遲來的椰汁年糕 (附食譜)

人人都過年前密密蒸糕,我就年初一至心血來潮整椰汁年糕。其實本來都唔諗住整,老公唔食,又唔知可以請邊個食。不過星期日有 super bowl party, 有人會整蘿蔔糕,攪到我又心思思想整個年糕!

細個過年,晌屋企一定會食椰汁年糕,其他糕就好少食。不過唔緊要,因為我最鐘意都係食椰汁年糕。

幾年前自己一個住晌 Detroit. 新年思鄉病發,想食年糕。於是去度㗎蚊型華人超市睇吓有冇得賣。我都唔記得係冇定係又細又貴。總知 end up 我返咗屋企揾食譜自己整。之後幾年我都有整,順便送 D 比同我一樣晌美國無親無故㗎單身女仔。

十四個月啦！

好快又一個月啦!今個月又識多咗嘢啦！

瞓:
夜晚瞓覺時好時壞。有時一晚醒一,兩次,有時醒五,六次。依然係八點度瞓,瞓到四,五點埋身食吓奶,之後再瞓到六,七點。

日間多數瞓兩次,十點同三,四點。每次瞓半小時至個半小時不等。有時下午瞓唔倒,夜晚就扭計 D。

食:
仍然繼續一早一晚飲媽奶,其他時間飲牛奶或米奶。最近又試返牛奶我諗佢之前皮膚紅係天氣乾,因為先排真係極之乾,而且睇過 D 資料話米奶營養唔夠,牛奶好 D. 一日三餐加一至兩次小食。正餐食完自己 D 仲要食大人嘢!

人仔食嘢好乖,咩都肯食,唯一擔心㗎係驚佢食得太急。佢好似唔洗咀嚼就吞咁,有時口仲有嘢又繼續塞嘢入口。跟住就會晌 D 便便度見返 D 食物。。。都唔知吸收咗 D 咩。。。

試過㗎新嘢包括:柑, 蛋白 (懷疑敏感), 芋頭, 紫菜, 椰菜, 倉魚,豆奶(懷疑敏感), 米奶

依家用匙羹用得好咗。"不"咗比佢佢會自己攞枝羹然後放入口,多數都食倒嘅。不過用用吓羹佢就要用手,初初都會一粒一粒咁食,食食吓就會用晒成隻手咁拿,然後係咁塞入口,好似餓咗幾日咁。。。

活動:
今個月正式識行啦！依家行得唔錯,手唔再晌 guarding position, 腳冇咁 steppage gait, 開始有少少 heel-toe pattern. (職業病發作,成日晌度做 gait analysis.... -_-)呢幾日鐘意倒後行。行平地沙地草地石地都 ok. 上樓梯識踏隻腳上去,扶住佢都免强上倒,落就唔係太識。教咗萬七次㗎掉轉扒底落樓梯終於都識!

可以蹲下執嘢然後企返起身,不過未識晌平地自己企起身,一定要扶 D 嘢至得。其實佢應該做倒,我諗我教多佢幾次佢會識。

童工

某日抹抹吓地,人仔又要抹埋一份。平時我抹地,佢都鐘意望住,今次佢終於成功攞倒枝抹地嘢。雖然支嘢高過佢好多,但係佢將支嘢舞來舞去,玩得好開心。攞住呢支嘢,既練臂力,又可練平衡力,係唔錯㗎"玩具",哈哈!佢玩咗半個鐘都唔肯比返我!到佢大個叫佢抹地時就唔會想攞支嘢㗎啦！

我想一覺瞓天光!

人仔呢排又成日半夜醒!其實佢自出世都無幾多晚係唔會醒。sleep train 咗好好多,可以由八點瞓到四,五點,醒咗食奶奶再瞓到六點幾。有時半夜醒咗自己喊兩喊又瞓返。呢排佢半夜有時會醒五,六次。有時好快瞓返,有時就係咁喊。。。以為佢出牙,但係又唔見有。唔知係咪濕疹加乾燥痕痕攪到瞓唔倒呢?

琴晚算好,只係十二點,三點同五點醒過,之後瞓到成八點。雖然醒幾次,不過每次醒都好快瞓返,我都冇咁攰。

以前我瞓少一,兩個鐘,第二日就會覺得好攰好唔夠瞓。依家成年幾我都冇試過一覺瞓到天光,好懷念以前唔洗半夜醒㗎日子。。。

幾歲開始睇電視?

