二號九個月嗰時晌香港唔記得寫，咁快就十個月啦！
食
出咗四隻牙仔㗎佢食固體食得好好，一日三餐咩都食!再加三、四餐奶。食得多但只得十七磅。我一向都唔太緊張佢幾重，只要有增長就得。但呢兩個月增長少咗又跌到5%以下，可能郁得多。又有可能係吸收唔好，見佢有時食㗎嘢晌 poo poo 度見返，所以依家餵多啲奶，睇吓會唔會好啲。
瞓
又係瞓得麻麻地。日間瞓兩次，好多時都係半個鐘就喊醒。夜晚仲係會醒。。。 上星期有兩日好啲，叫幾聲就瞓返，我以為曙光初露，點知之後病，又成日喊醒要食吓人肉奶咀至瞓返。。。希望病好會好啲啦。
活動
絶對係一隻馬騮仔!換衫換片轉唔停，又瞓又爬又企。依家爬得好快，所以放佢㗎地方一定要安全。隻手又好快就會攞咗啲嘢，睇少眼都唔得!可以扶住啲嘢行。
溝通
好多嘢講，有時成日講 ma ma ma ba ba ba. 教緊手語，唔知幾時會做倒？好鍾意哥哥。我同哥哥做同一個動作，我做佢唔會笑，哥哥做就笑到哈哈聲!好鍾意玩 Peekaboo, 仲有掉嘢落地等人執!一般情況都肯比人抱，又鍾意玩，放佢去主日學佢唔會喊。
二號驗血報告出咗，驗出佢對 wheat、蛋白、花生、黃豆敏感。黃豆敏感非常輕微，另外三樣都屬輕微，希望佢大啲好啲啦！如果唔係，煮嘢比兩兄弟都幾煩!人仔對全蛋、奶、花生敏感。即係比塊 cheese pizza 佢哋，一個只可以食啲料，一個只可以食下面塊包!人仔最锺意食包、粉麵呢類食物，但二號唔食得，只可以食飯、米粉要兩個都食得安全開心，有啲難度!
人仔有濕疹同食物敏感，二號都有少少濕疹，不過輕微好多，以為佢會冇咩事，點知。。。
某日佢食完午餐，瞓咗一覺，跟住喊醒。同佢換片之後就放低佢自己玩。玩玩吓佢叫，就睇吓佢。嘩!成面又紅又腫，睇吓啲手腳好似出風癱咁一撻撻，又好痕，仲有兩聲咳，即刻帶佢去 urgent care.
醫生話佢有過敏反應，仲話口喉嚨有少少腫，跟住抽血，驗吓對咩過敏。到當日夜晚仲係眼腫腫，好陰功。
我懷疑係對 wheat 過敏。返香港前試過比少少包佢食，諗住食得包，去旅行方便好多，但食完之後佢就手肘成日有濕疹嗰個位痕，懷疑佢對麪粉敏感，所以唔比包佢食。過一排又試，覺得佢冇咩，跟住又試通粉，食咗幾粒，面有兩點紅，又冇咩嘢。事發當日就係食咗碗通粉，即時冇咩嘢，瞓完個覺至出事。
依家冇比任何 wheat product 佢食，我仲餵緊奶所以都戒口。即係唔食得我最鍾意㗎包包餅餅。。。佢㗎濕疹又真係好咗喎!希望驗血報告快啲出咁就至係對咩敏感。
讀萬卷書不如行萬里路
返完香港，明白到讀萬卷書不如行萬里路呢個道理，決定唔送人仔上 preschool 住，慳咗㗎學費用嚟去多幾次旅行!返學真係唔需要咁早，有得晌淡季去旅行就玩多幾次先!
遲返學，唔輸蝕
人仔未正返學，我又教得 hea, 學術嘢學得慢，數數字數到十之後就亂嚟，英文細階仲未識晒，又冇上咩興趣班。不過佢係一個算有禮貌會守規矩㗎小朋友。有時又會為人著想，食嘢預埋其他人嗰份。返香港眼見一啲小朋友冇禮貌，唔尊敬長輩。同其他小朋友玩又唔肯分享。四、五歲講嘢已經好 mean, 又咩都要贏，要其他人輸，可能係受競爭風氣影響。當然都有見過啲乖小朋友。始終覺得良好品德、正確價值觀要從小建立，呢啲嘢唔一定要返學學，家教身教更重要。
玩咗三個星期，前兩日返到美國啦！好感恩一切順利，大小朋友都健康平安!今次玩得好開心，我諗我好快會再返去!
