整包癮

幾個月前有朋友嚟屋企，對我哋有部 air flyer 好有興趣，咁啱佢哋有部麵包機好少用，於是我哋就交換機玩啦！

第一次跟機個食譜整方包，麻麻地，於是揾其他食譜整。整過唔同味㗎方包，又整過造型包。

二號出世之後就冇時間整啦。

最近整包癮又起，於是又開機啦！

首先試整奶油包。啲奶油都唔係出面食嗰啲，再整打啲 cream 可能仲好味!

跟住整咗湯種椰絲包。雖然湯種多少少工夫，但啲包真係軟啲呀！人仔好鐘意，但一連八個甜包有啲膩。

前兩日又好想整包，雖然冇乜材料，但都好想整，於是整咗芝士洋蔥包，同埋香蔥芝麻包。

包包造型有待改善，繼續努力練習先!

法國麵包 (附食譜)

去食越南嘢，人仔好鐘意食外脆内軟㗎法國麵包。某日突然諗，不如試吓自己整。於是上網揾個食譜試吓。

整出啲味道唔錯，可惜皮唔脆，咁即係失敗咗啦。。。 有機會要再試，希望有朝一日會成功啦!

材料：
高筋麵粉 2杯
酵母 1包
蜜糖 1湯匙
鹽 1茶匙
暖水 1/4杯 +1/2杯
冰粒 4-5粒

1, 1/4杯暖水加蜜糖加酵母拌勻，靜置5分鐘。
2, 麵粉和鹽拌勻，加入酵母溶液。
3, 搓成光滑麵團，發酵半小時至兩倍大。
4, 分成兩份，搓成長條形，發酵半小時至兩倍大。
5, 預熱焗爐 450F。
6, 焗爐低層放入容器，預備放上冰粒。
7, 將發酵好的麵團放入焗爐，低層容器放入冰粒，焗 15 分鐘。

努力搓包

呢排又勤力搓包啦！一嚟想家人食得健康，美國啲包真係超多防腐劑，聽講放成年都唔發毛。。。。人仔愛吃包，真係唔想佢食咁多“加料”包呀！二嚟自己都有啲手痕。二號出世之後又會有好一排唔得閑㗎啦，依家盡情做吓自己鐘意做㗎嘢啦！

最近成日用免揉餐包個食譜整包，都 OK 㗎!

芝士火腿包/香蔥包

腸仔包/粟米包

兔仔吉士打包/粟米包

仲有整過菜肉包。

其實中式包易整啲，整定啲放冰格，想食蒸熟佢就得啦！之前買過出面嗰啲，但味精好勁!都係自己整好過!

免揉餐包(附食譜連結)

先嗰排少咗整包，最多都係整免揉包。6299晌度嗰時整得仲少，因為佢哋唔係好鐘意我整嗰隻，佢哋鐘意街買平平地一大條嗰啲方包，成日都話嗰啲好好食，又可以整三文治。

不過嗰啲包好多防腐劑，見佢放成個星期都冇發毛，冇變硬就知。

人仔好鐘意食包，可以一日三餐都食包，我又有咗，所以都係唔好食咁多防腐劑啦！依家6299走咗，係時候自己整包啦！

呢個食譜先一排揾倒嘅，想試好耐㗎啦，襯今朝晌屋企，就試吓。

依家天氣熱，發酵好快呀!個包好食呀，外面少少脆，入要軟綿綿，係淡咗少少，可以研究吓包餡喎。人仔中午食完大碗粥，都即刻食返個新鮮出爐㗎包呀！

食譜連結：https://icook.tw/recipes/114714

無心機整的紅苺包 (附食譜)

某日見到呢個麵包食譜,有用 cream cheese, 剛好屋企有啲用剩,咁就整呢個包啦。點知呢個包好高水分,搓到我呢。。。 勉強搓到光滑,唔太痴手,我就算了。

整出嚟效果幾軟綿綿,放幾日都唔乾。

材料:
高筋麵粉 250g
酵母 3g
糖 20g
鹽 3g
牛奶 190g
Cream cheese 57g
紅莓適量

做法:
1, 將牛奶加入粉類,放置 30 分鐘至1小時。
2, 加入其他材料,搓至麵團光滑。
3, 發酵1至1.5 小時。
4, 分成8份,搓圓,發酵至一倍大。
5, 預熱焗爐 350F, 焗15-18分鐘。

