易湊？難湊？

人仔個表妹兩星期前出世，令唔夠九個月㗎人仔榮升表哥！表妹在香港，所以未有機會見。不過聽講表妹好易湊，一星期唔夠就夜晚十一點瞓到朝早六、七點。食得快，食完就瞓，冇咩點喊！如果人仔係咁就好啦！

人仔頭幾個月成日喊，之後有濕疹，而瞓方面，到依家半夜仲成日醒。我好多時會諗，係咪我有咩做得唔好，係咪我食咗D咩令人奶有嘢令人仔食咗唔舒服？見倒表妹咁易湊，又聽過第二D BB 易湊難湊之處，令我覺得BB㗎本性，有部份係天生，係我改變唔倒。所以我唔應該咁自責，盡咗力就得！

亦因為咁，湊BB唔可以一本通書睇到老。例如訓練BB瞓教，有人用cry it out 㗎方法,由得個BB喊,幾日之後個BB就識得自己瞓，有人要訓練幾星期至得，有人訓練咗幾日，發覺BB仲喊得緊要，要用第二D方法至得,又或者繼續半夜抱佢比佢食奶。所以做媽媽㗎，唔可以只係聽人講要點點點，唔可以咁咁咁... 

有好多人話媽咪通常最了解BB，有直覺，知道咩係對個BB最好最有效。我覺得我好似仲係摸索緊，有時直覺啱，有時唔啱。希望我可以再了解佢多D，令佢易湊D！