人仔最開心係可以坐唔同㗎交通工具!一落機坐機場架無人架駛列車已經好開心!不過從未搭過交通工具㗎佢唔識扶住扶手，我哋又冇諗到呢一點，一開車時佢差啲跌襯!地鐵火車巴士小巴的士纜車丁丁渡海小輪全部都有坐!不知幾開心!
另一樣開心嘅就係可以同表姐表妹玩!有時佢揀留晌屋企玩都唔想同我出街!咁我又多啲自由時間!
我今次覺得自己放咗三個星期大假!平時晌美國想自己落街行個圈都難，但返香港有人幫手睇細路，我出街可以唔洗帶細路，仲可以同老公去三日台灣補渡蜜月，實在難得!當然要多謝我媽幫手睇細路!
去過香港公園、維園、迪士尼、鐵路博物館、室內遊戲室、圖書館.... 見咗唔少親戚朋友又識咗啲新朋友，好滿足!
坐飛機冇想像中咁辛苦。人仔自己睇電視畫畫食嘢，耐唔中要幫吓手。弟弟都好乖，瞓咗兩轉又冇大喊。算好好啦！反而時差辛苦啲，呢兩日二號夜晚都喊，瞓得唔好，但日間又唔係瞓得多喎，希望佢快啲適應啦！
轉眼就到十月最後一日，聽日就返香港啦!啲嘢差唔多執晒，成日覺得香港咩都有，仲有我家人接應，有咩冇帶都唔緊要，但又驚會帶漏啲重要嘢!第一次帶啲仔坐飛機，總有啲緊張，唔知啲仔表現如何，唔知會唔會好難捱。依家慣咗冇覺好瞓，
晌飛機冇得瞓都唔會覺得咁難捱呱!
大仔都易啲，晌機上睇吓電視食吓嘢瞓吓覺就到，係驚佢落機時未瞓飽扭計，因到達係美國時間半夜! BB 就唔知會點啦，呢排佢唔鐘意瞓，最鐘意四圍爬，希望我哋攪得掂!
返到香港唔知佢哋適應時差會點？另外又擔心佢哋會病。。。依家已經有啲鼻子同咳，希望佢哋快啲好返!
點都好啦，希望係一個難忘開心㗎旅程啦！
又係遲咗，近來懶寫 blog, 但都好想記錄返日常生活同小朋友㗎成長，佢哋大得好快，唔寫低好快會忘記晒!
瞓得越來越差，可能啱啱感冒，呢個星期夜晚兩三個鐘就醒，日間瞓一陣又喊醒，唔夠瞓又炆啲，攰到我呢。。。
食嘢就好叻，似當年㗎人仔咩都食!見佢開始識咀嚼，就唔再打泥，轉切粒，又食倒喎。粥仔飯仔照吃。有時整蕃薯紅蘿蔔切條比佢當 finger food 食，練習吓手指仔。
活動能力繼續進步。坐得好穩，識正式爬，扶住企時可以行兩步。好鍾意企，不過我想佢爬多啲。
呢個月又講多咗嘢。好鍾意同人玩，成日同哥哥玩到哈哈笑。兩個相親相愛係好事，不過一齊瞓午覺時，佢哋掛住玩唔瞓覺都幾激氣。有時我瞓咗佢哋都未瞓!