手搓包～煉奶包

晌 FB 見有人整呢個煉奶包，好靚好好食咁，於是我又試吓整。今次用咗呢個食譜：

材料：
高筋麵粉200g
糖20g
鹽3g
即溶酵母粉3g
煉奶25g
牛奶130g
無鹽牛油20g

塗料 : 煉奶20g 無鹽牛油20g

未食時我以為會好甜，但原來都唔係太甜，有啲似甜餐包，唔揸嘢，就咁食都好好食。而且好鬆軟，唔怪得有人用同一個食譜整吐司都話好鬆軟好好食啦！

手搓包～吐司，粟米包，腸仔包，餐包

呢排繼續 keep 住整包，已經好耐冇出去買包了！

試整吐司，可能都係搓揉技術未夠好，發酵唔夠加模太大，所以整出嚟個樣一啲都唔似吐司。。。有機會要再試吓!

粟米包加腸仔包
今次整形整得開始似樣了!好開心呢！

餐包
用牛奶代替水，好香好軟呢！試咗幾個造型，仲嘗試整車形等人仔開心吓。可惜一啲都唔似，問人仔個包似咩，佢完全答唔出!哈哈！有咩方法整倒車形包呢？

手搓包～椰絲包

整咗幾次手搓包，開始掌握倒少少技術! 今次整椰絲包。揀包款整因為個餡易整，椰絲、牛油、糖拌勻就得，而且個樣靚得嚟又易整。

晌焗爐見倒佢哋脹卜卜個樣真係極之開心，仲即刻叫人仔嚟睇。佢都興奮咁大叫“包包呀！”

麵包材料：
高筋麵粉 240g
糖 40g
奶粉 10g
牛油 40g
酵母 1/2茶匙
水 80g
蛋 30g
鹽 少許

餡料：
椰絲 50g
牛油 12.5g
糖 36g
蛋 1/4隻

做法:
1，麵包材料除牛油外，全部搓勻。
2，搓成團及有少許彈性後用手將麵團甩打出去。直至麵團光滑，可撐出薄膜。
3，將麵團放入抺了油的盆中，蓋上保鮮紙，靜置15分鐘然後放入雪櫃作低温發酵至一倍大。
4，取出麵團於室溫回暖。
5，麵團排氣，分成八份，滾圓，靜置15分鐘。
6，搌平，加入餡料，作第二次發酵至麵團大一倍。
7，預熱焗爐350F.
8，麵團掃上蛋液，入爐焗16～18分鐘。

繼續免揉包

自從學識做免揉包之後，就 keep 住整包，所以呢排都冇晌街買包啦！

多數都係整基本麵包一大個，但每次都試吓加唔同配料。整咗幾次，我發覺跟足方法用 入得焗爐㗎 corning ware 焗效果好好！

呢個加咗 rosemary, 第一次用 corning ware 焗，效果好好!大愛 rosemary 包㗎香味！

試咗一個加咗少少 wheat flour 同乾香草，冇影到相。

有呢個加咗 sun dried tomato. 一向我都好鐘意食 sun dried tomato bread, 但我覺得自己整呢個麻麻地好食。隻 sun dried tomato 好似怪怪地咁。

呢個係用一半水，一半奶做嘅。上面界一直線，擠上牛油蒜蓉鹽，面再落少少香草，焗起好香呢！

免揉包～香蔥包，腸仔包

 今次用返上次個甜包食譜，發酵 48 小時，果然係好搓 D 不過麵團依然比較濕，加上自己技術有限，所以整得唔係咁靚。味道唔錯，不過冇出面食開嘅咁軟，大有進步空間呢!

材料：

水 225 g
Instant yeast 1/2 TS
高筋麵粉 450 g
糖 90g
鹽 1/2+1/4 ts
奶粉 30g
蛋 2隻
牛油溶液 90g

做法：
1，乾材料拌勻，加入濕材料拌勻。
2，用保鮮紙蓋好，在室溫發酵1-2小時。
3，放入雪櫃發酵36-84小時。(今次48小時)
4，從需雪櫃拿出來加料整形，用揸了油的保鮮紙蓋好，發酵1～2小時。
5，預熱焗爐 400F。
6，焗25-30分鐘。

免揉甜包(附食譜)

上癮啦!呢幾日係咁睇包包食譜同 articles, 比我揾倒幾個甜包食譜,於是揀咗個嚟試。我以為甜包唔可以發酵太耐,所以放咗入雪櫃幾個鐘就攞嚟焗。麵團比較濕,所以我只係隨意加少少紅莓乾,冇整形,一大舊咁焗。

之後睇倒有個 blog 話甜麵團可以放雪櫃發酵 36-84 小時,發酵完成, 麵團會冇咁濕,比較易操控。噢,下次要試吓至得!

