繼續免揉包

自從學識做免揉包之後，就 keep 住整包，所以呢排都冇晌街買包啦！

多數都係整基本麵包一大個，但每次都試吓加唔同配料。整咗幾次，我發覺跟足方法用 入得焗爐㗎 corning ware 焗效果好好！

呢個加咗 rosemary, 第一次用 corning ware 焗，效果好好!大愛 rosemary 包㗎香味！

試咗一個加咗少少 wheat flour 同乾香草，冇影到相。

有呢個加咗 sun dried tomato. 一向我都好鐘意食 sun dried tomato bread, 但我覺得自己整呢個麻麻地好食。隻 sun dried tomato 好似怪怪地咁。

呢個係用一半水，一半奶做嘅。上面界一直線，擠上牛油蒜蓉鹽，面再落少少香草，焗起好香呢！

綠茶雲石曲奇/紅苺曲奇 (附食譜)

以前整過呢款曲奇好多次，最近又有興致整餅，所以就揾近個食譜出嚟整。另外仲整咗紅苺曲奇，咁人仔都有份食啦！

材料：
牛油 150g
糖粉 60g
低筋麵粉 225g
鹽 少許
綠茶粉 5g

做法：
1，將牛油同糖粉拌勻打鬆。
2，加入麵粉、鹽。
3，一半麵團加入綠茶粉，搓勻。
4，將原味及綠茶味麵團混合，整成條狀。5，放入雪櫃雪一小時。
6，預熱焗爐360F.
7，從雪櫃取出麵團，切成一塊塊，放在焗盆上。
8，入焗爐焗15-18分鐘。

紅苺曲奇只係將紅苺加入原味麵團，其餘做法一樣。

字母火車

人仔實在太愛車，所以教材都係用車至吸引到佢。某日教緊佢 'A' 'B' 㗎時候有字母火車呢個構思。於是即刻畫㗎火車，車卡上寫上 'A' 'B', 然後再晌圓形貼紙(做車轆)上分別寫上 'A' 'B'。玩法就係按車卡貼上對應㗎字母轆。

人仔要少少提示至識貼，不過第二見到個 'B' 字㗎時間又識講 'B' 喎，但係又唔係次次講啱，都係要慢慢教多幾次㗎啦！

呢個活動除咗可以學字母之外，又可以訓練小手肌肉，手眼協調。而且學其他字母，英文大細楷，什至數字，顏色都係，可以玩好多次啦！

芝士脆餅 (附食譜)

呢排又有返整餅㗎興致。見到有人整芝士餅，人仔實鐘意食，等我又試吓先。

呢個食譜用好多芝士，整㗎時間有懷疑過唔得，點知搓搓吓又 OK 喎，整起仲好好食。最重要係老公都有食，好快就清晒!

材料：
牛油 60g
麵粉 120g
碎芝士 226g
鹽 少許
水 4大羹

做法：
1，將麵粉、鹽及牛油拌勻。
2，加入芝士。
3，慢慢加入水，搓成麵團。
4，搌成薄片，放入雪櫃30分鐘。
5，分成小塊。
6，放入已預熱 350F 焗爐，焗 15 min.

顏色配對 2

某日佢又攪廚房櫃，比佢搵到個裝蛋㗎碟，係唔知邊個無用比咗我。我其實都冇用，不過見佢靚靚地，就 keep 住佢。估唔到可以成為教材呢！

首先我指住其中一間問佢人仔係咩色，佢就一如既往咩都答藍色!哈哈。咁我就教近返佢正確顏色，然後再請佢揾相同顏色㗎一格。佢一嚟都係亂指，但係提吓佢佢又會睇真 d ，然後會指啱。一個簡單又唔洗預備㗎遊戲，唔錯。

