話咁快二號就一歲啦！好可惜係病住過。前幾日開始咳，跟住斷斷續續發咗三日燒，終於好返啲。只有咳同流鼻水。最慘係人仔同我都咳。做媽媽嘅冇得請病假，半夜佢哋瞓得唔好攪到我都冇覺好瞓。老公自我隔離，我哋三仔乸同房瞓就輪流咳輪流醒。兩個醒都要媽媽，好多時係一手拖住人仔，二號就食住人肉奶咀。啱啱tum咗佢哋瞓，我咳兩聲又整醒佢哋。。。好在依家大家都好啲。
因為病，二號唔多食嘢，比咩佢都唔食，只係食啲 rice crispy。唯有比佢食多啲奶。。。我又比佢啜損晒，好痛。。。
長29寸，重17磅。體重係 under 5%, 繼續做細碼 bb。呢排食咁少，希望唔好跌出生長線!不過我發覺佢呢排 Poo poo 少咗，即係可能佢之前食得多 poo 得多，冇吸收到!可能係咁所以咁輕磅。
可以企一陣，行一小步，可能會似哥哥13個月識行。小肌肉發展幾好，多得呢排只食細細粒㗎 rice crispy!
開始有要求有脾氣。比人攞咗手上㗎嘢或者攞唔到想攞㗎嘢會喊。呢排病所以好痴身，有兩日直情成日咩住佢。
有時會講媽媽，mum mum, 少咗講爸爸。呢排食奶時有時會講妮妮，唔知係咪想講奶奶？
二號仔你大得好快呀！要好好珍惜仲係 BB 樣㗎你呀！
