平淡聖誕

睇 FB 見好多朋友聖誕節節目多姿多采。我一家就冇咩節目，因為人仔病咗。。。
人仔一向幾健康，可能未返學啦。歲幾之後都未試過因病睇醫生，最多只有少少流鼻水。今次發咗幾日燒，到依家都仲冇咳同流鼻水，新年可能都冇咩節目啦。
佢21日星期一朝早開始發燒，燒到 102F ，中午退燒，不過就繼續咳同流鼻水。
22日冇燒，諗住佢慢慢好返啦，點知23日又燒過，仲燒咗成日。佢成日都冇精神玩，晌張床度瞓吓醒吓，成日都話唔舒服。下午比少少退燒藥佢，之後退咗燒，精神好少少。但係藥力過後又燒過。
好在24日退咗燒，但係夜晚又有少少低燒。。。
25日就冇再燒啦。
本來 24日會去教會 party 都冇去到。25日聖誕節只係朝早出去公園晒吓太陽，跟住就成日晌屋企啦！
雖然過得平淡，不過一齊 hea 吓，其實都唔錯嘅。
好在人仔唔係咩大病，希望佢快啲咳完啦。

咁快就三十週啦！

第二胎過得好快，唔經唔覺就到咗三十週啦！今胎係冇咁緊張，有時都唔記得自己大緊肚!啲人問我幾多個星期，我只記得大約二十幾。到上星期產檢時睇一睇，至知原來已經係三十週啦！
今次個肚低啲又大啲，好快就要著大肚褲，好在仲係行得走得，跪得，坐地吓再企起身都冇咩問題，唔係都唔知點同人仔玩!
今次大肚都幾輕鬆，暫時都係食得瞓得冇咩唔舒服。所以我會好珍惜呢段日子。到二號出世時就有排忙啦！

Babymoon + 人仔生日旅行

一直想襯二號出嚟之前一家三口去一次旅行，嚟個 babymoon。本來想去 Disney World, 但太貴了，所以近近地 road trip 住吓 cabin, 親親大自然好過!人仔又就嚟三歲，當埋生日 trip 啦！

我哋住 cabin, 一間屋仔得兩張床同好細㗎枱，要自備床單睡袋。有電有 heat, heat 呢樣好緊要，因為嗰度好凍!

第一日去到安頓好，就晌 camp site 㗎去 playground 玩一陣，之後就去附近㗎超級市場買啲嘢，然後返 campsite 煮嘢食。食完嘢洗碗沖涼，之後仲睇咗一陣星，跟住就瞓覺啦！

第二日食完早餐就出發去國家公園。

個個都話嗰度好凍，會有雪玩。一去到覺得唔凍又冇雪有啲失望。不過上一輪山之後就見雪啦！

我哋先去睇大樹。

晌嗰度旁邊有啲積雪，人仔玩得好開心!第一次砌雪人呢！

之後揾個地方食午餐，都係吞拿魚麵包水果呢啲簡單嘢。

跟住去咗個 museum 參觀，之後繼續晌出面玩雪!人仔玩到唔捨得走呀。

玩咗一輪，就回程啦!

夜晚返 campsite 同人傾計，佢哋話晌 campsite 附近都有地方玩雪，於是決定第三日去嗰度玩。

第三日朝早食完早餐就出發上山玩雪。去到 campsite 啲人講嗰個小 town, 原來嗰度係私人地方唔比我哋入!後來我哋晌路邊停低，去雪地玩雪。

之後落山行吓穚，睇吓河，再野餐。人仔瞓完午覺之後我哋去到另一個小鎮，嗰度有個公園，覺得幾靚，就停低玩吓。嗰度有條河，仲見倒鴨仔添。啱啱有包餅，就比人仔餵鴨。估唔到佢餵鴨睇鴨都玩得好開心!

玩完之後返 campsite 煮嘢食。之後執嘢沖涼瞓覺。

第四日一早出發再去國家公園，因為見人仔玩雪玩得好開心，平時又冇機會比佢玩，所以決定再去多次。

前兩日去嗰個地方太多人，結果我哋無意間揾咗另一個地方，嗰度有一大片雪地，又少人，仲有 picnic table 比我哋野餐添!

