十四個月啦！

好快又一個月啦!今個月又識多咗嘢啦！

瞓:
夜晚瞓覺時好時壞。有時一晚醒一,兩次,有時醒五,六次。依然係八點度瞓,瞓到四,五點埋身食吓奶,之後再瞓到六,七點。

日間多數瞓兩次,十點同三,四點。每次瞓半小時至個半小時不等。有時下午瞓唔倒,夜晚就扭計 D。

食:
仍然繼續一早一晚飲媽奶,其他時間飲牛奶或米奶。最近又試返牛奶我諗佢之前皮膚紅係天氣乾,因為先排真係極之乾,而且睇過 D 資料話米奶營養唔夠,牛奶好 D. 一日三餐加一至兩次小食。正餐食完自己 D 仲要食大人嘢!

人仔食嘢好乖,咩都肯食,唯一擔心㗎係驚佢食得太急。佢好似唔洗咀嚼就吞咁,有時口仲有嘢又繼續塞嘢入口。跟住就會晌 D 便便度見返 D 食物。。。都唔知吸收咗 D 咩。。。

試過㗎新嘢包括:柑, 蛋白 (懷疑敏感), 芋頭, 紫菜, 椰菜, 倉魚,豆奶(懷疑敏感), 米奶

依家用匙羹用得好咗。"不"咗比佢佢會自己攞枝羹然後放入口,多數都食倒嘅。不過用用吓羹佢就要用手,初初都會一粒一粒咁食,食食吓就會用晒成隻手咁拿,然後係咁塞入口,好似餓咗幾日咁。。。

活動:
今個月正式識行啦！依家行得唔錯,手唔再晌 guarding position, 腳冇咁 steppage gait, 開始有少少 heel-toe pattern. (職業病發作,成日晌度做 gait analysis.... -_-)呢幾日鐘意倒後行。行平地沙地草地石地都 ok. 上樓梯識踏隻腳上去,扶住佢都免强上倒,落就唔係太識。教咗萬七次㗎掉轉扒底落樓梯終於都識!

可以蹲下執嘢然後企返起身,不過未識晌平地自己企起身,一定要扶 D 嘢至得。其實佢應該做倒,我諗我教多佢幾次佢會識。



溝通:
依然係一大堆 BB 話,好多唔同㗎發音,好似講緊外語。唯一聽得明㗎係見倒牙膏/牙刷時會講"牙牙",同埋唔正㗎"鴨鴨"。"爸爸","媽媽"竟然不敵"牙牙",鴨鴨"。。。。

成日手指指,用多咗食指,希望佢大個唔好再用中指!哈哈!識拍手,但係教極都未識揮手。。。

小肌肉活動:
突然識得入圈圈。入圖形入好咗,指明比佢睇入邊個佢難 D 㗎形狀都入倒。食 finger food 好叻,蘿蔔絲都攞倒,全靠為食!

開心大發現!
發現佢認得車,波,鴨,lighting McQueen, mickey, bear bear, 直升機。叫佢比或晌書度指佢多數都做倒!但係教咗 n 次咗手手,鼻鼻耳朵就唔多識。

同佢講爸爸呢？佢會望出門口睇吓係咪爸爸返嚟。

有時佢整跌嘢,我指住佢大聲講"哦…",佢倒驚跟住喊。睇見佢個樣我會忍唔住笑跟住攬住佢,咁就冇事。

"上堂",睇書時專心咗,可以集中一段仔時間。

寫住咁多先,期望下個月識講多少少嘢! :)