最近有朋友 send 咗篇文章比我睇,係解釋睇電視或其他電子產品對幼兒㗎害處。內容大慨係話睇電視會 overestimated 幼兒㗎腦部,阻礙腦部發展,亦會增加患上 ADHD 㗎可能性。

其實人仔未出世時,我已經決定兩歲前唔比佢睇電視,玩 i-pad/ 電話。暫時都 keep 倒。晌屋企,佢除咗同阿嫲 facetime 時會睇 i-pad 之外(我媽媽好了解我個 "no screen time policy"所以唔會要求人仔望佢,所以同婆婆傾計時,我唔會比人仔睇個 screen),都冇咩 screen time。平時都只係我同佢晌屋企,所以都唔難 keep 嘅。係我自己要節制,唔好晌佢面前篤電話囉!

損手爛腳

呢排人仔㗎手腳成日又紅又痕,所以我每晚晌佢瞓咗之後都同佢磨手甲,等佢唔好 "R" 損。前兩晚攞開咗個指甲"錯",冇磨到,諗住磨少一次半次唔緊要啦。點知第二朝起身同人仔換衫時,就見倒佢隻手損晒！!好陰公豬。。。望落去好似好痛,但我又唔覺得佢覺痛喎,掂佢又唔喊,沖涼照浸水,佢好似唔知自己損晒咁！

我竟然織倒-蝴蝶頸巾

我見幾位 blogger 媽媽都織咗蝴蝶頸巾比小朋友,攪到我心郁郁又想織。

雖然我手藝麻麻;
雖然我屋企冇冷又冇針;
雖然我連起針都唔記得點起,莫講話加針,收針,駁線。。。

但正所謂"世上無難事,只怕有心人。"我竟然可以四日織完呢條頸巾!多謝艾菲 post 㗎教學 link, 同youtube 入面㗎編織 video!

初初織得太粗,又成日無端端加咗針,所以織咗一半覺得唔靚所以拆晒再織過。其實依家條都唔多靚,織得時鬆時緊,又好似長得濟,不過我覺得唔錯㗎啦！哈哈!可惜依家天氣熱到好似夏天咁,暫時冇機會比人仔戴,隨意比佢試試就算。

依家仲有好多冷剩,再織咩好呢？

又"上堂"啦-kindergym

繼圖書館 storytime 之後,我又揾倒一個力免費帶人仔去玩去學嘢㗎地方. 其實半年前,我已經睇倒 Kindergym 呢個 class, 不過上呢個 class 㗎 minimal age 係一歲,當時人仔太細,所以要等到呢個學期至可以上。

"上堂"地點係一個教會㗎活動室,一去到就見到有 D 大形㗎室內玩具,好似滑梯,遙遙馬咁。頭十五分鐘係自由玩玩時間。人仔一去到痴住我,不過好快佢就唔理我自己走去玩!貪玩得佢吖！

玩咗十五分鐘就有"老師"請大家圍圈唱遊聽故仔。人仔當然係坐兩坐,又走去玩啦！唱完一輪就有大肌肉活動時間。今次係晌個小斜台度轆落嚟然後爬過 D 圈圈。

玩完之後,就玩泡泡,玩噹噹之後唱首歌就夠鐘啦！

呢個 class 同 storytime 一樣都有唱遊聽故仔,不過呢當比較著重大肌肉活動。幾好玩,好期待下一堂呢！

玩泡泡時間

咩病呢？

琴日病咗,清晨覺得有 D 胃痛,起身之後食咗少少嘢跟住想嘔標冷汗。我斷斷續續咁瞓到十二點幾至起身整嘢比人仔食。之後好似好返 D 就嗱嗱聲煲個湯同預備晚餐。做咗一陣,又想嘔,又好攰,又發冷,於是又瞓過,瞓吓醒吓直至四點幾!夜晚只係煮咗個好簡單㗎飯,同人仔食 mum mum 玩一陣,沖涼瞓覺。我就一齊瞓過!差不多瞓足一日!今日好好多啦,只係胃口麻麻。

唔肯定係咩病,希望唔好再病啦!琴日好在老公可以 work from home,幫手睇住人仔,佢又要做嘢,又要睇仔,又要整屋企個閘,辛苦晒！

特別任務

有朋友病重,冇胃口食嘢。佢係中國人,但佢屋企附近冇咩好中國嘢食,所以我地打算去探佢,順便整 D 水餃比佢。除咗餃子,我仲煲個湯同粥,星期日攞去比佢。希望佢會好返!