我哋玩到兩、三點就回程返屋企啦！

今次旅行行程簡單，不過有得親親大自然，仲可以玩雪添，所以好開心呀！期待二號快啲大少少，一家四口再玩過!

三歲 check up

今次睇醫生，覺得人仔大個仔好多。以前同佢睇佢一入去會喊，磅重探熱咩都喊一大餐，個個聽倒都望一望，睇吓發生咩事。今次佢好淡定呀！我覺得一來佢大個，知道係咩一回事，二來佢成日陪我去產檢，睇慣探熱量血壓打針抽血，見我做完晒都仲係笑笑口，咁佢就知呢啲程序唔可怕。所以今次佢連打針都冇喊，又會同醫生打招呼，比起佢以前，真係叻好多呀!

介日片成功!

呢幾個月嚟試咗幾次同人仔介片，佢都唔識同我講要去，又成日瀨。最近再試，終於成功啦！大細佢都會自己同我講，呢兩個星期都冇再瀨濕。其實夜晚都多數乾片，不過耐唔中仲有日顯咗，所以都係同佢著片瞓。夜片我就唔急啦！介咗日片已經好好啦！依家我再唔洗心驚膽跳成日足佢去廁所，佢晌屋企同出街都去得好好，真係輕鬆好多!所以話呢啲嘢真係迫唔到，小朋友 ready 就會攪掂㗎啦！

參觀警局

上星期六朝早睇到屋企附近㗎警局有開放日，見冇咩做所以即刻去咗!

我未去過警局，所以有啲期待!

一入去人仔就玩 bounce house。玩咗一陣就四圍睇吓。

有幾㗎警察電單車，啲警察問人仔想唔想坐上去，不過人仔怕醜唔敢!

有架粉紅色㗎消防車，人仔好鐘意，不停咁上上落落，睇完又睇!去警局，竟然係睇消防車!

之後睇吓啲攤檔。

見有警局 tour, 即刻報名參加!參觀咗 jail, dispatch center, shooting range.... 我覺得好好睇，可能係因為從未睇過啦！人仔就有啲悶。不過依家耐唔中同佢講返睇過咩，點運作，佢都好有興趣聽!

玩咗一朝早，之後就返屋企啦！

牙痛慘過大病

呢幾日牙痛，從來都未試過痛得咁緊要，係不停咁痛，有時痛得好緊要，有時就冇咁痛。大住個肚唔想食咁多藥，所以好痛嗰時就用冰敷吓，真係頂唔順，痛到瞓唔倒至食少少止痛藥。結果走咗去睇牙醫。發覺係以前做過 root canal 㗎牙蛀咗發炎。初初都心大心細，諗緊好唔好生完至做，但係真係好辛苦，痛到個人冇晒心機，咩都做唔倒，而且頭都痛埋，所以都係整咗佢。

其實我都幾鐘意睇牙醫!因為睇完之後會覺得啲牙好乾淨，好舒服。重整 root canal 要去睇幾次，就當係 relax 吓啦！

Playdate~ children museum

上星期同朋友一齊去 children museum，呢個 museum 我哋耐唔中都會去。今期㗎 changing exhibit 係 construction site, 有人仔最鐘意㗎整路車!呢排一定要去多幾次啦！

Playdate ~ jumping house

星期一朝早有個朋友 text 我，話佢個仔唔洗返學，有冇興趣 play date。我哋得閑，於是就一齊去咗 jumping house 玩。嗰度有好多 bounce houses 同玩具，其中最多係車!

我一早做少少家務，再 pack 埋 lunch 就出去啦！我哋十點半去到，晌嗰度食咗個午餐，一直玩到一點半，啲細路當然好開心!

原來屋企附近有個咁㗎地方，以後放電有多個選擇啦！

介片有突破

嘗試介片都有幾個月啦！一開始都幾成功，因佢已經識晌廁所小便，但係攪攪吓佢就唔肯去。叫佢去佢話冇，試吓都唔肯，又唔會自己出聲話要去喎，什至瀨咗都唔出聲。大就一時得一時唔得，有時朝早晌片度去，有時瀨咗唔出聲。。。 同佢坐廁所就又冇，但耐唔中又會識得同我講要去廁所跟住又去倒喎!

