23個月!

仲有一個月就兩歲,好快呀！

今個月最明顯進步亦係講嘢。識講好多字,有 d 冇特別教過佢都識,例如有日晌街有陣風,佢就講"風",又有日見倒風扇就講"風扇,吹"。同車有關嘅講得特別叻,落車,泊車,be bu 車, 巴士。。。依家人仔好似錄音機咁,我講一句,佢會跟一,兩個字。亦開始講簡單句子例如媽媽揸車,爸爸痛痛。有日佢講"爸爸抱--摸--燈燈"

開始可以傾計,佢多數答單字,多數都係講無聊嘢,例如
我:"車車點呀"
佢:"行"
我:"跟住呢？"
佢:"停"

佢可以表達自己需要,例如要"玩",奶奶","出嚟","抱"。。。

除了講嘢進步外,唱遊做動作都叻咗,有 D 歌我一唱佢就自動做動作。好鐘意唱遊,我一唱起碼唱十次八次。佢亦鐘意音樂,一聽倒歌會 un,拍手或者搖。我好多歌都比佢聽,多數揸車時聽。詩歌, classical, 有時開正係墨佬台唱西班牙文歌照比佢聽,佢又跟住 "un" !

Potty training 冇咩進展,仲係耐唔中 pee 倒一次。問佢次次都話冇,定時捉佢去又唔肯。好多人都話小朋友 ready 㗎時間就好快攪掂,所以我都唔急,慢慢嚟,懶吓先!

瞓都冇咩特別,一次午睡 ave 兩個鐘。夜晚通常9點幾瞓到7點幾,有時半夜醒吓。拖住佢手哼住歌(咩歌都哼!慢節奏就得),15-30 分鐘瞓著。

食都 ok, 開始肯食菜,仍然唔鐘意食飯(但鐘意食粥),所以 lunch 多數整三文治,粉麵之類比佢食。

脾氣大致上 ok, 有時好少嘢會扭,什至係冇原因,但扭一陣佢會突然"醒"咗咁冇嘢。佢扭任何嘢都唔會比佢,同佢講"我講咗唔比就唔比,扭冇用。"然後 suggest 其他嘢比佢。但佢都係會扭一輪。有時為咗防止自己發火,我會行開一邊。。。

Overall 都係聽話嘅,希望繼續係啦！

小農夫

參觀完農田,係時候晌屋企實習啦！

咁啱老公攞咗 D 西蘭花苗返嚟,佢呢排又損手爛腳不宜種植,所以種苗呢個重任就交比我呢個種仙人掌都可以種 c 㗎媽媽手上。。。

人仔仲細,除咗識淋下水之外做唔倒咩,只係晌度行行企企扮吓嘢。不過比佢睇吓 D 植物,睇吓我除草落苗都好。

其實我食咗西蘭花咁多年,都唔知種出嚟係點嘅。上網睇圖至知原來種大之後係有好多葉圍住中間有一棵西蘭花。希望呢度九棵會有一棵種得成啦！

From farm to table

上篇講到我地晌 Tanaka Farm 摘咗少少蔬菜。摘返屋企當然會煮嚟食啦！由洗蔬到切到煮到食,全程都比人仔參與吓,等佢知道平時餐枱上 D 食物係點嚟嘅。

少少紅蘿蔔,洋蔥同豆,加幾隻蝦一齊炒,自己落田摘嘅,特別好食!

參觀農田~ Tanaka Farm field trip

有人介紹屋企附近有個大 farm, 好適合帶小朋友去。上去個網站睇,個 farm 有 wagon ride, petting zoo, pumpkin patch 等等, 好吸引呀!本來想約朋友一齊去,但夾唔倒時間,而農田十一月會休息,所以就自己帶人仔 field trip 啦！

朝早嚟到,原來好多學校成團咁嚟 field trip, 所以都好多人呀,不過聽講週末會仲迫!

我地先去買飛, wagon ride, petting zoo, farm admittion, pumpkin patch 幾樣加埋 $10, 未到兩歲㗎人仔就唔洗錢!

一嚟到人仔就話"坐車",所以就上咗 wagon. 架 wagon 會停一個站,就係個 petting zoo. 個 zoo 有好多羊,同兩隻alpaca, 朝早仲啱啱有隻 alpaca 出世!睇住佢第一次企起身同啜奶奶,好 amazing 呀！人仔就有 D 驚 D "咩咩",唔敢摸佢地。佢又驚,但又要睇,哈哈!

睇完動物,又上返 wagon. 架車圍住個 farm 行咗個圈,之後我地落車,就行去田度摘菜啦!當日有紅蘿蔔,豆同洋蔥。其實我咁大個女,都係第一次摘紅蘿蔔咋！本來冇諗過摘嘢嘅,但一場嚟到,又可以比人仔體驗吓,於是摘咗少少,返屋企就可以同佢一齊煮一齊食啦！

摘完菜,坐低食少少嘢,然後去南瓜田,我又忍唔住攞咗個細嘅！

D 蔬菜以磅計,比完錢諗住走,但人仔想再坐車,於是又同佢坐多轉。 school tour D 人走咗好多,所以呢轉坐得好鬆動!

