墨西哥飽

幾年前一個夏天迷上整麵包，當時整西式飽飽多，一出爐時就好食，過一段時間就硬晒。最近多咗時間，又再玩整飽！之前想買麵包機，聽講係放晒D材料入去等幾個鐘就得。但係原來麵包機都有好多種，都唔知點選擇。有D朋友又話以前用過不過唔係咁好用，D飽第二日就硬晒...而且架機又會佔一個位，又唔知自己會用幾多次，所以都係試吓自己搓飽！

上之試咗個基本飽飽，只係加芝麻上面。不過發得唔靚，焗完出嚟細細舊，有D乾。都唔敢比老公食，自己哽晒佢算。其實都唔係太差，至少過咗幾日都未變石頭。

今次再試，整咗墨西哥飽，都係無餡，不過上面加塊皮。搓皮嗰時小心咗，因為我發覺自己好似不停咁搓斷D麵根，今次又搓同拉多D。今次真係搓到有似樣D架薄膜架！之後焗完出嚟個飽大咗好多，似返一個正常size架飽！估唔到個食譜係可以做倒6個大飽飽！

入爐前在飽面唧上墨西哥皮

新鮮出爐墨西哥飽

 





















搓飽雖然花多D時間，又花力，不過見倒製成品又真係好滿足！整咗咁多次，最成功係今次！老公見倒D飽，都係同上次一樣問同一條問題：D飽有冇餡架？好喇，今次做倒基本野，下次試吓加餡喇！整得好就可以攞出去請人食喇～

食譜參考為食貓 website: http://www.leisure-cat.com/frm_1227.htm