短遊 Carlsbad day 3

今日上午去摘士多啤梨。我地晌酒店食完早餐之後,人仔就不停講 "去摘士多啤梨啦！"不知幾開心!

用 $10 買個筒就可以入田摘。遠睇以為冇乜士多啤梨,點知原來有好多。又紅又大好吸引,一邊摘,一邊食,新鮮摘落嚟嘅真係好好食!

人仔去到邊,都掛住睇車!

摘完就回程返屋企啦,途中停一停去 Chick-fil-A 食午餐,食完比人仔晌 playground 玩一陣。之後上車,冇兩分鐘就瞓了！

今次短遊好 hea, 至在出外走走。玩之餘,都比人仔有足夠時間瞓覺,因為人仔唔易瞓,瞓唔夠又扭計。今次人仔玩得又瞓得,所以好開心,佢開心易攪,我都玩得輕鬆啲！

短遊 Carlsbad Day 2

清晨5點幾人仔喊醒,要食 mum mum. 之前一晚食㗎嘢嘔晒出嚟,當然肚餓。於是我比少少水同餅佢。識餓又食倒,証明佢好返了！

佢食完嘗試 tum 返佢瞓,不過佢瞓唔著了,反而係我係咁恰著。。。

今日去睇花,之前成日同人仔講有 tractor 坐,佢不知幾期待!一入到 flower field 就即刻排隊坐 就即刻排隊坐 tractor.

中途落車睇吓花,之後去個 playground 玩吓,再行吓食吓嘢,咁就返酒店比人仔午睡。

午睡後去咗 Carlsbad downtown 行吓，之後食飯，跟住返酒店啦！

28 個月

又一個月了！

飲食瞓覺冇咩特別，大緻上都唔錯。

講嘢越來越叻，好多嘢都表達到。某日突然問“呢個咩嘢嚟㗎？”又識講“婆婆送嗰㗎火車唔見咗。”講嘢會有“呢、嘅、㗎”等助語詞，好得意。但仲係調轉我、你。

終於肯講對唔住，但有時知道自己錯咗會扭計唔肯講。仲係成日要提至講唔該。

開始可以自己著鞋、著褲，但仲要幫吓。可以自己除拉鏈外套。去完街會自己除鞋再去洗手。

最近去咗兩次新教會，佢適應得好好，去到 nursery 就自己行入去玩，喊都冇喊，知道媽媽會返嚟接佢。另外又覺得佢幾 social, 會主動比玩具其他小朋友“潦”人玩。

呢排覺得佢冇咁聽話，有時叫佢唔好做，佢就繼續做，當我冇到。教仔，真係需要好有耐性啊！

短遊 Carlsbad Day 1

Carlsbad Flower Field 每年只係三月至五月開花,所以嚟過 Carlsbad 幾次都冇機會入 flower field 睇花。今年適逢婆婆嚟探我地,婆婆鐘意花,所以就安排一個 short trip 去 Carlsbad.

Day 1
校啱人仔 naptime, 食家 brunch 出發,比佢上車瞓。下午到達,去 outlet 行吓,行到三點幾話差不多行完,點知最後行到六點幾!

晌 outlet 有得租㗎車仔比小朋友坐。人仔好鐘意,又可以載戰利品,真好!

平時我好少自己同人仔行街買衫,因我買嘢要諗好耐,揀好耐。有人一齊幫手睇吓人仔,我就可以買倒嘢了！

行到六點幾,簡單食個晚餐,就去酒店。去到酒店人仔耐唔中就話肚痛,沖完涼,瞓咗一陣覺,就嘔咗出嚟。嘔晒啲晚餐同 snack 之後,佢就舒服多了。可能係出街食嘢油膩得濟,陰公豬。。。。

勞作時間:無頭蜜蜂!

某日同人仔做吓 fine motor skill activities.  比佢撕紙,搓埋一舊。

又學用剪刀,佢開始識剪嗰吓,但剪完未開倒把剪刀。

之後心血來潮同佢做隻蜜蜂,因之前晌backyard 見過,最近睇書又有。毫無美術天份㗎我同佢一齊做咗個身同翼之後,諗唔倒點做個頭!哈哈!將來返學要用咩親子勞作就慘了！

隨意的聯線練習

比支筆人仔畫畫,好多時會變成我畫車車比佢睇。人仔鐘意啲車一架拖住一架,於是我就畫啲車,然後我叫佢畫啲線將一架架車拖住。估唔到畫條直線都唔易㗎,唔怪得我見好多練習簿都有聯線練習啦!

之後我又畫啲人同車,叫人仔畫啲線帶啲人搭車。開頭都有畫,但之後唔肯畫,佢話啲人唔搭車,要行路喎。好在唔係要交功課,唔係就激 c 我了！哈哈!