坐完就返屋企啦！呢個 farm 真係好玩呀,而且唔遠,春天一定會再去!

又有意外。。。

一波未平,一波又起。

呢頭老公炒單車,琴晚人你就晌櫈度向後跌,懷疑撞倒頭。。。 佢一跌即大喊,我地就即刻抱起佢。我一邊攬住佢,一邊睇吓佢個頭有冇傷。佢喊喊吓我望一望自己件衫,嘩,有血呀！睇一睇,咀仔好似有血,唔理咁多車去醫院先。

晌車度人仔情緒平復落嚟,開始講嘢,識講媽媽車,爸爸揸車。。。咁都冇驚。行行吓佢有 D 眼瞓,我就繼續同佢講嘢。

去到醫院等一陣就見護士。平時 check up 磅個重都喊爆㗎人仔今次當然都係喊爆!仲不停講"媽媽抱","行"。雖然我之前已係咁同佢解釋叔叔姨姨會做咩但都冇有。

之後見醫生,佢問完問題就叫多兩個護士嚟,㩒住人仔等醫生檢查佢口仔。人仔不停爭扎,好陰公豬呀!醫生睇唔倒有傷口(佢郁成咁,點睇倒吖。。。)。之後同我地講如果人仔冇大嘔,冇昏迷,咁應該冇咩事。

咁我地就返屋企。夜晚同人仔擦牙時,佢唔肯比我擦右上角 d 牙,問佢係咪痛,佢點點頭,雖然唔知佢係咪明咩叫痛,不過唔肯比我擦就應該係痛。好可能佢跌㗎時候咬親。

之後如常瞓覺,今日一切正常。冇咩事真係要感恩!

意外!

上星期六日係一年一度兩日一夜㗎慈善踩單車 event.今年老公叫多兩個朋友一齊踩,我同佢地 D 老婆就做 support team. 今年人仔大 D, 仲諗住一早出發睇開始,但其他女士好似冇乜興趣,所以打算九點至出發,晌 lunch stop 見老公們,之後再晌終點等。

之前一日人仔有咳同鼻水, 諗諗吓都係唔好朝早出發,我地晌屋企食完 lunch 至去,都仲可以見 D 老公衝線。

星期六朝早,我同人仔就晌屋企 hea 吓,點知 9 點幾其中一個朋友打嚟話老公炒車,唔可以再踩,要我去接佢。當時我㗎反應係"oh, ok. Oh, ok, thank you." 佢事後問點解我咁冷靜,我諗我轉數慢,即時冇諗到炒單車可以好大獲!所以話有時人蠢蠢地係好嘅,唔會自己赫自己, 哈哈!

收線後就即刻同其他老婆聯絡,教佢地點去終點點去酒店等等,又執嘢走人,又聯絡老公。人仔都算合作,冇攪攪陣扭計。行行吓老公 text 我話佢會晌 Starbucks 等。仲可以嘆茶即係冇咩啦！

11 點幾終於都見倒佢啦,損手爛腳咁真係陰公。好在佢仲係笑笑口。佢話應該係頭落洗,咁真係可以好大濟。依家郁傷頭頸冇斷骨,係不幸中之大幸!

之後我地決定落 finish line 同朋友 hang out 吓。途中我地去食 lunch. 晌唔知食咩㗎情況下入咗去間 Subway. 入到地見冇 high chair, 間舖又細又迫人,於是老公話不如出海邊食啦,好近啫。於是我地買完就揾路去海邊。一睇地圖,就發現原來度係我以前坐火車經過,覺得好靚,每次經過就諗如果有日可以落去行吓就好啦㗎地方!

去到我地揾地方坐低,一邊睇海,一邊食,有清涼㗎海風,耐唔中仲有火車經過!好寫意呀！人仔都好開心,不停咁講海灘,又有得睇雀仔狗仔同火車!

嘆完我地就去終點,晌度 hea 一輪,卜五點幾就回程返屋企啦！返到去就慘囉,攪掂人仔沖涼瞓覺之後就幫老公洗傷口,睇見佢就陰公囉。。。 受刑咁,呢幾日慢慢好返,希望快 D 完全好返!

參觀消防局

好開心有得參觀消防局呀,要多謝媽媽會㗎朋友約倒消防局比我地一齊去參觀。為咗隆重其事,我專登晌圖書館借咗兩本消防書,比人仔預習吓,參觀完又可以温習吓,覺得自己好虎媽添,哈哈!