材料：
水 225 g
Instant yeast 1/2 TS
高筋麵粉 450 g
糖 90g
鹽 1/2+1/4 ts
奶粉 30g
蛋 2隻
牛油溶液 90g

做法：
1，乾材料拌勻，加入濕材料拌勻。
2，用保鮮紙蓋好，在室溫發酵1-2小時。
3，放入雪櫃發酵36-84小時。(今次只放了數小時)
4，從需雪櫃拿出來拌入紅苺乾，約略整形，用揸了油的保鮮紙蓋好，發酵1-2小時。
5，預熱焗爐 350F。
6，焗25-35分鐘。

免揉麵包 (附食譜)

最近又有返整包癮,又開始睇麵包機。我知 P 仔好用,不過唔平,二手都好少見。其他機又唔知好唔好,希望揾倒個平平地㗎二手機試吓。未揾倒機之前,比我揾倒個免揉麵包㗎食譜,一試就成功咗,好滿足呀！睇嚟冇機都可以玩一排先。

材料:
高筋麵粉 300 g (今次用咗中筋)
酵母 1 1/2 茶匙
鹽 1 1/4 茶匙
暖水 300 mL

做法:
1, 將乾材料放入膠盆拌勻。
2, 慢慢加入暖水,拌勻。
3, 蓋好盆,在室溫發酵一小時。
4, 放入雪櫃繼續發酵,麵團會發大,表面有氣孔。
5, 第二日攞出麵團,放在有少許粉的工作枱上約略整成圓形或長形。
6, 焗盆舖上 parchmen paper , 洒少許粉, 放麵團在上。
7, 舖上揸了油的保鮮紙,發酵一小時。
8, 預熱焗爐 425 F。
9, 放一盆熱水在焗爐低層。
10, 在麵團上介兩,三下,放入焗爐焗 25-30 分鐘。

Cranberry scone with streusel topping (附食譜）

今日又試下整scone，用番上次個食譜不過轉用紅莓乾。今次先落一半奶，然後搓麵團。結果麵團冇咁濕，整形容易好多！
今次整埋個topping. 用咗大約1/8杯麵粉，1/8杯啡糖同1TS牛油。放上整好形，用奶掃咗面㗎麵團上面。整得唔係好靚添

材料：
2杯麵粉
1/3杯糖
2茶匙發粉
1/8茶匙鹽
6湯匙牛油(切粒)
1杯紅莓乾
1隻蛋
1茶匙雲利拿油
1/4杯奶 (原來食譜一半)
Topping: (將材料混合)
1/8杯麵粉
1/8杯啡糖
1TS牛油

造法：

1) 預熱400F焗爐.

2) 將麫粉,發粉,糖,鹽混合.

3)將冰凍的牛油與粉混合成麫包康狀.

4) 加入紅莓乾.

5) 加入蛋,雲利拿油,

6) 逐少加入牛奶,搓成麫團.

7) 在晒滿粉的枱面上, 將麫團碌成1"厚, 分成八份.

8) 掃上牛奶, 放上topping, 放入焗爐18分鐘.

Strawberry scone (附食譜）

今個星期又買倒靚士多啤梨喇!本來想整返上次個蛋糕，不過又想整喇新嘢，於是決定整scones.

都唔難整，當我就整好時，人仔開始扭計，所以快快手，冇掃蛋漿就放咗入焗爐，攪到個面好白添⋯⋯

今次個dough 整得濕咗D，下次整加牛奶時應逐少加，夠就停，唔好一次過加晒。

材料：
2杯麵粉
1/3杯糖
2茶匙發粉
1/8茶匙鹽
6湯匙牛油(切粒)
1杯士多啤梨(切粒)
1隻蛋
1茶匙雲利拿油
1/2杯奶

造法：

1) 預熱400F焗爐.

2) 將麫粉,發粉,糖,鹽混合.

3)將冰凍的牛油與粉混合成麫包康狀.

4) 加入士多啤梨.

5) 加入蛋,雲利拿油,牛奶,搓成麫團

.
6) 在晒滿粉的枱面上, 將麫團碌成1"厚, 分成八份.

7) 掃上蛋汁, 放入焗爐20分鐘. 