顏色配對 1

人仔仲未識分顏色，睇嘢又成日走漏眼，玩吓顏色配對應該有幫助。

屋企有幾個唔同顏色㗎碗，又有一堆唔同顏色㗎膠蛋，搵幾個同 d 碗一樣顏色嘅，然後要佢將蛋按顏色放入碗就得啦。

幾個月前都玩過類似嘅，不過佢唔係好識玩。依家識玩啦。首先試分兩隻色，再分三隻色都分到。

之後我攞咗個之前做手工用剩㗎蛋盒，貼橙色同綠免色貼紙入去再要人仔放相同顏色㗎蛋入去。佢要少少提示就做到。

雖然人仔學顏色係慢少少，不過見佢有進步就好開心啦！

免揉包～香蔥包，腸仔包

 今次用返上次個甜包食譜，發酵 48 小時，果然係好搓 D 不過麵團依然比較濕，加上自己技術有限，所以整得唔係咁靚。味道唔錯，不過冇出面食開嘅咁軟，大有進步空間呢!

材料：

水 225 g
Instant yeast 1/2 TS
高筋麵粉 450 g
糖 90g
鹽 1/2+1/4 ts
奶粉 30g
蛋 2隻
牛油溶液 90g

做法：
1，乾材料拌勻，加入濕材料拌勻。
2，用保鮮紙蓋好，在室溫發酵1-2小時。
3，放入雪櫃發酵36-84小時。(今次48小時)
4，從需雪櫃拿出來加料整形，用揸了油的保鮮紙蓋好，發酵1～2小時。
5，預熱焗爐 400F。
6，焗25-30分鐘。

sensory play~ 泡泡，顏色水

某日我洗碗時人仔又要嚟，於是我就比佢嚟'幫手'。我洗個煲時，有好多泡泡，人仔就伸手落去玩，跟住我靈機一動，諗到可以滴 D 食用色素落去整顏色水。估唔到又幾好玩喎，色素滴落去時形成唔同㗎 patterns,又可以玩溝色。我當然乘機教吓人仔顏色啦！不過佢依然係咩都話藍色。。。

分顏色

某日人仔攞起張 label 紙晌度貼貼貼,於是我就隨手畫幾個格,教佢分顏色。佢差不多每貼一個都要少少提示,但我發現佢搣同貼貼紙都可以自己做,手指仔靈活咗呢！

另一次我攞咗幾張同貼紙同一顏色㗎紙，比佢對返顏色貼上去，一開始教一教佢佢就識跟返顏色貼。

其實一直都有教佢認顏色，不過佢好似唔係好識，次次問佢咩免色佢都話藍色，指住一樣嘢教佢係黃色，再問佢佢都係話藍色。佢係咪未了解顏色呢個概念呢？

免揉甜包(附食譜)

上癮啦!呢幾日係咁睇包包食譜同 articles, 比我揾倒幾個甜包食譜,於是揀咗個嚟試。我以為甜包唔可以發酵太耐,所以放咗入雪櫃幾個鐘就攞嚟焗。麵團比較濕,所以我只係隨意加少少紅莓乾,冇整形,一大舊咁焗。

之後睇倒有個 blog 話甜麵團可以放雪櫃發酵 36-84 小時,發酵完成, 麵團會冇咁濕,比較易操控。噢,下次要試吓至得!

材料：
水 225 g
Instant yeast 1/2 TS
高筋麵粉 450 g
糖 90g
鹽 1/2+1/4 ts
奶粉 30g
蛋 2隻
牛油溶液 90g

做法：
1，乾材料拌勻，加入濕材料拌勻。
2，用保鮮紙蓋好，在室溫發酵1-2小時。
3，放入雪櫃發酵36-84小時。(今次只放了數小時)
4，從需雪櫃拿出來拌入紅苺乾，約略整形，用揸了油的保鮮紙蓋好，發酵1-2小時。
5，預熱焗爐 350F。
6，焗25-35分鐘。

人仔語錄~白公仔食果

最近老公冇咁忙,夜晚有夜晚有時會講唔故事 "tum" 人仔瞓。頭幾次,老公唔知點解揀咗白雪公主故事講。唔知係咪先入為主,依家每次老公 "tum" 瞓覺,問人仔想聽咩故事,佢就會話:"白公仔。。。食果" 即係白雪公主故事。

哈哈,白雪公主講成白公仔,成個故事只係識講"食果",果然係為食仔!