成日瀨咗唔出聲攪到我好忟。我聽有人講過當你都冇耐性㗎時間，就係要停一停㗎時候，過一排至再試。初初我都唔想停，眼見佢其實識，希望佢快啲攪掂，唔想佢慣咗用片，但又真係好煩，所以都係停一停。

其實都有啲爭扎，有時會覺得唔好停，一直比佢試，會快啲攪掂。一停，又驚佢有排至誡倒。但係另一方面又覺得呢啲嘢迫唔嚟，佢 ready 時自然好快攪掂。

On and off 試咗幾次，最近又再試返，今次有進步喎!雖然仲有瀨，但至少佢會同我講，同埋開始主動同我講佢要去!

原來真係唔洗驚，到佢 ready 時，真係易啲，希望今次成功啦！

法國麵包 (附食譜)

去食越南嘢，人仔好鐘意食外脆内軟㗎法國麵包。某日突然諗，不如試吓自己整。於是上網揾個食譜試吓。

整出啲味道唔錯，可惜皮唔脆，咁即係失敗咗啦。。。 有機會要再試，希望有朝一日會成功啦!

材料：
高筋麵粉 2杯
酵母 1包
蜜糖 1湯匙
鹽 1茶匙
暖水 1/4杯 +1/2杯
冰粒 4-5粒

1, 1/4杯暖水加蜜糖加酵母拌勻，靜置5分鐘。
2, 麵粉和鹽拌勻，加入酵母溶液。
3, 搓成光滑麵團，發酵半小時至兩倍大。
4, 分成兩份，搓成長條形，發酵半小時至兩倍大。
5, 預熱焗爐 450F。
6, 焗爐低層放入容器，預備放上冰粒。
7, 將發酵好的麵團放入焗爐，低層容器放入冰粒，焗 15 分鐘。

Jazz Festival

寫完 Heritage Festival, 至發覺冇記錄底之前帶人仔去 Jazz Festival。

幾個星期前，近住屋企㗎一個 city 有個 Jazz Festival。見人仔鐘意音樂，就帶佢去睇吓。

嗰度有個大舞台，我哋去到嗰時冇人表演，所以行吓嗰度啲攤檔，之後去食晚餐。

食完出嚟見有人表演，就走去睇吓。當日雖然人山人海，但好容易就揾倒位坐啦。我哋坐得遠，不過人仔都睇得幾專心喎!

睇咗一段時間，就到中場休息。嗰時都夜啦，所以我哋就返屋企。

本來仲諗住之後嗰日再去多次，可惜冇時間。不過嗰度耐唔中都有啲音樂節，下次一定要再去!

Heritage Festival

上星期六唔洗返工，揾倒附近有個 Heritage Festival 帶人仔去。見佢 car show, parade, matching band，有車有音樂，啱晒人仔!

估唔到十月仲係好熱!我哋朝早九點幾去到已經好晒好熱啦！

一入去個公園就見到好多古董車，全部都整得好靚。人仔唔係太鐘意古董車，所以行咗個圈就地睇其他嘢。

行過有好多攤檔。

當然唔少得賣食物㗎檔仔啦！可惜太貴而且天氣太熱啦，我哋冇幫襯過就走了。

有好多彈床比小朋友玩。我哋去到嗰時仲 set up 緊。

等咗一陣， parade 就開始啦！有好多 matching bands, 仲有舞蹈學校，童軍，唔同㗎團體。。。

人仔可以近距離睇人玩樂器，佢睇得好投入呀！

既然人仔鐘意音樂，以後要揾多啲有音樂㗎社區活動帶佢去吓啦！

蜂蜜蛋糕 (附食譜)

平時整蛋糕，都係整 muffin 或者 quick bread 多，貪佢易整方便。但係人仔同老公都唔係太鐘意，所以呢排好少整。某日心血來潮，想整吓蛋糕，但又唔想就咁整 muffin, 於是揾咗個食譜就開工!

