少 snack 多滋味

一向，人仔食嘢都幾好嘅，先嗰排，叫親佢食晚飯佢都要三吹四請至嚟，又話飽，又話要吐出嚟，一係就要繼續玩，食又食得慢。

有日我同老公有嘢做，下午要擺係喎親戚屋企。親戚好錫佢，知佢鐘意食，於是不停比嘢佢食。餅乾水果仲有朱古力食唔停。到夜晚我哋去生日會，有佢鐘意㗎 pizza 意粉，佢一口都唔食，我諗佢食 snack 食飽晒，所以都冇迫佢，由佢玩。

嗰晚之後，我開始諗，平時㗎 snack 會唔會多得濟，令佢冇胃口食晚餐。其實平時㗎下午茶都係餅、水果之類，耐唔中有蛋糕咁，都唔係好多，但可以對佢嚟講都好飽肚。所以我嘗試只係比佢飲杯奶或者食個生果就算，唔再比餅乾之類㗎零食。果然，夜晚開胃咗，一叫佢食飯就嚟食，又食多咗。

當然，佢會有要求要食餅，佢鐘意食餅到有時發開口夢都話“食餅餅”！但食飯前一定唔比，佢扭都唔比，呢啲位要企得好硬，唔可以心軟，唔係比佢知道扭係 work 的話，我就有排煩!

小進步

前兩日帶人仔上 Kindergym，有學 somersault 。自人仔一歲開始上都已經有教過 somersault. 不過佢只能夠晌老師幫手下好勉強咁打倒，仲要次次打完都喊。有時佢唔肯試，我都唔會勉強。眼見其他細路大多數都打得好開心, 我當然都希望人仔可以開心咁 somersault。

今次係兩歲之後第一次試。一開始佢都係唔肯行過去，只係顧住玩其他嘢。後來佢見倒其他同學打，我又鼓勵吓佢嘗試。今次終於成功啦，仲不停咁再排隊打，一共打咗六次!

另一日同佢去咗圖書館。當我揾書比佢借㗎時間，比咗個消防車砌圖佢玩。佢差唔多次次去圖書館都會玩呢個砌圖。我一邊揾書，一邊睇吓佢，發現原來差唔多可以自己砌晒!

人仔不經不覺又進步咗!

媽媽失守了

人仔好幸福，未出世已經有一大堆二手玩具等佢玩，又有好多好錫佢㗎叔叔姨姨送玩具比佢，再加上媽媽我覺得小朋友玩膠樽紙盒都可以好開心，唔需要咁多玩具，所以佢兩歲我都未買過玩具比佢。

屋企有一細盒 Lego, 佢好鐘意玩。呢類玩具唔錯，訓練創意想像力之餘，又可以練吓手仔肌肉，所以想買多少少比佢玩。正當我諗緊 Lego 好定 Mega Bloks 時，有朋友送咗一盒 Mega Bloks 比人仔。之後咁啱有日行街見倒 construction site 同 火車 Mega Bloks 好平，我行過好多次，都係第一次見呢兩款!有人仔鐘意㗎泥頭車同火車啊!所以忍唔住，買咗。又平又啱心水㗎嘢可遇不可求。之前有見過其他款想買冇買，之後就冇再見過了，有點後悔呢！

手搓包～椰絲包

整咗幾次手搓包，開始掌握倒少少技術! 今次整椰絲包。揀包款整因為個餡易整，椰絲、牛油、糖拌勻就得，而且個樣靚得嚟又易整。

晌焗爐見倒佢哋脹卜卜個樣真係極之開心，仲即刻叫人仔嚟睇。佢都興奮咁大叫“包包呀！”

麵包材料：
高筋麵粉 240g
糖 40g
奶粉 10g
牛油 40g
酵母 1/2茶匙
水 80g
蛋 30g
鹽 少許

餡料：
椰絲 50g
牛油 12.5g
糖 36g
蛋 1/4隻

做法:
1，麵包材料除牛油外，全部搓勻。
2，搓成團及有少許彈性後用手將麵團甩打出去。直至麵團光滑，可撐出薄膜。
3，將麵團放入抺了油的盆中，蓋上保鮮紙，靜置15分鐘然後放入雪櫃作低温發酵至一倍大。
4，取出麵團於室溫回暖。
5，麵團排氣，分成八份，滾圓，靜置15分鐘。
6，搌平，加入餡料，作第二次發酵至麵團大一倍。
7，預熱焗爐350F.
8，麵團掃上蛋液，入爐焗16～18分鐘。

