mini 蒜茸包

上星期六團契小組，見自己有時間，又冇人預備晚餐，所以就煮餐比大家食喇。十個人，最方便就係整意粉，焗雞腿。

搓飽癮又起，於是搵咗個蒜茸包食譜。其實去超級市場時見倒D現成蒜茸包都好平，有晒牛油蒜茸響面，焗熱佢就得，都係兩三蚊美金，不過都係想自己整吓。今次個麵團比較濕，搓咗大約一個鐘之後就唔黏手，有薄膜。其實搓緊嗰陣都有諗，搓到手都軟，點解唔買個現成就算呢？哈哈！

整咗12個，其實好想試一個睇吓得唔得，不過見佢12個剛剛一盤咁靚仔，所以就冇試。我仲要係之前一日整，希望一日後唔會變石頭！哈哈！
結果去到焗番熱，又幾好食喎，老公仲幫我宣傳，同人講話係我自己搓架！哈哈！


其實我仲整咗個朱古力MOUSSECAKE。試咗三個食譜，結果整咗出嚟似啫哩扮MOUSSE...  下次再試...