學人整排毒美顏水

先排上網見人整排毒美顏水,好容易,只係將不同㗎瓜果放入玻璃樽內,加入水,放入雪櫃過夜,第二日就可以當水飲。

我見其他人好多時落青檸,檸檬,薄荷葉等等。我屋企冇,所以今次試落蘋果同車里子,飲落有少少蘋果味,清清涼涼,好適合夏天飲。

止咳洋蔥水

呢排上網成日見人介紹蒸洋蔥水,話對止咳好有效。前兩日人仔又咳返,唉…又病!我即刻試吓整 D 比佢飲。

做法好簡單:
1, 洋蔥一個去皮切條。
2, 蒸約三十分鐘。

會有少量洋蔥汁,唔好加水就咁飲咗佢。甜甜地,人仔好快就飲晒!連飲兩晚,依家雖然仲有鼻涕,但冇咳啦！佢上兩次傷風都咳好耐,睇嚟洋蔥水真係有 D 料到!

海底椰蘋果蜜棗水

前兩日用晒 D 羅漢果,唔去買唔得。前兩日難得去開中國人區,就順便買埋。平時我真係唔想為咗兩粒羅漢果而專程去度買呀!咁去開,就順便買包海底椰。其實我未煲過,飲都好似未飲過,不過我知係止咳潤肺。呢幾日我同人仔都有幾聲咳,又試吓煲海底椰啦!

上網揾食譜,原來都有好多煲法,啱啱屋企有蘋果蜜棗,南北杏就用呢幾樣啦。其實食譜仲有瘦肉,過我有落。話時話,南杏北杏點分?好似一樣係毒 D係咪呢？

川貝雪梨羅漢果水

先排人仔同我都咳,於是我煲咗個川貝雪梨羅漢果水齊齊飲。佢初時唔係咁肯飲,於是我就同佢講,我飲你唔飲,我會好返先過你,哈哈!(我成日同佢講埋 D 無聊嘢!哈哈!)第二日佢就肯飲啦！

啤梨啤梨汁

週末去個親戚度住,佢朝朝早都用幾種水果蔬菜再加少少乳酪整幾大杯 smoothie。飲一杯就食倒唔同㗎水果蔬菜,幾健康呀！而且自己整,可以唔落糖,比起街買 D 更健康更啱口味。

屋企有 set magic bullet,之前成日用嚟整人仔㗎 mum mum.  細細部,好方便,可以用嚟整果汁呀。今朝未買餸,得啤梨同之前雪落㗎士多啤梨。整咗杯,又唔錯喎！

雪梨雪耳糖水

某日揾倒屋企有 D 雪耳,剛好買咗 D 雪梨,咁就煲個雪梨雪耳糖水潤吓啦!兩個雪梨半個雪耳少少冰糖,話咁快煲好!秋天真係要潤一潤!

羅漢果雪梨水

人仔仲有幾聲咳,又有啖,所以我煲咗個羅漢果雪梨水,一家三口齊齊飲。其實佢只係飲好少,都係我地飲多!羅漢果化啖止咳,希望人仔飲完快 D 好啦！

自製乳酸飲品

呢個又係睇 Carol 個 blog 學,唔睇唔知原來乳酸飲品係可以自己整。呢度 D 乳酸飲品唔平,至少三,四蚊一枝,又少減價,所以我冇買過(基本上依家除咗奶之外,都唔會買飲品)。

Carol 個食譜係用有糖㗎原味乳酪。我屋企得冇糖㗎原味乳酪,所以要加多 D 糖。Carol係用 cc做單位。我冇嘢度倒 cc, 所以convert 咗做 cup。我個食譜變成一杯乳酪加一杯糖煮溶,放涼後再加三湯匙檸檬汁。放入已消毒㗎玻璃樽,飲時稀釋四至五倍。可存放兩個月。

滋潤蘋果梨水

前幾日見 blogger cici 煲咗個蘋果雪梨雪耳湯,提醒咗我可煲吓雪梨水。橫掂我個夏枯草菊花茶綠豆水 cycle 都cycle 咗幾次,而且天氣開始涼,係時候煲 D 滋潤 D 㗎嘢。

剛買咗蘋果同韓國梨,加塊果皮同粒蜜棗,煲一輪(煲吓停吓出街返嚟又再煲,我都唔記得煲咗幾耐!)咁就得啦! D 蘋果同梨煲到林晒,我比咗 D 人仔食! :p

檸檬薏米水

屋企有好多薏米,99 帶咗D過嚟,而我自己之前又買咗D,加加埋埋就好多。又有幾隻就嚟爛㗎檸檬,咁就煲個檸檬薏米水啦！據聞係美白同去水腫㗎,啱晒女仕!

只需將薏米浸一個鐘,然後加冰糖煲一個鐘倒,再加檸檬汁,太酸可以再加糖,咁就得啦！

夏枯草水

99臨走吩咐落要時時煲 D 乜水物比老公飲,仲買定D 夏枯草,菊花,雞骨草,雞蛋花....

今日煲個夏枯草水啦,據聞係清肝火,適合夜瞓人仕。我仲加咗 D 雞骨草入去,同少少冰糖。

入好一樽樽放入雪櫃,可以時攞嚟飲!

Fresh strawberry and grape juice

買咗好多生果，食唔晒，驚佢爛，其實可以冰咗佢，不過依家唔食得凍野，又就嚟搬，於是

攞嚟攪汁。士多啤梨加提子，仲清埋D蜜糖。雖然糖份高D，不過，冇色素，冇添加濟, 而且

仲有好多纖維，好多維他命, 都算係健康架選擇。