手搓包情意結

第一次玩手搓包係讀大學時㗎某年暑假，嗰時比較得閑，就晌圖書館借咗幾本整包書自學,整歐式包。嗰時整㗎包一出爐係好正，不過好快變石頭。過咗一排就冇乜點玩。

第二次係大肚時。嗰時轉咗做 part-time,得閑啲，又心血來潮整包。嗰時上網揾咗好多資料，揾倒整港式包食譜，試咗幾次之後開始成功，整倒香軟㗎包。不過就要搓成個鐘。生咗之後當然冇時間玩啦！

最近又有舖焗嘢癮!想揾部麵包機返嚟。揾揾吓發現免揉包呢樣嘢，一試上癮!整整吓又挑起舖搓包癮!今次繼續上網“進修”，睇咗好多 video. 搓包技術開始有進步，但可能天氣凍，發酵比較難，所以成品仲差少少。但味道唔錯，亦好軟熟!希望會越做越好啦！

Oak Canyon Nature Walk

話說我參加咗個 preschool mama club. 上兩個月有個 event 係去 Oak Canyon 行山。我去到唔見有其他媽媽。。。今個月又有呢個 event. 我諗就算冇人出現，自己同人仔去行吓山都好吖。於是我又 sign up 。

今次有好多人嚟啊，大約有七、八個媽媽，十幾個小朋友，好熱鬧呢！

啲 trails 都幾易行，大部分時間都可以 keep 住一班人行，係臨尾有一段要上好樓梯，我哋就跟唔上了！

人仔都好叻，大部分時間都自己行，不過都有扭抱時，其中一段就係行上樓梯時。。。 我就抱住行上樓梯，乘機練氣練力。。。好在，行咗兩行，我同佢講 “媽媽攰啦，你自己行啦”，佢都肯落地自己行。

呢個活動好好啊，可以同小朋友親親大自然之餘，又可以認識吓其他媽媽。佢哋都好有經驗咁，而且有幾個都係想 homeschool 嘅，可以向佢哋取吓經啦！

Kindergym 兩歲班

同人仔上 Kindergym 已上咗一年。Kindergym 我諗係類似香港㗎 playgroup 咁，不過冇咁多完化，但唔洗錢，係用 State Funding (交咁多稅，當然要用吓!)。每一堂都係自由玩一陣，跟住唱遊，做吓動作咁。然後做一樣大肌肉活動，再唱遊吓咁就完。每一堂唱㗎歌講㗎小故事係一樣嘅，老師話0-5歲㗎小朋友 learn best by repetition. 大人可能覺得悶，覺得冇嘢學，但其實多重覆更適合小朋友。睇人仔次次都聽得好開心就知啦！

今年升班，上2-3歲班。其實内容差不多，但加咗兩段比小朋友坐晌老師前面㗎小故事/唱歌時間。睇住人仔自己坐出去望著老師聽故事，感覺佢大個咗好多呢！

上年呢個時候，佢一歲多少少，上堂坐唔定，都知佢聽咗咩。到依家，佢一聽倒嗰啲歌就識做部份動作,真係成長咗好多呢！

燉蛋 (附食譜)

先一排晌朋友屋企食過 cream brulee. 人仔好鐘意，老公又想食，咁我當然要整啦！我專登揾咗個 cream brulee 食譜，可惜整出嚟太甜太漏。中，可能太多 cream. 於是我整返以前整過㗎燉蛋。

呢個人仔，叫佢食飯就三吹四請，又話食飽又話要玩。但一見爸爸攞甜品呢，就即刻自己坐低等食!哈哈！阿仔要食甜品咩，乖乖食晒飯先啦！

材料：
蛋 2隻
糖 20g
奶 250mL

做法：
1，蛋加糖拌勻。
2，奶加熱至微暖。
3，將奶加入蛋中，拌勻。
4，“不”走泡沫。
5， 用錫紙蓋好，中火蒸約十分鐘。

病病病 2

本來大家都好返，點知呢兩日人仔有少少肚柯，食嘢少咗。不過見佢依舊跑跑跳跳，冇發燒又冇特別攰，我除咗比多啲嘢佢飲之外，都冇做咩嘢。今朝同佢去公園，佢比平時扭抱，又冇咁活躍，就返到屋企時又不時摸摸肚仔。我諗佢唔知係咪肚仔唔舒服。佢一路話返屋企要飲果汁。平時晌屋企唔比果汁佢，但見佢早餐唔係食得多，而且佢需要多水份，於是返到屋企就比果汁佢飲。