呢個蛋糕要先將蛋打起，然後慢慢拌入麵粉。我好少整呢類蛋糕，因為冇咩耐性温柔地慢慢攪。我令願大力撻麵團搓麵包，可能我比較粗魯，哈哈！

材料：
牛油溶液 50g
蛋 3隻
糖 60g
低筋麵粉 100g
泡打粉 1茶匙
蜜糖 15g

做法
1，預熱焗爐 350F。
2，麵粉加泡打粉篩好。
3，蛋加糖坐暖水打至企身。
4，輕手拌入粉類。
5，拌入蜜糖。
6，倒入焗盆焗20-25分鐘。

又嚟 short trip ～ 2日1夜 outlet 之旅

襯二號未出世，媽媽又過咗嚟，就出去玩多啲。下次佢嚟就冇一齊去玩㗎啦！
今次去一個 outlet, 要揸兩個幾鐘頭車，所以晌嗰邊瞓一晚，咁就唔洗咁趕。而且人仔鐘意住酒店，就比佢住一晚啦！
呢個 outlet 都幾大，不過帶住人仔，要就返佢作息時間，又唔想佢咁悶，所以冇得每間舖慢慢行。
好在人仔算合作，比少少玩具佢，我同媽媽輪流睇佢，咁大家都可以買吓嘢!

去到某間舖頭，人仔 high 咗，自己跳舞!

行行吓見倒有工程車開工!當然停底比人仔慢慢睇啦！

大家都有收獲，其中買得最多係嘅係小朋友嘢。

其實我幾鐘意近近地去一、兩日旅行，住吓酒店。因為住酒店我就可以真正休息，唔洗做家務，唔洗驚整污糟啲地方，哈哈！而且出外走走，心情都舒服啲，又可以比人仔睇多啲嘢，有啲唔同㗎經歷。

四日三夜 Bay area 之旅

我媽過嚟一個月度，啱啱個周末去咗 Bay area 探佢一個朋友。

星期五夜晚至出發，去到係半夜兩點!人仔差唔多瞓足全程，不過去到醒咗，半夜三更發覺晌陌生地方，當然喊爆!喊完之後仲要我攪咗好耐至瞓返，我都唔敢睇嗰時幾點!

第二日八點幾人仔就醒咗，不過我哋都係攪到十一、二點至食完嘢出去。我就唔夠瞓之下要陪玩。。。食完嘢，出咗去附近一個公園行。嗰度有個湖，有條 trail 晌湖邊，見倒好多野生雀仔，又有個小 playground.

晌嗰度散吓步，玩一陣，之後就走啦！一上車人仔就瞓咗，不過都唔係瞓好耐。
佢瞓完，hea 一陣就出去食嘢，之後返屋企沖涼瞓覺。

第三日去咗 Napa Valley. 朝早十一點幾食個 brunch 之後出發。我唔飲得，去到都係行行企企睇住個仔。

夜晚晌嗰度食埋飯就返屋企。人仔下午只係 nap 咗一陣，所以夜晚一上車就瞓咗，仲瞓到抱上屋企，同佢抺身換衫都係一直瞓!佢真係好攰呀，平時一抱佢落車已經會醒!

第四日返屋企啦！朝早食完早餐就同人仔行去附近一個 playground 玩，因為要等其他人 ready 好至可以出發。最後十二點幾至出發，人仔上車冇耐就瞓咗，仲瞓咗好耐，睇嚟呢幾日作息時間亂咗，攪到佢唔夠瞓。

下午無端端因為整路而賽咗成個鐘，嗰度行一條路，周圍咩都冇，想行另一條路都唔得!結果攪到好夜至返到屋企!

今次個 trip 主要係探媽媽個朋友，有大有細大家又冇咩所謂要去邊，所以行程好 hea。我覺得 bay area 好舒服啊，特別係我哋住嗰邊，行出去就有條 trail, 又有 playground , 環境清靜但又交通方面好近 freeway。唔怪之得嗰邊啲屋咁貴啦！

努力搓包

呢排又勤力搓包啦！一嚟想家人食得健康，美國啲包真係超多防腐劑，聽講放成年都唔發毛。。。。人仔愛吃包，真係唔想佢食咁多“加料”包呀！二嚟自己都有啲手痕。二號出世之後又會有好一排唔得閑㗎啦，依家盡情做吓自己鐘意做㗎嘢啦！

最近成日用免揉餐包個食譜整包，都 OK 㗎!

芝士火腿包/香蔥包

腸仔包/粟米包

兔仔吉士打包/粟米包

仲有整過菜肉包。

其實中式包易整啲，整定啲放冰格，想食蒸熟佢就得啦！之前買過出面嗰啲，但味精好勁!都係自己整好過!

