激氣

今日返工真係好鬼激氣!同個護士一齊 reposition 個病人,佢未數夠三聲就拖,我當然跟唔倒,之後就係咁話我做唔倒攪到個病人姿勢唔舒服,要揾第二個人嚟幫手,仲不停咁同個病人同另一個職員話我做唔倒!

我晌醫院做咗咁耐,成日都 reposition 病人㗎啦,點會做唔倒!我諗個護士見我瘦,就覺得我無力 move 唔倒個病人!其實個病人咁本唔需要咁多人幫,佢自己有能力 reposition 自己,但個護士就係咁話要多 D 人幫。。。

最激氣係佢晌病人面前 blame 我!大家一條 team, 唔應該 blame 來 blame 去,我成日都晌病人面前讚其他職員,等病人放心比我地 serve 佢地。

下午我再經過個 unit, 個護士一見我就黑口黑面,洗唔洗咁呀！

好呷完!

工作後感

今日又有得"放假"啦,即係返工!返工對我嚟講好重要,可以令我生活平衡 D ,唔洗成日都係做屋企嘢。如果可以返多少少就好啦！

兩個星期冇返,一返到去個感覺就係要轉 gear, 將平時個 hea mode 轉做作戰 mode! 今日返工都幾攰,因為好多病人要睇。今日㗎怪現象係我個 caseload 入面,深切治療部㗎病人行得多過普通病房㗎病人!好多時,晌心切治療部㗎病人最多都只可以坐晌床邊,但今日我幾個病人都行倒,仲要行得幾遠!反而有幾個手術後普通病房㗎病人坐都坐唔倒起身。所以每朝見倒自己個 caseload㗎時候,係唔可以完全估計倒當日㗎工作會係點。我覺得呢個係醫療工作有趣亦係有挑戰之處!

放工返到屋企,人仔有 D 扭,老公又趕住走,所以我要拿拿淋沖個涼,跟住就要"處理"人仔。餵食,陪玩,沖涼,瞓覺。佢瞓咗之後我仲有一大堆嘢要執要洗。依家總算可以鬆一口氣。不過其實屋企要執要洗嘅仲有大把,但我決定隻眼開隻眼閉,上網鬆一鬆,今晚早 D 瞓,聽日至再做過!

終於quit 了

終於 quit 咗其中一份工。

其實我一路都覺得唔需要做兩份咁類似㗎 per diem 工。只不過之前兩間都請,我覺得多個機會,又安排倒,返多 D仲有 bonus,咁咪做囉。

呢間醫院剛比人買咗,新高層決定星期日唔需要 PT, 話我可以改星期六返。咁我一向星期六都係返另一間,與其返兩間,不如我返一間返多個星期六算啦。而且論工作環境,論學嘢,論人工,論返工距離,都係星期六間好。咁就藉此機會quit 咗星期日呢間啦！

西班牙文速成班

上星期聽完個同事講話佢從病人中學西班牙文，令佢足以應付工作。今日我就有個講西班牙文，又識少少英文㗎病人，於是我就問下佢一D字㗎西班牙文。點知佢非常積極咁教我。見到咩都指住然後講個西班牙文比我聽。門、窗、出口、藍色、洗手間、手、腳、室外....

又多又快，我只係記得好少，不過我都記得幾個有用的。

walk=caminar
pain=dolor
stairs=escalera
walker=caminante
patient=paciente
個病人真係好積極咁教，佢仲叫我要 práctica práctica, 練多D! 

聯合國

LA 係一個有好多唔同種族人居住㗎地方。我响醫院做嘢,當然會遇到好多唔同國籍㗎病人。好似今日,就有墨西哥人,越南人同波蘭人。幸好,佢地都有親戚在場,可以幫手翻譯,如果唔係,就要揾吓有冇職員講種話,否則就雞同鴨講,指手畫腳!