到食午餐時，佢食得好慢，有時又吐返出嚟話“難食”。食食吓，佢突然嘔晒啲食物加果汁出嚟！唔計細細個嘔奶，今次係佢第一次嘔！跟住我就同佢換衫清潔。得意㗎係，大家都好冷靜，冇驚冇喊，好似平時倒瀉水咁，換完衫佢照樣去玩。我比少少水佢飲，佢冇再嘔。跟住佢就 nap 啦。

瞓完又比佢飲少少水，佢亦食倒蘋果餅乾。晚餐就煲咗粥，湯比佢。佢都食得 OK.我諗佢嘔咗之後舒服咗。希望佢唔好再柯嘔啦。

呢排個個輪住病，我即刻又進行家居大消毒。。。 啱啱琴日㗎車又 c 咗，唉真黑仔。。。

淮山扁豆芡實無花果湯

展老公腸胃炎，柯咗幾日，慢慢康復中。上芳姐湯水個 site 揾倒呢個健脾止瀉減輕腸胃炎㗎湯，拿拿聲煲返煲比佢飲 。

材料就係個湯名個啲，原來
食譜係用牛肉，屋企得包肥牛，冇理由用肥牛煲嘅，芳姐話用豬展都得，咁我就用豬展。

個湯甜甜地，幾好飲。呢個健脾益胃㗎湯，平時煲吓都得!

病病病。。。

人仔由上年年尾開始 on and off 咁流鼻水，幸好都係小事，但都希望佢可以完全好返。我都一樣，成日都病病地咁。20 幾號時有少少喉嚨痛，到 31 號覺得差不多好返，於是照原定計劃請朋友嚟打邊爐。打時都冇嘢，朋友走晒之後開始失聲，"tum" 人仔瞓覺時仲唱歌唱到走晒音，自己都忍唔住笑，之後唯有開音樂比佢!1月1日，全家留晌屋企，我同人仔都咳同流鼻水，我仲同佢一齊 nap 添。我除咗簡單咁煮兩餐之外，咩都冇做，哈哈！

晌人仔同我慢慢好返之際，老公就病。佢可能係食錯嘢，又柯又發燒，成日攰“奶奶” 咁，瞓足一日，第二日好少少。依家我仲有 d 咳。希望大家都快快好返。。。

廚房新玩具～ airflyer

先一排見朋友用 airflyer 煮嘢，好似好方便，於是同老公講吓。估唔到佢好有興趣，即刻做晒 research 咁。又成日講可以用嚟整乜乜物物。有日我去見 Costco 有部唔貴，影相比佢睇，佢放工返嚟竟然問我有冇買。我以為佢講笑，點知佢真係認真想買。過兩日，佢就走咗去買！

暫時試整過薯條、雞翼、四季豆、甜酸肉。真係好方面，用好少或者唔洗用油，加調味，放入去就得，唔洗企晌度慢慢煎/炸。

雖然食得多煎炸嘢唔好，但平時屋企煎吓豬扒雞翼都好正常。有咗呢部機就可以輕鬆整倒煎炸嘢，仲用好少油添!

25 個月啦！

又聖誕又新年，都唔記得人仔已經 25 個月大啦。我諗攪攪吓，我會唔記得寫成長紀錄呀！

今個月除咗講嘢進行之外，扭計都進步咗呀。。。 日日都起碼扭一、兩次。佢扭計通常係唔肯做某 d 嘢，例如唔肯食飯，咁我話唔好食啦，跟住佢又要食。行到去飯枱又會話唔食，大喊大鬧,來來去去唔知自己想點咁。試過 tum 佢，話佢，講道理。。。之後發覺唔理佢最好，因為佢通常過一陣就“醒返“冇嘢。到佢冷靜返至同佢講道理。冇咁扭㗎情況呢，比選擇、轉移視線都可能可以攪掂，之後講吓道理等佢明白。不過同一情況，用同一招又未必得，所以次次佢唔合作都係鬪智考耐性時間。。。

自理方面慢慢有進步。可以除鞋襪同部分衫褲，自己放入洗衣籃。幫手開飯，食完飯幫手收拾。執玩具就多數要叫幾次至執，佢會一邊執一邊唱 “clean up clean up"。去廁所依然係時得時唔得，我諗我都係等暖 d 先。其實佢明白去廁所係咩，因為佢會攞公仔去廁所扮去 poo poo, 但自己去時就唔肯上廁所。好多人都話小朋友 ready 時好快攪掂，依家係反抗期，咩都 “no" 都無謂迫佢。希望佢大 d 可以攪掂啦！