又嚟奶皇包

又係奶皇包呀！今次其實係第三次。中式飽唔洗搓咁耐，而且每次蒸返熱後都好軟熟，D材料又簡單，整多幾次都唔麻煩！其實最主要係老公鐘意食！哈哈。

呢兩次整都嘗試改變個餡架味道，因為第一次整覺得個餡唔夠味。第二次落少咗水同生粉。第三次再少D生粉同將份量減一半，因為次次都用剩一半。

奶皇餡（改良中版本）（12份）

材料

吉士粉 1湯匙   淡奶 1／2 小罐 砂糖 1/8抔   雞黃 1隻

粟粉 1湯匙    清水 1/2 杯

做法:

1. 將清水,糖、雞蛋拌勻,放入鍋內煮滾

2. 粟粉和吉士粉先用淡奶開溶,水滾時倒入,煮至成濃漿,冷後便成奶黃餡

料 

香蔥包+半雞尾包

個包都係用番之前整墨西哥包個食譜。一半整咗香蔥包，一半整咗D類似雞尾包架包。點解係"類似雞尾包"？因為冇椰絲，所以個餡只係有牛油，奶粉，麵粉同糖。個材料比例同食譜有D唔同。出嚟個效果都OK喎！而個香蔥包就可以再落多D蔥。

迷你蟹柳包

今日會見幾個FRIEND，想整D包派吓街坊，咁又比個藉口我整麵包喇。本來想試吓整湯種包，但係之前嗰日冇時間（其實係懶...）所以冇整到湯種。用番上次墨西哥包個包，上面改用蟹柳同紫菜。唔夠蟹柳，所以有幾個用咗芝士比自己食，依家要食多D鈣質嘛～ 今次搓包好似快咗，冇一個鍾，焗出嚟又ok喎！

未入爐前

新鮮出爐包包

蒸奶皇包（附食譜）

 今日終於整有餡架包喇！嚟個中式包先。見老公生日，整個佢鍾意架奶皇包喇！
原來中式飽個麵團好易搓，唔先搓到有薄膜，搓到光滑就得喇！唔先十分鐘攪掂！睇嚟我以後都會整中式蒸包多D！哈哈！個包老公都話好軟。過兩日蒸返嚟食都依然鬆軟，好嘢～
 

















蒸前架樣

 























蒸完脹卜卜

第一次整奶皇餡，睇咗幾個食譜，試咗其中一個。味道唔夠濃，等我改

良吓先。

奶皇包

材料: (12個)

麵粉 200g   生粉 30g   依士  1茶匙   砂糖  40g

水 90g  泡打粉 2/3茶匙  油 2茶匙

做法

1. 先將水加泡打粉加依士撈勻後放一分鐘
2. 麵粉和生粉篩勻,中間開穴加入糖、水、油，再倒入之前液體，搓至麵團滑溜
3. 發酵半小時後分割成12件細份
4. 準備奶皇餡
5. 所有細團開薄包入餡料
6. 再放 40 分鐘發酵，蒸前灑水在包面，蒸 10-15 分鐘

奶皇餡
材料
吉士粉 1湯匙   淡奶、砂糖 各1/2抔   雞蛋 1隻 
粟粉 60g   清水 1 1/2 杯

做法:

1. 將清水,糖、雞蛋拌勻,放入鍋內煮滾 
2. 粟粉和吉士粉先用淡奶開溶,水滾時倒入,煮至成濃漿,冷後便成奶黃餡料 

下次可以試吓菜肉包！

mini 蒜茸包

上星期六團契小組，見自己有時間，又冇人預備晚餐，所以就煮餐比大家食喇。十個人，最方便就係整意粉，焗雞腿。

搓飽癮又起，於是搵咗個蒜茸包食譜。其實去超級市場時見倒D現成蒜茸包都好平，有晒牛油蒜茸響面，焗熱佢就得，都係兩三蚊美金，不過都係想自己整吓。今次個麵團比較濕，搓咗大約一個鐘之後就唔黏手，有薄膜。其實搓緊嗰陣都有諗，搓到手都軟，點解唔買個現成就算呢？哈哈！

整咗12個，其實好想試一個睇吓得唔得，不過見佢12個剛剛一盤咁靚仔，所以就冇試。我仲要係之前一日整，希望一日後唔會變石頭！哈哈！
結果去到焗番熱，又幾好食喎，老公仲幫我宣傳，同人講話係我自己搓架！哈哈！


其實我仲整咗個朱古力MOUSSECAKE。試咗三個食譜，結果整咗出嚟似啫哩扮MOUSSE...  下次再試...