開始一湊二的生活!

因家有喜事，婆婆過嚟唔夠兩個月就要返香港啦!老公又返新工請唔倒假，所以我要開始一湊二啦！
二號差唔多兩個月，開始上軌道。雖然仲係三個幾鐘餵一餐同半夜要餵夜奶，但瞓得好咗。好多時放低佢，佢喊幾喊就會瞓。日間有時瞓唔到就孭佢。要出街就孭住佢佢就會瞓。

一拖二去圖書館

人仔都開始適應。之前二號清晨喊，人仔就會起身唔肯再瞓。如果我出咗去餵奶佢更會大喊要媽媽。依家二號喊佢會照瞓!又唔洗再聽故事或者聽歌瞓。同佢睇完書佢會自己合埋眼瞓。
家務方面，基本洗衫抺吓地嗰啲會做，其他做倒咩就咩。呢兩日都竟然買倒餸煮倒飯!

簡單炒烏冬

下午兩個都午覺㗎時候我都瞓吓，之後再做吓運動，hea 吓咁。

依家最辛苦係餵夜奶攪到唔夠瞓，希望慢慢會好啦！