開始戒片了

原本打算下個星期試吓戒片，但幾日前人仔換完衫，冇著片，冇著褲之下走咗去玩，於是我乘機試吓同佢戒片，因佢已經識晌廁所 pee。

佢玩咗一陣我就叫佢去廁所，去完佢喊晒咁話要著片，於是我就同佢講唔著片就可以玩新火車玩具(呢件玩具係之前見平買落，但唔想無拿拿比新玩具佢玩，所以一直放咗晌度)。佢著咗條面褲之後就即刻走出去玩，唔再要片。

成功 pee 咗幾次之後賴咗一次。之後佢就主動話要著低褲(之前點都唔肯著㗎!)。

Pee 暫時要定時叫佢去，自己唔識主動同我講要去。賴咗幾次之後就好少失手，有時 nap time 冇片都得。又試過出街食飯都冇事。poop 就煩了！佢依然係一 poop 嗰時就話：“唔要媽媽。”，唔比我接近佢。咁我叫佢自己入去廁所，去落低褲都好，至少佢會養成晌廁所大大㗎習慣，不過佢係唔理我。亦試過即刻鼓勵佢坐廁所，但佢都係同以前一樣，一係就已經去咗，一係就坐好耐都冇嘢出。

佢好多時食完早餐會去，咁我就同佢去廁所玩啦，希望玩玩吓佢會去，但佢又冇喎。仲攪到佢時間亂晒，又去得少，如果攪到佢便秘就慘了。

日日都同佢講有 poo 要去廁所，佢自己都識講，又成日比佢睇我哋去廁所，又攞啲公仔示範。。。但係到佢自己去就去咗落低褲度。。。

睇過啲文章話有啲細路係咁，有啲會自己要求換返片至去倒。如果係咁，就要慢慢教佢要晌廁所去。首先要佢入廁所去，習慣之後要佢片坐廁所包住片咁去，再之後晌條片度剪個洞比佢坐低去，最後除片去。

不過人仔依家一開大時係都唔肯入廁所，唉，睇嚟有排攪。