22 個月啦！

呢排成日睇新聞,都唔記得咗人仔已經 22 個月大啦,又係時候記錄吓佢㗎成長!

今個月佢講嘢有明顯進步,好似開咗竅咁！依家識講㗎有:
人物: 爸爸, 媽媽, 婆婆, 爺爺, 嫲嫲
食物: 肉, 包, 芝士, 菜, 魚, 麵, 奶
動物: 兔, 汪汪(狗), 鴨, 豬, bear bear, 馬, 馬騮, 貓
植物: 花, 樹
交通工具: 車, 轆, 火車, truck, 飛(飛機)
動作: 行, 跑, 踩, 痴, 揸(車), 坐, 抱, 抹, 拍, 拆, 摸, 落, 攞, 擺,  爬
身體: pat pat, 頭
形容詞: 大, 快, 多, 高, 熱
物件: 屋, 褲, 袜, 泡泡
數字: 1, 2
字母: A, B

仲開始識砌字,例如媽媽行, 媽媽抱, 抹車, 揸車。又成作詞, 例如 pat pat 車, pee-a-poo 車, 包包車。。。 基本上係鐘意咩都加個車字。。。我成日教佢講唔該,謝謝,不過佢又未識講。。。

Potty training 就冇咩大進展,可以晌廁所小便,但唔係成日肯,試過比佢唔著片,佢賴咗幾次都照賴,教極都好似 get 唔倒咁,唯有慢慢嚟。

自理方面,教佢自己著褲,但未完全識。除鞋袜就有時要幫吓。收碗碟,拋垃圾叫佢都識做嘅。clean up 亦係要叫好耐,同佢一齊做佢至幫手。平時佢好鐘意幫手,依家我收衫佢會自動幫我收衣夾,買完餸會幫手攞,抹地就搶住抹,大 D 就睬你都儍㗎啦！

食嘢都係差不多,鐘意食嘅好快食晒,唔鐘意就食兩啖就掛住玩。我會餵吓,但夠鐘就收嘢,由得佢餓!爸爸通常會有心機 D, 會餵多 D!

呢個月因多咗時間晌屋企(病咗。。。) ,所以終於買咗佢㗎書枱同 chairs, 又整多咗嘢比佢玩,例如, sensory bin, 教吓嘢,畫吓嘢, 做吓手功咁。 教咗一輪,依家識大, 細。顏色好似識識地分。