仔㗎 bedtime routine 絶對係艱巨任務,因為佢屬於難入睡同醒瞓㗎人,不過我又唔想佢養成臨瞓飲奶㗎習慣,所以我就鼓起勇氣試試!

人仔本來㗎 bedtime routine 係沖涼,上大人床飲奶,轆一陣瞓。有時好攰,會飲飲吓瞓。跟住我會抱返佢去 BB 床。 試過比佢埋身食,不過唔想佢啜到瞓著,未瞓著唔比佢食又喊爆,所以都係用樽餵。



第一樣改㗎係讓佢晌自己床仔瞓著。沖完涼,就直接上床,然後飲奶瞓覺。頭幾次一放佢上床佢就喊喊,要比奶奶至可以令佢冷靜落嚟。幾日之後,就唔再喊,乖乖飲奶瞓覺。有時未瞓著會講吓故事,唱吓歌,傾吓計。

見佢上咗床都可以保持冷靜,咁我就試吓唔比奶佢,只係同佢講故事。不過佢越聽就越醒,好多時都攪成個鐘至瞓。晚晚都差不多講晒成本聖經。。。有時佢其實係好攰,但又唔瞓,晌度扭眼瞓。結果,我由得佢喊到自己瞓著。。。有幾日我病咗,我就比奶佢等佢快 D 瞓,因為我太攰。。。

呢幾日漸入佳境,佢聽一陣故事就瞓。原來同人仔轉 bedtime routine 冇想像中咁難,係要有少少耐性同堅持。希望佢一路都會乖乖聽故事瞓覺啦！依家可以順勢戒埋奶樽啦！