我工作環境中最普遍㗎外語係西班牙文,好多時都可以揾倒同事翻譯,不過如果自己識幾句,咁會方便好多。我一直都好想學,試過上網學,不過唔係好學倒。今日同個同事傾開,佢話佢識少少西班牙語,可以應付醫院工作。我問佢點學,佢話都係病人教,一邊做,一邊問。其實來來去去都係要講嗰幾樣嘢,所以問得多,講得多,自然識!又係喎!我都有從病人中學,不過只係學吓數數字識hell咁,冇諗過咁問問吓會可以問到溝通倒,等我努力問多D學多D, 希望可以學到應付倒工作啦!

生命無常

最近有兩個cases,不得不令我感嘆生命無常！


前幾日有個eval係一個晌ICU架病人。佢需要呼吸機維持生命。通常，咁嚴重架病人我地都做唔倒D咩。我同個同事eval 個病人架時候，想扶佢坐，但未坐起，血氧已經跌咗D，而且個病人完全participate唔倒,係半昏迷狀態，所以我決定佢暫時唔適合接受物理治療。

兩日後，我在ICU見另一個病人。同事指住之前個病人個床位同我講，𠴱位病人情況冇好轉，因某原因，醫生在病人家屬同意下，停止呼吸機，讓病人慢慢離去。𠴱一刻我望住個用簾圍住，冇燈光架床位,。知道有一個生命正慢慢離去，覺得好可惜。前兩日我仲同個病人架家屬傾過，佢地話病人做完個小手術就急轉直下，之前佢仲可以自己行... 我相信佢架家屬一定好難過。

***

另外一個五十多歲架病人，入院前兩星期跌斷腳，做完手術之後去咗老人院rehab.之後發現有感染所以再入院。我eval佢時都覺得奇，雖然佢一隻腳係non-weight bearing，但咁後生，應該都可以返倒屋企，點解佢會去咗老人院呢？eval時佢企唔倒，只係可以免強坐起身，活動能力比我預期中低。不過佢好motivated,又好合作。第二日我返工時見佢discharge咗，我諗佢可能係去返老人院，我仲心諗點解今次咁有效率？平時D discharge都要起碼一兩日。過幾日，有個同事同我講原來𠴱位病人當晚過咗身....  


生命真係無常，要好好珍惜！

百歲人

依家返工等於放假，因為老公幫手湊夜（雖然佢有幾次半夜攪唔掂，結果我都係要起身⋯⋯ ）有工返下生活會平𧗾D，唔洗24/7都係攪屋企嘢，仲可以有D額外收入!

琴日返工又遇倒100歲㗎病人!我見佢時都冇留意到，之後打note時至睇倒，如果之前睇倒，就可以請教下佢㗎養生之道!佢比好多人健康，PMH 得三、四樣。有好多比佢年輕㗎病人閑閑地都有十樣八樣!佢講同聽都冇咩問題，判斷力亦正常；可以自己落床，我只係扶一扶佢企起身，然後佢就用walker行；平衡力亦唔差，真係唔似100歲!

1912年出世，經歷過兩次世界大戰，人生經驗一定好豐富，如果可以同佢傾下計就好喇!

I love my job!

我好幸福，BB出世兩個月之後至開始返工，仲只係返part-time. 我識好多朋友生完一個月就返工，幾辛苦。

其實我返全職屋企架經濟會好好多，不過我地雙方家長都唔晌美國，而我老公又好堅持要自己湊BB，所以我依家返part-time. 我媽返香港之前我就返多D，佢返去我就只可以返weekend喇。

做Healthcare真係唔錯，返工時間可以好flexible, 又容易搵工，而且工作性質係幫人，好有滿足感。做物理治療更加好，因為唔洗返夜班，冇理由半夜三更叫醒人做運動咁麻!

依家我晌醫院做，主要工作係評估病人架活動能力，鼓勵病人活動同教病人點起身落床行。唔好以為起身落床行好簡單，當個病人晌ICU, 插住幾十條喉，要扶佢坐起床邊，至少要兩個人，仲要小心睇住佢架情況，一路check 住心跳、血壓等等架vital sign, 都唔簡單!

有時夜晚瞓得唔好，第二日又要返工，都幾攰。不過我好鐘意份工，每次放工都好滿足，而且唔係日日返，所以都唔辛苦！