免揉麵包 (附食譜)

最近又有返整包癮,又開始睇麵包機。我知 P 仔好用,不過唔平,二手都好少見。其他機又唔知好唔好,希望揾倒個平平地㗎二手機試吓。未揾倒機之前,比我揾倒個免揉麵包㗎食譜,一試就成功咗,好滿足呀！睇嚟冇機都可以玩一排先。

材料:
高筋麵粉 300 g (今次用咗中筋)
酵母 1 1/2 茶匙
鹽 1 1/4 茶匙
暖水 300 mL

做法:
1, 將乾材料放入膠盆拌勻。
2, 慢慢加入暖水,拌勻。
3, 蓋好盆,在室溫發酵一小時。
4, 放入雪櫃繼續發酵,麵團會發大,表面有氣孔。
5, 第二日攞出麵團,放在有少許粉的工作枱上約略整成圓形或長形。
6, 焗盆舖上 parchmen paper , 洒少許粉, 放麵團在上。
7, 舖上揸了油的保鮮紙,發酵一小時。
8, 預熱焗爐 425 F。
9, 放一盆熱水在焗爐低層。
10, 在麵團上介兩,三下,放入焗爐焗 25-30 分鐘。

生日加 Thanksgiving 慶祝

今年人仔生日啱啱係 Thanksgiving, 本來諗住提早攪或後補生日會,不會諗到佢兩歲都唔係好知咩係生日,所以唔諗住攪咁多。又諗過請人嚟屋企慶祝 Thanksgiving 加生日,點知約唔倒,因我地住得比大家遠。結果我地去咗幾個朋友屋企 gather, 仲切咗兩次蛋糕!有朋友仲好有心送禮物比人仔!

雖然冇攪生日會,但人仔都有得玩有得食仲有得切蛋糕!佢不知幾開心!仲學識講開 party! 哈哈,今年又冇正式攪生日會,我又懶多一年!

2 歲啦！

話咁快人仔就兩歲啦！今個月講嘢繼續有進步,講倒三個字㗎 phases, 好多動詞加名詞,同簡單句子,例如爸爸切蛋糕,媽媽煮飯。成日重複我地講嘢,跟著自己就不停練習講,好得意。例如有日我講句"爸爸揾 car seat."佢又跟著講。有 D 字冇特別教,但突然自己講,例如 party, clean up, 比賽。識將一個字運用晌唔同情況,例如學識個"完"字,佢就講食完,玩完,買餸完!

開始可以同佢傾計,問佢返學(church sunday school)玩咩,佢會答玩車車,跟著問佢咩車車,佢又會講 D 出嚟。其實都唔知係咪!哈哈!

教佢講自己個名,每次問佢叫咩名佢多數會答,不過有日我問佢媽媽叫咩名,爸爸叫咩名,火車叫咩名。。。 佢都係答佢自己個名!哈哈!

自理方面,可以自己除鞋袜再放好,唔洗幫。除著衫褲就要幫吓。食嘢方面,仲係鐘意用手食,當 D 餐具冇到!好在食粥食 yogurt 佢都會用羹啫。。。 呢期鐘意吐嘢,仲要吐出呢話比媽媽食 @@

一踏入兩歲,就識講個 "no" 字,成日咩都 "no", 唔要就 "no"。正式踏入 trouble two 階段!好在暫時大扭都係眼瞓或剛瞓醒時,其他時間最多 "no" 幾聲。不過就覺得佢唔肯認錯,佢個樣又知衰咁,但係就唔肯講"對唔住"或"住" (平時係發倒音嘅)。可能佢未係好明認錯呢個 concept。