Hea vs 谷

同老公啲姪女傾計，佢哋晌度出世、長大、讀書，依家讀小學高年班。問佢哋有幾多功課，其中一個話佢哋學校話上年有人話讀書壓力大，所以今年試吓冇功課，所以除咗上堂做唔晒㗎練習、活動，可以攞返屋企做之外，都冇功課。問佢哋上年有幾多功課，要做幾耐，佢話多數兩、三樣，做一個鐘度，有時快啲做完，有時都幾難，要做耐啲。

平時㗎課外活動係學琴，每日都會練，之外有聽過佢哋學畫畫、學中文。另外都參加吓教會活動，行吓山，暑假就學吓游水咁。

暑假時除咗練琴，做一本媽媽買㗎練習之外，同參加一項課外活動之外，其他時間都係玩玩玩!冇出去玩的話，晌屋企就隨意玩吓電腦，學吓車衫，睇吓課外書咁，都好輕鬆。我諗香港㗎幼稚園學生都忙過佢哋呀！

晌呢邊讀書可以好 hea, 當然都有啲家長會谷啲細路啦。學樂器、學游水、上公文數，學珠心算。。。連 preschool , 都有啲 focus 晌學術方面，賣廣告話會教小朋友學深一年㗎嘢。私校程度亦會深一啲，聽講要入都幾 competitive 㗎。

有時覺得太 hea 同太谷都唔好。晌呢邊讀書，自由度同選擇都比香港好，希望揾倒適合人仔㗎教育方向啦!

露營初體驗

幾個月前，有朋友問我有冇興趣一齊露營。佢預訂咗一個營地，但佢個朋友唔去得，所以問我哋有冇興趣去。我見嗰個周末得閑，又一直都想帶人仔去體驗吓露營㗎樂趣，所以就決定去啦！

我哋唔係 18 22，仲帶埋個人仔去，當然好多嘢帶。我哋啲嘢，塞滿咗成個車尾箱呀!

但其實我哋唔多嘢㗎啦，朋友一行四人，開架 truck 去，成車都係嘢呀！

我哋下午四點幾到營地，先扎營。人仔對樣樣嘢都好好奇。營起好之後就走入去跳跳跳。

起好營，時間尚早，就去海灘行吓。個營地位置就係晌海灘旁邊，位置好好呢！

之後朋友話佢哋有排至到，所以我哋先煮嘢食。我哋打邊爐，其實只係煮個麵，烚吓丸烚吓菜咁!

佢哋入夜之後至到。嗰晚冇做咩，人仔好攰，好快瞓咗啦！

第二日同第三日我冇攞電話出嚟。一來收得唔好，二來費事义電，三來去到大自然環境，乘機 detox 一吓，唔想再用電子產品。所以都冇影到相!

第二日朝早煮吓嘢食，之後行山。午餐就帶定麵包吞拿魚食。下午又去海灘玩吓沙，之後就返營地煮嘢食。

夜晚營地有個活動，有個工作人員帶咗好多小動物介紹比我哋聽，有蛇、小狐狸、山貓。。。人仔有動物睇，好開心呀！

睇完動物返營就瞓覺啦！

第三日朝早執嘢，跟住煮早餐。十點幾我哋就走啦，因為大家都瞓得唔好，都想早啲返屋企休息同執返啲嘢。

免揉餐包(附食譜連結)