第一桶金!

我承認,我晌 potty training 方面係比較懶。由於依家係天冷,而呢度 D 人主張歲半後至訓練,男仔有時會仲遲開始,所以我冇急於同佢試。其實主要原因都係我懶!

不過,我見唔少 blog 友 D BB 十令個月就可以成功晌 potty 度便便,所以我都有試吓。有時見佢谷緊咁樣,就抱佢去個 potty 度等佢坐吓。好多時一開條片已經見倒有少少,但佢上到去個 potty 時,就掛住左攪右攪冇再谷便。可能咁抱一抱佢,攪亂咗佢度氣,令佢便唔倒。試過幾次之後都好少再試,最多都係同佢講"係咪便便呀""同你換片片啦"等佢知吓咩係"便便"咩係"片片"。

今日佢食完午餐後又谷便。我同佢換片時見只有一粒仔便便,於是心血來潮咁放佢上 potty。我比 D 嘢佢玩佢又肯坐,冇四圍郁。過咗一陣都冇料到,我仲諗住算啦。就晌時,佢突然定咗,專心運氣!佢谷便呀！!跟住就聽倒便便跌落廁所㗎聲!呀仔!你終於都得咗呀！

我不知幾興奮,對住佢又攬又錫又大讚叻叻！哈哈!而佢就自己笑咗一笑。唔知係笑我㗎反應定係覺得便便完唔洗醃住舒服所以笑呢？希望係後者啦！

對一個成日晌屋企湊仔㗎人嚟講,一件咁小㗎事係可以令我開心一日!哈哈!

第一次~自己行去圖書館

今日同人仔去圖書館,我做咗一個大膽㗎決定,就係唔帶 stroller, 唔帶揹帶,比佢自己行去圖書館。其實要行㗎路程好短,所以就算佢唔行,抱都唔難。最煩係我要揾書時驚佢攪攪陣啫！

我地去到圖書館,佢都肯比我拖住行入去,不過行行吓就比 D 車同單車吸引住,係都要行過去,攪咗一輪,結果都係要我抱佢入去。還書㗎時候佢乖乖咁拉住我條褲企定定(在佢冇拉底我條褲!)。之後去借 BB 書。度有 D 玩具比小朋友玩。我一邊睇吓借咩書,一邊住人仔。佢係都要攪個小姐姐㗎積木,攪到我好唔好意思。好在個小朋友又冇咁所謂。

睇完 BB 書,想去睇吓大人書,但人仔開始扭計。。。圖書館好靜甘麻,佢晌度呱呱叫,攪到個個望住晒,所以我都係嗱嗱聲 check out 幾本 BB 書就走人!

返到屋企同佢睇吓新書。我發覺佢依家睇書專心咗。以前佢只會指住 D 車車, e e ar ar 兩聲,跟住就會去攪其他嘢。依家我一路指一路讀比佢聽㗎時間,佢會望住頁,有時佢又會自己打開本書好留心咁睇,好似真係讀緊咁！

蛋白黃豆敏感?

我懷疑人仔對幾樣食物敏感。前幾日比佢試全蛋,佢食時咀仔周圍已經有 D 紅,食完連面仔都紅晒。過一陣又冇事。之後試多一次都係咁,所以可能係敏感。

其實呢排,佢成日腳仔痕痕又紅,有 D 地方仲 R 損咗。面仔又紅紅地咁,特別係食嘢㗎時候。我以為係因為天氣乾燥,不停咁同佢揸嘢,不過都唔見好。我諗諗吓,覺得可能佢對其他食物都有敏感。其中一樣容易致敏㗎食物係奶類食物。於是,我就停止比佢食乳酪,芝士同牛奶。唔飲牛奶,就試吓豆奶。

第一日飲完同佢出咗去玩。日天氣熱,佢一出去就面仔紅紅,我以為佢熱,或者太陽晒,所以面紅紅。第二日朝早比咗少少豆奶佢飲,佢又面仔紅咗少少。夜晚食飯時有豆腐,比咗少少佢試(其實之前試過,不過可能試好少,所以唔覺佢有咩),佢面仔又紅,紅到好似之前食蛋咁,唔通佢對黃豆敏感?

