煲劇!

做全職湊仔師奶㗎我，竟然有時間做D n年冇做過㗎嘢--煲劇!!當然我唔係對住瑩光幕十幾個鐘咁煲，有時間都冇精神咁做，更何況我冇時間!我只係一邊做嘢，一邊睇下啫。都係睇番以前睇過嘅，大概都知劇情，所以可以睇下skip 下。

先𠴱排同人講開卡通片，講到我最愛㗎cyber formula, 即係高智能方程式!攪到我忍唔住上網搵番嚟睇!睇咗zero, saga, sin 同少少double one. 原來套卡通有廿年喇!（我好老⋯⋯）不過依然係好好睇!鐘意佢其中一個theme, 為夢想而活!

前幾日無意間搵倒日劇沒有家的女孩，當年我都有睇過下。依家睇番，覺得套劇超脫離現實⋯⋯ 乜日本冇社會福利，冇兒童院，冇醫療福利㗎咩?奸嘅奸到離譜，慘嘅又慘得濟，睇到有D頂唔順，所以依家轉睇充滿正能量㗎將太的壽司!以前我有睇套漫畫㗎!真人版都好好睇，雖然有D誇張。琴晚睇𠴱集講有個小朋友失去媽媽，變得反叛。將太就造咗蛋壽司令佢尋回媽媽煮食㗎味道，抒發倒佢壓抑心裏對媽媽㗎思念。其中一段講將太搵倒個媽媽㗎煮食筆記，記錄咗佢點將仔仔唔鐘意食㗎嘢加入去佢鐘意食㗎嘢度，又抒發佢對仔仔㗎思念，睇到我眼濕濕!特別依家做咗阿媽，更感動!