先嗰排少咗整包，最多都係整免揉包。6299晌度嗰時整得仲少，因為佢哋唔係好鐘意我整嗰隻，佢哋鐘意街買平平地一大條嗰啲方包，成日都話嗰啲好好食，又可以整三文治。

不過嗰啲包好多防腐劑，見佢放成個星期都冇發毛，冇變硬就知。

人仔好鐘意食包，可以一日三餐都食包，我又有咗，所以都係唔好食咁多防腐劑啦！依家6299走咗，係時候自己整包啦！

呢個食譜先一排揾倒嘅，想試好耐㗎啦，襯今朝晌屋企，就試吓。

依家天氣熱，發酵好快呀!個包好食呀，外面少少脆，入要軟綿綿，係淡咗少少，可以研究吓包餡喎。人仔中午食完大碗粥，都即刻食返個新鮮出爐㗎包呀！

食譜連結：https://icook.tw/recipes/114714

無水蒸海鮮

成日見人用 LC 㷛整無水蒸海鮮，好正咁，好想試整，但係又冇 LC㷛喎。最近發現原來玻璃㷛或者康寧㷛都得。

琴日買咗幾隻蜆同蝦，仲有白蘿蔔同紹菜，試整無水蒸海鮮。

一開始太細火，所以煮咗十幾分鐘都冇咩起色。之後效大少少火，都係中火之下，就開始見啲菜出水，蝦開始轉色。最後煮咗三十幾分鐘啲蜆至開口。

其實啲嘢都係啱啱熟咋，下次試吓一開始開大少少火可能好啲。

咁樣煮法，啲海鮮真係原汁原味，唔洗調味都好好食!揾日要再煮過!

兩歲八個月

先一排冇心機，miss 咗兩個月，依家已經過咗兩歲八個月有多，係時候補返啲成長記錄呀！

瞓：好唔鐘意瞓覺，明明已經攰，都要 tum 好耐至瞓著。我諗我好快唔會迫佢午覺，比佢早啲瞓算。日日花個幾兩個鐘 tum 佢瞓唔係辦法，特別係當二號出世之後，我更加冇咁㗎時間 tum 佢瞓!

食：一向鐘意“損”骨(雞翼，排骨。。。)㗎佢，原來“損”魚骨都好叻。依家食魚，要比晒啲骨佢，比佢慢慢“損”。佢又有係食倒㗎喎。食車里子又識吐個 seed 出嚟，仲好鐘意添!
一向都唔鐘意食白飯，依家直情唔食!可能係因為 6299 晌度餐餐都飯，又要迫佢食晒。攪到佢叫親食飯都唔肯上枱，又食得好慢。所以依家就算其他人食飯，我都會整麵包粉麵比佢。佢即刻食得又快又好，又唔洗我勞氣呀，大家開心!

大肌肉：
學識踩三輪車啦！去公園爬鋼架就冇以前咁叻，大個咗，細膽咗，明明以前爬倒依家又唔肯爬，又要我抱住爬。。。 不過有時小心啲都好嘅。。。

自理：
著鞋開始好咗，仲係唔肯自己著袜。
potty training 進展不大，時得時唔得，試過出街瀨咗晌低低之後，又唔識主動同我講要去廁所攪到我神經緊張成日提住佢又驚佢瀨，所以我唔係好敢出街比佢著低低。可能係咁，有時有片有時冇，所以進展慢。我又覺得佢未係好 ready, 無謂攪到自己勞氣又傷感情，等陣佢又抗拒，咁就煩。其實佢#1控制得好好，#2都有時得，但係就唔會主動講話要去，所以依家等一等先，或者大少少再試。

第二次產檢～8月

今次都係帶埋人仔，佢都好合作呀。

去到都係要等，人仔就食吓嘢。入到去佢都好乖跟住我，等時就玩吓車仔。

今次照超聲波，見到啲手仔腳仔啦，仲睇倒 BB 郁添!

依家冇咩唔舒服，同平時一樣，唔係睇倒超聲波，都唔覺自己有咗呀！其實要好感恩呢！如果唔舒服，又要湊個大嘅，一定好辛苦!

照完超聲波，個醫生見佢望住張 exam table 好鐘意咁，就抱佢上去比佢同我一齊坐，點知嚇親人仔，攪到佢大喊!個醫生好唔好意思!好在好快喊完!

第一次產檢～7月

隨著人仔開始大，湊佢越來越輕鬆，加上老公讀完書，自己又唔想做高齡產婦，亦唔想人仔同弟/妹差太遠，所以都係時候要多個。

頭嗰兩個月，其實一直都冇咩唔舒服，只係有少少作嘔同胃口麻麻。有時攰就同人仔一齊午覺。

由於平時係我一個湊人仔，所以產檢都帶埋佢去，順便比佢 involve 多啲 BB 㗎嘢，比多啲心理準備佢做哥哥!

晌等候室時乖乖坐晌度畫畫。

產檢都係等完一輪，做少少嘢，又等一輪。所以我帶定多啲嘢比人仔玩。佢都好乖，醫生檢查時又冇攪攪震。

之後仲要去抽血，抽咗9筒!人仔就自己坐隔離玩車車。

佢全程都好乖，希望嚟緊次次都咁合作!