無心機整的紅苺包 (附食譜)

某日見到呢個麵包食譜,有用 cream cheese, 剛好屋企有啲用剩,咁就整呢個包啦。點知呢個包好高水分,搓到我呢。。。 勉強搓到光滑,唔太痴手,我就算了。

整出嚟效果幾軟綿綿,放幾日都唔乾。

材料:
高筋麵粉 250g
酵母 3g
糖 20g
鹽 3g
牛奶 190g
Cream cheese 57g
紅莓適量

做法:
1, 將牛奶加入粉類,放置 30 分鐘至1小時。
2, 加入其他材料,搓至麵團光滑。
3, 發酵1至1.5 小時。
4, 分成8份,搓圓,發酵至一倍大。
5, 預熱焗爐 350F, 焗15-18分鐘。

人仔語錄

人仔越來越多嘢講，有時講啲嘢幾好笑。要記低佢，將來可以回味一下。

某日見倒隻四腳蛇，佢話：“恐龍。”

某日同佢出成日街，嗰日佢好多 poo poo, 攪到唔夠片要問人借。換片時佢見到嗰條片，佢話，：“著呢個片，呢個片好舒服。”

佢鐘意晌張大人床度玩車，有日見我抺地，就同我講：“媽媽抺嗰度(指睡房)”，等我入埋去培佢玩。我入到去，佢又講：“呢度其實好污漕。”

有感而發 ~ 點解我寫 blog

突然有感而發。大約8,9年前開始寫 yahoo blog。當時愛上跑步,只想開個 blog 記錄吓跑步進度,心情等等。時個 blog 又可以 set private, 咁就當寫日記。

之後斷斷續續咁寫。後來鐘意焗嘢,咁就寫 blog 記錄,成功失敗都寫底,寫埋食譜,以後再做就可以參巧一下。

有咗 BB 之後就寫多咗,因想記錄仔仔㗎成長。亦好開心睇到好多湊仔 blog,可以同其他媽媽傾吓計。大家素未謀面,但從 blog 中可以交流一吓,互相支持,感覺好奇妙!

今日突然有感而發,係因為生活中實在太少支持鼓勵。晌 blog 度每一個留言,無論係講笑,傾句計,或者支持鼓勵,都比倒我動力。多謝大家睇我寫嘢,亦多謝大家努力寫 blog 讓一班本來不相識㗎人可以交流,希望呢個平台可以持續落去!

減 screen time

一向都唔主張比人仔睇電視/電腦。自從佢兩歲，我就開始放鬆，爸爸比佢睇我都唔介意，反正爸爸成日早出晚歸唔多晌屋企，睇都唔會睇好多。只有我同佢晌屋企的話就唔開比佢睇。

先嗰排佢好鐘意睇“彈琴叔叔” Piano Guys 㗎 music video。我覺得佢啲歌幾好聽，music video 又拍得好靚 (佢哋可以為咗攞個靚境而用直升機吊部三角琴去崖邊拍!)，咁就比人仔睇吓。

之後佢日日都話要睇。其實，佢睇㗎時間，我真係可以好專心地做家務，特別係自從佢病完之後好痴身，成日要我同佢玩。開咗部機比佢睇我係輕鬆好多!完全明白點解咁多人鐘意用電子奶咀!但我唔鐘意見倒人仔望住個 screen 發呆個樣，而且驚影響佢視力，所以都係要同佢戒，我湊住佢㗎時候唔比佢睇。

其實佢戒都好易，我只係同佢講爸爸攞咗部機返工，跟住又講吓睇得多唔好。。。 佢係唔會扭睇，可能係佢未睇上癮。只係我辛苦少少，做家務時有個人晌度攪攪震。心情唔好時真係易發火，但我盡量提醒自己唔好咁惡。其實預多啲時間做家務，當係親子時間㗎一部份咁就大家都開心啦！

呢排佢日日都要一齊洗碗!希望佢會一直愛洗碗!哈哈！

選擇性記憶力

人仔㗎記憶力同觀察力，有時令我好驚訝!

某日同人仔去圖書館，睇咗本火車書，我覺得內容怪怪咁，於是我同佢講：“呢本書個故事好怪，我地唔借啦。”兩星期後晌圖書館時，人仔見倒同一本書，佢就話：“呢本書怪。”

又一次去咗朋友屋企玩，佢送咗啲檸檬比我，用咀香園膠袋袋住。幾日後我用同一個袋袋其他嘢攞出街，佢指住個袋話：“檸檬。”

因為佢記性係幾好，所以我講咗㗎嘢要算數，唔可以側側膊講完冇咗件事!