由於消防局距離屋企大約 45 分鐘車程,人仔晌車度瞓著咗,去到醒㗎時候就要扭抱,加上陌生環境同陌生人,人仔成程都要我抱,係最後睇消防車至肯落地行。

我自己唔係聽倒好多,因為抱住佢,就費事企前面阻住人啦！我亦唔知人仔睇倒倒咩,又唔知佢記唔記得,不過佢返嚟就學識咗講 "梯" 同 "bi bu 車"。有 D 大少少㗎小朋友就睇得好興奮,希望人仔大 D 時會再有機會參觀啦！

第二日就同人仔做咗個消防車手工。我剪定 D 圓形正方形長方形,然後比佢揸膠水同貼。對於未夠兩歲㗎人仔,揸同貼嘢都唔容易,加上人仔又唔鐘意膠水痴住㗎感覺,所以都係要我幫手。其實揸膠水同貼嘢都係好好練習手眼協調,小手肌㗎活動,得閑玩多 D 先。

I

咩咩"乞痴"

前幾日,人仔晌車度無端端係咁講"咩咩乞痴",每次講完,就係咁笑。一開頭我唔明點解佢會講"咩咩乞痴",跟著我醒起呢期借咗本故事書講幾隻羊咩咩去餐廳食嘢攪到一團糟,最後行出餐廳見倒個草地,食得好滋味。其中一頁話 D 食蛋糕唔小心落咗胡椒粉,攪到隻隻打乞痴,然後整跌晒 D 嘢。

我問佢係咪講緊本書呀,佢就不停咁講"咩咩乞痴又不停笑!

返到屋企佢又真係走去攞本書出嚟,跟著又講"咩咩乞痴"。估唔到原來佢記得睇過㗎書!

晌屋企玩食得㗎沙

人仔驚沙,同佢去過兩次沙灘,都係要好長時間 warm up 至敢摸吓沙。試過去一個 playground, 地下舖沙,佢直程唔敢行入去。

其實玩沙既好玩,又可以刺激小朋友㗎觸覺,我希望人仔唔好咁驚沙,可以開開心心咁玩。我想佢接觸多 D, 令佢唔好驚沙,但係我又唔想吓吓走去沙灘,又晒又要帶好多嘢,而且沙灘唔係好近。

最近上網見有人用麥粉加油整成"沙"比小朋友晌屋企玩。呢個方法好方便,而且 D "沙"係食得嘅,咁整咗入口都唔驚啦！

第一次玩,整少少試吓先。佢咁怕沙,比枝羹佢玩,唔係一定唔肯玩。

用羹玩得好開心,其間都有用手掂吓沙,不過仲係唔鐘意用手玩。

第二次玩雖然仲有少少怕污漕,不過都敢用手玩吓啦!

大與細

先排開始教人仔大同細㗎 concept. 有時我會攞起兩架唔同大細㗎車加誇張㗎動作教佢。不過,其實最有效㗎方法,係攞住兩件一樣樣但 size 唔同㗎物件教,咁就比較清楚。

上網揾圖,揾倒同款但唔同大細㗎 cement mixer. 車車,人仔鐘意啊,於是 print 咗出嚟,剪開佢,用嚟做教大細㗎教材。

將大車放入大盒,細車放入細盒

將大車細車分別排隊

我覺得佢玩完都好似唔係好明,不過之後一有機會就教吓佢大細呢個 concept,依家攞起兩樣嘢,問佢邊個係大,佢都指得出呀！出街見倒大車,佢又會講"大",哈哈!

顏色對應貼貼貼

貼貼紙可以訓練小手肌肉,點知屋企係冇貼紙,於是我買咗 D唔同顏色㗎圓形貼紙比人仔玩吓。當我望住佢貼㗎時候,就諗倒個比佢認顏色㗎遊戲。

畫 D 紅色綠色㗎圓點晌紙度,然後要佢貼相同顏色㗎貼紙上圓點。

第一次玩基本上係我教佢貼邊,然後佢貼。玩多幾次,到佢明白,又識分顏色,咁就可以 random 咁畫 D 唔同顏色㗎圓點然後比佢貼啦！

sensory bin~ 顏色冰, 水, 沖涼鴨

最近,人仔識講"熱",有時用得啱但有時凍㗎時候,例如晌超市行過雪櫃,佢又話"熱"咁到底佢明唔明咩係熱呢？

趁依家天氣仲熱,我整咗顏色冰,加少少水同幾隻沖涼鴨同兩隻量杯羹比人仔玩。

顏色冰可以用食用色素整,我仲未買倒,所以用水彩整。人仔唔係鐘意放嘢入口㗎細路,加上我全程同佢一齊玩,所以都安全嘅。

呢個 sensory bin 可刺激:
視覺(唔同顏色)
聽覺(冰塊撞擊聲,水聲)
觸覺(液體 vs 固體, 凍)

可訓練:
Fine motor skill
Gross motor skill.

可學習:
涷㗎概念
大 vs 細 (量杯唔同 size)
唔同顏色
講"凍""冰"

大 D 㗎小朋友可以學:
水㗎唔同形態(液體,固體)
冰遇熱會溶
溝色(紅加藍變紫, 冰溶咗之後 D 水係紫色嘅)

今次人仔玩咗大半個鐘,玩到冰都溶晒,玩得開心又易整,我諗呢個 sensory bin 可以玩好多次!

咦,媽媽整咩比我玩呢？

呢舊凍冰冰係咩嚟㗎？

倒水好好玩!

鴨仔坐船

D一舊舊㗎嘢越玩越細粒,可以放晒入個杯裏面喎！

拍水!