咁就八個幾月啦，湊住兩個，時間過得好快呀！
二號七個月大，過咗成個星期有多至記得寫 ，哈哈！
食
繼續全埋身，人奶食放題，都唔知佢食幾多。食咗一個多月 solid，一日兩餐，但有時忙或出街冇預備就一餐。試過：
米糊，蕃薯，薯仔，紅蘿蔔， 意大利瓜，節瓜, 青江菜， 青豆，香蕉，蘋果， prune
暫時都好肯食，唔讚得唔讚得。
瞓
一日兩小睡，好多時都瞓得唔好，半個鐘就喊醒。瞓得最好係晌孭帶入面。半晚仲係會醒。。。點解我啲仔都係唔鍾意瞓覺嘅。。。
活動能力
反身同爬(軍人式)都好快,攪到換片好似打仗咁。開始坐倒，同鍾意扶住床邊跪。中秋節嗰日仲發展到企!自從佢識企之後，就好鍾意企，下午成日扶住個 play pan 邊企晌度睇我煮飯，好似想我快啲煮完同佢玩咁。
溝通
依然好鍾意同人玩，邊個抱佢同佢玩都笑笑口。呢個月好似冇發咁多音。
其他
呢個仔都係有濕疹，暫時冇當年哥哥咁嚴重，希望佢唔好似哥哥咁慘。。。
過咗差唔多兩個星期至記得寫!哈哈！
半歲㗎佢重16磅，長25.5串，頭圍好似係16.5,繼續做細碼細頭 BB。
佢用哥哥一樣有濕疹，好在冇哥哥咁嚴重。醫生開咗藥，不過唔會揸，因為發覺啲藥係越揸越唔掂!
開始食糊仔啦！一心比佢試 baby led weaning. 所以等到半歲，坐得好啲，對食有興趣至試。第一樣係試蕃薯條，佢冇乜意欲攞，比佢攞住又唔會放入口，明明平時咩都放入口。。。又gag 咗兩次。都幾驚!之後又嘗試整難啲用匙羹比佢，佢又唔食。試咗幾日都係唔鐘意，見到一條條㗎食物冇意欲攞，但係見匙羹就會開口。終於我試吓整米糊，佢又好鐘意喎，我諗都係用返 traditional weaning。
活動能力唔錯，反身好快，又成日軍人式四圍爬，開始做到正式爬㗎姿勢，但未爬到。
多咗唔同㗎發音。之前成日講”L Ger",依家會講“um 咩”“ma",特別係有需要時就會"咩咩ma ma"。
一日兩至三次 nap,有時都會扭眼瞓。夜晚六點幾食完奶就瞓。半夜仲會起身，食一陣就瞓返。想訓練佢瞓過夜，試過兩次唔餵佢抱吓佢跟住放低佢，佢會瞓返，但唔係次次得。有時都係餵一餵佢容易啲。。。唉，我已經唔記得一覺瞓天光㗎感覺係點啦！
Overall 都係一個開心 BB，可能當年哥哥太難攪!佢一見到我就開心笑嗰個樣真係好可愛!雖然仲要餵夜奶，有時又扭眼瞓，但我都好珍惜佢細細粒手抱㗎時候，真係唔想佢大得咁快啊！
好耐冇跑過啦! 依家跑步，最難係揾時間練。啲仔仲細好困身，又要餵夜奶攪到冇覺好瞓。最近有朋友揾人一齊跑 10 k, 攪到我都想跑吓。
今日返工，老公就帶咗啲仔去朋友屋企因為佢下午都要返。我放工返到屋企係冇人㗎!!呢啲千年難得一見㗎景象，我當然要好好把握!
2.15 mile
25 min
11:37 min/mile
竟然仲可以跑完全程，我諗平時晌屋企做㗎 interval 係有用喎!
雖然係慢，但係係好㗎開始!希望可以繼續努力!咁十月就可以跑個 10k 啦！
最近聽見有五百幾蚊來回機票返香港，好平呀！攪到我拖住兩件都心郁郁想返香港。諗咗個幾星期，老公請倒假，安排好我返工㗎日子，終於 book 咗機票啦！
我有五年冇返過香港啦！我所有親戚都晌香港，雖然好想返，但一直覺得細路細，返去好煩。人仔以前成日唔瞓覺，喊又喊得大聲，所以唔敢同佢坐飛機。依家佢大咗，希望會好啲啦！
其實係要返吓去㗎啦，太耐冇見啲親戚同朋友。而人仔下年可能正式返學，咁就唔可以 low season 返。二號仲細，依家返去都煩，但我覺得一係就一歲前返，一係就等到三歲。一、兩歲嗰啲時候識行識走但又未係好懂事，塔嗰轉飛機會好辛苦。
