第二個母親節

上年母親節,人仔五個幾月大,我都唔記得做咗咩。今年我地都冇計劃做咩,朝早返教會。我地近來去咗間新教會,我仲適應緊,不過人仔就好適應,一去度 nursary 就自己走入去玩。D 職員好有心機,母親節仲整咗禮物!之前幫人仔影咗張相,放入個相架入面。哈哈!人仔㗎招牌認真樣!

去完教會之後,就去朋友屋企食飯,之前冇 plan 㗎,咁啱大家㗎父母都係晌香港,冇咩活動,所以就一齊 hang out 吓。其實去到佢地屋企,已經係人仔㗎 nap time. 我地食嘢,又傾咗一陣至走,人仔都冇扭計,只係晌車度扭咗一陣至瞓!好難得!算係我嘅母親節禮物啦！

夜晚如常晌屋企煮飯洗碗同人仔玩吓然後沖涼瞓覺。其實唔洗同人迫,唔洗驚人仔扭計,老公又可以有多 D 時間做吓嘢,幾好呀！