但係同時，佢學一啲嘢呢，又學極都唔識，或者學得好慢，例如顏色、字母。講“唔該”亦要次次提。我諗佢㗎記性，係選擇性嘅!

形狀

呢排正式教吓形狀。有次指住個三角形，問人仔係咩形，佢答：“藍色”。好似啲人壓力太大，攪到講嘢九唔答八咁!哈哈！

人仔，我都好 hea 㗎啦，你唔係咁都有壓力吖!哈！

Homeschool 這條路

一直覺得 homeschooling 呢個概念係好嘅，特別係五歲以下㗎幼兒，其實我覺得唔係一定要返學，日常生活中每分鐘都學緊嘢。自理能力，守規矩，學有禮以至學術上㗎嘢都可以晌屋企學到。去公園，圖書館或者約其他媽媽 playdate 都可以比小朋友有群體生活。

晌美國，五歲以下 homeschool 都幾普遍，因好多媽媽都 stay home, 而且一生生三、四個，邊有錢送晒個個去 preschool, 就算返 preschool, 都可能只係一星期返兩、三日，每次三個鐘咁。

我本來都想人仔兩歲時送佢去 preschool, 然後我去返工，但依家諗法又唔同了。我想嘗試自己教，至少到三歲，如果得就教到佢 5 歲返至幼稚園。

諗法轉咗原因有幾個：
1， 揾唔倒適合㗎學校。
2， 如果我返工，會辛苦啲，因呢邊冇人幫，即係我依舊係要做晒所有家務。
3， 親子時間會少好多。實在太喜歡同人仔相處㗎時間。小朋友大得好快，要好好珍惜。
4， 想人仔講多啲中文。
5，我覺得兩歲返學早咗啲。
6，見有啲朋友㗎小朋友兩歲幾返咗學之後，性情變咗好多。可能係 trouble two, 但都可能係返咗學呢個劇變。如果我又返工，又要對付個 trouble two, 我諗我會顛咗。

經濟上，我哋唔有錢，但好慳，所以暫時我都唔係一定要返全職。既然係咁，咪唔好咁快送佢返學囉！

一個。兩個

年幾前寫過一篇“一個，兩個”，當時講過唔再生多個，因為人仔成日喊到拆天，又瞓得差，想像唔到再多一個會點。但隨著人仔開始大，越來越易湊，我亦好享受同佢一齊㗎時間，慢慢覺得如果有多個，都應該攪得掂嘅。辛苦就一定辛苦啲㗎啦，但好多朋友都話睇住兩個有傾有講一齊玩就覺得好值得了,所以依家都唔抗拒多一個。

只此一次的糖霜曲奇

有朋友 baby shower, 我幫手做個甜品，已經有人預備 mousse, cheesecake, fruit tart... 咁我就諗住試吓整糖霜曲奇，因可以 customized, 整得靚會好 cute.

之前兩日焗定餅，夜晚晌人仔瞓咗時就畫畫畫。咪睇得嗰幾塊餅，都畫咗我兩個鐘。。。毫無美術天份㗎我，畫嘢始終唔得。畫完出嚟唔係靚，第二朝仲要化咗少少，我諗係第一層未乾晒就畫第二層。而且呢啲餅我諗大部分人都會覺得太甜，唔好食，所以最終冇攞去 baby shower.

有啲嘢，試過就算了，又唔好睇又唔好食，應該都唔會再整啦！

27 個月

我又唔記得人仔又大咗一個月啦！哈哈！

食同瞓同之前差唔多，除咗病嗰時食得差瞓得差又痴身之外，其他時間都好易湊。當然，少少扭吓計一定有，但都唔過份。

今個月其中一個進步係正式識唱歌。某日佢自己玩緊㗎時間，無端端唱 ABC 歌㗎最尾幾個字。依家佢唱倒成首了，不過發音係唔正的!另外亦識唱某啲“上堂”唱㗎歌。好在我係同佢一齊“返學”嘅，所以聽得明佢唱咩歌!

Potty training 方面，佢開始會同我講佢去咗 poo poo,不過唔係次次講。咁都算有進步了。天氣暖少少就試吓同佢正式戒啦。

繼續都係鐘意車，其次係音樂。成日扮彈琴，扮打鼓，一見倒琴又要走去玩。睇彈琴 video 時手指仔都會不自覺感彈。老公成日話男仔識彈琴好型，我就冇咩意思要佢學，如果佢唔鐘意就無謂了。但見佢真係有啲興趣咁，睇嚟都係會比佢學。好在我識少少彈琴，可以教吓基本嘢，等佢真係鐘意至正式學，咁可以慳返啲!