今次遇著平機票，係時候返吓去啦！希望旅途順利啦！
2號5個月大，就嚟半歲啦！依家同佢玩會笑得好開心，有時望住哥哥玩又會大笑。同佢睇書佢又會好專心咁望，當然亦會手多多攪本書，跟住放入口!活動能力好勁，雖然唔係成日反身，但係未夠五個月已經爬倒!當然係肚貼地嗰隻爬。可能係因為佢趴住瞓，每日 tummy time 㗎時間多過瞓晌度!當年哥哥好似成七個月至開始爬。
見佢開始爬，就舖啲膠墊比佢爬。點知佢過一個星期，就好快爬出地下。我冇可能成日望住佢，於是即刻開個 playpen 比佢。哥哥仲好開心咁放晒啲軟㗎玩具比佢，又企晌個 step stool 上面睇佢。
繼續全人奶，埋身餵，好方便。三至四個鐘一餐。平時唔知佢食幾多。我要返工之前兩日就泵吓奶，等佢可以繼續食人奶。老公餵佢每餐食7、8安。
日間兩至三 nap。七點幾食完奶瞓到五、六點，中間會醒兩次，希望佢快啲瞓長啲啦！
雖然比佢攪到冇覺好瞓，但日日望住佢都覺得佢好可愛，好鐘意攪住佢，唔捨得佢得咁快啊！
好快又一個月。今個月成功轉返埋身餵，慳好多功夫呀！出街唔洗帶奶樽奶粉，幾時要食揾個地方坐低披條巾就得，好方便啊！今日仲成功晌孭帶入面餵，行緊都冇人知我餵緊奶，哈哈！
日間食 5 餐，半夜食1餐，耐唔中會醒2次。唔知係咪轉咗埋身餵，餐餐食㗎份量唔同，所時食得冇咁定時。
一日2-3 nap, 下午嗰轉通常瞓長啲。可能因為我都瞓咗，佢醒我冇理佢佢又瞓返，哈哈！
Tummy time 可以好耐，頭舉得好高又會周圍望。成日想反身。琴日比佢扒晌度，我走咗去煮飯，煮煮吓聽倒佢叫，走去睇佢時佢反咗瞓咗晌度!錯過咗睇唔倒佢反添!
手仔攞嘢叻咗，可以攞住啲嘢放入口。
同佢玩會哈哈笑，但下一次做同一個動作佢又唔會笑㗎喎，要玩另一樣嘢佢至會笑。
佢係細碼 B, 身高體重係 10-25 %, 頭圍係5-10%, 細頭似我呀！
其實人仔過咗3歲半一段時間，成日想記低佢㗎成長但懶懶閑，又唔記得。再唔寫就四歲㗎啦！
瞓
二號出世之後反而瞓得好咗!唔洗再講故事講到瞓著，會自己晌床合埋眼瞓。每日都午睡，呢樣對我好重要，因為我都要午睡!每日我快快食完午餐就餵二號，佢就自己食埋，跟住玩一陣再去個廁所就入房瞓。好多時我都差唔多餵完。咁我哋三個就齊齊瞓!係每日最開心㗎時候呀！哈哈！
有時瞓醒唔見我會喊，但有時又會乖乖自己行出嚟玩。
活動能力
跑跑跳跳冇問題，呢幾個月開始識單腳跳。跳舞音樂感好好。
小肌肉
識扣鈕，兩歲幾就開始玩細粒 Lego，屋企得啲濕濕碎碎㗎細 Lego, 都可以自己玩成朝，會自己砌車仔。三歲倒開始鐘意揸筆畫嘢，雖然之前少揸筆，但手仔都夠力，可能係玩車仔玩 Lego 玩得多。
自理
以前去廁所一定要揾媽媽，依家有時要湊二號，所以佢要自己去廁所!開大的話要等我攪掂二號至可以幫佢抺!
社交
呢排做咗親善大使，主動同人打招呼，講多謝唔該。好快識倒小朋友，會主動同人玩。
語言能力
講嘢似大人，好老積。ABC 㗎佢暫時仲係流利廣東話。自己玩嗰時會自言自語，講啲好似英文但又聽唔明㗎嘢!耐唔中又會有一、兩個字係聽得明嘅，例如 let's go, come on, car, go, monster.... 同講英文㗎人會自動轉台，用佢有限㗎英文同人講溝通。佢又唔會因語言唔同而唔同人溝通，呢樣叻過我好多!
玩
去公園玩大膽咗，以前唔敢玩有蓋㗎滑梯，依家敢啦！有段時間返學唱遊時唔會做動作，只會企晌我身邊。二號啱啱出世後一個月再返返學佢直情連 free play 時間都要痴住我。但最近又好投入，跟住老師又唱又跳，好感動!
