可樂餅

最近見倒 D blog友整，仲整得好靚好吸引。我一向都鐘意食薯仔，而我老公就鐘意食D香脆架野，於是就試吓整。

整嗰時心想，都唔知幾時會再整，特別係BB出世之後，因為又要整薯溶，又要搓，又要炸，整到成手薯溶嗰陣又或者炸緊嗰陣個B喊都幾煩惱。

我整嗰個係冇肉，只係加咗洋蔥同胡蘿蔔。老公食完之後讚好食。我覺得D薯溶好似濕咗D，下次整完D薯溶之後可以雪耐D，等佢乾D。

由於老公weekend 會參加一個長途單車event,於是第二日（星期五）食午餐時，我就同佢講：「你今日要食多D carb呀，要carb loading，要食多D飯。」
老公：「咁今晚食咩好？」
我：「飯呀，今晚煮意粉都得，唔好食太多肉，難消化。」
老公：「薯仔都係carb喎，不如整琴晚D薯餅，好好食呀！」
嘩!老公大讚，仲encore要再食！屋企冇薯仔，都即刻出去買。嗶！竟然連續兩晚整同一個餸！今次仲加咗少少自家種架rosemary！由於薯餅比較肥，難消化，所以都唔係整好多。