呢幾日冇食奶類食物,腳仔又真係冇咁紅,又唔見佢 R, 唔通佢對奶都敏感?其實佢食嘢陣,好多時面仔都會紅紅地。到底係乾燥定敏感?定係兩樣都有 D?或兩樣都唔係?

剪髮

人仔頭髮少,又長得慢,所以依家十三個月大至第一次剪髮!我聽有 D 人係親小朋友瞓㗎時候至同佢剪,於是,我晌佢 nap 㗎時候就試吓同佢剪。不過人仔好醒瞓,我剪一剪,佢又郁一郁。剪咗一邊耳仔上面㗎頭髮,想剪另外一邊,但佢側住頭瞓,攪到我剪唔倒!攪到要分兩次剪。而且佢晌 car seat 度瞓,所以我剪唔倒後面 D 頭髮。於是,我就嘗試當佢晌 high chair 㗎時候同佢剪,我快快手剪咗一下之後,佢就唔比我剪,郁來郁去。所以我每次只可以剪少少。唔知我要剪幾耐至可以剪好呢？

其實我唔係好識剪頭髮,雖然以前都有幫過個男仔 friend 剪過,不過佢冇咩要求,只想慳返十令蚊,所以肯比我剪!哈哈!希望人遲都唔好太介意,咁我就可以慳返 D 錢啦！哈哈!

乳酪方塊酥餅 (附食譜)

琴日心情唔錯,整吓餅先!先一排晌 Carol 個 blog 度見倒呢個餅,覺得幾得意,所以今日試整。

材料:
Cream cheese 50g
牛油 50g
糖粉 50g
蛋黃 1隻
低筋麵粉 150g

1, cream cheese, 牛油, 蛋黃放室溫回暖。
2, 麵粉過篩備用。
3, 用打蛋器將 cream cheese 打至軟滑。
4, 加入牛油,糖,打至打蛋器尾端呈現挺立的程度。
5, 拌入蛋黃。
6, 慢慢拌入麵,混合成麵團。
7, 將麵團搌成約1cm 厚長方形。
8, 用保鮮紙包好,放入雪櫃雪半小時。
9,
放入已預熱 350F 的焗爐焗15-18分鐘。
8, 熄火,用焗爐餘溫再烤一會至上色。

馬豆糕 (附食譜)

最近執雪櫃,見倒有包馬豆。屋企又有 D 減價時買落㗎椰汁同花奶,唔用就過期㗎啦,所以整個馬豆糕先。可以清嘢之餘,老公又鐘意食,整一大盆仲可以請人食添!

材料:
馬豆 半杯
椰汁 一大罐
花奶 一小罐(約160g)
粟粉 170g
糖 280g (我諗下次我會試250g)
水 5杯

造法:
1, 將馬豆煮淋。我將佢浸咗幾個鐘水,所以較快煮淋。
2, 水加糖煮滾。
3, 用椰汁同花奶開溶粟粉後拌入糖水。
4, 慢慢煮杰。
5, 倒入盆中,放入雪櫃雪至硬身。

BBQ 醬焗排骨 (附食譜)

我地好耐冇出街食 ribs 啦,之前鐘意晌 costco 買 D 醃咗嘅,返屋企焗,又好味又易整,仲比出去食平好多。前幾日見某超市有排骨減價,買咗條返嚟,見屋企有樽 BBQ sauce 未用完,咁就攞嚟試吓焗排骨。

造法:
1,先用 BBQ 醬將排骨醃一下,最好醃過夜。亦可以用其他調味料醃。
2, 預熱焗爐 350 F。
3, 用錫紙蓋好排骨,焗一小時。
4, 拿開錫紙,加醬,淋醬上面再焗 20 分鐘。
5, 每 20 分鐘重複加醬淋面一至兩次。
6, 最後可加蜜糖然後用上火焗幾分鐘。要睇住小心焗燶。

原來係咁容易,老公都讚好食!真係平靚正!