隨咗鐘意玩車之外，佢亦好鐘意扮拉大提琴。開 piano guys 音樂比佢，佢會擺住兩條 pool noodle 扮拉大提琴。
濕疹
令我好頭痛，成日 R 損晒。有啲地方損完好返又再損，半夜又會痕醒，R 到損晒流晒血，好陰功。
學術
數倒0-10樣物件，認A-Z大楷，開始認吓中文字，最叻認個“車”字。
唔經唔覺，2號3個月大啦！
食：
3.5-4個鐘一餐。其實佢瞓倒的話，係可以4個鐘，不過好多時都未夠鐘就醒。
開始試返埋身餵。
依家全人奶，仲有剩可以同哥哥分享!
瞓：
日間多數3小睡，有時瞓多啲有時少啲。
扒住瞓，出街就晌孭帶度瞓。
夜晚七點幾食完瞓到4 點幾再食。
玩：
開始有互動，笑多咗，又會笑出聲。
鐘意申右手摸嘢，左手就鐘意攞住啲巾或者衫。
搵倒自己對手。
二號滿月了！依家冇之前咁辛苦。二號夜晚通常十二點幾食一次，之後三點幾再食，然後到清晨。媽媽晌度，通常佢會餵十二點嗰轉，而我就會早啲同人仔一齊瞓，可以瞓到四個鐘倒至起身泵奶。跟住三點再埋身餵。佢依家半夜食幾食就瞓過，所以好多時我餵完會再泵。佢夜晚算瞓得幾好，唔知幾時會戒夜奶呢？
日間就瞓得麻麻地，未識自行入睡，要抱或者孭佢至瞓倒。之前一餵完奶換完片，同佢玩吓就抱或者孭到佢瞓著。但依家都冇咁緊張，因為又要陪吓人仔，又有其他嘢做，所以通常比佢晌床度 hea 一陣，等我做吓其他嘢，試過佢晌床度喊一輪，我只係拍吓佢，跟住瞓咗。又試過比奶咀佢，佢啜啜吓瞓咗，不過好多時都唔成功，哈哈！
雖然啱啱至滿月，但其實我上星期已經開始帶埋佢出街。冇法啦，我媽媽唔揸車，老公又要返工，所以我哋要出去買吓餸，同埋大家都唔想成日困晌屋企。hehe!可以出去行吓，心情都好啲呀！
依家成日都想二號快啲大，易湊啲，出街去玩都方便啲，兩兄弟又可以多啲互動。不過到佢大嗰時就會懷念佢細細粒㗎樣㗎啦！哈哈！
過咗兩星期不分日夜㗎湊 B 日子。呢兩星期，冇一覺係瞓超過三個鐘，好攰。唯有不斷同自己講，過得一日得一日，最辛苦㗎日子會過去嘅。
頭幾日係全埋身餵人奶，但實在太痛，所以用泵泵出嚟再餵，咁樣多功夫好多。依家都仲有試吓埋身餵，開始冇咁痛，希望遲啲可以轉返全埋身，特別係我媽返香港之後，咁就方便好多。
二號食嘢快又多，好快就加到三安一餐，有時再加埋身，大約每三個鐘食一次。一開頭都驚唔夠奶，好在人奶慢慢增加，依家每日大約加兩安奶粉。希望遲啲可以全人奶!
二號難湊㗎地方係難入睡同好醒瞓。有時又覺得佢好多氣一瞓低就喊，要抱住。好想就咁放佢上床仔由佢瞓，不過佢會喊。。。抱住佢瞓咗，放佢上床又喊。有時就孭住佢，或者比佢啜奶等佢瞓。呢啲習慣都係唔好，但係唔 tum 佢瞓佢又係咁喊，好煩。
今次傷口好快唔痛，行得走得，唔似上次坐又痛，企又痛，行又行得慢。頭一個星期有少少 depress, 會突然喊，不過好快就積極返，因知道會慢慢容易。
人仔都開始適應。初初佢好容易就大喊，特別係半夜二個一齊醒，兩個同時要媽媽時最難攪!日間爸爸帶佢出去就好啲，我可以休息吓，但係爸爸只放一星期，今個星期已經返工啦。有時婆婆會帶佢去附近行吓食吓嘢，咁我可以專心湊二號或者休息吓。當然我幾攰，都唔可以唔理人仔。佢晌屋企時我盡量同佢玩吓。佢依家適應咗少少，我 tum 緊二號瞓瞓時佢可以晌我旁邊靜靜玩。之前大家都好緊張，要捉佢走驚嘈到二號，攪到佢又大喊!
琴日實在太攰，又病病地。發冷頭痛頭暈，啲奶又有啲唔順，好驚係乳腺炎。好在係星期六，老公唔洗返工，可以帶人仔去街，咁我媽就可以湊二號，我就可以休息吓。
咁就捱咗兩個星期，希望到滿月時會容易啲!
二號同哥哥一樣，都晌婆婆落機之後嗰日提早出嚟!今次係早咗七日。星期六朝早覺得有啲陣痛，仲有少少見紅。由於大肚後期一路都有啲唔規律㗎陣痛，所以都冇理到，照出咗街買嘢。下午陣痛慢慢強烈，又開始密咗，心知二號都應該就快出嚟。到四點倒已經係十分鐘一次，打去醫院個護士叫我等到五分鐘一次至再打去。當時己經有啲頂唔順啲痛，心諗點可以捱到五分鐘一次至去醫院。過咗一陣陣痛密咗，唔理咁多即去醫院。
去到醫院，陣痛已經係五分鐘一次，醫生檢查時話已經開到九度，唔怪之得咁痛啦！早知就早啲入去打無痛，唔洗咁辛苦啦！個醫生仲話我應該打唔切無痛!我嗰刻好驚，冇無痛點頂呀！好在都打得切，因為打咗之後仲等咗三個鐘至生得。
今次生嗰時真係完全無痛!上次個護士臨尾停咗藥攪到我生人仔時好辛苦。今次係完全冇痛㗎感覺，啲醫生護士又好温柔，唔似上次打扙咁!個醫生手勢亦好好，傷口過幾日就唔痛啦！
今次生完復完得唔錯，傷口冇咁痛，又好快去倒廁所。不過第一次落床去廁所時成個暈低!要老公同三個護士抬我上床。我咁大個人都係第一次咁暈法，直情斷咗片!
餵人奶尚算順利，唔洗加奶粉但餵到好痛。。。希望慢慢會好啦！
晌醫院住咗三日兩夜，走嗰時唔知點解有啲感觸，可能係因為今次會係最後一次啦入院生仔啦。
琴日一早去三十七周産檢，諗住都係一切正常，依舊安排好一日活動。記得上一胎臨尾會照多次 ultrasound, 但上兩次問都話應該唔會照。今次一入醫生房就見部機，知道會照，就同人仔講可以見到二號啦，又準備定電話諗住影張相比老公睇。點知照 ultrasound 時，醫生話我羊水少，再度吓個肚，佢話個肚細。明明覺得今胎個肚大啲㗎喎!之後就叫我去醫院 labor and delivery，因為嗰度啲儀器好啲，可以 check 清楚個 B 有冇事。結果就即刻揸車去醫院，沿途就不停同人仔解釋要去醫院，好在佢都好合作。晌醫院同老公會合，之後 check-in.
入房後就接駁 monitor check 住 BB 心跳同 contraction. 之後又照 ultrasound. 結果羊水冇少，屬 borderline, BB 發展亦正常。check 心跳時有個小問題，但再仔細驗查之後都係正常，可以返屋企。
入院時都有啲擔心係胎盤提早退化，以致羊水少同 BB 發展慢，驚要即刻開刀攞佢出嚟。好在最後一切正常，希望 BB 再大啲，至少都等到婆婆嚟至出嚟啦！
已經到咗36 週啦，實在係太快!暫時仲係行得走行，星期六仲去廸廸尼玩咗成日!要襯二號出嚟之前玩多啲呀！
依家開始一星期要去一次產檢，我發覺今胎老公一次都冇同過我去，連超聲波都冇睇過!取而代之㗎係人仔，佢次次都一齊去，連要等成個鐘㗎糖水 test 都一齊!
啲嘢都預備得七七八八，走佬袋仲差少少就執好。不過仲未買尿片!哈哈！
希望二號唔好早到，至少都要等到我媽嚟先!老公將會轉職，都唔知佢可以有幾多假，希望到時攪得掂啦！
